Chúriká tamó iʼwiri echi libro Job japalí ti risoa nili

1, 2. ¿Chúsiá japi aní echoná libro Job we natéami ju?

¿ACHI mi kulí leérili echi libro Job? Tákoré oserúami nili 3,500 bamíali jonsa, wiká pagótami a bijí we natéami niraa iné jarecho libros yúa. Echi pagótami we simárika raʼicha echi jitra japi osali echi libro, jiti nee raʼíchili japi ke jilí ju inámilia, nalí ayénachó we simárika aní alí we natéami namuti. A bichíwali ju japi Moisés osali echi libro, nalí japi aní echoná Jeobá níwala ju (2 Tim. 3:16).

² Echi libro Job bilé libro we natéami ju japi olá echi Biblia. ¿Chúsiá? Bilé namuti ko ju, japi tamó iʼwiri aʼlá inamia japi echi ángeles alí echi pagótami, natásaré achi nijéwima Jeobá jiti we galé echi alí echi riwalá. Bilecho namuti ko ju japi tamó iʼwiri machiyá echi aʼláala namuti japi chu isíami ju Jeobá. Japi riká, echi ko we galéami ju, we machíami, wachíniga isíami alí omériami. Japi riká, echoná libro Job riwá Jeobá “Suwaba Omériami” 31 niraa, jepuná wabé wiká ju suwaba jaréala libros yúa napawika niraa. Echi bikiá namuti ko ju, japi echoná libro Job ruyé chúsiá Jeobá riwé japi ta risoa nílipo alí jarecho namuti we natéami.

3. ¿Chúriká tamó iʼwiri binea echi libro Job?

³ Leeria echi libro Job ju japi riká ko moyenia bilé ripá rabó. Japalí mi ma ripá rabó wilí, mujé ko omeri we aʼlá inea piri nirú omáana. Echi riká cho, leeria echi libro Job tamó iʼwiri aʼlá machiyá piri nata Jeobá japalí ti risoa nili. Jenaʼí binepo chúriká japi ikili Job a keʼré iʼwírili jaré israelitas chabé piréami alí chúriká tamó iʼwiri jipi. Ayénachó binepo chúriká ti omeri néea jepuná libro iʼwírimia jarecho.

ONORÚAMI RIWELI JAPI JOB RISOA NÍLIMA

4. ¿Chúsiá Job sinúrika nili echi israelitas yúa japi mochili echomí Egipto?

⁴ Job ko biteili echomí Uz riwéachi, japi a keʼré mulipi nili echomí norte Arabia alí mulipi echoná weʼé japi Jeobá iyama riweili echi israelitas, echalí rawemti japalí echi israelitas pioni nili echomí Egipto. Job ko a we nijéwili Jeobá, ke ko japi riká echi israelitas japi chotásili nijewia jarecho dioses echoná Egipto (Jos. 24:14; Ezeq. 20:8). Jiti la, Onorúami ko jéanili echi jitra: “Tasi wesi nirú jenaʼí wichimóbachi japi riká Job” (Job 1:8).a Job ko wiká winomíwami nili, we riwíwitami alí bilé rijoi we natéami jarecho pagótami yúa japi pireili echomí Uz (Job 1:3). ¡Satanás ko we iyoa níliliré Job yúa jiti echi ko we nijéwami nili Onorúami, tákoré we natéami nili alí winomíwami!

5. ¿Chúsiá Jeobá riweli japi Job risoa nílima? (Job 1:20-22; 2:9, 10).

⁵ Satanás ko anili japi Job risoa nílisaká, riwema nijewia Jeobá (Job 1:7-11; 2:2-5). Jiti la, tákoré Jeobá we galeli Job, riweli japi Satanás néwariwélitima achi bichíwali ju japi anili Job jitra (Job 1:12-19; 2:6-8). Jiti la Satanás isili japi echi Job bukula namuti suwimea alí chikónirami nima, japi echi 10 kúchuwala suwimea alí japi nayuma echi chánali jitra omáana ripokala. Nalí jepuná namuti ke isili japi Job riwema nijewia Jeobá (leeri Job 1:20-22; 2:9, 10). Pe aminana, Jeobá ko isili japi Job ku saʼwimea, ku riwíwitami nima echi pagótami jitra, ku olama wiká namuti alí 10 kúchuwala. Ayénachó isili japi Job bitélima auché 140 bamíali, jiti la echi ko ineli echi binoy usúchuwala alí echi kúchuwala japi olali echi usúchuwala (Job 42:10-13, 16). Nalí, ¿chúriká japi ikili Job iʼwíriliré jarecho Onorúami siérvowala chabé piréami alí chúriká tamó iʼwiri jipi?

6. ¿Chúriká japi ikili Job iʼwíriliré echi israelitas? (Ayénachó iné echi dibujo).

⁶ Chúriká iʼwíriliré echi israelitas. Echi israelitas we risoa nílili echomí Egipto. Japi riká, natabo Josué alí Caleb jitra. Japalí kúruwi nili, echi ko pioni nili alí miná ko 40 bamíali járili echoná desierto jiti jaréala israelitas ke nijéwili. Echi israelitas machílaká suwaba namuti japi ikili Job alí echi aʼláala namuti japi nareli pe aminana, jepuná iʼwírili echi alí ayénachó jaréala israelitas japi pireili pe aminana aʼlá inamia jépuká ju echi japi isimí japi ta risoa nílipo. Ayénachó aʼlá machili chúsiá Onorúami riwé japi echi pagótami risoa nílima alí japi echi ko we galé echi japi sinibí nijéwami ju tákoré isini kaachi we jilí ju, alí japi iyá namuti aʼláala.

7, 8. ¿Chúriká iʼwiri echi libro Job echi japi risoa nili? Ruyé bilé ejemplo.

⁷ Chúriká tamó iʼwiri jipi. Jipi rawé wiká pagótami ma ke bichiwi Onorúami jiti ke inami chúsiá ikí wiká chati namuti echi pagótami aʼláala. Ma binepo Hazel jitra,b bilé mukí Ruanda bitéami. Japalí tiwé nili, echi ko bichiwie Onorúami. Nalí miná ko riweli bichiwia jiti ikili wiká namuti chati. Echi wénwala ku rojali alí echi iyela niwili bilecho rijoi yúa japi risoa olayé Hazel. Miná ko bilé rijoi tábili echi. Japalí Hazel iʼwírili aali echoná religión japoná simiyé, ke iʼwíritami nili. Siné rawé, echi ko osélili bilé carta Onorúami japoná jéaneli: “Ani mi yúa raʼíchiki alí ni iʼwérili isili aʼlá isiá, nalí mujé ko isili japi ni risoa nílima. Jiti la ni mi riwema alí ni isima japi riká nijé binoy nakí jiti ni kaníliami nima”. Japi riká Hazel, wiká pagótami ikaleka aneri Onorúami jitra, jiti la bichiwi japi echi ju japi isimí japi ta risoa nílipo. ¡We ti omona nili jiti echi ko ke machí echi bichíwali Onorúami jitra, alí ta iʼwírinali echi!

⁸ Nalí echi libro Job jitra, ata bineli japi Jeobá ke isimí japi ta risoa nílipo, nalí echi Satanás. Ayénachó ti bineli japi ta ke natásaré japi echi pagótami risoa ikí jiti cha nokali, jiti echoná Biblia aní japi “sinéami karú ikí isini kaachi alí ke wesi machí chu kabú echi ikimea” (Ecl. 9:11; Job 4:1, 8). Alí ti bineli japi ta ke riwésaká nijewia Jeobá japalí ti ikí namuti jilírami, tamujé ko iʼwiri jiti ke cha riká raʼichárami nima echi jitra alí ti néwariwéliti japi Satanás ikaléami ju (Job 2:3; Prov. 27:11). Ayénachó, echi Biblia tamó binérili chúsiá tamujé risoa ikí alí echi japi ta galé. ¡Ati waʼlú matétara iyá Jeobá echi jitra! Alí, ¿piri ikili echi Hazel jitra? Echi ko chotásili binea echi Biblia echi testigo Jeobá yúa alí bineli japi Onorúami ke isimí japi echi risoa nílima. Echi ko jéanili: “Ani raʼíchiki Jeobá yúa ne sulachí jonsa alí ni aneki japi ni ke ne bichíwali echi riwénali. Nalí echi riká ni isiki jiti ni ke aʼlá machiyé echi jitra. Jipi ko ani machí japi Jeobá we tamí galé alí we ni kanila bité”. ¡Ati we kanili machiyá japi Jeobá ko ke isimí japi ta risoa nílipo! Jipi ko binepo chúriká echi libro Job tamó iʼwiri ibili niraa tamujé japalí ti risoa nili.

CHÚRIKÁ TAMÓ IʼWIRI ANACHIA JAPI IKILI JOB

9. Ruyé chúriká biteili echi Job japalí jilírami namuti ikili (Santiago 5:11).

⁹ Natabo japi Job bineli atí nasipa echoná napisórili, omáana ripokala olá chánali alí rimucha atí okoa. Machí newaré echi ochilá, alí echi sapala biká wichí echi nayulí jitra. Echi ko ke jiweria nili alí sikolí asíkami jitra usú echoná japoná chiʼwáami ju. Nalí Job ko ke bi iʼwérili isimí jiti ke mukumea, echi ko anachi alí ke riwé nijewia Jeobá alí bichiwia (leeri Santiago 5:11, TNM). ¿Piri iʼwírili Job jiti anachama?

10. ¿Chúriká ti machí japi Job we aʼlá Jeobá amígowala nili?

¹⁰ Job ko ke majali ruyea Jeobá suwaba japi inílili (Job 10:1, 2; 16:20). Japi riká, echoná capítulo 3 ata iné japi echi ko risoa nílika aneli Jeobá suwaba echi chati namuti japi ikili, jiti echi ko nátili japi Jeobá iyiri nili. Miná ko, bikiá echi amígowala wisabé aneli Job japi Onorúami castigo iyali echi jitra japi isili. Nalí Job aminabi aniyé japi echi ko we nijéwami nili. Jaré namuti japi Job anili néwariwélitili japi echi ko nátili japi wabé wachíniga isíami nili Onorúami yúa (Job 10:1-3; 32:1, 2; 35:1, 2). Nalí Job ayénachó anili japi echi ko ke nátika raʼíchili japalí iʼwérili isili binoy ku nimía (Job 6:3, 26). Echoná capítulo 31, ata iné japi echi ko nakiyé japi Jeobá kipuma echi alí animea japi wachíniga isíami ju (Job 31:35). Nalí be, Job ko ke iʼwérili anesa riweili Onorúami japi ruyema chúsiá risoa nílili.

11. ¿Chúriká isili Jeobá japalí raʼíchili Job yúa?

¹¹ Jipi ko ti machí japi echi namuti japi Job anili, néwariwélitili japi echi ko we aʼlá Jeobá amígowala nili alí japi we bichíwili japi Jeobá ko machili japi echi ko we nijéwami nili. Miná ko Jeobá isili japi we ikamea alí raʼíchili Job, nalí Jeobá ko ke ruyeli Job chúsiá risoa nilie alí ke cho castigo iyali jiti anili japi echi inílili o jiti ke aʼlá raʼíchili. Jeobá ko nalí we simárika raʼámili Job japi riká isimí bilé onolá echi ranala yúa. Echi riká, echi ko machili japi ke machíami nili alí japi ke nátika raʼíchili (Job 31:6; 40:4, 5; 42:1-6). Nalí, ¿chúriká japi ikili Job iʼwíriliré jaré pagótami chabé piréami alí chúriká tamó iʼwiri jipi?

12. ¿Chúriká japi ikili Job iʼwíriliré echi israelitas?

¹² Chúriká iʼwíriliré echi israelitas. Natabo Moisés jitra. We jilí nili echi jitra nulea sinéami echi israelitas, wisabé niraa echi israelitas ke nijéwili Jeobá alí risoa nílitili Moisés. Nalí echi ko ke nili japi riká echi israelitas japi wisabé niraa cha riká raʼíchili Jeobá jitra, nalí mulíwili Jeobá alí aneli suwaba japi echi inílili (Éx. 16:6-8; Núm. 11:10-14; 14:1-4, 11; 16:41, 49; 17:5). Ayénachó anáchili japalí Jeobá raʼámili jiti ke aʼlá isili. Japi riká, japalí echi israelitas mochili echomí Cadés, a keʼré japalí ma 40 bamíali sírili echoná desierto, Moisés ke aʼlá nátika raʼíchili alí ke walubéala aneli Jeobá (Sal. 106:32, 33). Jiti la, Jeobá ko ke riweli japi bakimea echoná weʼé japi iyama riweili (Deut. 32:50-52). Moisés ko we omona níliliré echi jitra, nalí ke niráami nili alí a nijéwili japi Jeobá aneli. A keʼré japi ikili Job ayénachó iʼwírili anachia echi jilírami namuti echi jaréala israelitas japi pireili pe aminana. Echi israelitas a omérili natia japi ikili Job alí binea jaré namuti we natéami, japi riká ruyea Jeobá suwaba japi inili, ke natia japi wabé aʼláala ju Onorúami yúa alí nijewia japalí echi raʼami.

13. ¿Chúriká japi ikili Job tamó iʼwiri anachia? (Hebreos 10:36).

¹³ Chúriká tamó iʼwiri jipi. Japi ta cristianos ju ayénachó ti newalé anachia (leeri Hebreos 10:36, TNM). A keʼré japi ta we nayuli, omona nili o majaa nili natia wiká namuti, o tamujé téemala ikí jarecho si namuti jilírami. Ayénachó a keʼré japi bilé tamujé téemala o bilé amigo mukuli o tamujé ikí namuti jilírami. Alí a keʼré bilé animea o isima namuti japi aminabi tamó risoa nílitima (Prov. 12:18). Nalí be, echoná libro Job ati biné japi ta omeri ruyea Jeobá suwaba japi ta inili alí bichíwika japi echi ko a tamó kipuma (1 Juan 5:14). Ati anisáaká bilé namuti japi ke aʼlá ju japi riká isili Job, Jeobá ko ke tamó yúa iyoma. Nalí echi ko tamó iyama jiwérili alí machiwáami japi ta newalé anachamia (2 Crón. 16:9; Sant. 1:5). Japi riká isili Job yúa, a inésaká bilé namuti japi ta aʼlá ku nokisáré, Jeobá ko tamó iʼwírima néeka binoy Raʼicháala, binoy organizaciónwala, bilé anciano o bilé amigo japi we machíami ju. Japalí Jeobá tamó raʼami, ati néwariwélitisaré japi ta anacha (Heb. 12:5-7). Kipúa echi busuréliami japi Jeobá aneli we iʼwírili Job, alí ayénachó we tamó iʼwírima ke niráami niya alí nijewia echi busuréliami japi ta iyáliwa (2 Cor. 13:11). ¡Ati wiká namuti biné echi jitra japi ikili Job! ¿Chúriká ti omeri néea echi libro Job iʼwírimia jarecho? Ma inepo.

NÉEPO ECHI LIBRO JOB IʼWÍRIMIA JARECHO

14. ¿Chu iyiri ju bilé namuti japi chúriká ti ruyé jarecho chúsiá ti risoa nili?

¹⁴ Japalí ti nawisasia simía, jaré ko tamó nari chúsiá echi pagótami risoa nilia piré, alí ati we kanili ruyea japi aní echi Biblia. Wisabé niraa ati ruyé japi ikili echoná weʼé we baʼóachi, Edén riwéami. A keʼré japi ta chotasi aniyá japi Satanás, bilé ángel we chati, ikaleka aneli Adán alí Eva alí echi jitra echi ko ma ke nijéwili Onorúami (Gén. 3:1-6). Miná ko ati ruyéiré jiti Adán alí Eva ke nijéwili, sinéami tamujé risoa nili alí suwí (Rom. 5:12, TNM). Alí upá ko ati ruyéiré japi Onorúami ko kilí buwé néwariwélitimia japi ke bichíwali ju japi anili Satanás alí jiti echi pagótami machimea japi pe aminana ma ke risoa nílima alí sinibí pirélima (Apoc. 21:3, 4). Echi riká ruyea we aʼlá ju alí ma iʼwírili wiká pagótami inamia chúsiá ti risoa nili.

15. ¿Chúriká néepo echi libro Job japalí bilé tamó nárisa chúsiá risoa nilia piré echi pagótami? (Ayénachó iné echi fotos).

¹⁵ Bilecho namuti japi chúriká ti omeri ruyea japalí bilé tamó nárisa chúsiá echi pagótami risoa nili, a ju raʼichia Job jitra. Ma chotásimia raʼichia, ati omeri anea japi we aʼlá ju japi riká isili tamó naria echi namuti we natéami. Miná ko, ati omeri anea japi bilé rijoi chabé bitéami Job riwéami, ayénachó echi riká nárika isili japalí risoa nílili alí nátili japi Onorúami iyiri nili japi echi risoa nílima (Job 7:17-21). A keʼré echi pagótami aminabi machinálima inea japi chabé jonsa niruili pagótami japi echi riká cho nárika nokali. Miná ko, ati omeri anea japi Onorúami ko ke iyiri nili japi Job risoa nílima, nalí echi Diablo. Echi nili japi isili japi Job risoa nílima, jiti echi riká néwariwélitima japi echi pagótami nijewi bi Onorúami jiti iyá wiká namuti aʼláala, alí japi echi pagótami risoa nílisaká, riwema Onorúami. Ayénachó ti omeri anea tákoré Onorúami ke iyiri nili japi Job risoa nílima, echi ko riweli japi echi riká ikimea jiti we bichiwi japi echi pagótami a omeri sinibí nijéwami niya alí néwariwélitia japi Satanás ikaléami ju. Alí upá ko, ati omeri anea japi Onorúami ko iyali Job wiká namuti aʼláala jiti sinibí nijéwami nili tákoré we risoa nílili. Sinibí iʼwíripo jarecho aneka japi Jeobá ke iyiri ju japi ta risoa nílipo.

16. Ruyé bilé ejemplo japi néwariwéliti japi chúriká echi libro Job omeri iʼwiria bilé japi we risoa nili.

¹⁶ Ma inepo chúriká echi libro Job iʼwírili bilé rijoi Mario riwéami. Bamíali 2021, bilé hermana nawesia asali néeka echi teléfono alí echi bachá pagótami japi yúa raʼíchili ko nili Mario. Leérili bilé texto alí miná ko ruyeli japi Onorúami ke bi tamó ané chúriká pirélipo pe aminana, nalí ayénachó tamó kipú japalí ti echi yúa raʼicha. Miná ko nárili piri nata echi texto jitra. Mario ko anili japi osayá asali jaré raʼíchali japoná ané echi téemala japi we galé alí japi miná ko ma binoy miʼlimeli nili. Mario jéanili: “Ani bichiwi Onorúami, nalí jipi biʼá ani iníliki japi echi ko tamí riweli”. Japalí echi hermana checho marcárili, echi ko raʼíchili Job jitra japi we risoa nílili, alí Mario ko anili japi leérima suwaba echi libro Job. Jiti la echi hermana ko júulili echi enlace jw.org jiti omérima leeria echoná internet. ¿Chúriká iʼwírili jepuná? Mario ko chotásili binea echi Biblia alí we kanílili aminabi binea echi Onorúami jitra japi néwariwélitili japi we natéami niraa iné echi.

17. ¿Chúsiá mi matétara nijí jiti Jeobá uchali echi libro Job echoná binoy Raʼicháala? (Job 34:12).

¹⁷ Echi Biblia we iʼwiri echi pagótami sinúrika ku pirelia alí ku kaníliti japi risoa nili (Heb. 4:12). Ati waʼlú matétara iyá Jeobá jiti uchali echoná binoy Raʼicháala japi ikili Job (Job 19:23, 24). Echi libro Job tamó ruyé japi “Onorúami ke siné chati isíami ju” (leeri Job 34:12). Ayénachó tamó bineri chúsiá riwé japi ta risoa nílipo alí chúriká anachabo. Alí tamó iʼwiri ku kanílitia echi japi risoa nili. Echoná biléala binelíwami binepo jarecho si namuti echi libro Job jitra alí chúriká nokiboa jiti we aʼlá busuré iyabo jarecho.