Japi ta biné echi jubá raʼíchali jitra japi anili Jacob (parte 1)

1, 2. ¿Piri isili Jacob japalí ma mulipi mukumea riweili, alí chúsiá? (Ayénachó iné echi dibujo).

MA SIMÁRILI pe 17 bamíali japalí Jacob simili echomí Egipto echoná Canaán jonsa echi téemala yúa (Gén. 47:28). Echalí echi ko we kanílili checho ku inea echi nolá José alí jiti sinéami echi téemala checho ku napawika mochili. Nalí Jacob machili japi ma mulipi mukumea riweili, jiti la echi ko bayeli echi kúchuwala anemia bilé namuti we natéami (Gén. 49:28).

² Chabé, japalí ma mulipi mukumea riweili bilé japi onolá nili, echi ko napabúe echi téemala anemia echi namuti japi echi nakili (Is. 38:1). Isini kaachi anéi jépuká walúala nima o japi nulema sinéami echi téemala.

3. Japi riká aní Génesis 49:1, 2, ¿chúsiá we natéami nili echi raʼíchali japi anili Jacob?

³ (Leeri Génesis 49:1, 2). Jepuná napawíliwami we natéami nili. ¿Chúsiá? Jiti Jacob profeta nili alí Jeobá ko néeli jiti animea namuti we natéami japi ikimea riweili echi kúchuwala alí echi aboi téemala. Jiti la, echi raʼíchali japi Jacob aneli binoy kúchuwala kecho bijí mukuyá, profecía nili.

4. ¿Piri ta binepo jenaʼí binelíwami? (Ayénachó iné echi recuadro “Echi Jacob téemala”).

⁴ Jenaʼí binelíwami binepo echi raʼíchali japi Jacob aneli echi naó kúchuwala: Rubén, Simeón, Leví alí Judá. Alí echoná biléala binelíwami binepo japi aneli echi jaréala osá naó kúchuwala japi rijoi nili. Echi raʼíchali aneli echi kúchuwala alí ayénachó echi aboi téemala, japi pe aminana suwaba echi nima riweili echi pueblo Israel. Japalí ti biné japi ikili chabé echi pueblo Israel, ata biné chúriká ikili japi Jacob anili. Ayénachó ti binepo namuti we natéami japi tamó iʼwírima kanílitia tamujé Onolá Jeobá.

RUBÉN

5. ¿Piri nátiliré Rubén japi narema Jacob jitra?

⁵ Jacob bachá raʼíchili Rubén yúa alí jéaneli: “Mujé ju kini nolá echi ne bacháwala” (Gén. 49:3). Japi riká Rubén nili echi ne bacháwala Jacob nolá, a keʼré japi echi ko nátili japi osá niraa iyárami nima echi jaré namuti japi olali echi onolá. Ayénachó a keʼré japi nátili japi echi ko walúala nuláami nima echoná téemala japalí ma mukusaa echi onolá alí japi sinibí bilé echi téemala we natéami nílisima.

6. ¿Chúsiá Rubén ma ke nareli echi namuti japi iyáliwa echi ne bacháwala? (Génesis 49:3, 4).

⁶ We be nalí, Rubén ko ma ke omérili narea echi namuti japi iyáliwa echi ne bacháwala (1 Crón. 5:1). ¿Chúsiá? Jiti echi ko nasawili echi onolá upila yúa, Bilhá riwéami. Echi ko iʼwíriami nili Raquel, echi Jacob upila japi wabé galeli (Gén. 35:19, 22). ¿Chúsiá Rubén nasawili Bilhá yúa? Jiti Rubén ko nili echi Lea ranala, bilecho echi Jacob upila. Alí japalí Raquel mukuli, a keʼré nátili japi echi riká isísaká, Jacob we kichima Bilhá alí jipi ko wabé galema Lea jarecho echi Jacob upila yúa. O a keʼré japi Rubén we koruli Bilhá alí ke namú isili jiti riwema echi riká inilia. Ke ti aʼlá machí chúsiá echi riká isili, nalí ti machí japi Jeobá alí Jacob we cha riká ineli japi echi isili (leeri Génesis 49:3, 4).

7. ¿Piri ikili Rubén alí echi kúchuwala? (Ayénachó iné echi recuadro “Echi profecía japi anili Jacob kecho bijí mukuyá”).

⁷ Jacob jéaneli Rubén: “Ke mi we natéami nima”. Alí jepuná japi anili a ne echi riká ikili. Ke machiwá japi bilé echi Rubén kúchuwala silíami nílili, sacerdote o profeta. Nalí Jacob ke riweli inea Rubén japi riká binoy nolá, alí echi kúchuwala bilé tribu nili echoná Israel (Jos. 12:6). Rubén ko néwariwélitili japi aʼláala nili japalí ikili jarecho namuti, alí a keʼré japi ma ke che siné isili echi nasawíliami chati (Gén. 37:20-22; 42:37).

8. ¿Piri ta biné echi jitra japi ikili Rubén?

⁸ ¿Piri ta biné? Japi ta iʼwérili nokisáré jiti ke nokiboa echi chati namuti, japi riká echi nasawíliami chati. Japalí ti nokinálisa japi chati ju, ata kilí natásaré japi echi namuti japi ta nokiboa omonáritima Jeobá, tamujé téemala alí jarecho si. Ayénachó ti newalásaré japi aní echi Biblia, japi ta ʼwibo echi namuti japi ta ichá (Gál. 6:7). Japi ikili Rubén ayénachó tamó newalari japi Jeobá ko we galéami ju. Tákoré a risoa nílipo echi chati namuti jitra japi ta nokali, Jeobá a tamó iʼwírima alí tamó iyama namuti aʼláala, ati iʼwérili nokisáaká ku nokayá japi aʼlá ju.

SIMEÓN ALÍ LEVÍ

9. ¿Chúsiá Jacob aneli echi Simeón alí Leví jaré raʼíchali japi ke kanílitili? (Génesis 49:5-7).

⁹ (Leeri Génesis 49:5-7). Miná ko, Jacob raʼíchili Simeón alí Leví yúa alí aneli jaré raʼíchali japi ke kanílitili. Jaré bamíali bachaka, echi Jacob malala Dina riwéami, chapirúami nili bilé rijoi jitra Siquem riwéami Canaán bitéami. Jiti la, sinéami echi Jacob kúchuwala we naʼáwili echi namuti jitra japi ikili echi rejimala. Nalí Simeón alí Leví we cha nokali. Echi ko ékili echi rijoi echoná piréami japoná biteili Siquem, aneka japi ke nakoma echi yúa, echi a nolérika sikirésaká. Echi ko a nakili alí, japalí echi a bijí okoa mochili, Simeón alí Leví simíali echoná ciudad alí miʼali sinéami echi rijoi (Gén. 34:25-29).

10. ¿Chúriká ikili japi anili Jacob echi Simeón alí Leví jitra? (Ayénachó iné echi recuadro “Echi profecía japi anili Jacob kecho bijí mukuyá”).

¹⁰ Jacob ke kanílili japi Simeón alí Leví we obátami nima. Jiti la echi ko anili japi chijanárami nima alí rojanárami nima omáana echoná Israel. Alí jepuná raʼíchali a echi riká ikili pe aminana ma 200 bamíali simírisa, japalí echi pueblo Israel moʼili echoná weʼé japi Jeobá iyama riweili. Echi tribu Simeón níwala nareli echi weʼé, nalí chijanárami nili omáana echoná Judá níwala (Jos. 19:1). Alí echi weʼé japi nareli Leví, 48 ciudades nili japi chijaa jali omáana echoná Israel (Jos. 21:41).

11. ¿Piri namuti aʼláala nokali echi tribus Simeón alí Leví níwala?

¹¹ Echi Simeón alí Leví kúchuwala ke nokali japi riká echi wénwala. Echi tribu Leví níwala ke riweli nijewia Jeobá. Japalí Moisés nareli echi nulalíwami japi Jeobá iyali echoná ripá rabó Sinaí, wiká israelitas chotásili amachikia bilé becerro oro jitra niwárami. Nalí echi levitas ke amachíkili echi dios ke bichíwali alí iʼwírili Moisés suwabia echi israelitas japi ke nijéwili alí mojachia echi becerro (Éx. 32:26-29). Jeobá isili japi echi tribu Leví níwala echi nóchilima japi riká sacerdotes (Éx. 40:12-15; Núm. 3:11, 12). Alí echi rijoi echi tribu Simeón níwala, ke majaka napawika nakóali echi rijoi echi tribu Judá níwala yúa, olamia echi weʼé japi Jeobá iyama riweili, alí echi riká nokaká iʼwírili jiti ikimea japi Jeobá nakili (Juec. 1:3, 17).

12. ¿Piri namuti we natéami ta biné echi Simeón alí Leví jitra?

¹² ¿Piri ta biné? Kiti nokiboa chati namuti japalí ta iyosa. Ata cha olárami nísaká o bilé japi ta galé, a keʼré japi ta iyoa nílipo (Sal. 4:4). Nalí kiti wikawabo japi Jeobá ko ke nakí japi ta cha riká raʼichabo o cha riká nokiboa japalí ta iyó (Sant. 1:20). Japalí ti cha olásiwa echoná congregación o jarecho jitra, ata iʼwérili noká nijewia japi riká aní echi Biblia. Echi riká ti ke cha nílitipo jarecho echi namuti jitra japi ta aní o japi ta noká (Rom. 12:17, 19; 1 Ped. 3:9). Alí mujé wénwala nokayáaká echi namuti japi Jeobá ko ke galé, ¿achi aniwáami ju japi mujé echi riká cho isísaré? Ke tasi. Kiti natá japi mi ma ke omérima isiá japi aʼlá ju alí japi mi ke omérima Jeobá amígowala niya. Jeobá mi iʼwírima jiti mi aʼlá isima alí mi iyama wiká namuti aʼláala.

JUDÁ

13. ¿Chúsiá Judá majaa níliliré japalí ma séali japalí Jacob echi yúa raʼichama?

¹³ Jipi ko Jacob raʼíchili Judá yúa. Ma kipusa japi Jacob aneli echi rejimala japi weli nili, a keʼré japi Judá ko majaa nílili natia piri binoy anema. Echi riká iníliliré jiti echi ayénachó isili namuti we chati. Japi riká, echi ko iʼwírili Simeón alí Leví ujúa echi namuti echoná ciudad japoná biteili echi Siquem (Gén. 34:27). Ayénachó iʼwírili ralinea José japi riká pioni alí ékili echi binoy onolá (Gén. 37:31-33). Alí pe aminana, echi ko nasawili echi moʼolila Tamar yúa, jiti nátili japi bilé mukí cha isíami nili (Gén. 38:15-18).

14. ¿Piri aneli Jacob echi Judá, alí chúsiá? (Génesis 49:8, 9).

¹⁴ Nalí Jeobá ko isili japi Jacob raʼichama namuti aʼláala Judá jitra alí japi namuti aʼláala bi ikimea (leeri Génesis 49:8, 9). ¿Chúsiá? Jiti Judá ko néwariwélitili japi we galeli echi onolá Jacob japi ma ochérami nili. Ayénachó we natimali binoy bonilá Benjamín alí aʼlá tibuli (Gén. 44:18, 30-34).

15. ¿Chúriká ikili echi profecía japi Jacob anili Judá jitra?

¹⁵ Jacob ko anili japi Judá nulema echi rejimala. Nalí be, echi profecía ikimea riweili pe aminana. Pe 200 bamíali simírisa, japalí echi israelitas buyali echoná Egipto jonsa alí sírili echomí desierto simíaya echoná weʼé japi Jeobá iyama riweili, echi tribu Judá nili japi bachá sírili jaréala tribus yúa (Núm. 10:14). Pe aminana, echi rijoi echi tribu Judá níwala nili japi bachá chotásili nakóaya echi cananeos yúa jiti moʼimea echoná weʼé (Juec. 1:1, 2). Alí niruili wiká isélikami echi tribu Judá níwala, japi riká David, echi bacháwala silíami japi echi tribu Judá nili. Nalí ke jepuná bi ju.

16. ¿Chúriká ikili echi profecía japi aní Génesis 49:10? (Ayénachó iné echi recuadro “Echi profecía japi anili Jacob kecho bijí mukuyá”).

¹⁶ Jacob anili japi bilé echi Judá kúchuwala nulama riweili omáana Wichimóbachi alí japi echi gobiérnowala sinibí nima (leeri Génesis 49:10). Echi silíami ko ju Jesucristo. Bilé ángel jéanili Jesús jitra: “Jeobá isima japi nulama japoná nulayá asali echi onolá David” (Luc. 1:32, 33, TNM). Alí Jesús ayénachó anéliwa “echi Mawiyá echi tribu Judá níwala” (Apoc. 5:5, TNM).

17. ¿Chúriká ti nokiboa japi riká Jeobá?

¹⁷ ¿Piri ta biné? Jeobá ko sinibí iné echi namuti aʼláala japi noká japi echi nijéwami ju. Echi ko isili japi Judá ikimea namuti aʼláala tákoré echi ko namuti chati isili. Nalí a keʼré japi echi Judá rejimala nárika nokali chúsiá Jeobá echi riká isili alí piri namuti aʼláala ineli Jeobá japi isíami nili Judá. Ke ti machí achi echi riká nárika nokali, nalí japi ta a machí ko ju japi Jeobá ko ineli echi namuti aʼláala japi isili Judá, jiti la isili japi ikimea namuti aʼláala. ¿Chúriká ti nokiboa japi riká Jeobá? Inepo echi namuti aʼláala japi noká echi hermanos. Bilé hermano iyásiwaká bilé nóchali we natéami, a keʼré japi tamujé bachá natabo echi namuti japi ke aʼlá isimí, nalí ati newalásaré japi Jeobá ko we kanili echi hermano yúa jiti iné echi namuti aʼláala japi isimí.

18. ¿Chúsiá ti kilí buwéami nísaré?

¹⁸ Bilecho namuti japi ta biné Judá jitra ko ju, japi ta kilí buwéami nísaré. Jeobá ko sinibí isimí japi riká aní, nalí isini kaachi ke isimí japi riká tamujé nakí o japalí ti nakí. Echi tribu Judá níwala ke sapú chotásili nulea echi Jeobá puéblowala, nalí iʼwírili echi japi Jeobá jáwili tákoré ke echi tribu níwala nili, japi riká Moisés levita nili, Josué efraimita alí echi silíami Saúl benjaminita. Tamujé echi riká cho nokiboa, iʼwíripo o nijéwipo echi japi Jeobá jáwili jipi rawé nulemia echi puéblowala (Heb. 6:12).

19. ¿Piri ta biné echi profecía jitra japi anili Jacob kecho bijí mukuyá?

¹⁹ ¿Piri ta bineli echi profecía jitra japi Jacob anili kecho bijí mukuyá? Ati bineli japi “Onorúami ko ke iné echi namuti japi riká iné echi pagótami” (1 Sam. 16:7). Ayénachó ti bineli japi Jeobá ko kilí buwéami ju, wikáwiami alí japi ke kanili japalí ti chati namuti noká, nalí ke cho buwé japi ta sébali aʼlá nokáami nipo. Ayénachó iyá namuti aʼláala echi pagótami japi iʼwérili noká aʼlá ku nokayá, tákoré chabé chati namuti nokali. Echoná biléala binelíwami binepo piri aneli Jacob echi jaréala kúchuwala.