Yehova ali Watukwasia Syani Kusipikizia Maavia?

1. Juu ya ki te kileengele kutwalilila kusipikizia mpaka ku mpela, inzi nani wakaba kutukwasia? (1 Petro 5:10)

MU ENU nsiku ya mpeleezio ikolele, fwe bantu bakue Yehova tuli twapata maavia paleepale, pa kako nsita inge kunti twamona kyakolele kutwalilila kusipikizia mpaka ku mpela. Kwa mufuano, bamo bali ni malwele asizi kutunzika, bange bali baema pantu baakifwilua na muntu olia ubatonene sana, kabili bange bali bapingua na bantu ba mu lupua lwabo ao na bantu ba mu buteeko. (Mat. 10:​18, 36, 37) Uye wasininkiziizie nangue ata sie kine uli mukupata maavia a syani, Yehova kunti wakukwasia kuasipikizia.—Soma 1 Petro 5:10.

2. Ni kiki kili kyatukwasia kusipikizia?

² Kusipikizia kuli na mana ya kusyala twali ba kisinka kuli Yehova ata sie kine tuli mukupata maavia, tuli mu kutesua, ao kweziiwa kukita lizambi. Evi tuvinde kusipikizia, tupalile kuya twazumiine nangue bintu byakaba kwaluka bwino. Buvinde bwa Bakristu bwa kusipikizia tebwizi kuletua na maka abo bene, inzi buli bwafuma kuli Yehova, olia ali watupeela “maka apitile alia a kawaida.” (2 Bakor. 4:​7, NWT) Mu leli lyasi, tuli kumona bintu bina biteaniizie Yehova evi kutukwasia kusipikizia maavia. Kabili, tuli kusambilila bintu bitupalile kukita evi kupata faida mu bebio bintu bitupeelue na Yehova.

LIPEPO

3. Juu ya ki lipepo ni nzila ya kupapia ya kulanziana ni Yehova?

³ Yehova ateaniizie nzila imo ya kupapia ya kulanziana nakue, elia ili yatukwasia kusipikizia maavia, ni ezio nzila ni lipepo. Akitile kivindikane tuye twalanziana nakue ata sie kine tuli bantu ba mazambi. (Baeb. 4:16) Wazanke palua keki: Kunti twapepa kuli Yehova nsita yonse ni palua kila kintu. Wene ali waunvua lipepo lyetu ata sie kine twapepa mu lulimi ki ao ata sie kine tuli kupi, kabili ata sie kine tuli pa bunke ao tuli mu prizo. (Yon. 2:​1, 2; Miil Bat. 16:​25, 26) Kine tuli mukwema sana, ni kekio kyalengia twandue kulanda mu lipepo vitwiunvwiile, Yehova ali ni buvinde bwa kwinika belia bitukebele kulanda. (Bar. 8:​26, 27) Kulanda kisinka, lipepo ni nzila ya kimpezia mano ya kulanziana ni Yehova!

4. Twamana syani nangue Yehova wakaba kutukwasia kine twamulomba atukwasie kusipikizia?

⁴ Yehova ali watusininkiziizia mu Mulandu Wakue nangue “kine twamulomba kubalua kantu [ao kila kintu] kukonkana ni mwatoneene, ali watunvua.” (1 Yoan. 5:14) Eba, kunti twamulomba Yehova atukwasie kusipikizia? Een! Pantu kekio kipateene ni kutona kwakue. Juu ya ki twalanda evio? Pantu kine twasipikizia maavia, tuli twamukwasia Yehova kumwasuka olia ali wamusokozia, i kulanda, Sataana Kibanda. (Tus Maf. 27:11) Kukila pa kako, Bibilia ili yalanda nangue Yehova atonene “kulangilila maka akue ku baalia bali ni mutima ukumeene kuli wene.” (2 Mil Nsi. 16:9) Pa kako, tuye twasininkiziizie nangue Yehova ali ni maka, kabili atonene kutukwasia kusipikizia maavia.—Is. 30:18; 41:10; Luk. 11:13.

5. Lipepo kunti lyatupeela syani mutende wa mu mano? (Isaya 26:3)

⁵ Bibilia ili yalanda nangue kine twapepa kwa mute palua maavia etu, ‘mutende wakue Leeza upitile mano onse waya watusungile mitima ni mano etu.’ (Baf. 4:7) Tuli twatasia sana palua kekio. Bantu baalia basizi kumubombela Yehova ni bene bali bapata maavia, kabili bali baezia mu nzila ingi kukeba mutende wa mu mano. Kwa mufuano, bamo bali baikwinda kutontonkania mu nzila isili ya kawaida evi kufumia mawazo abo onse mu mano, kubiika mukati bintu byonse bili mukubeemia. Kine muntu wakita evio, kunti watendeka kutungululua na bibanda. Kulanda kisinka, koko ni kwibiika mu bwavia kimupasi. (Palania ni Mateo 12:​43-45.) Kukila pa kako, mutende olia uli watupeela Yehova kine twapepa, ni wa pa muulu sana kupita mutende olia uli wapata muntu kupitila kolia kutontonkania kusili kwa kawaida. Kine twapepa kuli Yehova, tuli twalangilila nangue tumuswapiile kakiine; kabili lutuli twakita evio, ali watupeela “mutende utwaliliile.” (Soma Isaya 26:3.) Nzila imo ili yabombia Yehova evi kukita evio ni ezi: Kutukwasia kulanguluka Malembo a kututeekia mutima alia atuli twasambilila mu Mulandu wakue. Azo Malembo ali atulangulusia nangue Yehova atutonene, kabili nangue atonene kutukwasia evi tuteeke mutima.—Malum. 62:​1, 2.

6. Ni biki byupalile kubiika mu mapepo obe? (Mona ni foto.)

⁶ Kintu kyupalile kukita. Kine uli mu maavia, “mupozele Yehova kifunda kyobe,” kabili mulombe akupeele mutende. (Malum. 55:22) Kabili, uye wamulomba mulangue olia uuli nao lazima evi uye wavinda kusipikizia maavia obe. (Tus Maf. 2:​10, 11) Kukila pa kako, te kuya walaba kupepa evi kumutasia. (Baf. 4:6) Uye wawaza palua nzila yali wabombia evi kukukwasia kusipikizia kila busiku, kabili uye wamutasia pantu ali wakukwasia. Te kulekela maavia obe akulengie ulabe mpaalo elia yaakupeele kale.—Malum. 16:​5, 6.

MULANDU WAKUE LEEZA

7. Kusambilila Bibilia kunti kwatukwasia syani kusipikizia?

⁷ Yehova atupeele Mulandu wakue evi kutukwasia kusipikizia. Mu Bibilia muli mpunda ingi isininkiziizie nangue Yehova ali watukwasia. Tumone sie mufuano umo. Lilembo lya Mateo 6:8 lyalanda evi: “Baba wenu amanine kelia kimukabiile ata sie ntanzi temunamulombe.” Yesu i waalandile ezio milandu, kabili wene i amumanine bwino Yehova kuliko muntu unge onse. Pa kako, tupalile kuya twasininkiziizie kakiine nangue Yehova amanine bintu bituli nabio lazima, kabili wakaba kutukwasia kine twapata maavia. Mu Bibilia muli mawazo engi apateene ni azo a kutukwasia evi tuvinde kutwalilila kusipikizia.—Malum. 94:19.

8. (a) Bibilia ili yatukoselezia kukita ki? (b) Ni kiki kili kuvinda kutukwasia kulanguluka mafunde a Bibilia musita utuli nao lazima?

⁸ Mafunde ali mu Bibilia kunti atukwasia kusipikizia. Kulanda kisinka, mu azo mafunde muli mulangue wa kutukwasia kukwata bupinguzi buweme. (Tus Maf. 2:​6, 7) Kwa mufuano, Bibilia ili yatukoselezia kupoza mano ku belia bituli nabio lonu kuliko kwemena belia byakaba kukitika ao bisikaba kukitika lukele. (Mat. 6:34) Kabili, kine tuli ni kibelezio kya kusoma Malembo ni kuatontonkaniapo, kyakaba kuya kyaleengele kulanguluka mafunde atuli nao lazima pa musita utwakaba kuya twali nao lazima.

9. Eba, maasi ali mu Bibilia kunti atukwasia syani kukila kuswapila nangue Yehova wakaba kutukwasia?

⁹ Mu Bibilia muli maasi a kisinka a bantu baalia baamuswapiile Yehova ni kukwasiiwa na wene. (Baeb. 11:​32-34; Yak. 5:17) Kine twawaza sana palua nzila ibanga yabombia Yehova evi kubakwasia, kekio kili kulengia tukile kuswapila nangue wene wakaba kutukwasia ni fwefue. Yehova i “fwasi yetu ya kubutukila, bukwasi buleengele kupatika mu nsita ya maavia.” (Malum. 46:1) Kine twawaza palua babombi ba kisinka bakue Yehova ba ku kale, kekio kyakaba kutusonsezia tukabe kupala kiketekelo kyabo ni kusipikizia kwabo.—Yak. 5:​10, 11.

10. Ni kiki kyupalile kukita evi Mulandu Wakue Leeza ukukwasie?

¹⁰ Kintu kyupalile kukita. Uye wasoma Bibilia kila busiku ni kukita liste ya malembo alia aumwene nangue ali akukwasia kakiine. Bengi bali basoma lukele-keele lilembo pamo ni bulondolozi buli mu katabu Tutoosie Malembo Kila Busiku. Kekio kili kyabakwasia bapate kintu kya kukoselezia kya kuwazapo koba konse. Nkazi umo, olia ali wakuutua Marie,a waamwene kekio kuya kyali kisinka musita bavyazi bakue bonse babili lubaalwele bulwele bwa kapopo. Ni kiki kyaamukwasiizie Marie kusipikizia musita lwabanga wabasunga bavyazi bakue mu myezi yabo ya ku mwisio-mwisio? Wene walanda evi: “Kila busiku lukele-keele mbanga nasoma lilembo mu katabu Tutoosie Malembo Kila Busiku ni kulitontonkaniapo.” Walanda kabili evi: “Kekio kibelezio kibanga kyankwasia kwizuzia mu mano mawazo ali mu lilembo, alia abanga ankwasia kupoza mano ku bintu biweme kuliko kupoza mano ku aali ikolele imbanga nasipikizia.”—Malum. 61:2.

BAKRISTU NETU

11. Juu ya ki ni kintu kya kukoselezia kumana nangue te tuli bunke musita utuli mu maavia?

¹¹ Yehova atupeele Bakristu netu evi kutukwasia tuye twasipikizia. Kumana sie nangue “bazumizi [netu] bonse mwaya kyalo, ni bene bali bapita mu lyemo nga leli lyenka,” kuli kwatusininkiziizia nangue te tuli bunke ata kanini. (1 Pet. 5:9) Pa kako, tuye twasininkiziizie nangue kila aali ituli twapitamo, ni bange baapitilemo kale, kabili baasipikiziizie. Kekio kyalangilila nangue ni fwefue twakaba kusipikizia.—Miil Bat. 14:22.

12. Bakristu netu kunti batukwasia syani, ni fwefue kunti twabakitila ki? (2 Bakorinto 1:​3, 4)

¹² Musita utuli mu maavia, Bakristu netu kunti batukoselezia evi tuvinde kusipikizia. Mutumua Paulo waamwene kekio kuya kyali kisinka. Mu mikanda yakue, lingi abanga wazimbula meena a baalia bamukwasiizie musita lwabanga wakakilue, kabili abanga wabatasia. Babo ba lupua ni ba nkazi babanga bamuteekia mutima, kumukoselezia, ni kumukwasia mu bintu byabanga wali nabio lazima. (Baf. 2:​25, 29, 30; Bakol. 4:​10, 11) Ni lonu kunti twasaakaana na aali ipaleene ni ezio. Musita utuli ni lazima ya kukwasiiwa evi tuvinde kusipikizia, ba lupua ni ba nkazi bali basangua bali palia evi kutukwasia; ni bene lubali basangua bali ni lazima ya kukwasiiwa, ni fwefue tuli twasangua twali palia evi kubakwasia.—Soma 2 Bakorinto 1:​3, 4.

13. Ni kiki kyaamukwasiizie nkazi Maya evi asipikizie?

¹³ Bakristu netu baamukoseleziizie sana nkazi umo ali wakuutua Maya, olia ali waikala mu Urusi. Mu 2020, ba polisi baaingiile mu nsesi yakue mu kusitukila, ni kutendeka kukebulula bintu. Kisia musita, wene waapingwilue pantu abanga wabasimikila bantu bintu byabanga wazumiine. Maya walanda evi: “Musita umbanga naemene sana mu mano, ba lupua ni ba nkazi babanga bankuuta ku telefone ni kungandikila mpunda, kabili babanga bansininkiziizia nangue babanga bantonene.” Wene walanda kabili evi: “Lyonse mbanga namanine nangue ba lupua ni ba nkazi babanga bantonene, kabili nangue bene i lupua lwane. Inzi, kutendekela mu mwaka wa 2020, naakilile kwisininkiziizia nangue bantonene sana.”

14. Kunti wakita ki evi Bakristu nobe bakukwasie musita uuli mu maavia? (Mona ni foto.)

¹⁴ Kintu kyupalile kukita. Musita luuli mu maavia, uye wali pepi ni Bakristu nobe. Te kutiina kubalomba bakote evi bakukwasie. Bene kunti baya bali “nga fwasi ya kwikingilila kufuma ku mwela, fwasi ya kufyaminamo kufuma ku mupondo wa nvula.” (Is. 32:2) Languluka nangue Bakristu nobe ni bene bali basipikizia maavia. Kumukitila muntu fulani kintu kimo kiweme kelia kyali nakio lazima kwakaba kukukwasia usyale wali ni mawazo ateekamene, kabili aweme musita luuli mukusipikizia maavia obe.—Miil Bat. 20:35.

KISWAPILO KYETU

15. Kiswapilo palua musita uli waiza kyaamukwasiizie syani Yesu, ni fwefue kunti kyatukwasia syani? (Baebrania 12:2)

¹⁵ Yehova atupeele kiswapilo kilumine evi tutwalilile kusipikizia. (Bar. 15:13) Languluka kiswapilo vikyaamukwasiizie Yesu kusipikizia busiku bukolele sana bwa mu bwikazi bwakue panu pa kyalo. (Soma Baebrania 12:2.) Yesu abanga wamanine nangue kine watwalilila kuya wali wa kisinka, kekio kyakaba kukwasia kuswesia liina lyakue Yehova. Kabili, Yesu abanga wapembeleele kwa amu kusaakaana kabili ni Baba wakue, ni kubomba wali Likolo pamo ni ba lupua bakue babiikilue mafuta, mu Bukolo bwa mu muulu. Enka evio, kiswapilo kyetu kya kwikala lonse mu kyalo kya lenu kyakue Leeza kili kyatukwasia kusipikizia kila bwavia butuli twasaakaana nabo mu kenu kyalo kyakue Sataana.

16. Kiswapilo kyaamukwasiizie syani nkazi umo evi avinde kusipikizia, kabili wewe wasambilila ki kupitila bulondolozi bwakue?

¹⁶ Tumone kiswapilo kya kwikala mu kyalo kya lenu vikyaamukwasiizie nkazi umo wa mu Urusi, olia ali wakuutua Anna. Mulume wakue waakwetue ni kubiikua mu prizo, wapembeleele apingulue. Lukyaakitikile evio, Anna waalandile evi: “Kupepa palua kiswapilo kyetu kya musita uli waiza ni kutontonkania palua kekio kuli kwankwasia te kunti ntyoke sana mutima. Manine nangue kisia aza maavia, bintu biweme byakaba kwiza. Yehova wakaba kubepaya balwani bakue, kabili wakaba kutupeela kilambu.”

17. Kunti twakita ki evi kulangilila nangue tuli twatasia palua kiswapilo kitupeelue na Yehova? (Mona ni foto.)

¹⁷ Kintu kyupalile kukita. Uye wawaza palua bintu biweme sana bitulailue na Yehova palua musita uli waiza. Waza bwikazi vibwakaba bwali mu kyalo kya lenu kyakue Leeza, kabili waza palua mpaalo iwakaba kupata. Mana nangue maavia onse auli mukusaakaana nao lenu ni “a musita unini, kabili aleengele” kine apalania na kwikala lonse mu Paradiso. (2 Bakor. 4:17) Kabili, uye waikwinda kubasimikilako bange palua bulayo bwakue Yehova bwa musita uli waiza. Waza vikili kyasangua kyakolele kuli bene kusipikizia maavia a mu kenu kyalo kyakue Sataana bila bamanine bulayo bwakue Yehova palua musita uli waiza. Ata sie kine wababwila sie bintu binini, kekio kunti kyabasonsezia batone kumana bingi palua Bukolo Bwakue Yehova pamo ni bulayo bwakue.

18. Juu ya ki tupalile kuswapila bulayo bwakue Yehova?

¹⁸ Kisia kusipikizia maavia engi, Yobu waamulandile evi Yehova: “Lonu, namana nangue uli ni buvinde bwa kukita bintu byonse, kabili namana nangue te kuli kintu ata kimo kyupangile kelia kyusivinda kukita.” (Yob. 42:2) Yobu waainikile nangue te kuli kintu ata kimo kili kuvinda kumwanzia Yehova kufikilizia kutona kwakue. Kumana kekio kisinka kunti kwalengia twaluke ni maka a kusipikizia. Kwa mufuano, waza mwanakazi umo wakita nsiku ingi walwele. Kisia wene watyoka mutima pantu ba doktere bengi bali mukwandua kumutunza. Inzi kisia musita, wene wapata doktere olia wainika bwino bulwele bwali nabo, kisia wamulondolwela vyakaba kumutunza. Kekio kyalengia onvue makola ata sie kine musita wakaba kupitapo pa kunti akabe kukosa, kabili kunti kyalengia asipikizie pantu waaluka ni kiswapilo nangue wakaba kukosa. Enka evio, ni fwefue tuli twavinda kusipikizia pantu tuli ni kiswapilo kya kwikala mu Paradiso musita uli waiza.

19. Tupalile kukita ki evi tutwalilile kusipikizia mpaka ku mpela?

¹⁹ Nga vitwamona mu leli lyasi, Yehova ali watukwasia evi tuvinde kusipikizia maavia kupitila lipepo, Mulandu wakue, Bakristu netu, pamo ni kiswapilo kyetu. Kine twaikwinda kubombia bwino bebio bintu, Yehova wakaba kutukwasia ata sie kine twapata maavia a syani. Twakaba kuvinda kutwalilila kusipikizia mpaka busiku Yehova lwakaba kwinoona kyalo kyakue Sataana, ni kupwisia maavia.—Baf. 4:13.