Yaandikilue na Mateo
14 Mu ozo musita, Herode, kateeka wa kazonga* ka mu Galilaya, waaunvwile mpunda pa lwakue Yesu 2 ni kubalanda evi babombi bakue: “Ozu ni Yoane Mubatizi. Waakifufulua kufuma ku bafwile, kekio i kilengiizie aye wali ni maka a kukita bebi bintu bya kupapia.” 3 Herode* waamukwete Yoane, wamukaka ni kumubiika mu prizo juu yakue Herodia mukazi wakue kwa Filipo, kaka wakue kwa Herode. 4 Pantu Yoane waali wamulanda evi Herode: “Ozu mwanakazi, te uli na nsambu ya kumwalula mukazi obe.” 5 Ata sie kine Herode waatonene kumwipaya Yoane, waatiinine bantu, pantu bantu baali bamumwene Yoane kuya wali nabi.* 6 Inzi, lubaali bakita nsikunkulu ya busiku bwaavyaliiluepo Herode, mwana mwanakazi mwina Herodia waatimpile mazia, kabili waamusansamusiizie Herode 7 mpaka waafikiile walapa wamulaya nangue ali kumupeela kila kintu kyali kumulomba. 8 Pantu ozo mwana mwanakazi waasonseziiziwe na mama wakue, waamulandile evi Herode: “Mpeele pa ezi nsaani mutue wakue Yoane Mubatizi.” 9 Likolo waaunvwile bulanda, inzi pantu waakitile bilapo pa menso a baeni bakue, waalaiziizie balete mutue wakue Yoane. 10 Ku mwisio, waamutumine muntu umo aye amuputule Yoane mutue mu prizo. 11 Baaletele mutue wakue Yoane pa nsaani ni kumupeela olia mwana mwanakazi, ni wene waaile kumutwalila mama wakue. 12 Kisia papo, basambi bakue Yoane baaizile ni kutwama mubili wakue ni kuya kuziika, kisia baaile kumubwila Yesu. 13 Yesu lwaapatile ezio mpunda, waafumine papo lwa bwato ni kuya ku fwasi kusibanga kwali bantu evi aye wali bunke. Bantu bengi sana lubaamanine, baafumine mu mizi ni kumukonka lwa pansi.
14 Lwaafikile ku musenga, waamwene bantu bengi sana; waabonvwiliile nkumbu ni kubakosia balwele babo. 15 Luyaalukile kyungulo, basambi bakue baaizile kuli wene ni kumulanda evi: “Panu patuli, tuli kule ni muzi ni koba kaya kale, balande baye evi baye mu tumizi besitile byakulia.” 16 Inzi, waabalandile evi: “Baaba bantu te bapalile kuya, mwemue bapeele kintu fulani kya kunti balie.” 17 Basambi baamulandile evi: “Te tulipo na kantu, inzi tukwetepo sie mikate isano ni nsabi ibili.” 18 Yesu waabalandile evi: “Ndetele panu.” 19 Kabili, waabalandile babo bantu bengi sana bekale pa bikusi. Kisia waatweme elia mikate isano ni nsabi ibili, wakenta mu muulu, watasia. Kisia kumokola elia mikate, waabapeele basambi bakue ni basambi baakasaniizie ku babo bantu bengi sana. 20 Pa kako, bantu bonse baaliile ni kwikuta. Kabili, baatolele bipande bya mikate byaasyeleko ni kwizuzia bipanda likumi na bibili (12). 21 Baalia baaliile babanga bali balalume elufu isano (5 000) evi, bila kupendako banakazi ni baanike. 22 Kisia, bila kukokola, waabalandile basambi bakue bapiluke mu bwato ni kutangila ku bwala bunge bwa lyezi. Basambi lubaali baya, wene abanga wali mukubalaya babo bantu bengi sana.
23 Lwaapwile kubalaya babo bantu bengi sana, waaile ku lupili wene bunke evi aye apepe. Busiku lubwaailile, abanga waliko sie bunke. 24 Bwato bubanga bwasyali mu ma mia a ma metre* kufuma ku musenga. Basambi bakue babanga baandua kupamizia pantu bwato bubanga bwasunkeena na mabimbi, ni mwela ubanga wafuma ku baali baya. 25 Ku makia sana, pakifiitile sie,* Yesu waaile kolia kubanga kwali basambi bakue wali mukwenda pa lyezi. 26 Basambi lubaamumwene wali mukwenda pa lyezi, baavulungheene ni kulanda evi: “Kelia kili mukwiza palia ni kiki?”* Kabili, baasamwine baunvwile mwenzo. 27 Inzi, penka papo Yesu waabalandile evi: “Teekamane! Ni nene; tekunvue mwenzo.” 28 Petro waamulandile evi: “We Mulopue, kine ni wewe, ndande ngize kuli wewe nali mukwenda pa menda.” 29 Yesu waamulandile: “Iza!” Pa kako Petro waafumine mu bwato, waaendele pa menda wali mukuya kuli Yesu. 30 Inzi, lwaamwene mwela ukata, waaunvwile mwenzo. Kabili lwaabambile kutibila mu menda, waasamwine walanda evi: “We Mulopue mpususie.” 31 Penka papo, Yesu waaolwele kuboko kwakue ni kumukwata wamulanda evi: “We muntu wa kiketekelo kinini, juu ya ki uli ni masyaka?” 32 Kabili, lubaaingiile mu bwato, olia mwela ukata wateekameene. 33 Kisia, baalia baali mu bwato baamufwinamiine* balanda evi: “Kakiine wewe uli Mwana mwina Leeza.” 34 Ku mwisio, baabukile lyezi ni kufika ku Genesareti.
35 Bantu ba koko lubaamwinikile, baatumine mpunda mu mizi yaali pepi ni ezio fwasi; kabili bantu baamuleteele baalia bonse baali balwele. 36 Kabili, baamupapaatile bamulomba bakumieko sie ku lupipi lwa ku ngubo yakue ya panze, ni baalia bonse baakumizieko, baakosele kakiine.