Uye Wasininkiziizie Nangue Yehova Akutonene

1. Juu ya ki wewe waaipeele kuli Yehova? (Mona ni foto.)

EBA, walanguluka musita luwaaipeele kuli Yehova kupitila kupepa kuli wene ni kumwana nangue wakaba kumubombela wene lonse? Wewe waakwete bobo bupinguzi pantu waafikiile kumumana ni kumutona. Waamulaile nangue wakaba kumubiika pa ntanzi mu bwikazi bobe bonse ni kutwalilila kumutona kwa mutima obe onse, kwa mweo obe onse, kwa mano obe onse, ni kwa maka obe onse. (Mark. 12:30) Kutendekela ozo musita, uli waya wakila sie kumutona. Ale, kunti waasuka syani kine muntu wakwipuzia evi: “Eba, umutonene Yehova kakiine?” Kulanda kisinka, uli kulanda nangue: “Een, mutonene sana kuliko muntu unge ao kintu kinge kyonse.”

2-3. Yehova atonene tuye twasininkiziizie ki, kabili tuli kusambilila ki mu leli lyasi? (Yeremia 31:3)

² Inzi, kunti waasuka syani kine muntu wakwipuzia evi: “Eba, usininkiziizie nangue Yehova akutonene wewe kakiine?” Eba, kunti wasiita kwasuka, pange wali mukuwaza nangue Yehova tapalile kukutona? Nkazi umo, olia abanga waimwene nangue tabanga watonenue lwabanga wali mwanike, walanda evi: “Manine nangue mutonene Yehova. Kabili, nsili na masyaka palua kekio. Inzi, lingi ndi naiipuzia kine Yehova antonene kakiine.” Pa kako, ni kiki kili kukukwasia kwinika kine Yehova akutonene kakiine?

³ Yehova atonene uye wasininkiziizie nangue akutonene. (Soma Yeremia 31:3.) Kisinka ni keki, Yehova i waakukuliile kuli wene. Kabili, luwaaipeele kuli wene ni kubatiziiwa, wewe waapatile kintu kya mana kakiine, i kulanda, ntono yakue ya kisinka. Kekio kilangiliile nangue wene akutonene sana, kabili takaba kukusia. Ni kekio kili kyamusonsezia aye wabamona babombi bakue ba kisinka, kubiika mukati ni wewe, nga evelia “bunonsi [bwakue] bwibeleele.” (Mal. 3:17) Nga evelia sie vibanga vyasininkiziizie mutumua Paulo nangue Yehova abanga wamutonene, Yehova atonene ni wewe uye wasininkiziizie nangue akutonene. Pantu abanga wasininkiziizie evio, Paulo waandikile evi: “Pantu nene nsininkiziizie nangue wala lufu, wala bukose, wala ba malaika, wala buteeko, wala bintu bilipo lonu, wala belia byakaba kwiza, wala maka, wala kuleepa kuya mu muulu, wala kuleepa kuya pansi, wala kibumbua kinge kyonse [te kikaba] kuvinda kutupusania kufuma ku ntono yakue Leeza.” (Bar. 8:​38, 39, NWT) Mu leli lyasi, tuli kusambilila juu ya ki tupalile kukila kusininkizia nangue Yehova atutonene, kabili tuli kumona bintu bitupalile kukita evi tuvinde kukita evio.

JUU YA KI TUPALILE KUYA TWASININKIZIIZIE NANGUE YEHOVA ATUTONENE?

4. Kunti twapinga syani bukengezi bumo pakati ka bukengezi bwakue Sataana?

⁴ Kine tusininkiziizie nangue Yehova atutonene, kunti twavinda kupinga bumo pakati ka “bukengezi” bwakue sataana. (Baef. 6:11) Sataana ali wakita maka sana evi kutulekezia kumubombela Yehova. Bumo pakati ka bukengezi bwakue Sataana ni bobu: Ali waezia kutusonsezia tutendeke kuwaza nangue Yehova tatutonene; inzi bobo ni bufi. Te kulaba nangue Sataana ali wakita kyonse kyali kuvinda evi kufikilizia mupango wakue. Lingi, ali waezia kutulwisia musita ututopele, i kulanda, pange musita utuli mukwemiiwa na bintu bibipile bitwaapitilemo, maavia atuli nao lonu, ao kine tuli mukwema palua musita uli waiza. (Tus Maf. 24:10) Sataana ali nga nkalamu olia ali wakeba kuzakila kanama kasili na buvinde bwa kwikingilila evi akalie. Enka evio, Sataana lwali wamona twali mukwema, ali waezia na maka akue onse kutulekezia kumubombela Yehova. Inzi, kine twatwalilila kukila kwisininkiziizia nangue Yehova atutonene, tuli kuvinda ‘kumukaana’ Sataana ni nzila yakue ya bukengezi yali wabombia.—1 Pet. 5:​8, 9; Yak. 4:7.

5. Juu ya ki ni kintu kya mana kusininkizia nangue Yehova atutonene, ni kutumona kuya twali ba mana?

⁵ Kine tusininkiziizie nangue Yehova atutonene, kekio kili kulengia tukile kumupalama. Juu ya ki twalanda evio? Yehova waatubumbile twali ni lazima ya kubatona bange ni kwiunvua nangue tutonenue. Kukonkana ni kavyalilua ketu, kine muntu atutonene, kekio kili kyatusonsezia ni fwefue tumutone. Pa kako, vituli kukila kwisininkiziizia nangue Yehova atutonene ni kutumona kuya twali ba mana, i vituli kukila kumutona. (1 Yoan. 4:19) Kine twakila kumutona wene, ni wene i vyali kukila kututona. Bibilia ili yalanda nangue: “Mupalame Leeza, ni ye ali kumipalama.” (Yak. 4:8) Ale kunti twakita ki evi tukile kwisininkiziizia nangue Yehova atutonene kakiine?

NI BIKI BILI KUTUKWASIA KWISININKIZIIZIA NANGUE YEHOVA ATUTONENE?

6. Evi kwisininkiziizia nangue Yehova atutonene, ni kiki kitupalile kumulomba?

⁶ Twalilila kupepa kuli Yehova evi akukwasie winike juu ya ki akutonene. (Luk. 18:1; Bar. 12:12) Kine kyapala, kila busiku, uye wapepa lingi kuli Yehova, wamulomba akukwasie kwimona nga evelia wene vyali wakumona. Kulanda kisinka, nsita imo kunti zamiri yobe yatendeka kukwemia, ni kekio kunti kyalengia te kunti uye wasininkiziizie nangue Yehova akutonene. Inzi, uye walangulukile nangue Yehova ni mukulu sana kuliko mutima obe. (1 Yoan. 3:​19, 20) Wene akumanine bwino kuliko viwimane we mwine, kabili wene ali wamona belia byusili na buvinde bwa kumona. (1 Sam. 16:7; 2 Mil Nsi. 6:30) Pa kako, te kuya wasiita ‘kumupongwela’ byonse bili ku mutima obe, kabili uye wamulomba akukwasie evi wisininkiziizie nangue akutonene. (Malum. 62:8) Kisia kupepa kuli wene, ni kintu kya mana kukita bebi bintu bili papa pensina.

7-8. Lilembo lya Malumbo lili lyatusininkiziizia syani nangue Yehova atutonene?

⁷ Swapila belia bili byalanda Yehova. Wene waabatungulwile ba kalemba ba Bibilia evi balondolole wene vyali kakiine. Mona nzila iweme yaabombiizie kalemba wa Malumbo Daudi evi kulondolola Yehova vyali watwemena. Waalandile evi: “Yehova ali pepi ni baalia bali ni mitima ili ni bulanda, ali wapususia baalia basansikile mu mupasi.” (Malum. 34:18) Kine utyokele mutima, kunti waiunvua kuya wali bunke. Inzi, Yehova wakulaya nangue, mu nsita ya evio, ali wasangua pepi ni wewe pantu amanine nangue uli ni lazima sana yakue kuliko musita unge onse. Mu Malumbo ange, Daudi waandikile evi: “Kolonghania mensozi ane mu lichupa lyobe lya mpapa.” (Malum. 56:8) Yehova ali wamona musita luuli waema. Ali wakwemena sana, kabili ali waunvua misa kine wewe uli mukwema. Mu mana fulani, wene ali wakolonghania mensozi obe ni kuamona kuya ali a mana nga evelia menda a mana alia ali mu lichupa lya mpapa lelia litweme muntu olia ali mu bulendo mu kaseeba. Lilembo lya Malumbo 139:3 lyalanda evi: “Wewe [Yehova] umanine nzila yane yonse.” Yehova ali wamona nzila yobe yonse, inzi ali wapoza mano ku bintu biweme byuli wakita. (Baeb. 6:10) Juu ya ki? Pantu ali wamona kwikwinda kobe evi kumusansamusia kuya kwali kwa mana.a

⁸ Kupitila azo malembo a kuteekia mutima ali mu Mulandu wakue utungulwilue na mupasi, kulanda kisinka Yehova ali mukulanda evi: “Ntonene umane nangue nkutonene sana, kabili nangue ndi nakwemena.” Inzi, nga vitwamonanga lwa ntanzi, Sataana ali waezia kukulengia uwaze nangue Yehova takutonene. Inzi, bobo ni bufi. Pa kako, kine nsita imo wewe waaluka ni masyaka nangue pange Yehova takutonene, iipuzie evi: ‘Nani umpalile kuswapila? Eba, mpalile kumuswapila “baba wa bufi” ao “Leeza wa kisinka”?’—Yoan. 8:44; Malum. 31:5.

9. Yehova ali wabasininkiziizia ki baalia bamutonene? (Kufuma 20:​5, 6)

⁹ Tontonkania vili vyaiunvua Yehova palua baalia bamutonene. Waza Yehova vyaamulandile Musa ni Baisraeli. (Soma Kufuma 20:​5, 6.) Yehova alaile nangue wakaba kutwalilila kubalangilila ntono ya kisinka baalia bamutonene. Ezio milandu yatusininkiziizia nangue Leeza wa kisinka tavinda ata kanini kwandua kubatona babombi bakue baalia bamutonene. (Neh. 1:5) Pa kako, kine nsita imo uli ni lazima ya kwisininkiziizia nangue Yehova akutonene, upalile kwiipuzia evi: ‘Eba, nene mutonene Yehova?’ Kisia, waza palua keki: Kine wewe umutonene, kabili kine uli waikwinda kumusansamusia, uye wasininkiziizie nangue ni wene akutonene sana. (Dan. 9:4; 1 Bakor. 8:3) Mu milandu inge, kine wewe te uli na masyaka nangue umutonene Yehova, ale juu ya ki uye wali ni masyaka nangue pange wene takutonene? Uye wasininkiziizie kakiine nangue wene wakaba wakutonene sie lyonse, kabili nangue takakusiapo ata limo.

10-11. Yehova atonene wewe uye wakimwene syani kilubula-mulandu? (Bagalatia 2:20)

¹⁰ Tontonkania palua kilubula-mulandu. Yehova waatupeele fwe bantu bupe bwa mana sana musita lwaamutumine Yesu Kristu evi atufwile, ni kwaluka kilubula-mulandu. (Yoan. 3:16) Inzi, eba Yehova waamutumine mwana wakue akufwile ni wewe? Een! Tumone mufuano wakue mutumua Paulo. Languluka nangue wene waakitile mazambi akata ntanzi ya kwaluka Mukristu. Inzi, ata sie kisia kwaluka Mukristu, abanga wapalile kutwalilila kulwisia kusipwililika kwakue ao butope bwakue. (Bar. 7:​24, 25; 1 Tim. 1:12-14) Inzi, waafikiile kumona kilubula-mulandu kuya kyali nga bupe bwaafumiizie Yehova evi kumupeela wene. (Soma Bagalatia 2:20.) Languluka nangue Yehova i waamutungulwile Paulo andike ezio milandu. Kabili, bintu byonse bili mu Bibilia byaandikilue juu ya kutusambilizia. (Bar. 15:4) Milandu yakue Paulo ilangiliile Yehova vyatonene wewe uye wamona kilubula-mulandu, i kulanda, atonene uye wakimona nga bupe bolia bwaafumiizie evi kukupeela. Kine wewe wabamba kukimona evio kilubula-mulandu, uli kukila kusininkizia nangue Yehova akutonene wewe pa lobe.

¹¹ Tuli twamutasia Yehova pantu waamutumine Yesu pa kyalo evi atufwile. Inzi, nsambu inge yaalengiizie Yesu eze panu pa kyalo ni juu ya kubabwilako bange kisinka pa lwakue Leeza. (Yoan. 18:37) Kekio kisinka kibiikile mukati Yehova vyabatonene baana bakue.

YESU WAASAMBILIZIIZIE NANGUE YEHOVA ATUTONENE SANA

12. Juu ya ki tuswapiile nangue Yesu waalondolwele bwino vili Yehova?

¹² Lwabanga wali panu pa kyalo, Yesu waalondolwele bwino vili Yehova. (Luk. 10:22) Tuli ni nsambu ikata ya kuswapila bintu byaasambiliziizie Yesu pa lwakue Yehova. Nga vitumanine, ntanzi ya kwiza pano pa kyalo, Yesu waakitile mabilioni a myaka wali pamo ni Yehova ku muulu. (Bakol. 1:15) Yesu abanga wamanine nangue Baba wakue amutonene, kabili abanga wamona vyabanga walangilila ntono yakue ku ba malaika ba kisinka ni ku baana bakue bonse ba kisinka panu pa kyalo. Yesu waatusambiliziizie ki evi tusininkizie nangue Leeza atutonene?

13. Yesu atonene fwefue tumumone syani Yehova?

¹³ Yesu atonene tumumone Yehova nga evelia wene vyali wamumona. Mu bitabu bya Nsimiko, Yesu wamukuuta Yehova nangue “Baba,” “Baba wane,” “Baba wenu,” pamo ni “Baba wetu” mara ikilile pa mia imo ni makumi sita (160). Kabili, musita lwabanga walanda ni basambi bakue, Yesu abanga wabombia bobu bulanzi, “Baba wenu” ao “Baba wenu wa ku muulu.” (Mat. 5:16; 6:26) Ntanzi Yesu tanaize pano pa kyalo, babombi bengi ba kisinka babanga bamukuuta Yehova nangue: ‘Wa Maka Onse,’ ‘Wa pa Muulu Sana,’ ‘Kabumba Mukulu,’ ni meena ange apaleene ni azo. Inzi, lingi Yesu abanga wamukuuta Yehova nangue ‘Baba’ wetu. Bobo bulanzi bulangiliile nangue Yehova atonene babombi bakue baye baiunvwile bali pepi nakue, nga evelia mwana vyali waiunvua kuya wali pepi ni baba wakue wa ntono. Pa kako, Yesu abanga wasambilizia nangue Yehova atutonene nga evelia Baba aweme vyali wasangua wabatonene baana bakue ba mana. Tumone mifuano ibili elia yaabombiziemo Yesu liina “Baba.”

14. Yesu waalandile ki kilangiliile nangue Baba wetu wa ku muulu amumwene kila umo wetu kuya wali wa mana? (Mateo 10:​29-31) (Mona ni foto.)

¹⁴ Tumonenke mufuano wa kwanza mu milandu yakue Yesu, elia ili mu lilembo lya Mateo 10:​29-31. (Soma.) Minsole ni toni tunini tusikamutonapo Yehova ata limo ao kumupupa. Inzi, Baba wetu ali wamona ata sie munsole umo kuya wali wa mana, kabili ali wamana kine waponena pansi. Kine Yehova ali wamona koni kanini nga kako kuya kali ka mana, tupalile kuya twasininkiziizie nangue ali waemena kila umo pa kati ketu pantu tumutonene, kabili pantu tuli twamupupa wene. Kabili, Yesu waalandile nangue Baba wetu amanine bwingi bwa misisi ili ku mutue wa kila muntu. Pantu Yehova amanine ata sie tuntu tunini pa lwetu, tupalile kuya twasininkiziizie nangue ali watwemena sana. Kulanda kisinka, Yesu atonene tuye twasininkiziizie nangue Baba wetu wa ku muulu amumwene kila umo wetu kuya wali wa mana.

15. Milandu yakue Yesu ili mu lilembo lya Yoane 6:44 ili yakubwila ki pa lwakue Baba obe wa ku muulu?

¹⁵ Tumone mufuano wa bubili molia mwaabombiizie Yesu liina “Baba.” (Soma Yoane 6:44.) Baba obe wa ku muulu waakukwasiizie evi wewe umumane ni kumutona wene. Juu ya ki waakitile evio? Pantu waamwene mibele iweme mu mutima obe. (Miil Bat. 13:48) Musita Yesu lwaalandile milandu ili mu Yoane 6:​44, pange abanga walandila palua milandu yakue Yehova elia ili mu lilembo lya Yeremia, lelia liimaniine mutue wa leli lyasi. Mu lelio lilembo, Yehova waabalandile evi bantu bakue: ‘Mikulile kuli nene kupitila ntono ya kisinka.’ (Yer. 31:3; palania ni Hosea 11:4.) Wazanke palua mana ya ezio milandu. Baba wetu wa ntono wa ku muulu atwaliliile kumona bintu biweme muli wewe belia byusivinda kumona we mwine.

16. (a) Yesu watusambilizia ki, kabili juu ya ki tupalile kumuswapila? (b) Kunti wakita ki evi ukile kusininkizia nangue Yehova i Baba olia uuli nakue lazima? (Mona ni kisanduku “Baba Olia Utuli Nakue Lazima.”)

¹⁶ Kupitila kulanda nangue Yehova ni Baba wetu, mu mana fulani, kili nga evelia Yesu ali mukukulanda evi: “Yehova te Baba wane sie, inzi ni wewe ni Baba obe, kabili nene nakusininkiziizia nangue wene akutonene, kabili ali wakwemena sana wewe pa lobe.” Kine nsita imo wewe waaluka ni masyaka kine kakiine Yehova akutonene, languluka milandu yaalandile Yesu, kabili muswapile, pantu wene ali walanda lyonse kisinka, kabili i amumanine bwino sana Baba wetu.—1 Pet. 2:22.

IKWINDE EVI UTWALILILE KUYA WASININKIZIIZIE NANGUE YEHOVA ATUTONENE

17. Juu ya ki tupalile kwikwinda evi tutwalilile kusininkizia nangue Yehova atutonene?

¹⁷ Tupalile kwikwinda evi tuye twasininkiziizie nangue Yehova atutonene. Nga vitwamona mu leli lyasi, Sataana, mulwani wetu, ali wakita maka akue onse evi atulekezie kumubombela Yehova. Pantu ali waikwinda evi kututyona mutima, wene wakaba kutwalilila kwezia kulengia tuye twawaza nangue Leeza tatutonene. Te tupalile kuzumina bufi bwakue Sataana.—Yob. 27:5.

18. Kunti wakita ki evi ukile kusininkizia nangue Yehova akutonene?

¹⁸ Evi ukile kusininkizia nangue Yehova akutonene, upalile kutwalilila kupepa evi kumulomba akukwasie wimone nga evelia wene vyali wakumona. Uye watontonkania sana palua malembo ali mu Bibilia, alia alangiliile Yehova vyali wabeemena sana baalia bamutonene. Languluka vyali wakita kine muntu wamutona; wene tavinda ata kanini kwandua kumutona mubombi wakue olia amutonene. Mana nangue kilubula-mulandu ni bupe bwaafumiizie Yehova evi kukupeela wewe. Kabili, nga vyaalandile Yesu, uye waswapiile nangue Yehova ni Baba obe wa ku muulu. Pa kako, kine muntu wakwipuzia evi: “Eba, usininkiziizie nangue Yehova akutonene wewe kakiine?” Wakaba kwasuka bila kusiita nangue, “Een, antonene! Kabili, kila busiku ndi nakita maka ane onse evi kumulangilila nangue ni nene mutonene.”