¿Chúsiá we aʼlá ju japi mi pakoma?

Jesús ko binérili japi ta ne bichíwali cristianos nínalaká, ata pakósaré (leeri Mateo 28:19, 20). Nalí, ¿chúriká pakóliwa? Alí, ¿chu isísaré bilé pagótami japi pakónali?

1. ¿Chúriká pakóliwa?

Echi raʼíchali “pakó” griego niraa aniwáami ju “butuwía”. Japalí Jesús pakoli, butuwírami nili echoná bakochi Jordán, alí “ku machínali echoʼná baʼwírali jonsa” (Marcos 1:9, 10). Echi cristianos ne bichíwali ayénachó suwaba butuwí echoná baʼwírali japalí pakó.

2. ¿Piri néwariwéliti japalí bilé pakó?

Japalí bilé pakó néwariwéliti japi ma katúwika raʼíchali Jeobá yúa. Nalí, ¿chúriká ti katuwi Jeobá yúa? Ati raʼicha Onorúami yúa alí ti ané japi ta echi bi nijéwipo sinibí, echi riká ti nokisáré japalí ti kecho pakó. Alí japalí raʼicha Onorúami yúa, echi japi pakónali ané Jeobá japi sinibí nijéwima alí isima japi echi nakí. Ayénachó nijéwima japi Jesús anili: “ʼYemi nakisáagá olánala mapurigá Nijeni nakí [...] ketasi waminabi olasi mapurigá ʼyemi aboni chopi nakí olánala” (Mateo 16:24). Jiti katúwika raʼíchali Jeobá yúa alí pakoli, echi pagótami ko Jeobá amígowala nima alí ayénachó sinéami japi echi nijewi.

3. ¿Piri isísaré bilé japi pakónali?

Ami pakónalaká, bachá mi binésaré Jeobá jitra alí mi echi bichíwisaré (leeri Hebreos 11:6). Aminabi mi binésaká, we mi bichíwima alí mi we galema Jeobá. Jepuná ko mi iʼwírima jiti mi siminálima nawisasia alí mi nijéwinalima suwaba japi aní echi Biblia (2 Timoteo 4:2; 1 Juan 5:3). Japalí echi pagótami sinibí “ne suwaba galá [olá] mapurigá Riosi nakí” echalí jonsa ma omérima katúwika raʼicha Onorúami yúa alí pakoa (Colosenses 1:9, 10).a

AMINABI NATABO JAPI TA BINÉ

4. Chúriká pakoli Jesús alí piri ta biné

Ma binepo chúriká pakoli Jesús. Leérisi Mateo 3:13-17 alí raʼichasi jepuná jitra:

• ¿Acha bilé taa muchi nili Jesús japalí pakoli?

• Japalí Jesús pakótami nili, ¿pe taa baʼwí roʼeli moʼólachi o chúriká pakoli?

Ma pakosa Jesús ko chotásili isiá echi nóchali japi Onorúami nuleli. Leérisi Lucas 3:21-23 alí Juan 6:38, alí raʼichasi jepuná jitra:

• Ma pakosa, ¿piri nóchali nalí we natéami niraa ineli Jesús?

5. Mujé a omérima pakoa

Ne kulí ko ami majaa níliré katúwika raʼichia Jeobá yúa alí pakoa. Nalí, aminabi mi binésaká Jeobá jitra, ma mi ke majama alí mi pakónilima. Jiti mi machimea jaré pagótami japi a echi riká nokali inesi echi VIDEO.

VIDEO: Iʼwérili isí jiti mi Jeobá amígowala nima (1:11)

Leérisi Juan 17:3 alí Santiago 1:5, alí raʼichasi jepuná jitra:

• Bilé pagótami pakónalaká, ¿piri isísaré?

1. Ati katuwi Jeobá yúa japalí ti ané japi ta sinibí echi bi nijéwipo.

2. Japalí ta pakó ata néwariwéliti japi ta ma katúwika raʼíchali Onorúami yúa.

6. Japalí ti pakosa ati ju japi riká Jeobá téemala

Japalí ti pakó, echalí jonsa, ati ju japi riká téemala sinéami hermanos yúa japi piré omáana Wichimóbachi. Tákoré ti jaré ko jaréana mi piréami ke, sinéami tamujé chopi riká bichiwi alí nijewi japi riká aní echi Biblia. Leérisi Salmo 25:14 alí 1 Pedro 2:17, alí raʼichasi jepuná jitra:

• ¿Piri namuti aʼláala mi narema ami pakósaká?

JAPI MI BINELI

Jesús ko anili japi a ta ne bichíwali cristianos nínalaká ati pakósaré. Jiti echi riká nokiboa, bachá we bichíwisaré Jeobá, nijéwisaré japi echi nulá alí echi yúa katúwika raʼichásaré.

Piri mi animea

• ¿Chúriká pakóliwa alí chúsiá we natéami ju japi ta echi riká nokiboa?

• ¿Chúsiá ke chopi yiri ju katúwika raʼichia Jeobá yúa alí pakoa?

• ¿Piri bachá isísaré bilé pagótami kecho katúwika raʼichia Jeobá yúa alí pakoa?

JITI MI CHE BINEMA

Ami machimea japi aní echi Biblia japi chúriká pakóliwa alí japi nata wiká pagótami.

“¿Chúriká pakóliwa alí piri aniwáami ju?” (Oselí japi nirú echoná jw.org)

Checho ku biné jaré namuti japi mi isísaré jiti mi pakoma.

“Ati we galésaká Jeobá alí natéami niraa inésaká japi echi isili, ati pakopo” (Echi Nawésami, marzo 2020)

Leeri piri namuti iʼwírili bilé rijoi jiti pakoma.

“Echi ko nakiyé japi nijé binoy bineka machimea chu iyiri nalí ne bichíwali ju” (Echi Nawésami, 1 inárachi febrero 2013)

Iné chúsiá aʼlá ju japi mi pakoma alí piri mi isísaré.

“¿Achi ni ma pakósaré?” (Japi machinali echi kúruwi alí iwé. Busuréliami japi iʼwírima [volumen 2], capítulo 37)