Yaandikilue na Mateo
3 Mu ezio nsiku, Yoane Mubatizi waaizile wasimikila mu kaseeba ka Yudea, 2 walanda evi: “Lapile, pantu Bukolo bwa ku muulu bwapalama.” 3 Kakiine, ozu i olia waazimbwilue na nabi* Isaya musita lwaalandile ezi milandu: “Lizui lya muntu umo lili mukupunda evi mu kaseeba: ‘Teanie nzila yakue Yehova! Olole misebo yakue.’” 4 Yoane waali wavwala ngubo yaali yatengeneziiziwe na masako a nghamia, ni mu kitungu waali wakakamo musipi* wa kipapa. Byakulia byakue bibanga byali bizenga ni kapelo ka mu kisonso. 5 Kisia, bantu ba mu Yerusalemu ni ba mu Yudea yonse ni ba mu byalo byonse bya mu mbali Yordani baali baya kuli Yoane. 6 Kabili, lubaali balapila mu kisinka mazambi abo, Yoane abanga wababatizia* mu Mumana wa Yordani.
7 Lwaamwene Bafarisayo ni Basadukayo bengi bali mukwiza kuli wene evi ababatizie, waabalandile evi: “Mwe kizazi kya kizoka mpili, nani ozo waakimisoka mubutuke kipuki kikata kili mukwiza? 8 Pa kako, kite bintu bilangiliile nangue mwalapila. 9 Tekuye mwaibepa mu mitima yenu mwalanda nangue ‘Abrahamu i baba wetu.’ Pantu namilanda nangue Leeza ali ni buvinde bwa kumufumiizia Abrahamu baana mu aza mabue. 10 Lizembe telisyabiikilue ku kisinte kya bimuti. Pa kako, kila kimuti kisizi kutwama matunda aweme, kyakaba kuteetua ni kupozua pa mulilo. 11 Nene pa lwane, ndi mukumibatizia na menda pantu muli mukulapila. Inzi, olia ali mukwiza ali ni maka sana kumpita nene, kabili nene nsipalile kumuvuula ma sandala.* Wene, wakaba kumibatizia na mupasi utakatifu ni mulilo. 12 Posyolo* yakue ya kuuluziiziako ili mu minue yakue. Kabili, wakaba kuswesia kakiine fwasi yakue ya kupuulilapo ni kukolonghania nghano mu butala. Inzi, bikupukupu* wakabizizia mu mulilo olia usivinda kuzimiiwa.”
13 Kisia, Yesu waafumine ku Galilaya ni kuya ku Yordani kolia kubanga kwali Yoane, evi Yoane amubatizie. 14 Inzi, Yoane waaeziizie kumukaanina wamulanda evi: “Nene i apalile kubatiziiwa na wewe. Ale waiza syani kuli nene?” 15 Yesu waamwasukile evi: “Lekela yaluke evi onu musita, pantu kili bwino bintu byonse byolokele tubikite evi.” Ku mwisio, Yoane walekela kumukaanina. 16 Kisia kubatiziiwa, bila kukokola Yesu waaibukile kufuma mu menda. Kabili mona! muulu waaizukile, waamwene mupasi wakue Leeza wali nga kakunda wakookela pali wene. 17 Mona! Kabili, lizui kufuma ku muulu lyaalandile evi: “Ozu ni Mwana wane, untonene, olia ungitabiile.”