Yaandikilue na Marko
10 Yesu waafumine koko ni kuya ku mipaka ya Yudea, ku bwala bunge bwa Yordani, bantu bengi sana baakolongheene kabili kuli wene. Nga vyabanga wazoweye kukita, waabambile kabili kubasambilizia. 2 Kisia, Bafarisayo baamupaleeme bali ni mupango wa kumutea Yesu, kabili baamwipuziizie kine mwalalume apeelue nsambu ya kumukaana mukazi wakue. 3 Yesu waabaasukile evi: “Musa waamipeele malaizio alandile syani?” 4 Baamwasukile evi: “Musa waaitabiziizie kumwandikila mukazi mukanda wa kulangilila nangue wamukuumba ni kumukaana.” 5 Inzi, Yesu waabaasukile evi: “Musa waamyandikiile azo malaizio pantu mitima yenu yumine. 6 Ata sie evio, ntangia ku ntendeko ‘Leeza waababumbile bali ba mwalalume ni mwanakazi. 7 Kukila pa kako, mwalalume wakamusia baba wakue ni mama wakue, 8 ni babo babili bakaaluka mubili umo,’ kansi te bakili kabili babili, inzi mubili umo. 9 Pa kako, kelia kyaakwataniizie Leeza, muntu te kunti akilekenkanie.” 10 Lubabanga bali kabili mu nsesi, basambi baabambile kumwipuzia Yesu palua kako. 11 Yesu waabaasukile evi: “Kila mwalalume olia wamukaana mukazi wakue ni kuya kuupa mwanakazi unge, wakita bukende, kabili takili wa kisinka ku olia mukazi wakue. 12 Kabili, mwanakazi ni wene kine wamukaana mulume wakue, kisia waya kuupua na mwalalume unge, ozo mwanakazi ni wene wakita bukende.”
13 Bantu baabambile kumuletela Yesu baanike evi abakumie, inzi basambi baabasasiliile bavyazi. 14 Yesu lwaamwene evio, waauzikile ni kubalanda evi: “Balekele baanike beze kuli nene; kabili tekwezie kubakaania, pantu Bukolo Bwakue Leeza ni bwa bantu bali nga baaba baanike. 15 Kakiine, namyana nangue kila muntu olia waandua kupokelela Bukolo Bwakue Leeza nga vili vyapokelela mwanike, takengilamo ata kanini.” 16 Kisia, waabatweme baanike mu maboko akue ni kubamba kubapaala waabiikile minue yakue pali bene.
17 Yesu lwabanga wali mukuya, muntu umo waakundukile ni kufukama ntanzi yakue ni kumwipuzia evi: “We Mwalimu aweme, ni bintu ki bimpalile kukita evi mpate bukose bwa lonse?” 18 Yesu waamwasukile evi: “Juu ya ki wankuuta aweme? Te kuli muntu aweme, inga sie Leeza bunke. 19 Umanine aza malaizio: ‘Te kwipaya, te kukita bukende, te kwiba, te kusininkizia bya bufi, te kuya wapompolana, mukindike baba obe ni mama obe.’” 20 Ozo muntu waamulandile evi: “We Mwalimu, bebio bintu byonse ndi nabikita ntangia ku bulumendo bwane.” 21 Yesu waamukentele, waamutonene ni kumulanda evi, “Upusilue na kintu kimo: Endo waye usisie bintu byuli nabio ni kubapeela bapabi, kine wakita evio, wakaba kwaluka ni bukonto ku muulu; kisia wize waluke musambi wane.” 22 Inzi, ozo muntu lwaaunvwile kyasuko kyakue Yesu, waafipilue, kisia waafuminepo wali ni bulanda pantu abanga wakwete bintu bingi.
23 Kisia Yesu kukenta koku ni koku, waabalandile evi basambi bakue: “Kyakaba kyakolele sana ku baalia bali ni makuta engi kwingila mu Bukolo Bwakue Leeza!” 24 Inzi, basambi baapapiiziwe na milandu yakue. Kisia, Yesu waabalandile evi: “Mwe baanike, kikolele sana kwingila mu Bukolo Bwakue Leeza! 25 Kileengele sana kuli nghamia kupita mu lipulo lya nsindano kuliko muntu anonkele kwingila mu Bukolo Bwakue Leeza.” 26 Baakilile kupapa ni kumulanda* evi: “Ale nani wakavinda kupusuka?” 27 Yesu lwaabakentele sana mu menso abo, waabalandile evi: “Tekivindikana ku bantu, inzi te kili evio kuli Leeza, pantu bintu byonse bili byavindikana kuli Leeza.” 28 Petro waabambile kumulanda evi Yesu: “Mona! Twaakisia bintu byonse ni kukukonka.” 29 Yesu waalandile evi: “Kakiine namyana nangue, te kuli muntu waakisia nsesi ao ba kaka ao balabakue ao ba dada ao baba ao mama ao baana ao makaba juu ya liina lyane ni juu ya mpunda iweme, 30 olia asikaba kupata mara ikilile pa mia imo (100) mu onu musita: Masesi, ba kaka, balabakue, ba dada, ba mama, baana, makaba pamo ni mateso, ni mu kyalo kelia kyakeza,* bukose bwa lonse. 31 Inzi, bengi ba kwanza bakaaluka ba mwisio, ni ba mwisio bakaaluka ba kwanza.”
32 Yesu pamo ni basambi bakue lubabanga baya mu musebo bapiluka ku Yerusalemu, Yesu abanga watangiile, ni basambi baapapile; inzi bantu baalia babanga babakonkele baabambile kunvua mwenzo. Waabatweme kabili batumua likumi na babili (12), ni kuya nabo ku mbali, ni kubamba kubabwila bintu belia bibanga byasyali pepi kumupata: 33 “Mone! Tuli mukupiluka ku Yerusalemu, ni Mwana mwina muntu wakaba kubiikua mu minue ya bakulu ba ba makoani ni ba kalemba ba sheria. Kabili, bakaba kulanda nangue apalile kufua ni kubiikua mu minue ya bantu basili Bayuda,* 34 bakaba kumuseka, kumutiila mate, kumuvipula ni kumwipaya, inzi kisia nsiku itatu wakaba kufufuka.”
35 Yakobo ni Yoane, baana bena Zebedayo, baamupaleeme Yesu ni kumulanda evi: “Mwalimu, tutonene utukitile kila kintu kelia kituli kukulomba.” 36 Waabepuziizie evi: “Mutonene nene mikitile ki?” 37 Baamwasukile evi: “Twitabizie tukekale, umo ku kuboko kobe kwa kulio ni unge ku kuboko kobe kwa kuso, mu bulumba bobe.” 38 Inzi, Yesu waabalandile evi: “Te mumanine kelia kimuli mukulomba. Eba, kunti mwavinda kumina kikombe kelia kindi mukumina ao kubatiziiwa lubatizio lolia lundi mukubatiziiwa?” 39 Baamwasukile evi: “Een, kunti twavinda.” Pa kako, Yesu waabalandile evi: “Kikombe kindi mukumina, mwakamina, ni lubatizio lundi mukubatiziiwa, mwakabatiziiwa. 40 Ata sie evio, nene nsili na nsambu ya kumilanda mwikale ku kuboko kwane kwa kulio ao ku kuboko kwane kwa kuso, inzi ezio fwasi yakekalapo baalia bateaniiziwe.”
41 Baalia bange likumi lubaaunvwile ezio mpunda, baabafiitiilue ba Yakobo ni Yoane. 42 Inzi, Yesu waabakuutile ni kubalanda evi: “Mumanine nangue baalia bamwenekele nangue bali mukuteeka bantu basili Bayuda* bali babatitikila bantu babo, ni bantu ba mana ni bene bali babateeka lusaba babo bantu. 43 Keki te kipalile kukitika pakati kenu; inzi kila muntu olia watona kwaluka mukulu pakati kenu, apalile kuya wali mubombi wenu, 44 kabili kila muntu olia watona kuya wali wa kwanza pakati kenu, apalile kuya wali muzia wa bonse. 45 Pantu ata sie Mwana mwina muntu lwaaizile, taaizile juu ya kubombelua, inzi kubabombela bange ni kufumia bukose bwakue buye bwali* kilubula-mulandu kya kulubwilako bantu bengi.”
46 Kisia, baafikile ku Yeriko. Inzi, Yesu pamo ni basambi bakue ni bantu bengi sana lubabanga bafuma ku Yeriko, Bartimayo (mwana mwina Timayo), mpofu umo olia abanga walombelezia, waali waikeele mu mbali musebo. 47 Lwaaunvwile nangue Yesu Munazareti abanga wali mukupita papo, waabambile kusamuna, walanda evi: “We Yesu, Mwana mwina Daudi, ngunvwileko nkumbu!” 48 Bantu bengi baabambile kumusasilila bamulanda atalale, inzi wene waakilile kusamuna, walanda evi: “We Mwana mwina Daudi, ngunvwileko nkumbu!” 49 Kisia, Yesu waaimeene ni kulanda evi: “Mulande eze panu.” Pa kako, baamukuutile ozo mpofu ni kumulanda evi: “Te kutiina! Imana; Yesu wakukuuta.” 50 Waapozele ngubo yakue ya panze, waaimeene lubilo ni kuya kuli Yesu. 51 Kisia Yesu waamulandile evi: “Utonene nkukitile ki?” Ozo mpofu waamulandile evi: “Raboni,* ntonene mbambe kumona.” 52 Yesu waamulandile evi: “Endo waye. Kiketekelo kyobe kyakukosia.” Penka papo waabambile kumona, kabili waatendekele kumukonka Yesu mu musebo.