Yaandikilue na Marko
1 Ntendeko ya mpunda iweme pa lwakue Yesu Kristu, Mwana mwina Leeza: 2 Nga evelia sie viyandikilue mu kitabu kyakue nabi* Isaya: “(Mona! Natuma kikula* wane ntanzi yobe* olia wakaba kuteania nzila yobe.) 3 Lizui lya muntu umo lili mukupunda evi mu kaseeba: ‘Teanie nzila yakue Yehova!* Olole misebo yakue.’” 4 Yoane Mubatizi abanga mu kaseeba wali mukusimikila palua lubatizio luli nga alama elia ili yatwalana ku kweleelua mazambi. 5 Bantu bonse ba mu kazonga ka Yudea ni bekazi bonse ba mu Yerusalemu baali baya kuli Yoane, kisia wene abanga wababatizia* mu Mumana wa Yordani, kabili baali bailumba paswetele mazambi abo. 6 Yoane waali wavwala ngubo yaali yatengeneziiziwe na masako a ngamia, ni mu kitungu waali wakakamo musipi* wa kipapa. Abanga walia bizenga ni kapelo ka mu kisonso. 7 Kabili, abanga wasimikila walanda evi: “Kuli muntu umo evi ali ni maka sana kumpita nene ali mukwiza kisia nene. Nsipalile ata kufwinama evi nkakule misipi ya ku ma sandala* akue. 8 Nene naakimibatizia na menda, inzi wene wakaba kumibatizia na mupasi utakatifu.”
9 Mu ezio nsiku, Yesu waaizile wafuma ku Nazareti ya ku Galilaya, kabili Yoane waamubatiziizie mu Yordani. 10 Bila kukokola, Yesu lwabanga wafuma mu menda, waamwene muulu wali mukwizuka. Kabili, waamwene mupasi wali nga kakunda wali mukukookela pali wene. 11 Kisia, baaunvwile Leeza walanda evi mu muulu: “Wewe uli Mwana wane, uuntonene; naakikwitabila.”
12 Bila kukokola, mupasi waamusonseziizie aye mu kaseeba. 13 Pa kako, waaikeele mu kaseeba nsiku makumi ana (40), ni koko Sataana abanga wamwezia. Kubanga kwali ni ba nama ba mu kisonso, inzi ba malaika baali bamwemena.
14 Kisia Yoane kukwatua, Yesu waaile ku Galilaya wali mukusimikila mpunda iweme yakue Leeza. 15 Abanga walanda evi: “Musita ubiikilue wakumana, ni Bukolo Bwakue Leeza bwapalama. Lapile, kabili aluke ni kiketekelo mu mpunda iweme.”
16 Yesu lwabanga wali mukwenda mu mbali Lyezi lya Galilaya, waamumwene Simoni ni Andrea mwalawakue kwa Simoni bali mukukoosia makila abo mu lyezi, pantu baali balobi. 17 Pa kako, Yesu waabalandile evi: “Nkonke, kabili nakaba kumyalula balobi ba bantu.” 18 Penka papo, baasiile makila abo ni kumukonka. 19 Kisia kuya pa ntanzi kakanini, waamumwene Yakobo pamo ni mwalawakue* Yoane, baana bena Zebedayo, lubabanga bali mu bwato bwabo bali mukutengenezia makila abo, 20 bila kukokola waabakuutile. Pa kako, baamusiile Zebedayo baba wabo mu bwato wali pamo ni babombi, kisia baamukonkele Yesu. 21 Kupwako, baaile ku Kapernaumu pamo ni Yesu.
Busiku bwa Sabata lubwaatendekele sie, waaingiile mu sinagogi ni kutendeka kusambilizia. 22 Kabili, bantu baapapiiziwe na nzila yakue ya kusambilizia, pantu abanga wabasambilizia nga evelia muntu apeelue buvinde na Leeza, taali wasambilizia nga evelia ba kalemba ba sheria. 23 Wenka ozo musita, mu sinagogi yabo mubanga mwali muntu umo olia abanga waingiilue na mupasi ufiitile, kabili waali wapunda evi: 24 “Waiza wakonkele ki konu we Yesu wa ku Nazareti? Eba, waiza kutwinoona? Kakiine nkumanine bwino, uli Mutakatifu wakue Leeza!” 25 Inzi, Yesu waausasiliile ozo mupasi, ni kuulanda evi: “Talala, kabili fuma mu ozu muntu!” 26 Kupwako, ozo mupasi ufiitile waamuponiizie ni kumuzukumbia ovio sana ozo muntu. Ozo muntu waasamwine na maka akue onse, kisia ozo mupasi waafumine muli wene. 27 Bantu bonse baapapile sana ni kutendeka kwipuziana bali mukulanda evi: “I kiki keki? Leli ni lisambilizio lya lenu! Ozu muntu ali ni buvinde bwa kukuumba mipasi ifiitile, ni yene ili mukumunakila.” 28 Pa kako, mpunda pa lwakue Yesu yaasalangheene lubilo mu kazonga konse ka Galilaya.
29 Kisia sie kufuma mu sinagogi, baaile ku nsesi ya ba Simoni ni Andrea. Yakobo ni Yoane baaile pamo nabo. 30 Mama muko wakue kwa Simoni waali waleele waunvwile oma, bila kukokola baamubwilile Yesu kulwala kwakue ozo mama. 31 Yesu lwaaile pali wene, waamukwete ku kuboko ni kumubuusia. Oma yaapwile, kisia waabambile kubateaniizia byakulia.
32 Luyaalukile kyungulo, kisia koba kuzimina, bantu baabambile kumuletela bantu bonse babanga balwele ni baalia babanga bali ni mipasi ibipile; 33 ni bantu bonse ba mu muzi ukata baakolongheene penka pa mulyango. 34 Pa kako, waakosiizie bantu bengi baalia babanga balwele malwele apusene-puseene, kabili waakuumbile mipasi ingi ibipile, inzi tabanga walekelela mipasi ibipile ilandepo, pantu ibanga yamanine nangue wene i Kristu.*
35 Lukele-keele paakili, lupabanga pakifiitile sie, waabuukile ni kufuma panze waya ku fwasi kusibanga kwali bantu, ni lwaaile koko, waabambile kupepa. 36 Inzi, Simoni pamo ni baalia babanga bali pamo nakue, baaile mukumukeba. 37 Lubaamupatile, baamulandile evi: “Kila muntu ali mukuya wakukeba.” 38 Inzi Yesu waabalandile evi: “Twende ku fwasi inge mu mizi ikata ili pepi ni panu evi ngiye nsimikile ni kolia, pantu i kinaaiziile.” 39 Kabili waaile wasimikila mu ma sinagogi abo a mu Galilaya yonse, ni kukuumba mipasi ibipile.
40 Ni koko, kwaaizile muntu umo wa bukoma, waamupapaatile wafukeeme, wamulanda evi: “Kine sie watona, nswesie.” 41 Yesu waamunvwiliile nkumbu, waaolwele kuboko kwakue ni kumukumia, walanda evi: “Natona! Sweta.” 42 Penka papo, bukoma bwakue ozo muntu bwaapwile, kabili waaswetele. 43 Kisia, Yesu waamusokele sana ni kumulanda aye, 44 wali mukumulanda evi: “Unvua, te kulanda ata kantu ku muntu ata umo. Inzi, endo waye wilangisie kuli koani, kabili ufumie bintu byaalombelue na Musa juu ya kuswesiiwa kobe evi ni bene basininkizie nangue wakosa.” 45 Inzi ozo muntu lwaaile, waabambile kulanda palua kekio kintu kikata kyaakitikile, kabili waavumiizie sana ezio mpunda, i kyaalengiizie Yesu aye waingila mu muzi bila waamwenue na bantu, inzi waaikeele sie panze pa muzi pasibanga pali bantu. Ata sie evio, bantu baali bafuma mu ma fwasi onse baiza kuli wene.