Echi Onorúami amígowala ko pirélima jenaʼí Wichimóbachi we baʼóachi

Echi Wichimóbachi we baʼóami tasi nímaré japi riká jipi ju echi kawí. Onorúami ke sineti nakili japi jepuná kawírili nirúlima karúa ikiwáami, okolí alí risóaniliwami. Ma mulipi Onorúami niwama jepuná kawí we baʼóami. ¿Churiká nímalé? Ma ineba chú aniyá echi Biblia.

Pagótami aʼláala. Echi Onorúami amígowala ko pirélima jenaʼí Wichimóbachi we baʼóachi. Jepuná ko nokimea we alabé namuti anakupi niraa alí pirélima katúwika echi namuti alabé japi Jeobá bineri (Proverbios 2:21).

Né wabé nirúlima koʼwáami. Echoná Wichimóbachi we baʼóachi, ke wesi lochema. Echi Biblia aní: “Arí biché aboni ma ke tasi lochema, nibiré barámama” (Apocalipsis 7:16).

We aʼláala kalí alí nóchali japi ta kaleba. Echoná Wichimóbachi we baʼóachi, sinéami echi pagótami a olama binói kalila, alí sinéami pagótami olama bilé nóchali japi kalema (Isaías 65:21-23).

Kilíi niraa piréliwami omáana Wichimóbachi. Ke siné che nakómalé alí ke che siné suwimea nakoka. Echi Onorúami Raʼicháala ko aní: “ [Onorúami ko] suwábama echi weli nakówami” (Salmo 46:8, 9).

Ke itélima nawilí. Echi Biblia ko aní: “Ke bilé wesi pagótami [echoná Wichimóbachi we baʼóami] animea: ‘Nawiluniʼ” (Isaías 33:24). Kecho a nirúlima busukachi alí pagótami japi ke kipusú alí japi ke omero raʼicha alí japi ke omero éena (Isaías 35:5, 6).

Ke nirúlima omonáliwami, okolíwami, kecho mukuwáami. Echi Biblia aní: “Echarí jonsa echi pagótami ma ke tasi suwimea, nibiré auché narákama, nibiré auché risoa animea, nibiré auché okoma; mapu kiti suwaba mapu ikí chabénala nirúari ko, ma káraga simírili” (Apocalipsis 21:4).

Ke itélima pagótami chati. Jeobá ko aní: “Arí biché jepuná jaré chati oráami waminá simama echoná japoná aboni sinibí niraa kastigo iyárami nima. Arí biché echi jaré alabé oráami simama echoná japoná aboni sinibí niraa pirérama” (Mateo 25:46).

Echi pagótami nakiká nokimea alí riwiika nokimea anakupi niraa. A nirúlima najóriwami. Ma ke che nirúlima risoa oliwáami, nakichíwami alí pagótami korúkami. Né bichíwali echi pagótami né aʼlá nakiká nokimea alí pirélima katúwika japi riká nulá Onorúami (Isaías 26:9).