Mukanda ku Baroma
3 Ale, Bayuda babapitile bange mu nzila ki? Ao kutairiwa kuli na faida ki? 2 Babapitile mu bintu bingi. Ntanzi ya byonse, bene baapeelue milandu itakatifu yakue Leeza. 3 Ale kine bamo pakati kabo baandilue kulangilila kiketekelo? Eba, kekio kilangiliile nangue Leeza te wa kisinka? 4 Ata, te evio! Inzi, ata sie kine kila muntu waaluka wa bufi, Leeza wene wakaba wali sie wa kisinka, nga evelia vilandile Malembo nangue: “Wewe wakaba kusininkiziiwa kuya waolokele mu milandu yobe, kabili wakaba kuvinda luwakaba wapingulua.” 5 Kusyoloka kwetu kukilile kulangilila paswetele nangue Leeza olokele. Pa kako, eba Leeza ali waluvia lwali walangilila kipuki kyakue kikata? (Ndi mukulanda mu nzila elia ili yatontonkaniiziamo bantu bange.) 6 Ata. Leeza tali na kilubo. Kine ali nakio, ale wakapingula syani kyalo?
7 Kabili, kine bufi bwane buli mukulengia bukisinka bwakue Leeza bukile kumoneka ni kukila kumuletela wene bulumba, ale juu ya ki ndi mukupingulua kabili kuya nali wa lizambi? 8 Juu ya ki te kunti tulande nga vili vyabepa bantu bange nangue: “Ale tukite bintu bibipile evi bintu biweme bikabe kwiza”? Baalia bali balanda bebio bintu bakaba kupingulua kukonkana ni nsambu.
9 Eba, fwe Bayuda tuli mu aali iwamiisie kupita bange? Ata, te evio! Pantu twalangililanga kale nangue Bayuda pamo ni Bagiriki, bonse bali pensina lizambi. 10 Nga evelia vili vyalanda Malembo nangue: “Te kuli muntu olokele, bila ata umo. 11 Te kuli ata umo ali ni buvinde bwa kwinika, te kuli ata umo ali wamukeba Leeza. 12 Bantu bonse baakifumako kuli wene, kabili bonse baakyaluka ba bulebule. Te kuli ata umo ali walangilila buwame, bila ata umo.” 13 “Mikolomino yabo ili nga kiina kizukile kya mankabuli. Bali babombia ndimi yabo evi kulanda bufi.” “Belia bibali balanda bili nga sumu ya bizoka.” 14 “Kanua kabo kezuzimo milandu ya kulainia ni kipuki.” 15 “Makasa abo ali akundukila ku kwitila milopa.” 16 “Mu bintu byonse bibali bakita, bali baleta bwinooni ni bulanda, 17 kabili te bamanine nzila ya mutende.” 18 “Te bezi kumutiina Leeza.”*
19 Lonu, tumanine nangue bintu byonse belia bili byalandua mu Sheria, bili byalandua palua baalia bali pensina Sheria, evi kila kanua katalaziiwe ni kulangilila nangue kyalo kyonse kili ni kilubo ntanzi yakue Leeza, kabili kipalile kulapiziiwa. 20 Pa kako, te kuli muntu ata umo wakapundua kuya waolokele ntanzi yakue Leeza kupitila kukita bintu bilombelue na sheria. Kakiine, sheria yaakilengia tukile kumana bwino lizambi.
21 Inzi lonu, Leeza waakilangilila bila sheria kooloka kwakue, nga vyaalandile Sheria ni ba nabi* lwa ntanzi. 22 Kooloka kwakue Leeza, kwaakilangililua kupitila kiketekelo muli Yesu Kristu ku baalia bonse bali balangilila kekio kiketekelo. Pantu te kuli ntundu iwamiisie kuliko inge.* 23 Bantu bonse baakitile lizambi ni kupungukilua na bulumba bwakue Leeza. 24 Kabili, Leeza abamwene kuya baolokele juu ya kilubula-mulandu kelia kyaalipilue na Kristu Yesu evi kubapususia. Bobo i bupe bwaafumiizie Leeza juu ya buwame bwakue.* 25 Leeza waamufumiizie Yesu kuya wali zabiu ya kubwezia burafiki bwetu pamo ni Leeza* kupitila kiketekelo mu milopa yakue. Waakitile evio evi kulangilila kooloka kwakue mwine, pantu kupitila kupembelela kwakue waali waeleela mazambi alia aakitilue mu nsita ya kale. 26 Inzi, alangiliile kabili kooloka kwakue mwine mu kenu kipindi, kupitila kumupunda kuya waolokele olia amuketekeele Yesu.
27 Pa kako, eba tuli ni nsambu ya kwitanka? Bila ata kanini. Tupalile kwitanka juu ya kunakila Sheria? Bila, inzi kupitila sie sheria ya kiketekelo. 28 Tumanine nangue muntu ali wapundua kuya waolokele kupitila kiketekelo, apana kupitila kwikwinda kukita bintu bilombelue na sheria. 29 Ao eba, wene ni Leeza wa Bayuda sie? Eba, wene te i wenka Leeza wa ntundu yonse? Een, i wenka Leeza ni ku bantu ba ntundu yonse. 30 Pantu Leeza ni umo sie, wene wakabapunda kuya baolokele juu ya kiketekelo kyabo, baalia batairiiwe pamo ni baalia basitairiiwe. 31 Eba, manake twatyona sheria kupitila kiketekelo kyetu? Bila ata kanini! Kupusana ni kekio, fwefue tukwatiliile sheria.