BINELÍWAMI 54
¿Jepi ju alí piri isimí “echi pioni aʼlá nijéwami alí aʼlá nátaka nóchami”?
“Jesucristo ne Walubela ju” echoná congregación cristiana (Efesios 5:23). Jipi rawé Jesús ko ripá jonsa nulea atí echi japi nijéwami ju jenaʼí Wichimóbachi néeka “echi pioni aʼlá nijéwami alí aʼlá nátaka nóchami” (leeri Mateo 24:45, TNM). Echi “pioni” wilárami ju Jesús jitra, jiti la echi ko a omero nulayá. Nalí tákoré echi riká ju, echi ko nijewi japi Cristo nulá alí ayénachó iʼwiri jaréala cristianos ungidos. ¿Jépuká ju echi pioni? Alí, ¿chúriká tamó iʼwiri?
1. ¿Jépuká ju “echi pioni aʼlá nijéwami alí aʼlá nátaka nóchami”?
Jeobá ko chabé jonsa néeli bilé rijoi o jaré ma, jiti nulema echi puéblowala (Malaquías 2:7; Hebreos 1:1). Japi riká, ma mukusaa echi Jesús, echi apóstoles alí ancianos echoná Jerusalén jawárami nili jiti nulema echoná congregación (Hechos 15:2). Japi riká nili chabéi, jipi rawé kuabi ancianos ju japi nijí suwaba japi ta newalé jiti binepo alí nawisabo Jeobá jitra, alí riwéami ju echi Japi Aʼlá Niseri echi Testigo Jeobá. Echi ko ju “echi pioni aʼlá nijéwami alí aʼlá nátaka nóchami japi wilárami nili echi nuláami [Jesús] jitra jiti nulema” (Mateo 24:45a, TNM). Sinéami echi Japi Aʼlá Niseri chapirúami ju espíritu santo jitra alí buwea muchuwi jiti nulama Jesús yúa echoná Onorúami Gobiérnowala, japalí ma suwisaa jenaʼí Wichimóbachi.
2. ¿Piri ju echi “koʼwáami” japi nijí echi pioni aʼlá nijéwami?
Jesús ko anili japi echi pioni aʼlá nijéwami “iyama koʼwáami [echi auché jaré cristianos] japalí newalé” (Mateo 24:45b, TNM). Japi riká echi koʼwáami japi ta koʼá isimí japi jiwérami nipo alí ke nayupo, echi riká cho echi koʼwáami japi nijí echi pioni tamó iʼwiri jiti binepo Onorúami Raʼicháala jitra, jiti iʼwérika nokiboa nijewia Jeobá alí jiti oméripo nokayá echi nóchali japi Jesús tamó nuleli (1 Timoteo 4:6). Echi koʼwáami ko ti iyáliwa echoná napawíliwachi, waʼlú napawíliwachi, oselichi alí videos japi raʼicha Biblia jitra. Suwaba jepuná tamó iʼwiri machiyá piri nakí Jeobá alí jiti aminabi we aʼlá amigos nipo echi yúa.
AMINABI NATABO JAPI TA BINÉ
Ma inepo chúsiá ti newalé “echi pioni aʼlá nijéwami alí aʼlá nátaka nóchami” japi ayénachó anéliwa Japi Aʼlá Niseri.
Echi Japi Aʼlá Niseri tamó iyá japi ta newalé jiti binepo Jeobá jitra, tamó ané chúriká nokiboa alí iʼwiri sinéami Testigos omáana Wichimóbachi piréami.
3. Echi Onorúami puéblowala napawika nochásaré
Jesús ko nulé echi Japi Aʼlá Niseri jiti echi ko anema echi testigo Jeobá japi chúriká nochama. Echalí bachá siglo, echi congregación cristiana ayénachó echi riká nokali. Inesi echi VIDEO.
Leérisi 1 Corintios 14:33, 40, TNM, alí raʼichasi jepuná jitra:
¿Chúriká nakí Jeobá japi nochama echi puéblowala? ¿Chúsiá mi echi riká nata?
4. Echi pioni aʼlá nijéwami aní chúriká ti nokiboa nawesia
Echi bacháwala cristianos we natéami niraa ineli simíaya nawisasia. Leérisi Hechos 8:14, 25 alí raʼichasi jepuná jitra:
Echalí bachá siglo, ¿jépuká jawárami nili jiti animea chúriká nokimea nawesia?
¿Piri nokali Pedro alí Juan japalí echi apóstoles nuleli jaré namuti?
Echi nóchali wabé natéami japi noká echi Japi Aʼlá Niseri ko ju iʼwiria jiti nawisárami nima echi Onorúami Gobiérnowala. Inesi echi VIDEO.
Jesús ko anili japi we natéami ju simiyá nawisasia. Leérisi Marcos 13:10 alí raʼichasi jepuná jitra:
¿Chúsiá echi Japi Aʼlá Niseri we natéami niraa iné japi ta simabo nawisasia?
¿Chúsiá ti newalé japi “echi pioni aʼlá nijéwami alí aʼlá nátaka nóchami” animea chúriká ti nokiboa nawesia?
5. Echi pioni aʼlá nijéwami aní chúriká ti nokiboa echoná congregaciones
Echi Japi Aʼlá Niseri aní chúriká nokimea echi testigo Jeobá nawesia omáana Wichimóbachi. ¿Chúriká noká? Ma inepo japi riká nokali echi Japi Aʼlá Niseri bachá siglo piréami. Leérisi Hechos 15:1, 2 alí raʼichasi jepuná jitra:
¿Piri namuti jitra naʼáwili echi cristianos bachá siglo piréami?
Jiti ku akaréwima echi namuti, ¿jépuká iʼwírili tánili Pablo, Bernabé alí jarecho si cristianos?
Leérisi Hechos 15:12-18 alí 23-29, alí raʼichasi jepuná jitra:
Kecho aniyá japi chúriká nokimea, ¿piri nokali echi Japi Aʼlá Niseri bachá siglo piréami? (Inesi echi versículos 12, 15 alí 28).
Leérisi Hechos 15:30, 31 alí 16:4, 5, alí raʼichasi jepuná jitra:
¿Chu nokali echi cristianos bachá siglo piréami japalí kipuli japi anili echi Japi Aʼlá Niseri?
Jiti we nijéwami nili, ¿chúriká iʼwírili Jeobá?
Leérisi 2 Timoteo 3:16 alí Santiago 1:5, alí raʼichasi jepuná jitra:
¿Piri namuti noká echi Japi Aʼlá Niseri jipi rawé jiti machimea chúriká nokimea?
JAPI ANÍ JARÉ PAGÓTAMI: “Nijewia echi Japi Aʼlá Niseri ko ju japi riká nijewia echi pagótami”.
¿Chúriká mi machí japi Jesús ju japi nulé echi Japi Aʼlá Niseri?
JAPI MI BINELI
Echi Japi Aʼlá niseri ko ju “echi pioni aʼlá nijéwami alí aʼlá nátaka nóchami” japi Jesús wilali. Alí echi ju japi ané sinéami testigos omáana piréami japi chúriká nokimea nóchilia Jeobá, alí japi nijí suwaba namuti japi ta newalé jiti binepo Jeobá jitra.
Piri mi animea
¿Jépuká wilali echi “pioni aʼlá nijéwami alí aʼlá nátaka nóchami”?
¿Chúriká tamó iʼwiri echi Japi Aʼlá Niseri?
¿Achi mi mayé japi echi Japi Aʼlá Niseri ju “echi pioni aʼlá nijéwami alí aʼlá nátaka nóchami”?
JITI MI CHE BINEMA
Biné chúriká noká echi Japi Aʼlá Niseri jiti we aʼlá nokimea echi nóchali japi olá.
“¿Piri ju echi Japi Aʼlá Niseri echi Testigo Jeobá?” (Oselí japi nirú echoná jw.org)
Iné chu isimí echi Japi Aʼlá Niseri jiti suwaba japi ta naré jiti binepo Jeobá jitra ne bichíwali nima.
¿Chúriká iné echi Japi Aʼlá Niseri echi nóchali japi Jesús nuleli?
¿Chúriká newaré echoná napawíliwachi alí asambleas japi Jeobá iʼwiri echi Japi Aʼlá Niseri?