Kitabu kya Nfyulo Kili Kyalanda ki Palua Musita obe Uli Mukuiza?

1. Ni bupinguzi ki bukata bupalile kukwata bantu bonse?

LOONU bantu bapalile kukwata bupinguzi bukata. Eba, bakaba kusaakula kumwitabila Yehova kuya wali Kateeka wansaambu wa myulu ni kyalo, ao eba, bakaba kusiala bali ku lubali lwakue muluani Sataana Kibanda? Te kuli muntu wa kulanda nangue tali na kwali. Bupinguzi bonse bubali kukwata bwakaba kulangilila kine bakaba kupata bukose bwa loonse ao abe. (Mat. 25:31-33, 46) Mu “lyemo likata” bakaba kubiikua kalangi ka kupusuka ao ka kwinoonua.​—Nfy. 7:14; 14:9-11; Ezek. 9:4, 6.

2. (a) Kitabu kya Baebrania 10:35-39 kyatusonsezia kukita ki? (b) Kitabu kya Nfyulo kunti kyatukwasia siani?

² Soma Baebrania 10:35-39. Kine usaakuile kukwasia buteeko bwakue Yehova, ukwete bupinguzi bwa mulangue. Loonu utonene kubakwasia bange bakwate bupinguzi buweeme. Kunti wabombia mpunda ili mu kitabu kya Nfyulo eevi kubakwasia. Keekio kitabu kya kupapia kili kyalangilila keelia kyakaba kubapata bantu bali bakaana kumukoonka Leeza, inzi kabili kili kyalangilila mpaalo yakaba kupata baalia bali bakwasia mu kisinka buteeko bwakue. Tupalile kusambilila bisinka bebio bya mana. Kukita evio, kwakaba kutukwasia tukile kupingula kutwalilila kumubombela Yehova. Kukila pakaako, kunti twabombia bintu bitwakisambilila eevi kubakwasia bange bakwate bupinguzi buli buino, kabili batwalilile kumubombela Yehova.

3. Tuli kulondoluela ki mu leeli lyasi?

³ Mu leeli lyasi, tuli kupata byasuko bya beebi biipuzio: Ni kiki kipembeele baalia bali bakwasia buteeko bwakue Leeza? Ni kiki kyakaba kubapata baalia bali bakwasia kinama kya mu kisonso kya rangi yakasi kizimbuilue mu kitabu kya Nfyulo?

NI KIKI KIPEMBEELE BANTU BAKUE YEHOVA BA KISINKA?

4. Mutumua Yoane wamona kikundi ki kili pamo ni Yesu ku muulu?

⁴ Mu kimonua, mutumua Yoane wamona bikundi bibili bili mukukwasia buteeko bwakue Yehova, kabili byapata mpaalo ya bukose bwa loonse. Mu kikundi kya kuanza muli baalia ba mia ni makumi ana na bana elufu (144 000). (Nfy. 7:4) Bafumiiwa ku kyalo eevi baye baunde buteeko, ao Bukolo pamo ni Yesu ku muulu. Yoane wabamona bali mukuteeka kyalo pamo ni Yesu. (Nfy. 5:9, 10; 14:3, 4) Mu kimonua, Yoane wabamona baimeene pamo ni Yesu ku Lupili lwa Sayuni lwa ku muulu.​—Nfy. 14:1.

5. Ni kiki kyakaba kukitikasie leenu ku baalia babiikilue mafuta basiele bakosele pa kyalo?

⁵ Kutendekela mu nsita ya batumua mpaka loonu, ma elufu a bantu akisaakulua eevi aaluke seemu ya baalia ba mia ni makumi ana na bana elufu (144 000). (Luk. 12:32; Bar. 8:17) Anzia evio, Yoane walandua nangue, baaliasie basielepo ao mpendua iniini ya bantu, i bakaba basiele bakosele pa kyalo mu nsiku ya mpeleezio. Ntaanzi ya kutendeka kwa lyemo likata, baalia “basielepo” bakaba kubiikua “kalangi” ka kupeleezia kalangiliile nangue betabiilue na Yehova. (Nfy. 7:2, 3; 12:17) Kisia, musita kampanda mu lyemo likata, baalia basielepo bakatwamua ni kuya ku muulu eevi kuya kwiunga pamo ni seemu ya baalia ba mia ni makumi ana na bana elufu (144 000) baafuile kale bali ba kisinka. Kooko i kubakaba bateeka pamo ni Yesu mu Bukolo Bwakue Leeza.​—Mat. 24:31; Nfy. 5:9, 10.

6-7. (a) Yoane wamona kabili kikundi ki kinge, kabili twasambilila ki kupitila kikundi keekio? (b) Juu ya ki baalia basielepo pamo ni “bantu bengi saana,” bonse bapalile kupooza maano ku kitabu kya Nfyulo katue ka 7?

⁶ Kisia kumona kikundi kya kuya ku muulu, Yoane wamona “bantu bengi saana.” Kupusana ni baalia ba mia ni makumi ana na bana elufu (144 000), bantu bali mu keekio kikundi beene tebaviinda kupendeka. (Nfy. 7:9, 10) Twasambilila ki palua babo bantu? Yoane walandua eevi: “Baaba i baalia baapitile mu lyemo likata, kabili baaba i baafulile nkanzu yabo mu mulopa wakue Muana Mukooko nga evio vyenka vyumwene yaswetele.” (Nfy. 7:14) Kisia kupusuka pa lyemo likata, “baaba bantu bengi saana” bakeekala paanu pa kyalo ni kusekelela mpaalo iweeme saana.​—Malum. 37:9-11, 27-29; Tus Maf. 2:21, 22; Nfy. 7:16, 17.

⁷ Ibe tusaakwilue kuya ku muulu ao tuli bakusiala pa kyalo, eba, ni fwefue twaisaanga twali mu bulondolozi buli mu kitabu kya Nfyulo katue ka 7? Tupalile kwisaanga mu bobo bulondolozi. Kakiine ozo musita wakaba kuya waweeme saana ku bikundi bebio byonse bibili bya babombi bakue Leeza! Twakaba kuya twali ni nsaansa saana paantu twaakisaakula kukwasia buteeko bwakue Yehova. Kitabu kya Nfyulo kili kyatubuila kintu ki kinge palua lyemo likata?​—Mat. 24:21.

NI KIKI KYAKABA KUBAPATA BAALIA BALI BAMUPINGA LEEZA?

8. Lyemo likata lyakaba kutendeka siani, kabili bantu bengi bakaba kukita siani?

⁸ Mu lyasi lyakipita, twaakisambilila nangue bakulu ba politike ba keenu kyalo, leenusie bakaba kupilibukila Babiloni Mukulu i kulanda ma diini onse a bufi. (Nfy. 17:16, 17) Ezio i yakaba kuya yali ntendeko ya lyemo likata. Eba, keekio kyakaba kulengia bantu bengi bakabe kutendeka kumubombela Yehova? Ata. Inzi, kitabu kya Nfyulo katue ka 6 kilangiliile nangue pa ozo musita waviizie, bantu basiizi kumubombela Yehova, bakakeba kusuungua na byama bya mu keenu kyalo bya politike ni bya busulu bipalaniiziwe na mpili. Paantu babo bantu te bakasaakula kukwasia Bukolo bwakue Leeza, Yehova wakabamona kuya bali baluani.​—Luk. 11:23; Nfy. 6:15-17.

9. Babombi bakue Yehova ba kisinka bakaba kusiala siani baibeleele, kabili keekio kyakaba kulengia kukabe kwaluka ki?

⁹ Kulanda kisinka, babombi bakue Yehova ba kisinka bakaba kusiala baibeleele mu ozo musita wakaba kuya waaviizie saana pa lyemo likata. Bakaba kusiala bali kikundi kimosie kya bantu bali bamubombela Yehova Leeza paanu pa kyalo, kabili bakaba kukaana kukwasia “kinama kya mu kisonso.” (Nfy. 13:14-17, NWT) Paantu babombi bakue Yehova bakaba kusiala bali ba kisinka ntaanzi yakue, baalia bali bamupinga weene, bakaba kufipua saana. Keekio kyakaba kulengia bunvuano bwa ntundu bukabe kusaukila bantu bakue Leeza mu kyalo. Bibilia ili yakuuta kusaukilua kooko nangue kusaukilua na Gogu wa Magogu.​—Ezek. 38:14-16.

10. Nga vilandile kitabu kya Nfyulo 19:19-21, Yehova wakakita siani musita bantu bakue lubakasaukilua?

¹⁰ Yehova wakakita siani musita bantu bakue lubakasaukilua mu nzila ibipile? Yehova watubuila eevi: “Kipuki kyane kikata kyakaleema.” (Ezek. 38:18, 21-23) Kitabu kya Nfyulo katue ka 19 kyatubuila bintu byakitika kisia paapo. Yehova wamutuma Muana Wakue eevi kusuunga bantu Bakue ni kubakanda baluani babo. Mu leelio lizibo, Yesu wakakwasiiwa na “mabumba a balukale ba mwiulu,” i kulanda bamalaika ba kisinka pamo ni baalia ba mia ni makumi ana na bana elufu (144 000). (Nfy. 17:14; 19:11-15) Leelio lizibo lyakapua siani? Bantu bonse bali bamupinga Yehova pamo ni bikundi bya bantu bili byakita evio, bakenoonua loonse!​—Soma Nfyulo 19:19-21.

KISIA BULUI, KWAKAKITIKA BUINGA

11. Ni kintu ki kya mana saana kilondolwelue mu kitabu kya Nfyulo?

¹¹ Ezia kutontonkania bantu ba kisinka pa kyalo vibakonvua musita ubakapusuka kwinoonua kwa baluani bonse bakue Leeza! Kakiine ozo wakaba wali musita wa kusaansamusia saana! Anzia kine kwakaba kwali tupundu twingi twa nsaansa ku muulu musita Babiloni Mukulu lwali wakenoonua, kuli kintu kinge kabili kyakakila kuleeta nsaansa. (Nfy. 19:1-3) Keekio ni kintu kya mana saana kilondolwelue mu kitabu kya Nfyulo, i kulanda “buinga bwakue Muana Mukooko.”​—Nfy. 19:6-9.

12. Nga vilandile Nfyulo 21:1, 2, buinga bwakue Muana Mukooko bwakakitika musita ki?

¹² Buinga bwakakitika musita ki? Baalia ba mia ni makumi ana na bana elufu (144 000), bonse bakaba basyali ku muulu musita uniini ntaanzi ya kutendeka bului bwa Armagedoni. Anzia evio, ozo teukaba wali musita wa buinga bwakue Muana Mukooko. (Soma Nfyulo 21:1, 2.) Buinga bwakue Muana Mukooko bwakakitika kisia bului bwa Armagedoni, baluani bakue Leeza basyainoonenue.​—Malum. 45:3, 4, 13-17.

13. Buinga bwakue Muana Mukooko bwakaba bwali na mana ki ku baalia bakaba bali mu bobo buinga?

¹³ Ale, buinga bwakue Muana Mukooko bwakaba bwali na mana ki ku baalia bakaba bali mu bobo buinga? Kakiine nga eveliasie buinga vibuli bwakwatania mwalalume ni mwanakazi, evio vyenka ni bobu buinga bwa mufuano, bwakakwatania Likolo, Yesu Kristu pamo ni “nabuinga” wakue, i kulanda, baalia ba mia ni makumi ana na bana elufu (144 000). Keekio kintu kya mana saana, kyakatendekezia buteeko bwa leenu bwakateeka kyalo mu miaka elufu (1 000).​—Nfy. 20:6.

MUZI WA BULUMBA NI MUSITA OBE ULI MUKUIZA

14-15. Mu kitabu kya Nfyulo katue ka 21, baalia ba mia ni makumi ana na bana elufu (144 000), bapalaniiziwe na ki? (Mona foto ili ku ntendeko ya kazeeti.)

¹⁴ Kisia paapo, kitabu kya Nfyulo katue ka 21 kyapalania baalia ba mia ni makumi ana na bana elufu (144 000), na muzi uweeme saana uli wakuutua nangue ‘Yerusalemu ya Leenu.’ (Nfy. 21:2, 9) Ozu muzi uli ni mabue 12 a musinzi aleembeluepo “meena a batumua 12 bakue Muana Mukooko.” Juu ya ki keekio kyalengia Yoane apoozeko maano? Paantu waamwene liina lyakue lyaleembelue pa libue limo lya pa azo mabue. Kakiine leelio lyaali lisyuko likata!​—Nfy. 21:10-14; Baef. 2:20.

¹⁵ Ozo muzi wa mufuano, teupaleene na muzi unge onse. Ozo muzi, uli ni musebo ukata wa oro iswesiiziwe buino, miliango 12 ikitilue na mabue a mutengo ukata, bibumba ni misinzi bikitilue na mabue a mutengo, kabili ni bipiimo byakue byalingeene mu nzila ipuililikile. (Nfy. 21:15-21) Inzi, Yoane waamwene nangue kuli ni kintu kipusile! Yoane walanda eevi: “Nsyaamwenemo ekalu, paantu Yehova Leeza Wamaka Onse pamo ni Muana Mukooko i ekalu yakue. Kabili ozo muzi te uloombele kusanikilua na koba aosie muezi, paantu bulumba bwakue Leeza bwaali bwasanikiile muzi ozo, kabili Muana Mukooko i waali litala lyakue.” (Nfy. 21:22, 23, NWT) Baalia baundile Yerusalemu ya Leenu, bakaba bali pamo ni Yehova. (Baeb. 7:27; Nfy. 22:3, 4) Kansi, Yehova ni Yesu i ekalu mu ozo muzi.

16. Ni biki byakakitika ku bantu mu Buteeko bwa Miaka Elufu bwa Bukolo Bwakue Leeza?

¹⁶ Baalia babiikilue mafuta bali basinsimuka saana lubali batontonkania palua ozo muzi. Inzi, baalia bali ni kiswapilo kya kwikala pa kyalo, ni beene bali ni nsaambu ya kupooza maano ku ozo muzi. Mu Buteeko bwa Miaka Elufu bwa Bukolo Bwakue Leeza, Yerusalemu ya Leenu yakaleeta mpaalo ingi saana. Yoane wamona mpaalo ezio yapongoka nga ‘mwenzi wa menda ali apeelana bukose.’ Kabili mu mbali yonse ibili ya ozo mwenzi muli ‘bimuti bili byapeelana bukose’ bili byafumia maani, eevi aye ‘ali miti ya kukosia ntundu.’ (Nfy. 22:1, 2) Bantu bonse bakaba bakosele mu ozo musita, bakasekelela bebio bintu biweeme. Bantu bonse bali bamunakila Yehova, bakaba baya bapuililika bukebuke. Tekukaba kuluala ata kaniini, aosie kukisua aosie mensozi a bulanda.​—Nfy. 21:3-5.

17. Nga vilangiliile lileembo lya Nfyulo 20:11-13, ni baani bakanoonkela mu Buteeko bwa Miaka Elufu?

¹⁷ Ni baani bakanoonkela mu bebio bintu biweeme saana? Ba kuanza, ni libumba likata lya bantu bakaba kupusuka pa Armagedoni, pamo ni baana bonse bakavyalua mu kyalo kya leenu. Inzi, kitabu kya Nfyulo katue ka 20, kilaile kabili nangue bafuile bakatuntumunua. (Soma Nfyulo 20:11-13.) Baalia bantu ‘balungheeme’ baafuile mu nsita yaapitile, ni “basilungheeme” baasyapatile fuasi ya kusambilila palwakue Yehova, bonse bakatuntumunua pa kyalo. (Miil Bat. 24:15; Yoan. 5:28, 29) Eba, keekio kilangiliile nangue bantu bonse bakatuntumunua paanu pa kyalo mu bolia Buteeko bwa Miaka Elufu? Ata. Baalia baakeene mu nzila ibiipile kumubombela Yehova ntaanzi ya kufua, te bakatuntumunua. Baapatile fuasi ya kusambilila palwakue Yehova, inzi baalangiliile nangue te bapalile kwikala mu Paradiso paanu pa kyalo.​—Mat. 25:46; 2 Bat. 1:9; Nfy. 17:8; 20:15.

BUEZIO BWA KUPELEEZIA

18. Ku mpela ya miaka elufu aali yakaba siani pa kyalo?

¹⁸ Ku mpela ya miaka elufu (1 000), baalia bonse bakaba baikeele pa kyalo bakaba basyapuililikile. Te kuli kabili muntu wakambukilua na lizaambi lyaafumine kuli Adamu. (Bar. 5:12) Ntiipo ya lizaambi lyakue Adamu yakaba yasyafumiziwepo yonse. Kansi, keekio kilangiliile nangue baalia bakaba bali pa kyalo, ‘bakaaluka bakose’ paantu bakaaluka bantu bapuililikile ku mpela ya miaka elufu (1 000).​—Nfy. 20:5, NWT.

19. Juu ya ki kiloombele kuye kwali ni buezio bwa kupeleezia?

¹⁹ Tumanine nangue Yesu waasiele waimeene sinta musita Sataana lwaaeziizie kumulengia atione bukisinka bwakue. Waasiele wali wa kisinka musita lwaaeziiziwe. Inzi eba, bantu bonse bapuililikile bakakita nga Yesu musita Sataana lwali wakapeelua fuasi ya kwezia bantu babo? Kila muntu wakaasuka keekio kiipuzio palwakue muine, musita Sataana lwali wakakakulua kufuma mu abiso ku mpela ya miaka elufu (1 000). (Nfy. 20:7) Baalia bakasiala bali ba kisinka pa bobo buezio bwa kupeleezia, bakapata bukose bwa loonse ni kufikiila kusekelela buntungua bwa kisinka. (Bar. 8:21) Baalia bakasaanguka ao kwaluka ba ntombosi, bakenoonua loonse pamo ni Kibanda ni bibanda byakue.​—Nfy. 20:8-10.

20. Weewe, waiunvua siani palua bukabika buli bwasonsezia buli mu kitabu kya Nfyulo?

²⁰ Weewe, waiunvua siani kisia kulondoluela kabili mu kifupi bintu bili mu kitabu kya Nfyulo? Eba, te ukinkiziiziwe kwisaanga wali mu bobo bukabika bwa kupapia? Eba, keekio te kikusonseziizie kubakupako bange beyunge ku lupupo luswetele lwakue Leeza weetu? (Nfy. 22:17) Loonu paantu twalondoluela bintu byakakitika mu musita uli mukuiza, twakinkiziiwa, kabili twatona kulanda nga evelia vyaalandile mutumua Yoane nangue: “Amen. We Mulopue Yesu, iza!”​—Nfy. 22:20.