Machiboa japi chabé ko ke machiwaa

¿Ami raʼíchiti bilé namuti japi pe mujé bi machimea?...a Echi Biblia ko raʼichi bilé namuti we natéami japi wiká pagótami “ketasi cho galá machí”, pe Onorúami bi machiyé. Né kulí ko tasi wesi machiyé. Echi ángeles ayénachó machinaali. ¿Ami machinali mujé?...

Ma wiká bamíali ju japalí Onorúami niwali echi rejoy alí echi mukí. ¿Chu riwéami nili?... Adán alí Eva. Echi ko we baʼóachi pireili japi Edén riwéami nili. Onorúami ko we baʼóami niwíwili echi kawí kiti echoná pirélima. Echi ko nakiyé japi sinéami ka nakúrika we baʼóami niwama echi kawí japi iyiri nili Edén alí nakili japi né sinibí pirélima we baʼóachi. We be nalí ke echi riká ikili ba. ¿Chúsiá ke?

Kiti echi Adán alí Eva tasi nijéwili Onorúami, kiti bela jipi ko ke ta baʼóachi pirea ko. Onorúami ko anili japi echi kawí checho a ku baʼóami nima alí sinéami we kanílika pirélima sinibí. ¿Chúriká ikiméalé? Ma wiká bamíali simárili, japi ke wesi cho pagótami machiyé.

Pe wilí ku nokaká ku machili. Japalí Jesús jenaʼí Wichimóbachi iyénali, echi ko binérili echi pagótami chu iyiri ka echi japi kecho machirúami nili. A ruyeli echi pagótami piri ju echi Onorúami Gobiérnowala. Japalí ta amachiki Onorúami, ata ané: “Riwé japi mujé Gobiérnowala nawama”. ¿Chúsiá? Kiti echi Gobierno we baʼóami niwama jenaʼí Wichimóbachi.

¿Ami kanílisa nili bitea echoná Wichimóbachi we baʼóachi?... Echi pagótami japi Onorúami bi nijéwami ju pirélima echoná Wichimóbachi we baʼóachi. Echi Biblia ko raʼicha echi rejoy alí mukí si japi aʼlá nijéwami nili Jeobá. Jenaʼí oselichi ta binepa jépuká nila alí chúriká ta cho nokiboa japi riká echi nokali. ¿Ami machinali?...