Uye Waikeefiizie Kine Kuli Bintu Byusimanine

1. Yehova waatubumbile twali ni buvinde bwa kukita ki, kabili juu ya ki?

YEHOVA waatubumbile twali ni buvinde bwa kuwaza, kumana, kwinika ni kubombia mulangue. Juu ya ki waatubumbile evio? Pantu atonene ‘tumumane wene,’ kabili pantu atonene tuye twamubombela ni kukwata bupinguzi buswapiile kumana kusili na kilubo.—Tus. 2:​1-5; Bar. 12:1.

2. (a) Ni kiki kitupalile kwinika? (Yobu 37:​23, 24) (Mona ni foto.) (b) Kumana mipaka yetu kunti kwatuletela faida ki?

² Ata sie kine tuli ni buvinde bwa kumana bintu bya lenu, tupalile kwinika nangue kuli ni bintu binge bitusimanine. (Soma Yobu 37:​23, 24.) Tumone mufuano wakue Yobu. Yehova waamwipuziizie bipuzio bingi belia byaalangiliile paswetele nangue kubanga kwali bintu bingi belia byasibanga wamanine. Kekio kyaamukwasiizie Yobu aaluke ni mibele ya kwikeefia, ni kwalulula mawazo akue. (Yob. 42:​3-6) Ni fwefue tuli twapata faida kine twainika twaikeefiizie nangue te tumanine bintu byonse. Kwikeefia kwa evio kuli kwalengia tuswapile nangue lyonse Yehova wakaba kuya watubwila bintu bitupalile kakiine kumana evi tuye twavinda kukwata bupinguzi buweme.—Tus Maf. 2:6.

3. Tuli kusambilila ki mu leli lyasi?

³ Mu leli lyasi, tuli kusambilila bintu paleepale bitusimanine, kabili tuli kumona faida ya kusimana bebio bintu. Kukila pa kako, tuli kumona juu ya ki kili sie bwino kusiba twamanine bintu bimo. Kusambilila bebio bintu byonse kuli kulengia tukile kuswapila nangue Yehova, “Olia apwililikile mu kumana,” ali watubwila lyonse bintu bitupalile kakiine kumana.—Yob. 37:16.

TE TUMANINE MUSITA WAKEZILAPO MPELA

4. Kukonkana ni Mateo 24:​36, ni kintu ki kimo kitusimanine?

⁴ Soma Mateo 24:36. Te tumanine musita wakezilapo mpela ya kenu kyalo. Ata sie Yesu, musita lwabanga wali panu pa kyalo, tabanga wamanine “busiku ni nsa.”a Kisia musita, wene waabalandile batumua bakue nangue Yehova sie i ali ni nsambu ya kupingula musita upalile wa kukitikilapo bintu. (Miil Bat. 1:​6, 7) Yehova waatantikile kale musita wakezilapo mpela ya kenu kyalo, inzi fwefue tetuvinda kumana bwino-bwino musita wine wakezilapo ezio mpela.

5. Pantu te tumanine musita wakezilapo mpela, kekio kunti kyalengia twiunvue syani?

⁵ Kukonkana ni milandu yaalandile Yesu, te tumanine kine kilombele tukabe kupembelela musita walepele syani evi mpela ikabe kwiza. Pa kako, kekio kunti kyalengia tumone nangue busiku bwakue Yehova bwakokola ao kunti twatyoka mutima, asa kine tekusyapitile musita wingi ntangia lutwaabambile kubupembelela. Kabili, kunti twatyoka mutima kine bantu bamo ba mu lupua lwetu ao sie bantu bange batendeka kutuseka pantu mpela te ili mukwiza. (2 Pet. 3:​3, 4) Kunti twabamba kuwaza nangue kabenge twamanine busiku bwa kwizilapo mpela, nga kyatuleengela kulangilila mibele ya kupembelela ni kusipikizia ata sie kine bange batuseka.

6. Kusimana busiku bwakezilapo mpela, kwatupeela lisyuko lya kukita ki?

⁶ Kulanda kisinka, pantu Yehova tatubwilile busiku bwakezilapo mpela, kekio kili kyatupeela lisyuko lya kulangilila nangue tuli twamubombela pantu tumutonene, kabili pantu tumuswapiile. Tutonene kumubombela Yehova lonse ata sie kine mpela yaiza. Kansi, kuliko kupoza sana mano ku musita wakezilapo “busiku bwakue Yehova,” tupalile kupoza mano ku bintu byakakitika kisia bobo busiku. Kine twakita evio, twakaba kukila kumupalama Leeza, ni kukita kintu kili kyonse evi kumusansamusia.—2 Pet. 3:​11, 12, NWT.

7. Ni biki bitumanine?

⁷ Tupalile kupoza mano ku bintu bitumanine; kwa mufuano tumanine nangue nsiku ya mpeleezio yaatendekele mu 1914. Mu Bibilia, Yehova waatupeele bunabi bulangiliile nangue nsiku ya mpeleezio yaatendekele mu ozo mwaka. Kabili, waatubwilile bintu bingi palua kyalo vikyakaba kuya kyali kubambila mu ozo mwaka. Pa kako, tusininkiziizie nangue “busiku bukata bwakue Yehova buli pepi.” (Zef. 1:14) Kukila pa kako, tumanine nangue Yehova atonene tuye twababwilako bantu bengi palua “mpunda iweme ya Bukolo.” (Mat. 24:14) Ezio mpunda ili mukusimikilua mu byalo mia ibili ni makumi ana (240) evi, ni mu ndimi ikilile pa elufu imo (1000). Ata sie kine twamana “busiku ni nsa,” te kekio kili kulengia tuye twali ni mute mu ezio miilo ya mana.

TE TUMANINE BWINO-BWINO YEHOVA VYAKABA KUKITA EVI KUTUKWASIA

8. Bulanzi, “miilo yakue Leeza wa kisinka” bulandiile palua ki? (Kasimika 11:5)

⁸ Lyonse, tetuvinda kumana “miilo yakue Leeza wa kisinka.” (Soma Kasimika 11:5.) Bobu bulanzi bulandiile palua bintu bili byalengia Yehova bikitike ao palua belia byali walekelela bikitike evi kufikilizia kutona kwakue. Tetuvinda kumana juu ya ki Leeza ali walekelela kintu fulani kikitike ao kumana kakiine kintu kyakaba kukita evi kutukwasia. (Malum. 37:5) Bibilia ili yapalania kusimana “miilo yakue Leeza wa kisinka” na kusimana vili vyakula mwana munda mwakue mama wakue. Ata sie ba sayansi te bamanine bwino-bwino mwana vyali wakula munda. Enka evio ni fwefue tetuvinda kumana bwino-bwino Yehova vyakaba kukita musita uli waiza.

9. Pantu te tumanine bwino-bwino Yehova vyakaba kutukwasia, kunti twabamba kuwaza ki?

⁹ Pantu te tumanine bwino-bwino Yehova vyakaba kutukwasia, kekio kunti kyalengia twaluke ni masyaka a kukwata bupinguzi fulani. Kabili, kunti twaandua kukita bintu bya kutukwasia kwipeela sana mu miilo ya kusimikila, nga evelia kuleengiako bwikazi bwetu, ao kuya ku fwasi kolia kuli lazima ikata ya ba kasimika ba Bukolo. Ao kine tuli mukukita bingi mu miilo yakue, inzi bila kuya twafikiila mipango yetu, kekio kunti kyalengia tubambe kuwaza nangue Yehova tatutonene. Ao pange tuli twasimikila sana, inzi bila twapata ata masambililo a Bibilia, ao tuli twabomba sana kwa maka mu miilo ya kiteokrasi, inzi kuya twali ni maavia engi. Kusakaana na aali nga ezio, kunti kwalengia tubambe kuwaza nangue Yehova tali mukutukwasia.

10. Kusimana vyakaba kukita Yehova kunti kwatukwasia kukuzia mibele ki?

¹⁰ Kusimana vyakaba kukita Yehova kunti kwatukwasia kukuzia mibele ya mana nga evelia kwikeefia pamo ni kiasi. Tuli twafikiila kwinika nangue nzila ya kuwaza ni ya kukitilamo bintu yakue Yehova i ya pa muulu sana kupita yetu. (Is. 55:​8, 9) Kabili, tuli twakila kuswapila nangue Yehova wakaba kutukwasia mu kila aali. Tupalile kumutasia Yehova musita utuli twapata matokeo aweme mu miilo ya kusimikila ao miilo inge ya kiteokrasi. (Malum. 127:1; 1 Bakor. 3:7) Kukila pa kako, kine bintu te bikitikile mu nzila ituswapiile, tupalile kulanguluka nangue Yehova amwene, kabili amanine kila kintu. (Is. 26:12) Tuli twakita belia bituli ni buvinde bwa kukita, kabili tuswapiile nangue lyonse Yehova wakaba kutukwasia. Tusininkiziizie nangue wene wakaba kututungulula mu nzila ipalile, ata sie kine teikaba kuya yali mu nzila ya kimpezia mano nga vyabanga wakita nsita inge lwa kale.—Miil Bat. 16:​6-10.

11. Ni bintu ki bya mana bitumanine?

¹¹ Tumanine nangue lyonse Yehova ali wasangua wali ni ntono, nsambu, ni mulangue. Tumanine nangue Yehova atumwene kuya twali ba mana sana juu ya bintu byonse bituli twamukitila ni bituli twakita palua Bakristu netu. Kabili, tumanine nangue lyonse Yehova ali wabapaala baalia bonse bali basyala baali ba kisinka kuli wene.—Baeb. 11:6.

TE TUMANINE BYAKABA KUKITIKA LUKELE

12. Lilembo lya Yakobo 4:​13, 14 lilandiile palua bintu ki bitusimanine?

¹² Soma Yakobo 4:​13, 14. Kulanda kisinka, te tumanine vyakaba bwikazi bwetu lukele. Mu kenu kyalo, ‘musita pamo ni bintu bisiketekeelue bili byatupata fwe bonse.’ (Kas. 9:11) Pa kako, te tumanine kine mipango yetu yakaba kukitika, ao kine twakaba kuya twakosele evi kuifikilizia.

13. Pantu te tumanine byakaba kukitika musita uli waiza, nsita imo kunti twaiunvua syani?

¹³ Kunti kyaya kyakolele kuli fwefue kusipikizia maavia a mu bwikazi pantu te tumanine bwino-bwino bintu byakaba kukitika musita uli waiza. Juu ya ki twalanda evio? Nsita imo, pange kunti twabamba kwema palua bintu byakaba kukitika, ni kekio kunti kyalengia tuzezie nsansa yetu. Bwikazi bwetu kunti bwaaluluka mu kukapa kwa linso, kabili kekio kunti kyalengia twiunvue ovio sana. Kukila pa kako, kine bintu bituswapiile te bifikiliziiziwe mu nzila itutonene, kunti twaiunvua ovio ni kutyoka mutima.—Tus Maf. 13:12.

14. Ni kiki kitupalile kukita ni kumana evi tuye twali kakiine ni nsansa? (Mona ni foto.)

¹⁴ Kine twasipikizia maavia, tuli twalangilila nangue tuli twamubombela Yehova pantu tumutonene. Bibilia ili yalanda nangue te tupalile kuswapila nangue Yehova wakaba kuya watukingilila ku kila bwavia, kabili taapangiile mbela bintu byakaba kukitika mu bwikazi bwetu. Kukila pa kako, amanine nangue nsansa yetu teizi kuletua na kumana bintu byakaba kukitika mu bwikazi bwetu. Inzi, ili yaletua na kukeba butunguluzi bwakue ni kumunakila wene. (Yer. 10:23) Kulanda kisinka, kine tuli twamuswapila wene musita utuli twakwata bupinguzi, ili nga evelia fwe bali balanda evi: “Mulopue [ao Yehova] kine watona kunti tukabeko, twakaba kukita kaaka ni kaalia.”—Yak. 4:15.

15. Tumanine ki palua musita uli waiza?

¹⁵ Kulanda kisinka, te tumanine bintu byakaba kuya byakitika kila busiku, inzi tumanine nangue Yehova alaile kutupeela bukose bwa lonse, iye yali ku muulu ao pa kyalo. Kukila pa kako, tumanine nangue wene tezi kubepa, kabili nangue te kuli kintu kili kuvinda kumwanzia kufikilizia bulayo bwakue. (Tit. 1:2) Wene sie bunke i ali ni buvinde bwa ‘kulanda ntanzi belia byakakitika ku mpela.’ Bintu byonse byaalandile ntanzi mu Bibilia nangue byakakitika, byaakitikile. Kabili, bintu byonse byaalandile nangue byakakitika musita uli waiza, ni byene byakakitika. (Is. 46:10) Tumanine kakiine nangue te kuli kintu ata kimo kili ni buvinde bwa kumwanzia Yehova kututona. (Bar. 8:​35-39) Wene wakaba kutupeela mulangue ni kutukoselezia, kabili wakaba kutupeela maka atuli nao lazima evi kusipikizia maavia onse akaba kutupata. Tuswapiile nangue Yehova wakaba kutukwasia ni kutupaala.—Yer. 17:​7, 8.

TETUVINDA KUNVWISIA YEHOVA VYATUMANINE BWINO

16. Nga vilandile Malumbo 139:​1-6, Yehova ali ni kumana kwa syani kolia kutusivinda kunvwisia?

¹⁶ Soma Malumbo 139:​1-6. Kabumba wetu amanine vyaatubumbile, kabili amanine kili kyalengia tuwaze ni kukita kintu fulani. Kukila pa kako, amanine bintu bituli twalanda ni belia bili mu mutima wetu. Kabili, amanine bintu bituli twakita ni kili kyalengia tubikite. Likolo Daudi waalandile nangue lyonse Yehova ali wasangua waiteaniizie evi kutukwasia, kabili ali ni buvinde bwa kukita evio. Ni kintu kya kupapia sana kumona Mulopue wa kyalo kyonse, kabili Kabumba wa maka onse wa muulu ni kyalo, watupozako mano sana! Daudi waalandile evi: “Kumana kwa evio kupitile kunvua kwane. Kuli pa muulu sana, ne nsivinda kufikapo.”—Malum. 139:6.

17. Juu ya ki kunti twamona kyakolele kwitabila nangue Yehova atumanine bwino sana?

¹⁷ Pange bintu byaatukitikiile mu bwikazi, tubelela twetu, ao bintu bitubanga twazumiine kunti byalengia kiye kyakolele kuli fwefue kumumona Yehova kuya wali nga Baba wa ntono, olia ali watupozako mano. Ao kunti twamona nangue bilubo bitwaakitile musita waapitile bibanga byabipile sana, ni kubamba kuwaza nangue Yehova tavinda ata kanini kutumana, kabili nangue ali kule ni fwefue. Musita umo, Daudi ni wene waaiunvwile enka evio. (Malum. 38:​18, 21) Ao pange muntu umo olia ali waikwinda kakiine kwalulula lwendo lwakue ni kwikala kukonkana ni mafunde a nsambu akue Leeza, kunti waiipuzia evi: ‘Kine kakiine Leeza amanine nene, ale juu ya ki atonene ndekele kukita bintu belia bingizibiile?’

18. Juu ya ki ni kintu kya mana kwitabila nangue Yehova atumanine bwino sana kupita ni vitwimanine fwe bene? (Mona ni ma foto.)

¹⁸ Ni kintu kya mana kwitabila nangue Yehova atumanine bwino sana kupita ni vitwimanine fwe bene, kabili nangue ali ni buvinde bwa kumona bintu biweme muli fwefue, belia bitusili na buvinde bwa kumona. Kulanda kisinka, wene ali wamona bilubo byetu, inzi amanine bumuntu bututonene kuya twali nabo, kabili atutonene. (Bar. 7:15) Lyonse, musita utuli twainika nangue Yehova ali wamona bumuntu bututonene kuya twali nabo, kekio kili kyatupeela maka atuli nao lazima evi tutwalilile kumubombela wene mu bukisinka ni nsansa.

19. Ni kiki kitumanine bwino sana pa lwakue Yehova?

¹⁹ Tumanine nangue Yehova i ntono. Kulanda kisinka, te kuli masyaka juu ya kekio. (1 Yoan. 4:8) Tumanine nangue mafunde akue alia olokele alangiliile sie wene vyatutonene, kabili nangue atonene tuye twali ni bwikazi buweme. Tumanine nangue Yehova atonene fwefue tukabe kupata bukose bwa lonse. Yehova waalengiizie kekio kivindikane kupitila kilubula-mulandu. Pantu Yesu waatufwiliile, tusininkiziizie nangue ata sie kine twakita kilubo, kunti twamubombela Yehova mu nzila yatonene. (Bar. 7:​24, 25) Kabili, tumanine nangue “Leeza ni mukulu kuliko mitima yetu, kabili amanine bintu byonse.” (1 Yoan. 3:​19, 20) Yehova amanine kila kintu pa lwetu, kabili aswapiile nangue twakaba kuvinda kukita kutona kwakue.

20. Juu ya ki te tupalile kwemena bintu bitusimanine?

²⁰ Yehova ali watubwila bintu byonse bitupalile kumana. Pa kako, te tupalile kwemena kya mpuni bintu bitusimanine. Kuliko kukita evio, tupalile kupoza mano ku bintu bya mana sana. Kine twakita evio, tuli kulangilila nangue tumuswapiile sana Yehova, “Olia apwililikile mu kumana.” (Yob. 36:4) Ata sie kine lonu tetuvinda kumana bintu paleepale, tumanine nangue Yehova wakaba kutwalilila kutusambilizia bintu bya lenu muyayaya. Kabili, kekio kili kyatusansamusia pantu tetukaba kulekela kusambilila bintu bya kupapia pa lwakue Leeza wetu Mukulu.—Kas. 3:11.