Nipo japi riká Jeobá japi ke niráami ju

1. ¿Chúsiá we jilí ju bichiwia japi Jeobá ke niráami ju?

JAPALÍ ti nata echi pagótami jitra japi weli jáwami ju jenaʼí Wichimóbachi, ¿achi ti nata japi ke niráami ju? Ke tasi. Nalí be, Jeobá japi Suwaba Omériami ju, ke niráami ju (Sal. 113:5-8). Suwaba japi isimí, néwariwéliti japi ke niráami ju. Jena binelíwami binepo naó namuti japi isíami ju Jeobá alí chúriká echi naó namuti néwariwéliti japi ke niráami ju. Alí inepo chúriká Jesús isili japi riká echi Onolá. Jepuná tamó iʼwírima aminabi muliwia Jeobá alí iʼwérili nokayá ke niráami niya.

JEOBÁ KO NAKÍ JAPI TA ECHI MULÍWIPO

2. ¿Piri tamó bineri Jeobá jitra Salmo 62:8? (Ayénachó iné echi foto).

² We jilí ju raʼichia echi pagótami yúa japi we niráami ju. Echi ko noká japi riká we natéami ka, jiti la wiká we jilí niraa muliwia echi o jaré ko ke tasi muliwi. ¡Nalí Jeobá ke echi riká ju! Jiti ke niráami ju, tamó ané japi ta mulíwipo echi alí japi ta ruyepo suwaba japi ta inili alí japi ta nata (leeri Salmo 62:8). Japi riká bilé onó we galéami we aʼlá kipú japi ané echi kúchuwala, tamó Onolá Jeobá ayénachó we aʼlá kipú japalí echi nijéwami echi yúa raʼicha. Alí isili japi echoná Biblia oserúa ripima wiká oraciones japi néwariwéliti japi ke jilí ju raʼichia echi yúa alí japi echi ko we aʼlá tamó kipú (Jos. 10:12-14; 1 Sam. 1:10-18). Tákoré echi riká ju, a keʼré japi isini kaachi iníliporé japi ta ke raʼichásaré Jeobá yúa jiti ta ke aʼlá noká. ¿Piri tamó iʼwírima echi riká iníliaká?

3. ¿Chúriká ti machí japi Jeobá nakí japi raʼichabo echi yúa?

³ Ati omero raʼichia Jeobá yúa tákoré ti inili japi ke galérami nísaré echi jitra. ¿Chúriká ti machí? Jiti Jesús anili bilé historia japoná ruyeli bilé onolá jitra japi we chilíwiami nili alí olali bilé nolá japi inilie japi ma ke galérami nísaré echi téemala jitra, jiti isili wiká namuti chati. ¿Chu isili echi onolá japalí echi ranala ku bitichí nawali? Japalí ku ineli, “we ʼmaga natépali, ayena cho wabé kaníliga narépali” (Luc. 15:17-20). Jeobá ju japi riká echi onolá. Jiti ke niráami ju, ayó kipú echi japi we omónika raʼicha echi yúa jiti ikí namuti jilírami o jiti omona nili echi chati namuti jitra japi isili (Lam. 3:19, 20). Alí jiti we chilíwiami ju, Jeobá ko sapú iʼwiri ku kanílitimia alí iʼwiri machiyá japi echi ko a we galé alí ku wikawi (Is. 57:15). Alí, ¿chúriká isimí? Echi ko nee echi ancianos, téemala japi Testigos ju alí jarecho hermanos (Sant. 5:14, 15, TNM). Jeobá tamó iʼwiri jiti nakí japi ta mulipi mochibo echi yúa.

4. ¿Chúsiá echi pagótami ke jilí nirali muliwia Jesús?

⁴ Jesús ko isimí japi riká echi Onolá. Japi riká Jeobá, Jesús ke niráami ju. Jiti la, japalí biteili jenaʼí Wichimóbachi, echi pagótami ke majaa nilie muliwia echi alí nárili suwaba japi machinalie (Mar. 4:10, 11). Alí, japalí Jesús nárili piri natie bilé namuti jitra, echi pagótami ko ke majaka aneli japi natie (Mat. 16:13-16). Alí japalí ke aʼlá nokayé, ke majali jiti machili japi Jesús we aʼláala nili, chilíwiami alí kilí buwéami (Mat. 17:24-27). Jiti Jesús sinibí isili japi riká binoy Onolá, echi discípulos aminabi we aʼlá machili chúriká ju Jeobá (Juan 14:9). Jesús jitra bineli japi Jeobá ke ju japi riká echi tiyópachi binériami japi we niráami nili alí ke natéami niraa ineli jarecho. Nalí japi Jeobá ko ke niráami ju alí ke jilí ju echi yúa muliwia.

5. ¿Chúsiá we aʼlá ju japi ta ke niráami nipo?

⁵ ¿Chúriká nokiboa japi riká Jeobá? Japalí ti ke niráami ju, ata noká japi jarecho ke jilí nirama tamó muliwia o raʼichia tamó yúa. ¿Chúsiá? Jiti echi riká niya tamó iʼwiri ke nokayá namuti japi isimí japi jarecho ke tamó mulíwinalima, japi riká korúkami niya, natéami ka nilia alí iyóami niya. Nalí tamó iʼwiri nokayá namuti japi isimí japi jarecho tamó mulíwinalima, japi riká we simá nokáami niya, kilí buwéami alí wikáwiami (Col. 3:12-14, TNM). Alí we natéami ju japi echi ancianos iʼwérili nokimea jiti echi hermanos ke jilí nirama echi muliwia alí yúa raʼichia. Jiti la echi ancianos iʼwérili nokisáré simíaya napawíliwachi echoná salón a omérisaká alí ke ko videoconferencia niraa. Alí iʼwérili nokisáré simíaya nawisasia echi hermanos yúa. Jepuná iʼwírima jiti echi hermanos aminabi machimea echi ancianos alí ke majaa nílima echi yúa raʼichia japalí newalesa.

JEOBÁ KO WE SIMÁ ISÍAMI JU

6, 7. Ruyé bilé ejemplo japalí Jeobá a nijéwili japi tánili echi nijéwami.

⁶ Echi pagótami niráami, nata japi aboi we machíami ju alí ke kipú o ke isimí japi ané jarecho. Tákoré Jeobá we machíami ju alí japi aní sinibí we aʼlá ju, echi ko ke niráami ju alí isimí japi ané jarecho. Japi riká, natabo piri isili Jeobá japalí Míriam alí Aarón cha riká raʼíchili Moisés jitra, echi japi Jeobá wilali. Jeobá ko we iyoli Míriam yúa, jiti echi ko cha riká raʼíchili binoy jitra. Jiti la nayútili lepra jitra. Aarón aneli Moisés japi iʼwírima Míriam, alí Moisés tánili Jeobá japi saʼwema. ¿Piri isili Jeobá? ¿Achi ke kipuli jiti ma anili japi echi riká isima? Echi riká isímili bilé japi niráami ju. Nalí Jeobá ke niráami ju, jiti la nijéwili Moisés alí ku saʼweli Míriam (Núm. 12:1-15).

⁷ Che siné Jeobá néwariwélitili japi ke niráami ju. Bilé profeta jitra aneli echi silíami Ezequías japi nayúa boʼili japi mukumea. Jiti la, echi ko we nalaka tánili Jeobá japi ku saʼwema. ¿Piri isili Jeobá? Jiti we chilíwiami ju, isili japi bitélima che jaré 15 bamíali (2 Rey. 20:1, 5, 6). Jepuná jitra ta biné japi Jeobá ke niráami ju, jiti la kipú alí isimí japi jarecho echi tani.

8. ¿Chúriká Jesús néwariwélitili japi isimí japi riká echi Onolá? (Marcos 3:1-6).

⁸ Jesús ko isimí japi riká echi Onolá. Japalí jenaʼí biteili, Jesús ko sinibí iʼwérili isili iʼwiria echi pagótami japalí aʼlá nili echi riká isiá. Japi riká, ku saʼweli echi pagótami sábado rawé tákoré echi tiyópachi binériami ke nakili (leeri Marcos 3:1-6, TNM). Alí jipi a bijí simá isimí echi congregaciones yúa. Japi riká, echi ko we kilí buwé echi pagótami jiti riwema cha nokayá (Apoc. 2:2-5).

9. ¿Chúriká nokiboa japi riká Jeobá? (Ayénachó iné echi fotos).

⁹ ¿Chúriká nokiboa japi riká Jeobá? Ati iʼwérili nokisáré binea Jeobá jitra jiti natabo alí nokiboa japi riká echi, japi we simá isíami ju (Sant. 3:17, TNM). Japi riká, echi wénwala ke riwésaré japi echi kúchuwala nokimea suwaba japi echi nakí, nalí ke cho iʼwérili anésaré japi nokimea japi ke omeri nokayá. Bilé we aʼlá ejemplo ko ju japi aní Génesis 33:12-14, japoná ruyé japi Jacob bachá nátili echi kúchuwala jitra. Ayénachó, echi wénwala japi ke niráami ju alí japi nata echi kúchuwala jitra, ke ané bilé echi kúchuwala japi nísaré japi riká jaréala. Echi ancianos ayénachó ke iʼwérili anésaré japi jarecho nokimea japi echi aní, nalí nokisáré japi aní wikabéala, a nísaká japi riká aní echi Biblia (1 Tim. 3:2, 3, TNM). Alí sinéami iʼwérili nokisáré riwiwia japi jarecho nata, tákoré sinúrika nata (Rom. 14:1). Ibili niraa tamujé iʼwérili noká nijewia jepuná busuréliami: “Sinéami machisáré japi emi we simá nokáami ju” (Filip. 4:5, TNM).

JEOBÁ KO KILÍ BUWÉAMI JU

10. ¿Chúriká néwariwélitili Jeobá japi kilí buwéami ju?

¹⁰ Ati machiyéeré pagótami we niráami japi ke kilí buwéami ju. ¡Nalí Jeobá ke echi riká ju! Ke nirú bilecho japi wabé kilí buwéami ju japi riká echi. Japi riká japalí biteili Noé, Jeobá ko anili japi buwema 120 bamíali suwábimia echi cha nokáami (Gén. 6:3). Noé ko a séali weelia echi kúchuwala alí niwayá echi arca echi téemala yúa. Alí japalí Jeobá anili japi suwábima Sodoma alí Gomorra, echi ko kilí niraa kipuli Abrahán japalí echi nárili echi jitra. Bilé pagótami we niráami anémili Abrahán: “Mujé ke tamí anésaré japi ni isísaré”. Nalí jiti Jeobá ke niráami ju, we kilí nili Abrahán yúa (Gén. 18:20-33).

11. Japi riká aní 2 Pedro 3:9, ¿chúsiá Jeobá we kilí buwéami ju jipi rawé?

¹¹ Jipi Jeobá ayénachó néwariwéliti japi kilí buwéami ju. Echi ko kilí buwé japi sebama echi rawé suwábimia echi chati namuti. ¿Chúsiá we kilí buwéami ju echi pagótami yúa? “Jiti ke nakí japi ke wesi suwábitami nima, nalí nakí japi sinéami ku roʼima echi yúa” (leeri 2 Pedro 3:9, TNM). ¿Achi we aʼlá nili japi Jeobá kilí buwéami nima? ¡Ayena! Jiti wiká millones pagótami ma machísimi echi, alí ti nakí japi che wiká millones machimea. Nalí Jeobá ke sinibí kilí buwéami nima. Echi ko we galé echi pagótami, nalí ke sinibí riwema japi nokimea japi aboi nakí. Jiti la suwábima echi chati namuti (Hab. 2:3).

12. ¿Chúriká Jesús kilí buwéami ju japi riká Jeobá?

¹² Jesús ko isimí japi riká echi Onolá. Ma wiká miles bamíali jonsa, Jesús ko kilí buwéami ju japi riká echi Onolá. Echi ko ineli chúriká Satanás wiká namuti ikaleka anili Jeobá jitra alí echi pagótami nijéwami jitra (Gén. 3:4, 5; Job 1:11; Apoc. 12:10). Alí ineli japi echi pagótami we risoa nilia piré. Ata machí japi Jesús we inili suwábinilia echi chati namuti japi isimí echi Diablo (1 Juan 3:8). Nalí echi ko kilí buwé japalí chéami Jeobá anema japi ma kárika suwábima echi chati namuti japi isimí echi Diablo. Alí, ¿piri iʼwiri jiti kilí buwema? Bilé namuti ko ju japi Jesús ke niráami ju alí machí japi Jeobá nalí anisáré chu kabú ma aʼlá ju suwabia echi namuti chati (Hech. 1:7).

13. ¿Chúriká néwariwélitili Jesús japi kilí buwéami nili echi apóstoles yúa?

¹³ Japalí Jesús iyénili jenaʼí, we kilí buwéami nili echi apóstoles yúa. Japalí ineli japi echi apóstoles wisabé niraa aniyé jépuká nalí wabé natéami nili jaréala yúa, Jesús ko ke iyoli nalí we kilí buwéami nili echi yúa (Luc. 9:46; 22:24-27). Jesús we aʼlá machiyé japi pe aminana aʼlá ku nokimea. ¿Alí tamujé ru? ¿Achi ti wisabé niraa ke aʼlá nokali bilé namuti? A echi riká nísaká, we ti kanili jiti tamujé Silíamiwala Jesús ke niráami ju alí we kilí buwéami.

14. ¿Piri tamó iʼwírima aminabi kilí buwéami niya?

¹⁴ ¿Chúriká nokiboa japi riká Jeobá? Jiti nokiboa japi riká Jeobá, ati olásaré “echi Cristo natáala” (1 Cor. 2:16, TNM). ¿Piri tamó iʼwírima natia japi riká Jesús? Ati leérisaré echi naó libros japi uchuwi echoná Biblia japi ruyé chúriká Jesús biteili alí kilí niraa natásaré chúriká echi namuti japi Jesús isili néwariwélitili japi riká nata. Alí we natéami ju tania Jeobá japi tamó iʼwírima ke niráami niya japi riká Jesús. Aminabi ti binésaká natia japi riká Jesús, ati aminabi nipo japi riká Jeobá alí ti aminabi we kilí buwéami nipo tamujé aboi yúa alí echi hermanos yúa (Mat. 18:26-30, 35).

JEOBÁ KO INÉ ECHI JAPI KE NIRÁAMI JU

15. ¿Chúriká isili Jeobá japi riká aní echi Salmo 138:6?

¹⁵ (Leeri Salmo 138:6). Tákoré Jeobá ne walubéala ju omáana Wichimóbachi alí echomí ripá, we natéami niraa iné echi japi ke niráami ju. Alí chabé jonsa echi riká isili jaré pagótami yúa. A keʼré japi ta ke machí jaré echi jitra, nalí Jeobá ko isili japi oserúa ripima echoná Biblia. Japi riká, chabé biteili bilé mukí Débora riwéami japi 125 bamíali we aʼlá nóchili tibúa Isaac alí Jacob tanala. Ke ti wiká namuti machí echi mukí nijéwami jitra, nalí Jeobá ko isili japi Moisés uchama echi riwalá echoná Biblia alí japi animea bilé namuti japi néwariwéliti japi we galérami nili (Gén. 24:59; 35:8, nota). Pe aminana Jeobá ko chapili David, japi taa towí boʼwá niséami nili, jiti silíami nima echoná Israel (2 Sam. 22:1, 36). Ayénachó japalí Jesús ochérili, Jeobá ko júali jaré ángeles jiti nawisama jaré boʼwá niséami japi echi Mesías ma ochérili echoná Belén alí echi ne bacháwala nili japi machili jepuná namuti we natéami (Luc. 2:8-11). Alí japalí José alí María tóoli Jesús echoná templo, Jeobá ko néwariwélitili japi we natéami niraa ineli Simeón alí Ana, japi ma ochérami nili, japalí isili japi inema echi binoy Nolá (Luc. 2:25-30, 36-38, TNM). Ayena, “tákoré Jeobá ko walubéala ju, echi ko iné echi japi ke niráami ju”.

16. ¿Chúriká isili Jesús japi riká echi Onolá?

¹⁶ Jesús ko isimí japi riká echi Onolá. Japi riká echi Onolá, Jesús ko we natéami niraa ineli echi pagótami japi ke natéami niraa inérami nili jarecho jitra. Binérili Onorúami Gobiérnowala jitra echi japi risóati nili o japi ke binékami nili (Hech. 4:13; Mat. 11:25). Ke bi saʼweli echi nayúami, nalí ayénachó we riwíwili alí galeli (Luc. 5:13). Kecho mukuyá, Jesús pabákili echi apóstoles ronola, bilé nóchali japi nokayé japi nóchiami nili biléana bitichí (Juan 13:5). Alí kecho ku simiyá ripá rewegachi, Jesús iyali bilé nóchali we natéami echi najátowala echalí piréami alí jipi piréami, japi ju iʼwiria jarecho jiti sinibí pirélima (Mat. 28:19, 20).

17. ¿Chúriká nokiboa japi riká Jeobá? (Ayénachó iné echi foto).

¹⁷ ¿Chúriká nokiboa japi riká Jeobá? Ati nokiboa japi riká Jeobá, japalí ti nawesa sinéami pagótami sinúrika raʼíchiami, sinúrika piréami o japi ke me binékami ju echoná escuela. Alí japi riká ti nokáami ju echi hermanos yúa néwariwélitipo japi ta noká japi riká Jeobá. Ata we natéami niraa iné echi hermanos tákoré ti olá bilé nóchali japi natéami ju echoná congregación o tákoré ti rasíruka aʼlá machí nokayá jaré namuti echi yúa (Filip. 2:3, TNM). Jeobá ko we kanili inea japi ta ke niráami ju, japi ta riwiwi alí we galé anakupi niraa (Rom. 12:10, TNM; Sof. 3:12).

18. ¿Chúsiá mi ke niráami nínali japi riká Jeobá?

¹⁸ Ata iʼwérili nokisáaká ke niráami niya japi riká tamujé Onolá Jeobá, ati nokiboa japi jarecho ke jilí nirama tamó muliwia, ata simá nokáami nipo alí kilí buwéami nipo. Ayénachó néwariwélitipo jarecho japi ta we natéami niraa iné japi riká isimí Jeobá. Alí newalabo japi ta sinibí iʼwérili nokisáaká ke niráami niya japi riká Jeobá, echi ko aminabi we natéami niraa tamó inema (Is. 43:4).