Bilé nuláami japi nocha iʼwiria echi hospitales echomí Estados Unidos aní japi echi redes sociales risoa níliti wiká kúruwi alí iwé | ¿Piri aní echi Biblia?

23 inárachi mayo 2023, bilé nuláami japi nocha iʼwiria echi hospitales echomí Estados Unidos, anili japi echi redes sociales isimí japi wiká kúruwi alí iwé ke aʼlá pirélima.

• “Tákoré echi redes sociales a iʼwiri echi kuuchi alí remalí, nalí ayénachó isímiré japi echi nayuma” (Social Media and Youth Mental Health: The U.S. Surgeon Generalʼs Advisory [Echi redes sociales alí echi kúruwi alí iwé: Japi nawésili echi nuláami japi nocha iʼwiria echi hospitales echomí Estados Unidos], 2023).

Japi anili echi informe we tamó natari japi we chati ju japi ikísimi.

• Echi kúruwi alí iwé japi 12 aminá 15 bamíbami ju “alí nee echi redes sociales sinibí rawé aminá 3 horas, a keʼré japi aminá we nayuma echi depresión jitra, ansiedad alí jarecho si”.

• Echi kúruwi alí iwé japi 14 bamíbami ju alí we nee echi redes sociales, “ke me aʼlá ochí, we cha riká anéliwa echoná internet, ke kanili inea japi riká ju aboi, ke natéami ka nili alí nayú depresión jitra. Alí echi iwé ju japi wabé echi riká ikí echi kúruwi yúa”.

¿Chúriká omeri echi wénwala iʼwiria echi kúchuwala jiti ke echi riká ikimea? Echi Biblia nijí we aʼlá busuréliami.

Japi omeri nokayá echi wénwala

Iʼwírisi. Wénwala, natasi echi chati namuti japi ikimea alí anisí achi aʼlá ju japi mujé kúchuwala néema echi redes sociales.

• Busuréliami japi aní echi Biblia: “Bineri echi kuuchi jiti machimea chu iyiri buwérili simama” (Proverbios 22:6).

• Jiti mi che machimea jepuná jitra, leeri echi artículo “¿Deberían mis hijos usar redes sociales?”.

Ami risensia iyásaká mujé kúchuwala jiti néema echi redes sociales, aʼlá machiká iné piri namuti ju japi iné mujé kúchuwala jiti ke cha ikimea. Nalí, ¿chúriká mi isima?

Tibusi emi kúchuwala echi chati namuti jitra. Bineri mujé kúchuwala jiti machimea chu iyiri namuti chati ju alí jiti ke inema.

• Busuréliami japi aní echi Biblia: “Yémitamo Riosi níwala pagótami ju, echijiti ketasi chati sitíi chuwé olasi. Ke siné chuwé bilétari yuwa kochisí, nibilé siné siʼwinárigá chati sitíi chuwé olasi, nibilé korusi auché jaré níwala namuti. Ke siné aʼnagupi kaníliga raʼichasi echiyiri chati sitíi oluwáwami jiti rugá. Nibilé siné kaníliga raʼichasi echiyiri wabé riwéluami oluwáwami jiti rugá” (Efesios 5:3, 4).

• Ami riwimea we aʼlá busuréliami echoná artículo “Enséñele a su hijo adolescente a usar con seguridad las redes sociales”.

Anesi emi kúchuwala chu kilipi néema. Japi riká, emi anisí chu kilí ko emi kúchuwala néema echi redes sociales alí chu kilipi.

• Busuréliami japi aní echi Biblia: “Sinibí galá ʼnatasi mapu churigátamo ologá pirélabo. Ketasi ologá pirélasi mapurigá echi auché jaré mapu ke galá machíami ju, chopi sinibí galabé ologá pirélasi mapurigá echi jaré galá machíami niráa. We yaa galabé olasi suwaba máputamo omero” (Efesios 5:15, 16).

• Iné mujé kúchuwala yúa echi video Aʼlá machiká iné echi redes sociales japi nirú echoná sección “Echi pizarrón japi dibujo buyaní”, iʼwírimia emi kúchuwala jiti machimea chúsiá aʼlá ju ke wilí néea echi redes sociales.