JAPI MACHINALI ECHI KÚRUWI ALÍ IWÉ
¿Chúsiá we natéami ju japi mi raʼichama Onorúami yúa?
Jaré náriami ko aní japi wiká témali Estados Unidos piréami a oración niwá. Nalí pe kuabi echi riká noká sinibí rawé. Jaré ko nátiré: “¿Echi oración keʼré japi tamí kanílitima bi?”.
¿Piri ju echi oración?
Echi oración ko ju raʼichia Onorúami yúa, japi niwali suwaba namuti. Tákoré echi Onorúami ko walubéala ju, “ketasi mikabé atí tamujé yuwa” (Hechos 17:27). Echi Biblia aní: “Galá bichíiga mulubéanasi Riosi yuwa, aʼlí Riosi ayénachó mulubéanama ʼyemi yuwa” (Santiago 4:8).
¿Chumi isima jiti mi mulíwima Onorúami yúa?
Niwayá oración. Echi riká mi omérima raʼichia Onorúami yúa.
Binea echi Biblia. Echi riká Onorúami mi yúa “raʼicha”.
Echi riká mi isísaká —niwayá oración alí binea echi Biblia—, mi iʼwírima jiti mi Onorúami amígowala nima.
“Raʼichia Jeobá yúa, echi japi Walubéala ju, ne wabé natéami ju japi ta omero nokayá” (Jeremy).
“Ruyea Jeobá japi ni nili, tamí iʼwiri jiti ni mulipi ka nílima echi yúa” (Miranda).
¿Ne bichíwali kipú Onorúami?
Tákoré mi bichiwi Onorúami alí mi oración niwayé, ami nátiré japi ke kipú. Nalí be echi Biblia aní japi Jeobá “kipú japalí echi pagótami [echi] yúa raʼicha” (Salmo 65:2). Jeobá ko nakí japi mi anema japi mi nili. ¿Chúsiá? Jiti Onorúami ko mi nakí (1 Pedro 5:7).
Natá jepuná: ¿Ami raʼicha sinibí rawé mujé amígowala yúa? Ami echi riká cho omero isiá Onorúami yúa. Raʼichá sinibí echi yúa alí echi riwalá néeka, Jeobá (Salmo 86:5-7; 88:9). Echi Biblia aní: “Sinibí galá tániga raʼichási Riosi” (1 Tesalonicenses 5:17).
“Echi oración ko ju raʼichia nijé Onolá yúa, japi ripá rewegachi bité, japi ni ne sulachí jonsa raʼichi” (Moises).
“Ani ané Jeobá echi namuti we natéami, japi riká ni isimí nijé iyela yúa alí amigos” (Karen).
¿Piri jitra ni omero raʼicha Onorúami yúa?
Echi Biblia aní: “Sinibí Riosi yuwa raʼíchaga tansi mapurigá Binói ʼyemi mi kuʼwírama; ayénachó sinibí walú natétara ʼyasi” (Filipenses 4:6).
¿Achi aʼlá ju japi mi anema Jeobá echi chati namuti japi mi ikí? ¡Ayena! Echi Biblia echi riká tamó ané: “Japi mi nili Jeobá ané, alí echi ko mi iʼwírima” (Salmo 55:22).
Nalí be, ke echi problemas bi mi anésaré. Bilé tiwé Chantelle riwéami aní: “Ani tánisaká bi Jeobá japi tamí iʼwírima, ke ni aʼlá amiga nima echi yúa”. Ayénachó aní: “Japi bachá ti nokisáré ko ju matétara nijía Jeobá. Alí a nirú wiká namuti jitra japi ta matétara iyásaré Jeobá”.
Natá jepuná: ¿Piri namuti aʼláala mi nareli Jeobá jitra? Natá bikiá namuti jiti mi matétara iyama Jeobá jipi.
“Ayénachó ineka echi namuti japi ke me natéami ju, japi riká inea echi semati siwá, a omero isiá japi ta matétara iyabo Jeobá” (Anita).
“Natá bilé versículo Biblia jitra japi mi we galé o bilé namuti jitra japi Jeobá niwali japi mi baʼórili. Echi jitra matétara iyá Jeobá” (Brian).