Echi misioneros ko simía “echoʼná suníami ne wabé mikabéana jenaʼí wichimóbachi”

Jesús ko aneli echi discípulos: “Ayénachótamo nawésabo echoʼná suníami ne wabé mikabéana jenaʼí wichimóbachi” (Hechos 1:8). Echi testigo Jeobá we iʼwérika noká alí we kanílika noká japi Jesús nulali. Nalí be, ke ti omero nawesa omáana wichimóbachi, japi riká jaréana weli pueblos o ciudades japoná piré wiká pagótami. Alí jaréana países ke nirú wiká testigos (Mateo 9:37, 38). ¿Piri ta noká jiti ta nawisabo echi pagótami japi echoná piré?

Jiti ta nijéwipo japi Jesús nulali, echi Comité de Servicio japi nocha echi japi Aʼlá Niseri yúa echi testigo Jeobá jitra, júula echi misioneros echomí japoná we newaléliwa. Jipi nirú 3,090 misioneros japi nawesa omáana wichimóbachi.a Wiká binéritami ju echoná Escuela japi biné echi Nawésami Raʼíchali Kalabé. Na misioneros ko simía we miká, riwesa aboi kalila alí suwaba japi olali. Jiti we aʼlá binéritami ju, jiti bela echi ko we aʼlá bineri alí iʼwiri nawesia echi pagótami. Japi riká we aʼlá noká, jarecho japi kulí binésimi achó echi riká nokinali.

Ata iʼwírisaká echi misioneros ayénachó ta iʼwiri jarecho

Ibili sucursal, echi Sección de Ministros en el Campo del Departamento de Servicio nocha echi Comité de Sucursal yúa, jiti iyama japi newalé echi misioneros. Japi riká japoná bitélima, iʼwiri japalí nayusa alí pe kuabi winomí si iyáliwa. Bamíali de servicio 2020 echi testigo Jeobá ko suwábili ne nokí 27 millones de dólares iʼwiria echi misioneros. Matétarabá jepuná jitra, echi misioneros ko we aʼlá iʼwiri echi pagótami alí echoná congregaciones.

¿Chúriká nikuuro echi misioneros nawesia? Frank Madsen, japi nocha echoná Comité de Sucursal echomí Malaui, aní: “Echi misioneros ko ke majaka nawesa japoná we jilí ju nawisalia alí japoná sinúrika raʼíchami ju. Jiti echi misioneros we iʼwérika noká nawesia, jiti bela echi hermanos echi riká cho nokinali. Ayénachó echi hermanos japi remalí ju achó nínali precursores. Ata matétarabá iyá Jeobá echi misioneros jitra”.

Bilé hermano japi nocha Comité de Sucursal, aní: “Echi misioneros ko newa noká japi echi testigos Jeobá napawika nochi Onorúami, tákoré jaréanami piréami ke. Echi japi ke testigo Jeobá ju machí japi ke bilé namuti isimí japi ta ke anakupi galepo. Japi ta biné echoná Bíbliachi tamó iʼwiri jiti ta anakupi we galepo”.

¿Chúriká echi misioneros iʼwiri echi hermanos japoná piré? Paulo ko bité echomí Timor Oriental, echi ko waʼlú matétara iyá echi misioneros japi nocha echoná congregación. Paulo ko aní: “Ata piré japoná we ratá. Tákoré echi misioneros ko we ruláachi bitéami nili, nalí echi ko ke riwé nawesia tákoré we ratá wilí. Ayénachó ke siné riwé napawía japalí ta simabo nawisasia. Alí achó ripí bineria echi pagótami nasipa rawé chéami tákoré we ratá. Ayénachó echi misioneros ko aʼlí chéami nawesa. Echi misioneros wiká pagótami iʼwírili bineria Jeobá jitra, tamí achó binérili. Echi ko we kanílika nochi Jeobá alí iʼwiri echi hermanos jiti we kanílika nóchilima Jeobá”.

Ketti, japi precursora regular ju echomí Malaui, aní chúriká bilé niwíkami misioneros iʼwírili binoy téemala: “Japalí sili echi misioneros jenaʼí congregación, nijé bineli ke testigo Jeobá. Echi ko we aʼlá tamí iʼwírili alí we aʼlá amigos nílili nijé téemala yúa alí nijé kúchuwala. Echi binérili nijé kúchuwala jiti machimea japi nóchilia Jeobá we tamó kaníliti. Jiti bela, bikiá nijé ranala precursora regular ju alí nijé kunala ma chotásili simiyá napawíliwachi”.

¿Chúrika nikúuriwa echi misioneros? Echi winomí jitra japi nijí echi hermanos. Ayénachó japi júuliwa echoná página internet donate.jw.org. Matétarabá jiti timí iʼwiri winomí jitra.