Yaandikilue na Mateo

12 Ozo musita, Yesu waapitile mu makaba a nghano busiku bwa Sabata. Basambi bakue baaunvwile nzala ni kutendeka kuputula misokoti ya nghano ni kulia. 2 Bafarisayo lubaamwene evio, baamulandile evi: “Mona! Basambi bobe bali mukukita kelia kisipalile kukitua mu busiku bwa Sabata.” 3 Yesu waabepuziizie evi: “Eba, temunasomepo kelia kyaakitile Daudi musita wene ni balalume baali pamo nakue lubaaunvwile nzala? 4 Lwaaingiile mu nsesi yakue Leeza, baaliile mikate itakatifu. Kukonkana ni sheria, te baali na nsambu ya kulia ezio mikate, pantu ba makoani sie i baali ni nsambu ya kulia ezio mikate. 5 Eba, te mwaasomene mu sheria nangue mu busiku bwa Sabata, ba makoani bali babomba ku ekalu bali batyona Sabata ni kusyala bila bali na kilubo? 6 Inzi namyana nangue, muntu wa mana sana kupita ekalu, ali panu. 7 Inzi, kabenge mwaainikile mana ya ezi milandu ilandile nangue: ‘Ndi natona nkumbu, apana zabiu,’ nga te mwabapingulanga baalia basili na kilubo. 8 Pantu, Mwana mwina muntu i Mulopue wa Sabata.”

9 Kisia kufuma papo, waaile kwingila mu sinagogi yabo, 10 kabili mona! momo mubanga mwali mwalalume umo abanga waumine* kuboko. Pa kako, baamwipuziizie evi Yesu: “Eba, sheria itabiziizie kumukosia muntu busiku bwa Sabata?” Baamwipuziizie evio juu ya kunti bamusitake. 11 Waabalandile evi: “Kine uli ni mukooko umo, kisia ozo mukooko waponena mu kiina busiku bwa Sabata, eba, kuli ni muntu umo pakati kenu asivinda kumukula ni kumufumia mu kiina? 12 Muntu ni wamana sana kuliko mukooko! Kansi, te ikaaniiziwe kukita kintu kiweme busiku bwa Sabata.” 13 Kisia Yesu waamulandile evi olia mwalalume: “Olola kuboko kobe.” Waaolwele kuboko, ni koko kuboko kwaakosele ni kwaluka sie nga kolia kunge. 14 Inzi, Bafarisayo baafumine panze ni kuya kukwata mupango wa kumwipaya. 15 Yesu lwaamanine evio, waafuminepo. Kabili, bantu bengi baamukonkele, ni wene waabakosiizie bonse. 16 Inzi, waabakaniizie sana te kunti balande kine wene abanga wali ni, 17 juu ya kufikilizia belia byaalandilue kupitila nabi* Isaya; waalandile evi:

18 “Mone! Mubombi wane unaakisaakula, untonene, kabili olia ungitabiile.* Nakabiika mupasi wane pali wene, wakababwila bantu basili Baisraeli kine nsambu ni kiki. 19 Takakankabula na muntu ao sie kusamuna, kabili te kuli muntu wakonvua lizui lyakue mu misebo ikata. 20 Takavunga litete lityokele, kabili lutambi luli lwafunka* takaluzimia, mpaka lwali wakaleta nsambu. 21 Kakiine, bantu bakaswapila mu liina lyakue.”

22 Kisia, baamuleteele muntu umo waali ni mupasi ubipile. Ozo muntu abanga wali mpofu kabili kameme. Yesu waamukosiizie; ni ozo kameme waabambile kulanda ni kumona. 23 Bantu bonse baapapile ni kulanda evi: “Eba, pange ozu te i wenka Mwana mwina Daudi?” 24 Lubaaunvwile evio, Bafarisayo baalandile evi: “Ozu muntu ali mukukuumba mipasi ibipile ku maka akue Belzebuli,* kateeka wa mipasi ibipile.” 25 Pantu Yesu waainikile mawazo abo, waabalandile evi: “Kila bukolo bolia bwikasaniizie buli bwafikiila kwinooneka, ni kila muzi ao nsesi elia iikasaniizie teikaba kwimana. 26 Enka evio, kine Sataana wamukuumba Sataana, ali mukwipinga mwine; ale bukolo bwakue bwakaba kwimana syani? 27 Kukila pa kako, kine nakuumba mipasi ibipile ku maka akue Belzebuli, ale basambi benu bali mukukuumba mipasi ibipile ku maka akue ni? Kansi, basambi benu i bakamipingula nangue muli ba bufi. 28 Inzi, kine nangue ndi mukukuumba mipasi ibipile ku maka a mupasi wakue Leeza, manake kulanda kisinka, Bukolo Bwakue Leeza buli pali mwemue. 29 Kabili, muntu kunti wavinda syani kwingila mu nsesi ya muntu ali ni maka ni kutwama bintu byakue ntanzi tanamukake ozo muntu ali ni maka? Mpakanke amukake i kusyali ebe bintu bya mu nsesi yakue. 30 Kila muntu olia asili ku lubali lwane, ali wandwisia. Kabili, kila muntu olia asizi kunkwasia kukolonghania bantu, ali wabasalanghania.

31 Pa kako, nene namyana nangue bantu bakeleelua kila lizambi ni lituka. Inzi, olia onse watuka mupasi wakue Leeza, takeleelua. 32 Kwa mufuano, kila muntu olia wamutuka Mwana mwina muntu wakeleelua, inzi, kila muntu olia watuka mupasi utakatifu takeleelua, bila, ibe ni lonu* ao mu kyalo kya lenu kili mukwiza.

33 Mwemue kite kimuti kiwame ni matunda akue awame, ao, kite kimuti kibole ni matunda akue abole, pantu kimuti kili kyainikilua kupitila matunda ali atwamako. 34 Mwe kizazi* kya bizoka mpili, kunti mwalanda syani bintu biweme, inzi mwali bantu babipile? Pantu, kanua kali kalanda belia bizuzi ku mutima. 35 Muntu aweme, ali wabuula bintu biweme bya ku butala bwa ku mutima wakue uweme wabifumiizia panze, inzi muntu abipile, ali wabuula bintu bibipile bya ku butala bwa ku mutima wakue ubipile ni kubifumiizia panze. 36 Namyana nangue, pa Busiku bwa Bupinguzi, bantu bakafumia mpendua juu ya kila mulandu usipalile ubali balanda; 37 pantu kupitila milandu yenu, mwakalandua nangue muli ba nsambu, kabili kine milandu yenu ibipile, Leeza wakamipingula.”

38 Kisia, evi bamwasuke, ba kalemba ba sheria ni Bafarisayo baamulandile evi: “We Mwalimu, tutonene tumone alama imo kufuma kuli wewe.” 39 Yesu waabaasukile evi: “Kizazi* kya bantu babipile ni ba bukende* kyatwalilila kukeba alama, inzi tekikaba kupeelua ata alama, inga sie alama yakue nabi* Yona. 40 Pantu nga evelia Yona vyaakitile nsiku itatu busiku ni koba wali munda mwa kisabi kikata, Mwana mwina muntu ni wene, wakakita nsiku itatu mu mankabuli busiku ni koba. 41 Bantu ba mu Ninawi bakeemana mu bupinguzi pamo ni keki kizazi,* kabili bantu ba mu Ninawi bakalangilila nangue baaba bantu bali ni kilubo, pantu musita Yona lwaabasimikiile, bene baalapiile. Inzi mone! Muntu wa mana sana kumupita Yona ali panu. 42 Likolo mwanakazi* wa kusini* wakeemana mu bupinguzi pamo ni keki kizazi,* ni wene wakalangilila nangue baaba bantu bali ni kilubo. Pantu, waafumine koko kule waiza evi onvue mulangue wakue Sulemani. Inzi mone! Muntu wa mana sana kumupita Sulemani ali panu.

43 Musita mupasi ufiitile luuli wafuma mu muntu, uli wapita mu fwasi musili menda wakeba fwasi ya kunti utuziepo, inzi waandua kupata fwasi ata imo. 44 Kisia, ozo mupasi ubipile walanda evi: ‘Ele mbwelemo ku nsesi yane kolia kunaakifuma.’ Luwafika, wasanga nsesi teinaikaluemo, inzi mwapyangilue bwino kabili mwapentelue. 45 Kisia, waya ni kwiza watweme mipasi inge saba ikilile kubipa kuliko wene, kisia luyaingila mukati, yaikala momo. Ku mwisio, aali ya kupeleezia ya ozo muntu yakila kubipa kuliko elia ya kwanza. Evi, i vikyakaba kyali ni ku keki kizazi* kibipile.”

46 Lwabanga wakilanda sie na babo bantu bengi sana, mama wakue ni balabakue baali baimeene panze bakebele kulanziana nakue. 47 Kisia, muntu umo waamulandile evi: “Mona! mama obe ni balabobe bemeene panze, bakebele kukulanzia.” 48 Yesu waamwasukile evi ozo muntu waamulanziizie: “Mama wane nani, kabili balabane ni bani?” 49 Kisia, waaolwele kuboko kwakue wabasinika basambi bakue wabalanda evi: “Mona ba mama wane, ba kaka wane ni balabane. 50 Pantu kila muntu olia ali wakita kutona kwakue Baba wane olia ali ku muulu, ozo i kaka wane, mwalawane, dada wane ni mama wane.”