Binelíwami 16

Sinibí nijéwilia Onorúami

¿Piri mi isíisaré kiti mi Onorúami amígowala nima? (1, 2)

¿Piri ju echi katúwiliami Onorúami yúa? (1)

¿Chu kabú mi pakótami nísaré? (2)

¿Chúriká mi oméroma narea echi jiwérala kiti mi sinibí nijéwima Onorúami? (3)

1. Kiti mi Onorúami amígowala nima, ami we aʼlá machisáré echi bichíwali echi Biblia kitra (1 Timoteo 2:3, 4), bichiika echi namuti japi mi ma bineli (Hebreos 11:6), omona nílisa japi mi cha isiili chabéi (Hechos 17:30, 31) alí ma ke isiá echi namuti chati japi mi isíiami nili chabéi (Hechos 3:19). Ayénachó ami we nakisáaká Jeobá, mi kuʼírimalé kiti mi katúwima echi yúa. Echi ko aniwáami ju japi mi mujé bineli amachíkima Onorúami alí mi ané kiti mi isíinali japi riká echi nakí (Mateo 16:24; 22: 37).

2. Ma mi binésaká echi Onorúami Raʼicháala alí ma mi katúwika isiili echi yúa, alí biché mi ma pakótami nísaré (Mateo 28:19, 20). Echi pakóliwami ko ju kiti sinéami machimea japi mi katúwika isiili Jeobá yúa. Pe echi bi pakótami nísaré japi ma omero machiyá binói niraa a sinibí nijéwinalaká Onorúami. Japalí bilé pagótami pakótami ju, suwaba echi ripokala nutuwísaré baʼwechi pe teili bia (Marcos 1:9, 10; Hechos 8:36).

3. Ma katúwisa, Jeobá ko nakí japi mi bitélima japi riká mi aneli (Salmo 50:14; Eclesiastés 5:4, 5). Echi Diablo ko nakiméalé kiti mi ke nijéwima Jeobá (1 Pedro 5:8). We be nalí muliwi Onorúami amachíkika (Filipenses 4:6, 7). Biné echi Raʼicháala sinibí rawé (Salmo 1:1-3). Sinibí muliwi echoná congregación (Hebreos 13:17). Ami suwaba isíisaká jepuná, ami narema Jeobá nikúurala kiti mi sinibí nijéwima echi. Ami oméromalé isiá sinibí rawé japi Onorúami taní.

[Ruyelíwami japi oserúa chukú rilé ayé]