Mukwasie Musambi obe wa Bibilia evi Apingule Kumubombela Yehova

1-2. (a) Juu ya ki basambi bamo ba Bibilia bali basiita kupingula kutendeka kumubombela Yehova? (b) Tuli kusambilila ki mu leli lyasi?

EBA, kuli ni bintu bibanga byakwanzia kupingula kwaluka Kasininkizia Wakue Yehova? Pange ubanga watiina nangue banafunzi nobe, ba rafiki bobe, ao bantu ba mu lupua lobe bakaba kukupinga. Ao pange ubanga wawaza nangue teukaba kuvinda ata kanini kukonka mafunde akue Leeza. Kine wewe waapitile mu ezio aali, kekio kunti kyakukwasia umane vya kubakwasia basambi ba Bibilia baalia bali batiina kutendeka kumubombela Yehova.

² Yesu abanga wamanine nangue mwenzo wa evio kunti wamwanzia muntu kupingula kutendeka kumubombela Yehova. (Mat. 13:​20-22) Inzi, taalekeele kubakwasia baalia babanga basiita kumukonka wene. Nga vituli kusambilila mu leli lyasi, kuliko kukita evio, wene waabalangiliile basambi bakue vya kubakwasia babo bantu evi (1) benike kibanga kyalengia bandue kupingula kutendeka kumubombela Yehova, (2) bamane vya kukita evi bamutonesie Yehova, (3) bamane vya kumubiika Yehova pa ntanzi mu bwikazi bwabo, ni (4) vya kukita kine bange babapinga. Eba, pa kubasambilizia bange, kunti twamupala syani Yesu musita utuli twabombia kitabu Sekelela Buikazi Loonse! evi kumukwasia musambi wetu apingule kutendeka kumubombela Yehova?

MUKWASIE MUSAMBI OBE ENIKE KILI MUKULENGIA ANDUE KUMUBOMBELA YEHOVA

3. Pange ni kiki kyaalengiizie Nikodemo te kunti apingule kwaluka musambi wakue Yesu?

³ Nikodemo abanga wali kateeka mukulu wa Bayuda. Inzi, kubanga kwali kintu kibanga kyalengia te kunti apingule kwaluka musambi wakue Yesu. Myezi sie sita evi kisia Yesu kutendeka miilo ya kusimikila panu pa kyalo, Nikodemo waainikile nangue wene [Yesu] waatuminue na Leeza. (Yoan. 3:​1, 2) Inzi, Nikodemo waapingwile kuya kumumona Yesu mu kafiso pantu ‘abanga watiina Bayuda.’ (Yoan. 7:13; 12:42) Pange abanga wawaza nangue kine waaluka musambi wakue Yesu, wakaba kuzezia cheo yakue pamo ni bintu binge bya mana.a

4. Yesu waamukwasiizie syani Nikodemo evi enike belia bibanga byatonene Yehova wene akite?

⁴ Nikodemo abanga wamanine Sheria Yakue Musa, inzi abanga wali ni lazima ya kumana bintu belia bibanga byatonene Yehova wene akite. Yesu waamukwasiizie syani? Yesu waapingwile kuya wapisia musita pamo nakue, ata sie nsita ya busiku. Kabili, Yesu waamulandile Nikodemo bila kufiika bintu byabanga wapalile kukita evi aaluke musambi, i kulanda, alapile mazambi akue, abatiziiwe mu menda, ni kumuketekela Mwana mwina Leeza.—Yoan. 3:​5, 14-21.

5. Wewe kunti wamukwasia syani musambi wa Bibilia evi enike kelia kili mukulengia te kunti apingule kutendeka kumubombela Yehova?

⁵ Ata sie kine musambi wa Bibilia amanine bwino Malembo, kunti kyalomba akwasiiwe evi enike kelia kili mukulengia te kunti apingule kutendeka kumubombela Yehova. Kwa mufuano, pange ali wapuuluziiwa na miilo yali wabomba ao pange bantu ba mu lupua lwakue bali bamupinga. Pa kako, nga evelia Yesu vyabanga wakita, uye wapisia musita pamo nakue evi kumukwasia. Kwa mufuano, kunti wamukupa evi mulie nakue pamo kyakulia, ao kunti waienzia nakue. Kukita evio kunti kwalengia wene akubwile maavia akue onse. Mukoselezie musambi obe akite bupilibuko bwa mana, apana juu ya kukusansamusia wewe, inzi juu ya kulangilila nangue amutonene Yehova.

6. Wewe kunti wakita ki evi kumukwasia musambi obe aaluke ni mibele ya kusipa evi apingule kutendeka kumubombela Yehova? (1 Bakorinto 16:13)

⁶ Kine musambi wa Bibilia asininkiziizie nangue Yehova wakaba kumukwasia kwikala kukonkana ni mafunde ali mu Bibilia, wene wakaba kusipa ni kutendeka kubombia belia byali wasambilila. (Soma 1 Bakorinto 16:13.) Miilo yobe kunti yapalaniiwa na miilo ili yabomba mwalimu wa ku masomo. Kwa mufuano, wewe luubanga wakili mwanafunzi, eba, ubanga watonesia mwalimu wa syani? Pange ubanga watonesia mwalimu olia abanga wakukwasia evi winike nangue te uli wa bulebule, i kulanda, winike nangue uli ni buvinde bwa kukita bintu paleepale. Enka evio, mwalimu wa Bibilia, olia ali ni bufundi, tapalile kumusambilizia sie musambi wakue bintu belia bitonene Leeza wene akite, inzi kabili apalile kumusininkiziizia nangue ali ni buvinde bwa kukita evio pantu Yehova ali mukumukwasia. Wewe kunti wakita ki evi waaluke mwalimu wa evio?

MUKWASIE MUSAMBI OBE AMANE VYA KUKITA EVI AMUTONESIE YEHOVA

7. Yesu waabakwasiizie syani baalia babanga bamutwilizia evi bamutonesie Yehova?

⁷ Yesu abanga wamanine nangue kumutona Leeza i kwakaba kubakwasia basambi bakue babombie belia bibaasambiliile. Lingi, abanga wasambilizia bintu bya kulengia basambi bakue bamutonesie Baba wabo wa ku muulu. Kwa mufuano, waamupalaniizie Yehova na baba olia ali wabapeela baana bakue bintu biweme. (Mat. 7:​9-11) Pange, bamo pakati ka baalia babanga bamutwilizia Yesu te babanga bakwete baba wa ntono. Waza vibaaiunvwile Yesu lwaababwilile mufuano wa baba umo ali ni ntono, olia waamupokeleele kabili mwana wakue, olia waakitile bintu bingi bibipile musita lwaafumine ku nsesi. Yesu waabakwasiizie bantu benike nangue Yehova abatonene sana, kabili nangue atonene kubakwasia.—Luk. 15:​20-24.

8. Wewe kunti wamukwasia syani musambi obe wa Bibilia evi amutonesie Yehova?

⁸ Ni wewe kunti wavinda kumukwasia musambi obe wa Bibilia evi amutonesie Yehova. Kunti wakita evio kupitila kulanda nakue sana palua mibele yakue Yehova. Lyonse, kine mwasambilila, uye wamukwasia musambi obe aye wainika belia bimuli mwasambilila vibilangiliile Yehova vyatutonene. Uye wamulangilila nangue Yehova waafumiizie mwana wakue evi aaluke kilubula-mulandu pantu amutonene ni wene pa lwakue bunke. (Bar. 5:8; 1 Yoan. 4:10) Pange kine musambi obe wainika nangue Yehova amutonene ni wene pa lwakue bunke, kekio kunti kyalengia ni wene amutonesie.—Bag. 2:20.

9. Ni kiki kyaamukwasiizie Michael kwalulula lwendo lwakue?

⁹ Tumone mufuano wakue Michael, olia ali waikala mu Indonesia. Waasambiliile kisinka lwabanga wakili mwanike, inzi taabatiziiziwe. Lwabanga wali na myaka likumi na munane (18), waaile kubombela mu kyalo kinge miilo ya kwenzia traki. Kisia, waabwelele kabili mu Indonesia juu ya kuupa, inzi kisia musita, waabwelelemo kabili kubombela mu kyalo kinge, kule ni mukazi wakue pamo ni mwana wabo mwanakazi. Mu wenka ozo musita, mukazi wakue pamo ni mwana wabo mwanakazi, baatendekele kusambilila Bibilia ni kukita buyantanzi. Kisia mama wakue kufua, Michael waapingwile kubwela ku nsesi evi kumusunga baba wakue, kabili waabambile kusambilila Bibilia. Semu “Tukebe Saana,” elia ili mu lisomo lya makumi abili na saba (27) ya kitabu Sekelela Buikazi Loonse! yaamukumiizie sana. Kisia kusambilila Yehova vyaaiunvwile musita Mwana Wakue lwabanga wateseka, Michael waabambile kulila. Pa kako, waatasiizie sana palua kilubula-mulandu, kabili kekio kyaamusonseziizie aalulule lwendo lwakue ni kubatiziiwa.

MUKWASIE MUSAMBI OBE AMANE VYA KUMUBIIKA YEHOVA PA NTANZI

10. Yesu waakitile ki evi kubakwasia basambi bakue ba kwanza-kwanza bamane vya kumubiika Yehova pa ntanzi? (Luka 5:​5-11) (Mona ni foto.)

¹⁰ Basambi ba kwanza-kwanza baainikile bila kukokola nangue Yesu i Masiya olia waalailue, inzi babanga bapalile kukwasiiwa evi babiike miilo ya kusimikila pa ntanzi. Petro pamo ni Andrea babanga basyali basambi kwa musita fulani Yesu lwaabakupile evi bamukonke nsita yonse. (Mat. 4:​18, 19) Bene pamo ni Yakobo ni Yoane babanga babomba miilo ya kuloba nsabi. (Mark. 1:​16-20) Inzi, ba Petro ni Andrea baalekeele miilo yabo evi kumukonka Yesu nsita yonse. Ata sie kine baakitile evio, babanga baswapiile nangue bakaba kuya bavinda kubapeela bantu ba mu lupua lwabo bintu bibali nabio lazima. Juu ya ki baapingwile kumubiika Yehova pa ntanzi? Mpunda ili mu kitabu kya Luka ilangiliile nangue Yesu waakitile kimpezia mano kelia kyaalengiizie bakile kuswapila nangue Yehova ali ni buvinde bwa kubakwasia.—Soma Luka 5:​5-11.

11. Wewe kunti wamubwila ki musambi obe wa Bibilia evi kulumia kiketekelo kyakue?

¹¹ Tetuvinda kukita bimpezia mano, nga Yesu. Inzi, kunti twababwila basambi betu ba Bibilia Yehova vyali wabakwasia baalia bali bamubiika wene pa ntanzi mu bwikazi bwabo. Kwa mufuano, eba, wewe walanguluka Yehova vyaakukwasiizie luwaatendekele kulonghaana? Pange wewe waaile kumumona mukulu obe wa miilo ni kumulondolwela nangue teukaba kuya wabomba kisia nsa ya miilo kine kekio kyalengia te kunti uye wasangua ku kulonghaana. Musita luuli kuya wamulondolwela musambi obe pa lobe, mulondolwele kiketekelo kyobe vikyaalumine luwaamwene Yehova wakukwasia mu bupinguzi buwaakwete evi kumubiika wene pa ntanzi.

12. (a) Juu ya ki upalile kuya wamusambilizia musambi obe walipo ni ba kasimika paleepale? (b) Wewe kunti wabombia syani ma video evi kumusambilizia bwino musambi obe? Leta mufuano.

¹² Musambi obe kunti wapata faida kine ba lupua ni ba nkazi bange bamubwila vibaalulwile bwikazi bwabo ni kumubiika Yehova pa ntanzi. Pa kako, uye wabakupa ba kasimika ba mu tubelela tunge pa kumusambilizia musambi obe Bibilia. Balande balondolole vibaasambiliile kisinka, ni bintu bibaakitile evi kumubiika Yehova pa ntanzi mu bwikazi bwabo. Kukila pa kako, uye wakenta ma video pamo nakue, alia ali mu semu “Tukebe Saana” ao mu semu “Manako ni Binge,” mu kitabu Sekelela Buikazi Loonse! Kwa mufuano, musita wa kusambilila lisomo lya makumi atatu na saba (37), mulondolwele mafunde ali mu video ilandile, Yehova wakaba kutupeela belia bitukabiile.

MUKWASIE MUSAMBI OBE AMANE VYA KUKITA KINE BANGE BAMUPINGA

13. Yesu waabateaniizie syani basambi bakue evi bamane vya kukita kine bapingua?

¹³ Yesu abanga wabalanda lingi basambi bakue nangue bakaba kupingua, ata sie na bantu ba mu lupua lwabo. (Mat. 5:11; 10:​22, 36) Musita unini ntanzi tanafue, Yesu waabalandile basambi bakue nangue bakaba kwipaiwa juu ya kumubombela Yehova. (Mat. 24:9; Yoan. 15:20; 16:2) Waabalandile kuya bakengeele kine baya mu miilo ya kusimikila. Evi bavinde kutwalilila kusimikila, waabalandile te kunti baye babisiana na baalia babanga bapinga bintu belia bibaali bazumiine.

14. Kunti twamukwasia syani musambi wetu amane vya kukita kine bamupinga? (2 Timoteo 3:12)

¹⁴ Kunti twamulondolwela musambi wetu palua bintu byakaba kulanda ao kukita babombi nakue, ba rafiki bakue, ao bantu ba mu lupua lwakue pantu ali wasambilila Bibilia. (Soma 2 Timoteo 3:12.) Babombi nakue bamo kunti bamuseka pantu waakyalulula lwendo lwakue. Ni bantu bange, i kulanda, ata sie bantu ba mu lupua lwakue lwa pepi, kunti babamba kulanda ovio palua bintu byali mukusambilila mu Bibilia. Kili bwino kumubwilila mbela palua kupingua ntanzi tanabambe kupingua. Kine twakita evio, wene takaba kutulumuka kine wabamba kupingua, pantu wakaba wasyamanine bintu bya kulanda ni kukita.

15. Ni kiki kyakaba kumukwasia musambi wa Bibilia kusipikizia kine bantu ba mu lupua lwakue bamupinga?

¹⁵ Kine musambi obe ali mukupingua na bantu ba mu lupua lwakue, mukoselezie aye wawaza palua kelia kili mukulengia baye bakita evio. Pange, bantu ba mu lupua lwakue bali bawaza nangue Bakasininkizia Bakue Yehova bali bamusambilizia bya bufi, ao pange bali bawaza nangue Bakasininkizia Bakue Yehova babipile. Yesu ni wene waapingilue na bantu ba mu lupua lwakue baalia babanga watonene. (Mark. 3:21; Yoan. 7:5) Musambilizie musambi obe aye wapembelela, kabili aye walanziana bwino na bange, kubiika mukati bantu ba mu lupua lwakue.

16. Kunti wamukwasia syani musambi obe wa Bibilia ababwile bantu bintu byazumiine mu nzila iweme?

¹⁶ Ata sie kine bantu ba mu lupua batona kumana bingi palua Bibilia, musambi obe tapalile kubalondolwela bintu byonse penka palia. Pantu kine wene wakita evio, bene kunti bafuulilua, kabili kekio kunti kyalengia te kunti batone kulanzyania nakue lwendo lunge. Pa kako, mukoselezie musambi obe wa Bibilia aye wababwila bange bintu byazumiine mu nzila elia ili kulengia bakabe kutona kabili kulanzyania nakue lwendo lunge. (Bakol. 4:6) Pange kunti wabalanda bantu ba mu lupua lwakue bengile ku kitente kya jw.org. Kukita evio kunti kwabakwasia basambilile bintu bingi palua Bakasininkizia Bakue Yehova musita onse ubali kutona kukita evio.

17. Kunti wakita ki evi kumukwasia musambi obe wa Bibilia amane vya kukita palua mpunda ya bufi elia ili yalanda bange palua Bakasininkizia Bakue Yehova? (Mona ni foto.)

¹⁷ Kunti wabombia semu ili ku jw.org, elia ilandile nangue “Bipuzio Bili Byaipuzia Sana Bantu Palua Bakasininkizia Bakue Yehova” evi kumukwasia musambi obe wa Bibilia ateanie byasuko bilengele bya kwasuka ku bipuzio bya bantu ba mu lupua lwakue ao babombi nakue. (2 Tim. 2:​24, 25) Ku mpela ya kila lisomo, muye mwapituluka mu semu ilandile, “Bange Bali Balanda,” ao “Unge Kunti Waipuzia” elia ili mu kitabu Sekelela Buikazi Loonse! Mukoselezie musambi obe wa Bibilia aye waiteania kupitila kubwelulukamo mu byasuko; kabili aye wakita evio kupitila kubombia milandu yakue mwine. Kine kyapala, mukwasie wene amane nzila iweme ya kulondolwelamo belia byazumiine. Kine wewe wamubelezia mu ezio nzila, wene wakaba kwaluka ni buvinde bwa kusakila mu nzila ipalile belia byazumiine.

18. Wewe kunti wakita ki juu ya kumukoselezia musambi obe evi atendeke kusimikila pamo ni kilonghaano? (Mateo 10:27)

¹⁸ Yesu waabalandile basambi bakue basimikile mpunda iweme ku bantu bonse. (Soma Mateo 10:27.) Kine musambi obe watendeka kusimikila pamo ni kilonghaano, ali kukila kumuswapila Yehova. Pa kako, wewe kunti wakita ki evi kumukwasia musambi obe wa Bibilia ebiikile ozo mupango? Kine kwaaluka kampanye ya kusimikila mu kazonga kenu, mukoselezie musambi obe wa Bibilia awaze palua bintu byapalile kukita evi kwaluka kasimika. Mubwile juu ya ki bantu bengi bali bamona kyaleengele kubamba kusimikila mu kipindi kya kampanye. Kabili, wene kunti wanonkelamo kine watendeka kupisia bipindi ku kulonghaana kwa mukati ka mulungu. Kekio kili kumukwasia aye wavinda kubalondolwela bange belia byazumiine.

MUSWAPILE MUSAMBI OBE

19. Yesu waalangiliile syani nangue abanga wabaswapiile basambi bakue, kabili kunti twakonka syani mufuano wakue?

¹⁹ Ntanzi tanafue ni kupiluka ku muulu, Yesu waabalandile basambi bakue nangue busiku bumo bakaba kusaakaana kabili. Inzi, basambi te baainikile nangue Yesu abanga walandila palua bene kuya ku muulu. Ata sie kine te baainikile, wene abanga waswapiile nangue bene babanga batonene kumusansamusia Yehova. (Yoan. 14:​1-5, 8) Yesu abanga wamanine nangue kibanga kyalombele kupite musita walepele pa kunti bafikiile kumana bintu fulani, nga evelia kiswapilo kyabo kya kuya ku muulu. (Yoan. 16:12) Ni fwefue kunti twalangilila nangue tuswapiile kakiine nangue basambi betu ba Bibilia batonene kumusansamusia Yehova.

20. Nkazi umo wa mu Malawi waalangiliile syani nangue abanga wamuswapiile musambi wakue wa Bibilia?

²⁰ Tupalile kuya twaswapiile nangue musambi wetu atonene kukita kintu kiweme. Tumone mufuano wakue Chifundo, nkazi umo wa mu Malawi. Wene waatendekele kumusambilizia Bibilia mukazyana umo, olia abanga wali mu dini ya bakatolika, liina lyakue Alinafe. Waatendekele kumusambilizia mu kitabu Sekelela Buikazi Loonse! Lubaapwile kusambilila lisomo lya likumi na tuna (14), Chifundo waamwipuziizie Alinafe mawazo akue palua kubombia mikisi ao ma foto mu lupupo. Alinafe waaemene sana ni kulanda evi: “Ne mwine i wa kupingula kine ndi kukita evio ao abe!” Chifundo waawazile nangue pange Alinafe wakaba kulekela kusambilila Bibilia. Inzi, Chifundo waatwaliliile kusambilila nakue waswapiile nangue ku mwinsio wakaba kwinika nangue kubombia mikisi ao ma foto mu lupupo kubipile. Kisia myezi inini, lubaasambiliile mu lisomo lya makumi atatu na tuna (34), Chifundo waamwipuziizie evi Alinafe: “Eba, ntangia luwaabambile kusambilila Bibilia ni kumana kisinka pa lwakue Yehova Leeza, teusyapatile faida ki?” Chifundo walondolola vyaasukile Alinafe. Walanda evi: “Alinafe Waalandile bintu bingi sana bya mana, kimo pakati ka bebio bintu ni keki, Bakasininkizia Bakue Yehova tebezi kukita bintu belia bikaniiziwe mu Bibilia.” Musita unini kisia papo, Alinafe waalekeele kubombia mikisi ni ma foto mu lupupo, kabili waabatiziiziwe.

21. Kunti twakita ki evi kumukwasia musambi wetu apingule kumubombela Yehova?

²¹ Ata sie kine Yehova bunke “i ali wakuzia,” ni fwefue tupalile kumukwasia musambi wetu wa Bibilia akite buyantanzi. (1 Bakor. 3:7) Te tupalile sie kupeleela pa kumusambilizia belia bitonene Yehova Leeza wene akite. Inzi kabili, tupalile kumukwasia amutone sana Yehova. Kabili, tupalile kumukoselezia alangilile ezio ntono kupitila kumubiika Yehova pa ntanzi. Kukila pa kako, tupalile kumusambilizia amane vya kumuswapila kine wapata maavia. Kine twamulangilila musambi wetu wa Bibilia nangue tuswapiile nangue atonene kumusansamusia Yehova, kekio kyakaba kulengia akabe kupingula kutendeka kumubombela.