Natchigagü i Ngutaqueꞌearü Nguꞌarü Popera Maü̃ rü Puracücaꞌ
6-12 YANERUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ SALMOS 127-134
Nanatügü — Meã nüna pedaugüama i perü ãmaregü i meẽtchigüü̃
w21.08 5wa 9tchimaü̃
9 Yeuwa nanaü i duü̃ü̃gü na naãacügüü̃caꞌ rü nanamu na nüü̃ nanguꞌẽẽgü nhuãcü nüü̃ nangetchaü̃ rü nüü̃ nicuaꞌüü̃gü a Yeuwa. Tchi cuma rü papa rüeꞌna mama quiĩgu, marü moẽ nüna cuã i ngẽma ãmaregagu? Aicuma niĩ na Yeuwa ãĩyugüna naã muü̃tchi i meü̃gü, notürü ãĩyugü rü tama naãacügü. Rü ngẽmacaꞌ, nanatügü nawaꞌe meã nayoniẽ i ngẽma Yeuwaarü ãmare, naacügüü̃ nanguꞌẽẽ. ‘Mea peyaxucu̱xẽgü rü naãxẽxü̃ nüxü̃ pecua̱xẽxẽ rü penangúexẽxẽ i ngẽma tórü [Yeuwa ya] Coriarü ore’ rü wüi puracü i meẽtchiü̃ niĩ erü Yeuwa peü̃ namu i ngẽma. (Epé 6:4, Deut 6:5-7, Sal 127:3) Na nanatügüü̃ narüngü̃ẽẽgüü̃caꞌ, Yeuwaarü duü̃ü̃gütanü rü nüna naã muü̃tchi i ngü̃ẽẽgü, cuaꞌãtchiruü̃ poperagü, vídeogü, wiyaegü rü natchigagü i sitewa. Rü guü̃ma i ngẽma rü Tupanaarü Orewa ne ĩ. Ngẽma rü tüü̃ naweꞌ na Tanatü ya dauü̃gücü rü Ngetchutchu rü namaã nataãẽgü i ngetüꞌüü̃gü rü paü̃gü. (Luca 18:15-17) Ngẽguma nanatügü rü Yeuwagu nayaõgügu rü nügü naporaẽẽgü na meã naacügüna nadaugüü̃caꞌ, Yeuwa ngẽmamaã nataãẽ. Rü nümagü nüü̃ nanangútchaü̃ẽẽ ta i naacügü na guü̃gutáma Yeuwatanüü̃ niĩgüü̃caꞌ!
w19.12 27wa 20tchimaü̃
20 Meã nüü̃ pecuaꞌü̃ i peacügü. Rü Salmo 127wa nüü̃ niu na naacügü rü nhama nane i denerüü̃ niĩgü. (Nawa naugütae Salmo 127:4.) Ngegumarüü̃ i denegü rü naguü̃raü̃ü̃ rü tama guü̃guma nawüigu i norü tawa, ngegumarüü̃ rü naacügü rü tama nügümaã nawüigu. Rü ngẽmacaꞌ, nanatügü nawaꞌe nüü̃ nauneta nhuãcü nüü̃ nanguꞌẽẽ a wüitchigü i naacügü. Wüi taene rü namaꞌ i Iraéugu pegüü̃ rü naacügüü̃ narüngü̃ẽẽ na Yeuwacaꞌ napuracüeü̃caꞌ. Nümagü rü nüü̃ niugü i taꞌacü nüü̃ narüngü̃ẽẽ na meã nayanguꞌẽẽü̃caꞌ i ngẽma: “Tomagü rü wüitchigü i toacümaã Tupanaarü Orecaꞌ tangúe.” Rü aicuma niĩ na wüitchigü i natanüü̃éru rü nüü̃ nauneta tchi ngẽmaãcü naügu rü nüü̃ name.
Nguꞌẽẽtaegü uirurüü̃ iĩü̃
it-1 543wa
Yeguma wiyaecü rü nüü̃ niugu i ngẽma ore nüma rü nagu rüĩnü i oribu (oríwa), rü teé Yeuwaü̃ ticuaꞌüü̃güü̃maã nauneta i nhaü̃: “Rü ñoma oribuchacüxü i ngexwaca rüxügüxü̃rüxü̃ tá naporae i ngẽma cuxacügü i curü mechacüwawa rütogüxü̃.” (Sal 128:1-3) Mueꞌpüꞌcüna duü̃ü̃gü natogü i oributchacüügü na nüü̃́ nangẽmaü̃caꞌ i ngewacaü̃ü̃ i oribugü. Rü nhuꞌmatchi, oribugü i marü nayae rü bemana naü i ngewacaü̃ü̃ i naitchacüügü, rü ngẽmacaꞌ nangẽma tá i to i naĩgü. Ngegumarüü̃, naacügü rü nanatücüwawa nangẽma tá, rü ngẽmaãcü natanüü̃ rü taãẽãcü namaẽ.
13-19 YANERUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ SALMOS 135-137
“Cori ya tórü Tupana rü guxü̃ma i ngẽma duü̃xü̃gü namaxã tupanaã́xü̃étüwa naxü”
w15 15/6 6wa 15tchimaü̃
15 Ngẽma Ngetchutchuarü pora rü Yeuwawa ne naũ, rü ngẽmacaꞌ aicuma nagu tayaõgü na Yeuwa meãma namaã ínacuáü̃ i nhama i naãnearü pora. Nüü̃ nadau i nümaü̃ i cuaꞌruü̃. Naü̃pa ga taütchicü ga mucü, rü Yeuwa nhanagürü: “Erü ngẽxguma 7 i ngunexü̃wa nanguxgux rü tá chanapuxẽxẽ i 40 i ngunexü̃, rü 40 i chütaxü̃.” (Gên 7:4) Rü ta, Êxodo 14:21wa nhanagürü: “Rü nüma ga Cori ya Tupana rü yema chütaxü̃gu rü inanaxǘxẽxẽ ga wüxi ga poracü ga buanecü ga éstewaama ne ũcü ñu̱xmata yangunexü̃mare. Rü yemaacü ga yema már rü taxregu niyauxyexü̃chiü.” Rü Jonas 1:4wa nhanagürü ta: “Natürü nüma ga Cori ya Tupana rü wüxi ga buanecü ga tacü inanaxǘxẽxẽ ga yexguma már arü ngãxü̃tüwa nanguxgu. Rü guma wapuru rü ñoma yapuxchaü̃xü̃rüxü̃ nixĩ, yerü nataxüchi ga yuape.” Rü yiemagü rü imeãẽmaregüü̃ erü nüü̃ tacuaꞌgü na Yeuwa meã namaã ínacuáü̃ i nhama i naãnearü pora. Nagu iyaõgü, na nhama i naãne rü Tupanameꞌewa nangẽma tá!
w21.11 6wa 16tchimaü̃
16 Ngẽguma nagu tayaõgügu na Yeuwa rü torü poü̃ruü̃ niĩ rü tameãẽgümare. Woo i ngẽma rü nhuguãcü rü tarümaãtchigü rü ngẽmacaꞌ tacaꞌcüraü̃ tüü̃ natau i pora na tchigüamaü̃caꞌ i gutchaü̃wa. Rü ngẽma gutchaü̃wa, taꞌacü Yeuwa tacaꞌ naüü̃? (Nawa naugütae Salmo 136:23.) Nüma rü nhama tüü̃ inadaẽẽrüü̃ i natchacüümaã rü ngetchaü̃acüma tüü̃ narüngü̃ẽẽ i gutchaü̃wa. (Sal 28:9, 94:18) Nhuãcü ngẽma rü torü mecaꞌ niĩ: Nagagu nüü̃ icuaꞌgüü̃ na Yeuwa rü tüü̃ narüngü̃ẽẽ rü nüna icuaꞌãtchiẽ i tare i meü̃gü. Norü wüi, Yeuwa tüü̃ ínapoü̃ i ngeü̃rüüü̃mare i natchicawa. Norü tare, Tanatü ya ngetchaü̃waꞌecü rü tacaꞌ nagutchaãẽ i wüietchigü i yiemagü.
Nguꞌẽẽtaegü uirurüü̃ iĩü̃
w21.11 4wa 10tchimaü̃
10 Rü Yeuwaarü ngetchaü̃ rü taguma inayaguꞌ. Salmo 136wa natchiga nidea i 26eꞌpüꞌcüna. Rü nüíra i wetchicuruwa rü nhanagürü: “Moxẽ nüxna pexãgü ya Cori ya Tupana! Erü nüma rü namecümaxüchi rü ngẽma norü ngechaü̃ rü taguma inayagu̱x.” (Sal 136:1) Rü wetchicuru 2 rü 26wa rü nhanagürü ta: “Erü ngẽma norü ngechaü̃ rü taguma inayagu̱x.” Rü ngẽguma ngẽma salmowa iugütaegu rü namaã tabaiꞌãtchie na nhuãcü Yeuwa nanaweꞌ i norü ngetchaü̃. Ngẽma ore i ümatüü̃ i nhaü̃: “Erü ngẽma norü ngechaü̃ rü taguma inayagu̱x” rü nanaweꞌ na Yeuwaarü ngẽtchaü̃ i norü duü̃ü̃gücaꞌ tagutáma natoraü̃. Nameẽtchima nüü̃ icuaꞌgüü̃ na Yeuwa rü tama paa norü duü̃ü̃güü̃ ínawogüü̃! Rü ngẽmaetüwa, nüma rü tümacüwawa nangẽma ya yíema nacaꞌ maü̃tchaü̃e rü tümacüwawa ngẽmatchaü̃e i gutchaü̃güwa. Nhuãcü i ngẽma rü torü mecaꞌ niĩ: Rü nüü̃ icuaꞌgüü̃ na Yeuwa rü tacüwawa nangẽma rü tüna nanaã i taãẽ rü pora na yana torü gutchaü̃gümaã iĩnüẽü̃caꞌ rü nagu iĩamaü̃caꞌ i ngẽma nama i maü̃wa daü. — Nawa naugütae Salmo 31:7
20-26 YANERUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ SALMOS 138-139
Ngutaqueꞌegüwa naunagü woo cuãnegu rü quiduruãẽgu
w19.01 10wa 10tchimaü̃
10 Cuma rü nüü̃ cucuaꞌ na quidurunecaꞌ ngẽguma nagu curüĩnügu na cuunagütchaü̃? Tchi cuma rü ngẽmaãcü quiĩgu rü tama niĩ cuicatama cuü̃ nangupetüü̃ yiĩ. Aicuma niĩ i tümaãẽ i yiema rü nüü̃ icuaꞌü̃ na imuü̃ i iunagügu. Notürü, nhuãcü ta nüü̃ curüyeera i ngẽma? Cuma cunawaꞌe cunangugü i nacüma. Eꞌna cuü̃ nangẽma i muü̃ i taguma nüü̃ curüngümaü̃ i taꞌacüü̃ quiuü̃ urü gutchinüü̃ quiucüraü̃? Rüeꞌna nagu curü ĩnü na curü unagü rü tama nameü̃ i togü i taenegüarü unagürüü̃? Aicuma niĩ, bemana ngẽma curü oegaãẽ rü name erü cunaweꞌ na cugü ícurüíraü̃. Rü Yeuwa nüü̃ nangetchaü̃ i nügü írüíraü̃. (Sal 138:6, Pir 2:3) Notürü Yeuwa nanawaꞌe ta na cuma rü nüü̃ quicuaꞌüü̃ rü taenegüü̃ cuporaẽẽü̃ i ngutaqueꞌegüwa. (1 Te 5:11) Yeuwa cuü̃ nangetchaü̃ rü cuna tá nanaã na tama cumuü̃ i taꞌacü i cuma cunawaꞌeü̃wa.
7 Cuma rü name nacaꞌ cudau i nümaü̃gügu i ucuꞌẽgü i marü iũü̃ i popera Dauü̃taecüwa. Cuaꞌãtchiruü̃, wüi ucuꞌẽ na cugü icumeẽẽü̃ i meãma. (Pro 21:5) Ngẽguma cuma meãma nüü̃ cucuaꞌgu i ngẽma ngutaqueꞌetchiga, rü yeeraãcü tá cuü̃ natautcha na cunaüü̃ i wüi iunagü. Rü to i ucuꞌẽ i iunagü rü nawaꞌe íramareü̃ quiuü̃. (Pro 15:23, 17:27) Cuma tama quiduruü̃tchi ngẽguma unagüwa íraü̃ quiugu. Rü nhuꞌmatchi, numareü̃ quiu i curü unagüwa na ngẽmaãcü natautchaü̃caꞌ na nüü̃ icuaꞌü̃ i ngẽma unagüwa. Ngẽguma íramareü̃ quiugu i curü ĩnü rü ngẽma rü nanaweꞌ na cuma rü cugü ícumeẽẽ i ngẽma rü ta meã nüü̃ cucuaꞌ i ngẽmatchiga.
Nguꞌẽẽtaegü uirurüü̃ iĩü̃
it-2 630wa
Rü ngẽguma wüi duü̃ü̃ tchieü̃ cumaã naügu i mueꞌpüꞌcüna, rü name na nüü̃ nüü̃ cungetchaü̃, ngẽma niĩ i yaõgüü̃cüma. (Luca 17:3, 4, Epé 4:32, Co 3:13) Tupana tama nüü̃ nüü̃ nangetchaü̃ i yíema tama togüeü̃ nüü̃ ngetchaü̃e i tümaarü tchieü̃gü. (Mat 6:14, 15) Ngẽguma wüi taütchiü̃ i gutchaü̃ naügu i taene, rü ngẽmacaꞌ ínamuü̃tchigu. Tchi nüma nüü̃ narüogu i ngẽma nacüma i tchieü̃, rü Yeuwa tá nüü̃ nüü̃ nangetchaü̃ rü ngẽma ngupetüü̃wa rü taenegü rü meãma nanayaugü i ngẽma taene ínamuü̃tchireü̃. (1 Cor 5:13, 2 Cor 2:6-11) Notürü, ngẽma yaõgüü̃tücumü rü tama nüü̃ nüü̃ nangetchaü̃ i ngẽma duü̃ü̃gü i guü̃guma tchieü̃ ügüü̃ rü tama nüü̃ rüoü̃ i norü tchieü̃gü. Notürü ngẽma duü̃ü̃gü rü Tupanaarü uwanügü rü nügü niĩgüẽẽ. — Ebr 10:26-31, Sal 139:21, 22
27 YANERUARÜ – 2 FEWERERUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ SALMOS 140-143
Ngẽmaãcü naü i taꞌacü yumüẽwa nacaꞌ ícucaü̃
13 Wüi ucuꞌẽ rü cuü̃ nanaweꞌ na Yeuwa cuü̃ nangetchaü̃. Yeuwa guü̃guma nanawaꞌe i taꞌacü i torü mecaꞌ niĩ. (Pro 4:20-22) Nüma rü tüü̃ naweꞌ na tüü̃ nangetchaü̃ rü ngẽmacaꞌ tüna nanaã i ucuꞌẽgü. Yeuwa rü tüü̃ naucuꞌẽ i norü Orewa rü norü poperagüwa rü nümaü̃ i yaõgüü̃ i yeera nüü̃ cuácügüwa. Ebréugü 12:9, 10wa nhanagürü: “Tupana rü tórü mexü̃ca̱x nixĩ i tüxü̃ iyanawe̱xãchixẽẽxü̃.”
14 Meã nagu rüĩnü i ngẽma ucuꞌẽ, rü taũ nagu curüĩnü na nhuãcü nüma rü cuü̃ naucuꞌẽ. Nhuguãcü, tama tacaꞌ name na nhuãcü tüü̃ naucuꞌẽü̃. Aicuma niĩ na teé tüü̃ ucuꞌẽtchaü̃ rü name na meããcüma tanaü i ngẽma. (Gár 6:1) Notürü, tchi ngẽguma cuü̃ naucuꞌẽgu, nawaꞌe na meã nagu curüĩnüü̃ rü taꞌacü ngẽma cucuaꞌü̃ i nawa ya yima cuü̃ ucuꞌẽcü, wootchi nhuguãcü tama cuma cunawaꞌeãcü cuü̃ naucuꞌẽgu. Rü ngẽmacaꞌ name nhaü̃gu curüĩnü: ‘Aicuma niĩ na tama tchoü̃ nameü̃ na nhuãcü tchoü̃ naucuꞌẽü̃. Notürü eꞌna ta nümaü̃ i ngẽma nüü̃ tchacuaꞌü̃ i ngẽma ucuꞌẽwa i meü̃güü̃? Eꞌna tchoü̃ nameü̃ ta nüna tchiũgatchi i ngẽma duü̃ü̃cüma i tchoü̃ ucuꞌẽü̃ na nagu tcharüĩnüetchaü̃caꞌ i norü ucuꞌẽ?’ Tchi duü̃ü̃ i nüü̃ cuáü̃ yiĩgu rü yigü taporaẽẽ tá na nüü̃ icuaꞌgüü̃ü̃caꞌ i ngẽma nguꞌẽẽtae i ucuꞌẽgü i megüü̃ i yaugüü̃wa. — Pro 15:31
w10 15/3 32wa 4tchimaü̃
Nümaü̃ i Tupanaarü duü̃ü̃gü rü narümaãtchigü nagagu i gutchaü̃gü erü togü natchi naaie, rü dĩẽru, rü daꞌawegü. Rü ta bemana ngẽma rü cuü̃ nangupetü. “Rü ñu̱xma rü chayaxĩ̱xãchiãẽxü̃chi rü chauãẽwa poraãcü chamuü̃”, nhanagürü ga Dawí. (Sal 143:4) Nhuãcü ãẽꞌgacü ga Dawí rü nüü̃ narüporamaẽ ga yema nüü̃ ngupetü? Dawí nügü naporaẽẽ na nüna nacuaꞌãtchiü̃caꞌ na nhuãcü Yeuwa rü norü duü̃ü̃gümaã ínacuá rü nhuãcü Yeuwa marü nüü̃ ínananguü̃tchiẽẽ ga nüma. Nüma rü nagu narüĩnü i natchiga taꞌacü Yeuwa marü nanaü i naégagagu. Rü Yeuwa üü̃gu narüĩnü. (Sal 143:5) Ngegumarüü̃, nagu tarüĩnüẽ i Yeuwa rü guü̃ma i taꞌacü nüma rü marü naüü̃ rü nhamaãcüü naüü̃ rü tüü̃ narüngü̃ẽẽ woo i gutchaü̃güwa.
w15 15/3 32wa 2tchimaü̃
Nhuguãcü, bemana cuma rü Dawírüü̃ nagu curüĩnü, yeguma nhanagürügu: “Pa Cori Pa Tupanax ¡paxa choxü̃ nangãxü̃! Erü ngẽmatama chayu. ¡Rü taxṹ i cuxoxü̃ nax choxü̃ curüngü̃xẽxẽxü̃!” (Sal 143:5-7, 10) Ngẽma ngupetüwa, nüü̃ ínanguẽẽ na cunatü ya Tupana rü cuü̃ nanaweꞌ taꞌacü niĩ i norü ngútchaü̃. Cunaü i ngẽma ngẽguma icunaüütchigu i curü nguneü̃ na Tupanaarü Orewa cuugütaeü̃caꞌ rü ngẽmagu curüĩnüü̃caꞌ. Ngẽmaãcü, cuma rü nüü̃ cucuaꞌ ngeü̃rüüü̃ niĩ i Tupanaarü mugü rü nüü̃ cudau nhuãcü nüma rü norü duü̃ü̃güü̃ narüngü̃ẽẽ i nũcüma. Ngẽguma nüü̃ cuĩnügu a Yeuwa rü nüü̃ cucuaꞌ na naga cuĩnü rü meü̃ i nacüma niĩ.
Nguꞌẽẽtaegü uirurüü̃ iĩü̃
it-2 610wa
Duü̃ü̃gü rü nadorataꞌagü rü tchieü̃ oremaã nideagü rü nhama i ãtapearü gurerüü̃ niĩ rü poraãcü nanatchieẽẽ i togü. (Sal 58:3, 4) Rü oregütaaꞌgütchiga nidea i nhaü̃: “Rü yima norü conü rü ñoma ãxtapearü conürüxü̃ naxãmagu”. (Sal 140:3, Rom 3:13) Duü̃ü̃arü conü, ngẽguma tama meü̃ i deagü niugu rü tchiri togüetchiga nideagü rü nhama i “üxüxü̃ i nawa iyuxü̃rüxü̃ nixĩ”. — Tia 3:8
3-9 FEWERERUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ SALMOS 144-146
“Taãxẽ nüxü̃́ nangẽxma i ngẽma duü̃xü̃gü i Cori ya Tupanamaxã Tupanaã̱xgüxü̃”
w18.04 32wa 3-4tchimaü̃gü
2. Ngẽwacaü̃ i deagü nawa i Tradução do Novo Mundo [tomagawa] rü nüü̃ rüngü̃ẽẽ na meã nüü̃ nacuaꞌü̃caꞌ i Salmo 144. Nhaa dea “então” nawa i wetchicuru 12 rü nanaweꞌ na guü̃ma i meü̃gü i wetchicurugü 12 nhuꞌmatáta 14wa nüü̃ yauü̃ rü natchiga niĩ i yíema Tupanaga ĩnüẽü̃ rü yíemagü i nacaꞌ cae na Tupana tüü̃ inanguü̃ẽẽü̃caꞌ i duü̃ü̃gü i norü tchieü̃güwa (wetchicuru 11). Ngẽma ngẽwacaü̃ i deagü rü tüü̃ nüü̃ nacuaꞌẽẽ ta i wetchicuru 15. Ngẽguma nangoꞌgu ngẽma wetchicuruwa i nhaa dea “feliz” rü natchiga niĩ i ngẽmatama i duü̃ü̃gü i norü Tupana rü Yeuwa niĩ. Name nüü̃ tacuaꞌü̃ ta na ngẽma namatü i ebréugügawa tama nayema i sinais de pontuação. Rü ngẽmacaꞌ, ngẽma to nagawa ümatügüü̃ rü nawaꞌe meã nüü̃ nacuaꞌgüü̃ taꞌacü aicuma nüü̃ niutchaü̃ i ngẽma wetchicurugü i ebréugügawa.
3. Ngẽma ngẽwacaü̃ i deagü rü namaã nawüigu i togü i wetchicurugü i Tupanaarü Orewa ngẽmagüü̃ rü nanaweꞌ na Tupana taétü nawémeꞌ i teé naga iĩnüẽü̃. Ngẽma ngẽwacaü̃ i deagü nacaꞌ i dea “asher” rü namaã nawüigu i taꞌacü Dawí nagu nayaõ. Nüma rü nagu nayaõ na Yeuwa rü Iraéutanüü̃güü̃ ínanguü̃ẽẽ ga norü uwanügüwa rü yicama naétü nawémeꞌ norü duü̃ü̃gü namaã i taãẽ rü ngẽmaü̃gü. (Lev 26:9, 10, Deut 7:13, Sal 128:1-6). Cuaꞌãtchiruü̃, Deuteronômio 28:4 rü nhanagürü: “Rü nüma ya Cori ya Tupana rü tá pexacügüxü̃ narüngü̃xẽxẽ. Rü penetügü rü tá namu i norü o. Rü perü wocagü rü perü carnérugü rü guxü̃ma i pexü̃nagü rü tá pexü̃́ nimu.” Ngẽma rü aicuma nangupetüü̃ yeguma Dawí nane rü ãẽꞌcacü niĩgu. Yeguma Charómoü̃ rü ãẽꞌcacü niĩgu, Iraéutanüü̃gü rü nameãẽãcüma namaẽ rü nüü̃ nayema ga taꞌacü nanawaꞌegü. Rü nhuꞌmatchi, nümaü̃ i meü̃gü i Charomóü̃ naü yeguma ãẽꞌcacü niĩgu rü namaã nawüigu i taꞌacü Ngetchutchu wipeꞌewa naü. — 1 Reis 4:20, 21, Sal 72:1-20
16 Nagu tayaõgüü̃ na maü̃ i taguma gúü̃ tüü̃́ nangẽma tá rü wüi Tupanaarü ãmare i meẽtchiü̃ niĩ. Meã ítananguẽẽü̃ i taꞌacü i meü̃ wipeꞌewa ngupetüü̃ rü aicuma nagu tayaõgüü̃ na Tupana nayanguẽẽ tá i ngẽma. Taꞌacü nagu tayaõgüü̃ nhama wüi i wapuruarü ngãü̃ruü̃rüü̃ niĩ, erü tüü̃ narüngü̃ẽẽ na tama nüü̃ tarütchaueü̃caꞌ i gutchaü̃güwa, ngẽguma tawe ningeü̃tanügu rü yuarü ãũcümaü̃wa ingẽmagügu. Rü taꞌacügu tayaõgüü̃ rü napateꞌerüü̃ niĩ, erü tórü ĩnügü ínapoü̃ na nüna tiĩgatchiü̃caꞌ i taꞌacü niĩ i tchieü̃ rü iügüü̃caꞌ i taꞌacü niĩ i meü̃. Taꞌacügu tayaõgüü̃ Tupanaarü Orewa ne naĩ rü Tupanana tangaicama rü ta tüü̃ naweꞌ na nhuãcü nüma rü ãũrima tüü̃ nangetchaü̃. Muü̃tchi i meü̃gü tüü̃ nangupetüü̃ tá i wipeꞌewa tchi poraãcü nagu tayaõgügu.
17 Pauru nüü̃ niu nawa i norü popera nacaꞌ ga romacü̃ãꞌ i nhaü̃: “Petaãẽgü erü ípenanguxẽẽ.” (Rom 12:12) Pauru nataãẽ erü aicuma nagu nayaõ na Tupanaü̃tawa nangẽma i wipeꞌewa, tchi Yeuwaga naĩnüamagu. Yiemagü ta, tataãẽgü namaã i taꞌacügu tayaõgüü̃ erü aicuma nüü̃ icuaꞌgüü̃ na Yeuwa nayanguẽẽ tá i norü unetagü. Ngẽgumarüü̃ i wiyaeü̃ rü nhanagürü: “Tataãxẽ ya yíxema . . . rü nagu yaxṍxe ya Cori ya Tupana. . . . Rü nüma rü guxü̃guma nayanguxẽxẽ i ngẽma nüxü̃ yaxuxü̃.” — Sal 146:5, 6
w18.01 26wa 19-20tchimaü̃gü
19 Marü 6 mil taunecü rü Tchataná nhama naãnemaã ínacuá rü nüü̃ nioeẽẽ i duü̃ü̃gü. Rü daa nguneü̃güarü guꞌwa rü naãnewa nangẽma muü̃tchi i duü̃ü̃gü i poraãcü nügüguicatama rüĩnüẽ, rü norü dĩẽruguama narüĩnüẽ rü norü ngútchaü̃caꞌama nadaugü. Ngẽma duü̃ü̃gü rü naguicatama rüĩnüẽ i nayoniẽ i guü̃ma rü norü ngútchaü̃caꞌíra nadaugü. Nümagü tama aicuma taãẽãcü namaẽ. Wiyaecü nüü̃ niutchiga i teé aicuma taãẽãcü imaẽ, ru nhanagürü: “Rü tataãxẽ ya yíxema Acóbuarü Tupanaxü̃tawa nayaxúxe i tümaarü ngü̃xẽxẽ rü nüxü̃́ yaxṍxe ya Cori ya Tupana.” — Sal 146:5
20 Wüitchigü i nguneü̃gu yeera Tupanaü̃ tangetchaü̃gü. Rü guü̃ i taunecütchigü, yeera i duü̃ü̃gü rü tamaã wüigu Yeuwaü̃ nicuaꞌüü̃gü. Ngẽma rü nanaweꞌ na Tupana rü torü ãẽꞌcacü niĩ rü paama rü duü̃ü̃güna naã tá muü̃tchi i meü̃gü. Rü ãũrima tüü̃ nataãẽẽẽ nüü̃ icuaꞌgüü̃ na Yeuwa tamaã nataãẽ. Rü teé Yeuwaü̃ tangetchaü̃ rü guü̃gutáma tataãẽgüü̃.
Nguꞌẽẽtaegü uirurüü̃ iĩü̃
it-1 135wa 5tchimaü̃
Tupanaarü Ore nüü̃ niu na name niĩ duü̃ü̃gü̃ rü meã nüna nadau i guü̃ma maẽü̃. Rü Yeuwa nügütchigatama nidea na nüma rü ngetchaü̃ãcüma nüna naã i maü̃ rü meã nüna nadau. (Pro 12:10, Sal 145:15, 16) Moichéarü mugü rü ta nanamu na meã nüna nadau i naeü̃gü i naü̃na iĩgüü̃. Rü yeguma nüü̃ inayangaugu i naeü̃gü, nümagü rü nawaꞌe norü yoraü̃́ inanatáeguẽẽ. Rü ngẽguma yaütchiü̃ nangegu i naeü̃gü rü nüü̃ rüngü̃ẽẽ. (Êxo 23:4, 5) Teé nüna tadaugu rü tanawaꞌe namaã tamecümaãcü rü namaã tapuracü. (Deut 22:10, 25:4) Duü̃ü̃gü rü nawaꞌe naeü̃güü̃ narüngü̃eü̃ nagu i tchawurugü. (Êxo 20:10, 23:12, Deut 5:14) Rü duü̃ü̃gü nawaꞌe meã namaã ínacuágü rüeꞌna nüü̃ nimaꞌ ga naeü̃gü i ãũcümaü̃güü̃. (Gên 9:5, Êxo 21:28, 29) Rü taũma natoraü̃ü̃ i naeü̃güü̃ nanaüacüẽẽ i ngẽma naü̃nagü. — Lev 19:19
10-16 FEWERERUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ SALMOS 147-150
Nangẽma i nacüma i guü̃raü̃ãcü̃ma na Yeuwaü̃ icuaꞌüü̃güü̃caꞌ
w17.07 18wa 5-6tchimaü̃gü
5 Yeuwa nüü̃ nataãẽẽẽ ga wüitchigü ga duü̃ü̃gü ga Iraéutanüü̃gü. Rü nhamacüü̃ nüma rü tüna nadau i wüitchigü i yiemagü. Wiyaecü rü nhanagürü: “Rü nüma rü tüxü̃ nataãẽxẽxẽ ya yíxema poraãcü ngechaü̃ ingegüxe rü tüxü̃́ nayana̱i̱xgü i tümaarü o̱xrigü.” (Sal 147:3) Nameẽtchi nüü̃ icuaꞌgüü̃ na Yeuwa rü tacaꞌ nagutchaãẽ. Rü nüma rü ãũrima nanawaꞌe tüü̃ nataãẽẽẽ rü nanameẽẽ i guü̃ma i torü gutchaü̃gü. (Sal 34:18, Isa 57:15) Nüma rü ta tüna naã i cuaꞌ rü pora na nüü̃ tarüporamaegüü̃caꞌ i ngeü̃rüüü̃ i gutchaü̃gü i tüü̃ nangupetüü̃. — Tia 1:5
6 Nawena, wiyaecü rü dauü̃gu nadawenü rü nüü̃ niu na Yeuwa “rü nüxü̃ nacua̱x nax ñuxre yixĩxü̃ ya ẽxtagü rü wüxichigü rü naégamaxã nüxna naca”. (Sal 147:4) Tüꞌcüü̃ ngẽma wiyaecü rü inanaügü na ẽtagütchigagu yadea? Yeguma dauü̃gu nadawenügu, nüma rü nüü̃ nacuaꞌ na muü̃tchi i ẽtagü nayema. Notürü, yema nguneü̃gu, tama nüü̃ nacuaꞌü̃ nhure ga ẽtagü nayema i dauü̃wa. Nhamacüü, nüü̃ icuaꞌgüü̃ na nangẽma muü̃tchi i ẽtagü i torü ĩnüarü yeera. Nümaü̃gü nüü̃ niugü na dauü̃wa nangẽma bilhões i ẽtagü i torü galáxiawa. Rü bemana guü̃ i dauü̃gu i naãnewa nangẽma trilhões i galáxias! Yiemagü rü tama nüü̃ tacuaꞌgü i nhure i ẽtagü rü dauü̃guü̃ i naãnewa nangẽma. Notürü Yeuwa ya torü Üruü̃ rü nüü̃ nacuaꞌ rü nhuꞌmatchi nüna naã i naéga i wüitchigü i ẽtagü. (1 Cor 15:41) Taꞌacü wiyaecü rü tüü̃ nanguꞌẽẽtchaü̃? Tchi Tupana nüü̃ nacuaꞌgu i guü̃ma i ẽtagütchiga, nüma rü nüü̃ nacuaꞌ ta guü̃ma i cutchiga. Yeuwa cuégaü̃ nacuaꞌ. Ngeü̃rüüü̃mare i ngora rü nguneü̃ rüeꞌna tchutacü, Yeuwa nüü̃ nacuaꞌ ngetá cungẽma, taꞌacügu curüĩnü rü taꞌacü cunawaꞌe.
w17.07 18wa 7tchimaü̃
7 Yeuwa meã cuü̃ nacuaꞌ rü cuü̃ narüngü̃ẽẽtchaü̃ i gutchaü̃güwa. Nüma rü nüü̃́ nangẽma i pora na tüü̃ narüngü̃ẽẽü̃caꞌ rü nhuꞌmatchi meã nüü̃ nacuaꞌ i taꞌacü tüü̃ ngúü̃ rü torü ĩnü. (Nawa naugütae Salmo 147:5.) Bemana cuma rü poraãcü i gutchaü̃wa cungẽma rü ngẽmagagu cutura. Tupana nüü̃ nacuaꞌ i curü turagü rü nüna nacuaꞌãtchi na waiü̃müteꞌe quiĩü̃. (Sal 103:14) Nagagu tipecaduãgüü̃, rü mueꞌpüꞌcüna tagutchinü i wüi gutchinüwa, rü ngẽma rü tüü̃ nangetchaü̃ẽẽ. Guãma i yiemagü rü marü tüü̃ nangẽma i ngútchaü̃gü i tchieü̃, rü nhuguãcü tiãũãtchiwaꞌegü rüeꞌna nüü̃ tiugü i wüi ore i taúema nüü̃ cuaꞌü̃. Yeuwa taguma ngẽma naü. Woo i ngẽma, nüma rü nüü̃ nacuaꞌ i torü ĩnügü rü nanaü i ngẽma i torü ĩnüarü yeera. — Isa 40:28
w17.07 21wa 18tchimaü̃
18 Wiyaecü nüü̃ nacuaꞌ ga Yeuwa guü̃guma naétü nawémeꞌ ga Iraéutanüü̃gü. Yeuwaicatama nüna nanaã i norü mugü rü norü deagü. (Nawa naugütae Salmo 147:19, 20.) Ngẽgumarüü̃ ta, Yeuwa naétü nawémeꞌ i norü duü̃ü̃gü i nhamaãcüü. Norü duü̃ü̃güicatama nüü̃́ nangẽma i Tupanaéga. Norü Ore rü namaã ínacuá i torü maü̃. Nüü̃ icuaꞌgüü̃ a Yeuwa rü namaã taãmücü. Ngẽgumarüü̃ nanawü i wiyaecü i Salmo 147wa, yiemagü rü meã nüü̃ icuaꞌgüü̃ na tüꞌcüü̃ Yeuwaü̃ ticuaꞌüü̃gü rü ngẽmacaꞌ yiemagü togüeü̃ itaãẽẽẽ na nüü̃ ticuaꞌüü̃güü̃caꞌ.
Nguꞌẽẽtaegü uirurüü̃ iĩü̃
it-1 262wa
Wiyaecü rü nüü̃ niu na “werigü” rü Yeuwaü̃ nicuaꞌüü̃güü̃ (Sal 148:1, 10), erü ngẽma naü̃ne nameẽtchi. Wüirica i weri rü bemana nüü̃́ nangẽma mil nhuꞌmata 20 mil naãꞌmügü. Notürü, wüitchigü i naãꞌmüwa nangẽma muü̃tchi i natchipeꞌegü (bárbula) rü wüitchigü i ngẽma natchipeꞌegüwa nangẽma ta i muü̃tchiü̃ i üyegü (barbicelas). Rü nawa wüi napatchií i 15 centímetro niĩ, rü nüü̃ nangẽma milhares i bárbulagü rü milhões i barbicelagü. Rü nhuãcü niĩ i ngẽma napeꞌátü rü naü̃ne rü werigüü̃ nanatautchaẽẽ na meã nagonagüü̃caꞌ rü aviãoarü yeera nameẽtchi. Weriarü natchinaꞌãgü rü tama naya. Rü ngẽmaãcü wüi weriarü natchinaꞌãgü i alcatraz rüeꞌna fragata, rü napeꞌátügü rü norü maꞌ niĩ i 2 metrugü, rü bemana 110 gramagü nüü̃́ nangẽma. Nümaü̃ weritchinaꞌãarü aiepeꞌewaütchi rü nüü̃́ nangẽma íraü̃ i norü toü̃ruü̃gü na tama nabüyeü̃caꞌ rü ngẽgumarüü̃ i aviãopeꞌátügüwa nangẽma.
17-23 FEWERERUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ PROVÉRBIOS 1
Ngetüꞌüü̃gü rü paü̃gü — Teéga peĩnüẽ tá?
w17.11 29wa 16-17tchimaü̃gü
16 Muü̃tchi i ngetüꞌüü̃gü rü paü̃gü rü nagu narüĩnüẽ na nanatügü rü tama meã nüü̃ tacuaꞌgüü̃ i norü ĩnügü rü nawaꞌe na namaã ítacuágüü̃ i guü̃ma i norü maü̃güwa. Eꞌna cuma rü marü ngẽmaãcü curüĩnü? Tchi ngẽma rü cuü̃ nangupetügu, bemana cuma rü curümaãtchi nagagu cuü̃ natchieweü̃tchi rü ngẽmacaꞌ tama meã nüü̃ cucuaꞌü̃cüraü̃ tchi Yeuwacaꞌ cumaü̃gu rü curü mecaꞌ niĩ. Notürü tchi nüü̃ curütchaugu na Yeuwaga cuĩnüü̃, paatama nüü̃ quicuaꞌãtchi na cunatügü rü cumücügü i yaõgüü̃tücumüwa rü ãũrima cuü̃ nangetchaü̃.
17 Rü nhaü̃gu rüĩnü: tchi cunatügü rü taguma cuü̃ narüweꞌãtchiẽẽgu, bemana cuma rü nagu curüĩnücüraü̃ i nhaü̃: ‘Nümagü tama tchaucaꞌ nagutchaãẽ.’ (Ebr 12:8) Notürü bemana cuma rü namaã cunu na nhuãcü cuü̃ narüweꞌãtchiẽẽ. Tchi ngẽma rü cuü̃ nangupetügu, taṹ ngẽmagu curüĩnü. Cugü naporaẽẽ na meã nüü̃ cucuaꞌü̃caꞌ na tüꞌcüü̃ cuü̃ narüweꞌãtchiẽẽgüü̃. Ngẽguma cunatügü cumaã nüü̃ iugu i taꞌacü tama cuü̃ meü̃, rü taũ paa cunuü̃. Tupanaarü Ore rü nhanagürü: “Yíxema cua̱x tüxü̃́ ngẽxmaxe, rü tama tamuarü orexã̱x. Rü yíxema tümaãẽxü̃ cuáxe, rü tama tanuxwa̱xe, rü yáxna taxĩnü.” (Pro 17:27) Name niĩ cuma rü nagu rüĩnü na nhuãcü duü̃ü̃ i naãẽ i cuáü̃rüü̃ cugü quiĩẽẽ na nüü̃ cucuaꞌü̃caꞌ na nhuãcü ucuꞌẽgüü̃ cuĩnü i tama nuãcüma rü ta tama nacaꞌ cugutchaãẽü̃tchi na nhuãcü cuü̃ narüweꞌãtchiẽẽ. (Pro 1:8) Cuü̃́ nangẽma i cunatügü i Yeuwaü̃ ngetchaü̃güü̃ rü wüi norü ãmare niĩ. Taguma nüü̃ icurüngüma na nümagü rü cuü̃ narüngü̃ẽẽtchaü̃ na cunayauü̃caꞌ i maü̃ i taguma gúü̃.
w05 15/2 19-20wa 11-12tchimaü̃gü
11 Nüü̃ nataãẽẽẽ a Tupana, rü tama duü̃ü̃güü̃. Airügumaraü̃ niĩ nanaweꞌ teé tiĩgü nawa i duü̃ü̃gütücumü i ngẽmagüü̃. Guü̃ma i duü̃ü̃gü nanawaꞌe i namücügü, rü nüü̃́ nangẽma i namücügü rü name niĩ. Ngẽguma ngetüꞌüü̃ rüeꞌna paü̃ niĩgu rü namücügü rü bemana poraãcü nüü̃ natchiewe, rü ngẽmacaꞌ ngẽma paü̃ rüeꞌna ngetüꞌüü̃ rü ãũrima nanawaꞌe togürüü̃ niĩü̃caꞌ rüeꞌna nüü̃ nataãẽẽẽü̃caꞌ. Notürü mueꞌpüꞌcüna ngẽma namücügü rü tama nagu rüĩnü i ngẽma paü̃ rüeꞌna ngetüꞌüü̃ rü bai norü mecaꞌ nagutchaãẽ. Nhuguãcü nümagü rü nanawaꞌegü i wüi duü̃ü̃ na tchieü̃ wüigu namaã naüü̃caꞌ. (Pro 1:11-19) Ngẽguma wüi Yeuwaarü duü̃ü̃ rü tchieü̃gu narüngugu erü togü nüü̃ natchiewe, airügumaraü̃ niĩ tama nüü̃ niu i teé niĩ. (Sal 26:4) Pauru rü naucuꞌẽ i nhaü̃: “Rü tama name i ñoma i naanecüã̱x i duü̃xü̃gücümagu pexĩ”. (Rom 12:2) Yeuwa tüna naã i pora i inawaꞌegüü̃ na nüü̃ tarüporamaegüü̃caꞌ i ngẽma gutchaü̃. — Ebr 13:6
12 Ngẽguma tüü̃ natchieweü̃tchigu na tchieü̃ taügüü̃caꞌ bemana nanatchiẽẽ i tacüma i meü̃, rü inawaꞌegü na nüna icuaꞌãtchieü̃ na Tupanaga iĩnüẽ rü duü̃ü̃güarü ĩnügüarü yeera narümemaẽ niĩ. Nawa i Êxodo 23:2 nangẽma i wüi meü̃ i ucuꞌẽ: “Rü tama name i natanügu cuxã i ngẽma rümumaexü̃ i duü̃xü̃gü i chixexü̃ ügüxü̃.” Yeguma muü̃tchi ga iraéutanüü̃ tama nagu nayaõgügu na Yeuwa nayanguẽẽ i norü uneta, rü Carébi rü tama duü̃ü̃güarü ĩnügu naũ. Nüma rü aicuma nüü̃ nacuaꞌ na Tupanaarü unetagü rü yanguü̃ tá, rü yemacaꞌ Yeuwa naétü nawémeꞌ erü tama yema duü̃ü̃güwe narüũ. (Núm 13:30, Jos 14:6-11) Na Yeuwamaã cuãmücüamaü̃caꞌ, cuma rü ta tama nüü̃ curütchautchaü̃ ngẽguma cuna naĩnügu?
Nguꞌẽẽtaegü uirurüü̃ iĩü̃
it-2 1140wa
Ngẽguma Tupanaarü Orewa nangoꞌgu i ngẽma dea “naetchitamare maẽü̃”, rü tama nüü̃ niutchaü̃ na duü̃ü̃ rü ãũãẽü̃ niĩ. Notürü, airügumaraü̃ niĩ ngẽma dea nüü̃ niutchaü̃ natchiga i duü̃ü̃ i tama meã nagu rüĩnüü̃ rü bai Tupana nawaꞌeãcüma namaü̃. Ebréugügawa nangẽma muü̃tchi i deagü na ngẽma duü̃ü̃tchiga nideaü̃caꞌ, cuaꞌãtchiruü̃: kesíl (“Naechitamare Maxẽxü̃x”, Pro 1:22), ꞌewíl (“tama naãẽxü̃ cuáxü̃”, Pro 12:15), na·vál (“tama naãẽxü̃ cuáxü̃”, Pro 17:7), rü lets (“tama ixĩnüchaü̃xü̃”, Pro 13:1). Rü gregugawa, á·fron nüü̃ niutchaü̃ natchiga i ‘nangeãẽmare’ (Luca 12:20), a·nó·e·tos rü natchiga i ‘tama naãẽü̃ nacuaꞌ’ (Gár 3:1), rü mo·rós natchiga i ‘nangeãẽ’ (Mat 23:17, 25:2).
24 FEWERERUARÜ – 2 MARÇUARÜ
TUPANAARÜ ORE I MEÜ̃GÜ UIRURÜÜ̃ IĨÜ̃ PROVÉRBIOS 2
Tüꞌcüü̃ cugü cuporaẽẽ na Tupanaarü Orecaꞌ cunguꞌü̃caꞌ?
16 Muü̃tchi i duü̃ü̃gücaꞌ tama name nawa naugütae rü nacaꞌ nangúeü̃. Notürü Yeuwa tüna nau na ‘yigü iãgüü̃ na nacaꞌ tadaugüü̃caꞌ’ i aicumaü̃ i ẽü̃guü̃. (Nawa naugütae Provérbios 2:4-6.) Ngẽguma ngẽmawa yigü iporaẽẽgügu, rü guü̃guma torü mecaꞌ niĩ. Wüi taene nagu naãéga Corey rü nüü̃ niu na ngẽguma Tupanaarü Orewa naugütaegu, nüma rü nagu narüĩnü i wetchicurutchigü. Nüma rü nhanagürü: “Tchama rü nawa tchaugütae i guü̃ma i taꞌacü naátüwa nangẽma rü meãma nacaꞌ tchadau i to wetchicurugüwa rü torü poperagüwa . . . Rü ngẽmaãcü meãma tchayoiniẽ i tchorü ugütaewa!” Nüétama nhuãcü Tupanaarü Orecaꞌ tangúegu, tanaweꞌgü na tüü̃ nameẽtchi i Tupanaarü Ore ngẽguma yigü iporaẽẽgügu na nacaꞌ tangúeü̃caꞌ. — Sal 1:1-3
3 Tupanaarü Ore rü nhanagürü: “Norü ügü nax cua̱x tüxü̃́ ngẽxmaxü̃ rü ngẽma nixĩ nax Tupanaga ixĩnüxü̃. Rü ngẽxguma Tupanaga ixĩnügu, rü ngẽmawa nango̱x nax aixcüma taãẽxü̃ icuáxü̃.” (Pro 9:10) Yíema tüü̃ nangẽmaẽ i cuaꞌ rü tümaarü cuaꞌmaã meü̃ i uneta taüe. Notürü tanaweꞌgü i tüü̃́ nangẽma i cuaꞌ ngẽguma ‘Tupanaü̃ icuaꞌü̃gu’, rü ngẽguma nacaꞌ tadaugügu nüü̃ icuaꞌgüü̃ i Yeuwaarü ĩnü naü̃pa na wüi uneta iügüü̃. Rü iügüü̃ i ngẽma ngẽguma Tupanaarü Orewa rü poperagüwa iugütaegügu. Rü ngẽmaãcü, tanaweꞌgü i cuaꞌ i aicumaü̃. — Pro 2:5-7
4 Yeuwaicatama tüna naã i cuaꞌ i aicumaü̃. (Rom 16:27) Tüꞌcüü̃? Norü wüi, erü Yeuwa rü torü üruü̃ niĩ rü nüma rü meãma nüü̃ nacuaꞌ i norü ütchiga. (Sal 104:24) Norü tare, guü̃ma i taꞌacü Yeuwa naü rü nanaweꞌ i norü cuaꞌ. (Rom 11:33) Norü tamaẽꞌpüꞌ, teé aicuma naga taĩnüẽ i Yeuwaarü ucuꞌẽgü rü guü̃guma meü̃gü tayaugü. (Pro 2:10-12) Tchi cuaꞌ i aicuma tüü̃́ ngẽmatchaü̃gu, inawaꞌegü tanayaugü i ngẽma aicumagüü̃, rü ngẽmaãcü tamaẽ.
w16.09 23wa 2-3tchimaü̃gü
2 Nhamaãcüü, muü̃tchi i duü̃ü̃gü rü tama nagu nayaõgü na Tupana naüü̃ i guü̃ma, rü nagu nayaõgü na maĩcüwa ne naĩ i duü̃ü̃gü. Tchi cuma rü ngetüꞌüü̃ rüeꞌna paü̃ rüeꞌna Tupanaarü Orearü ngúetanüü̃ quiĩgu, bemana cugüãẽwa cugüna cuca na nhuãcü meã togümaã nüü̃ quiutchiga na Tupana rü nanaü i guü̃ma. Tchi cuma rü ngẽma cuütchaü̃gu, nanaporaẽẽ i curü õ. Tupana tüna naã i cuaꞌ na meã nagu curüĩnüü̃caꞌ rü ngẽma rü cuü̃ ínapoü̃ tá. Nhuãcü? Nüü̃ cuo tá i naãnearü ĩnügü na bemana nanatchieẽẽ i curü õ. — Nawa naugütae Provérbios 2:10-12
3 Inawaꞌegü meã nüü̃ icuaꞌgüü̃ a Tupana na nanaporaẽẽü̃ i torü õ. (1 Tim 2:4) Rü ngẽmacaꞌ, ngẽguma Tupanaarü Orecaꞌ rü torü poperacaꞌ cungúegu, tama paatchimare cunaü i ngẽma. Cugü naporaẽẽ na meã nüü̃ cucuaꞌü̃caꞌ i taꞌacü nawa cuugütaeü̃. (Mat 13:23) Ngia nüü̃ tadaugü na nhuãcü ngẽma rü cuü̃ narüngü̃ẽẽ na aicuma nüü̃ cucuaꞌü̃caꞌ na Tupana nangẽma rü tüna naãü̃ i norü Ore. Cuma rü nüü̃ cudau ta na ngẽma rü aicuma niĩ! — Ebr 11:1
Nguꞌẽẽtaegü uirurüü̃ iĩü̃
it-1 1237wa 1tchimaü̃
Rü wüi duü̃ü̃ aicuma meã maü̃ i Tupanapeꞌewa rü tama norü poragagutama namaü̃. Notürü nüü̃́ nangẽmagagu i norü õ na Yeuwa nüü̃ namaẽẽü̃. (Sal 25:21) Tupana tamaã iunetaü̃ i nhaü̃: “Rü tüxna nadauxü̃ ya yíxema aixcüma nape̱xewa mea maxẽxe rü taxuxü̃ma i chixexü̃ ügüxe”. (Pro 2:6-8, 10:29, Sal 41:12) Ngẽma duü̃ü̃ nacaꞌ nagutchaãẽ na Yeuwa namaã nataãẽ rü ngẽmagagu meããcü namaü̃ rü tama tchieü̃gu nangu. (Sal 26:1-3, Pro 11:5, 28:18) Woo Yó nüü̃ niu na nhuguãcü wüi duü̃ü̃ i meü̃ üü̃ rü nayu namaã i ngẽma tchieü̃ ügüü̃, rü Yeuwa namaã iunetaü̃ na ngẽma meü̃ üü̃ rü nanayau tá muü̃tchi i meü̃gü rü wipeꞌewa meã namaü̃. (Jó 9:20-22, Sal 37:18, 19, 37, 84:11, Pro 28:10) Ngẽgumarüü̃ i Yóarü maü̃, rü Tupana tümamaã nataãẽ i teé aicuma naga ĩnüẽ rü tama dĩẽruguama rüĩnüü̃. (Pro 19:1, 28:6) Tümaacügü ya teé aicuma Tupanaga iĩnüẽ rü tataãẽgü niĩ (Pro 20:7), erü nagu namaẽ i ngẽma nanatügüarü cuaꞌruü̃ i meü̃.