Tüꞌcüü̃ Yeuwaéga rü Ngetchutchucaꞌ narümemaeü̃?

1-2. (a) Taꞌacü Ngetchutchu naüü̃ ga tchütacü naü̃pa na nayutchaü̃? (b) Taaꞌcü i cagü nhaa nguꞌwa tanangãü̃gü?

YÜÜARÜ ãgümücüarü tchütaü̃gu norü nguneü̃ 14gu Nisáü̃arü tauemacügu i norü taunecü 33gu. Ngetchutchu rü norü ngúeü̃gümaã natchibüe ga Coriarü Õna i Üüneü̃wa. Nüma rü marü nüü̃ nacuaꞌ na Yúda na naetchitaeü̃ tá rü yicama norü uwanügü poraãcü nanacuaiꞌgüü̃ rü nawena nayamágüü̃. Rü nawena Coriarü Õna i Üüneü̃wa natchibüeü̃ rü Ngetchutchu norü deamaã nüü̃ naporaẽẽ ga yema norü ngúeü̃gü. Yeguma nüna niĩgatchinügu ga norü ngúeü̃gü, Ngetchutchu nanaü ga yumüẽ i meẽtchima. Norü ngúeü̃ ga Juã́ũ nanaümatü ga yema norü yumüẽ. Rü Juã́ũ capíturu 17wa nangẽma i ngẽma yumüe.

² Nhaa nguꞌwa nüü̃ tadaugü i taꞌacü Ngetchutchuarü yumüẽwa nüü̃ icuaꞌgüü̃ i natchiga taꞌacücaꞌ nagutchaãẽ rü taꞌacü nüü̃ rümemaeü̃tchi yeguma nhama ga naãnewa nayemagu. Ngiã nüü̃ tadaugü i norü ngaü̃gü i nhaa norü cawagü.

“MARÜ TÜÜ̃ NÜÜ̃ TCHACUAꞌẼẼ I CUÉGA”

3. Taꞌacü ga Ngetchutchu nüü̃ niu i naéga ya Yeuwa, rü taꞌacütchiga niĩ i ngẽma? (Juã́ũ 17:6, 26)

³ Rü norü yumüẽwa, Ngetchutchu nhanagürü: “Rü marü tüü̃ nüü̃ tchacuaꞌẽẽ i cuéga.” Aicuma niĩ Ngetchutchucaꞌ narümemaẽü̃ niĩ ga yema erü nüma rü tareeꞌpüꞌcüna nüü̃ niu. (Nawa naugütae Juã́ũ 17:6; Juã́ũ 17:26.a) Eꞌna nüma rü nanawaꞌe norü ngúeü̃gümaã nüü̃ niu i taꞌacü niĩ i Tupanaéga? Tama, erü nümagü rü yudíugü niĩgü yemacaꞌ marü nümagü nüü̃ nacuaꞌgü na Tupanaéga Yeuwa yiĩ. Ngẽma naéga 7 mil eꞌpüꞌcüna nangó i Tupanaarü ore i Ebréugügawa ümatüü̃wa. Ngẽmacaꞌ yeguma Ngetchutchu nüü̃ niugu i nhaü̃: “Rü marü tüü̃ nüü̃ tchacuaꞌẽẽ i cuéga”, rü tama namaã nanangúeẽẽ na taꞌacüme yiĩ i Tupanaéga, notürü namaã nanangúeẽẽ na teé yiĩ ya Tupana ya Yeuwa. Rü Ngetchutchu rü norü ngúeü̃güü̃ narüngü̃ẽẽ na meãma Yeuwaü̃ nacuaꞌgüü̃caꞌ, cuaꞌãtchiruü̃ namaã nüü̃ niu i taꞌacü nhama i naãnecü̃ãꞌmaã ínaunetaü̃, taꞌacü marü nüma naüü̃, taꞌacü naüü̃ tá rü norü nacümagütchiga. Ngetchutchurica meãma Yeuwaü̃ nacuaꞌ rü ngẽmacaꞌ norü ngúeü̃gümaã meã nüü̃ niu i ngẽmatchiga.

4-5. (a) Nhuãcü wüi duü̃éga rü tacaꞌ narümemaẽ? Nüü̃ iu i cuaꞌruü̃. (b) Nhuãcü Ngetchutchuarü ngúeü̃gü yeeraãcü Yeuwaü̃ nacuaꞌgü?

⁴ Rü nagu rüĩnü i paãtchi i nhaü̃ rü tchi cuma rü marü nüü̃ cucuaꞌgu muü̃tchi taunecügu wüi õgüü̃tanüarü dauruü̃ i Dawigu aégacü rü nüma rü dutúru niĩ. Rü wüiarü nguneü̃gu ãnüpaa cuü̃ nangupetü rü cuü̃ ngéma nagagü ngetá inapuracüü̃wa ya yima taene rü nüma rü cuü̃ narümeẽẽtchi. Ngẽguma marü curümegu, ngẽmacaꞌ cuma rü yeeraãcü nüü̃ cungetchaü̃ ya yima cuene, ngẽguma naégaü̃ cuĩnügu rü nüna cucuaꞌãtchi i taꞌacü cucaꞌ naü. Dawi niĩ ya yima õgüü̃tanüü̃arü dauruü̃ i muü̃tchi taunecügu nüü̃ cucuaꞌcü, notürü nüma rü dutúru niĩ ya yima cuü̃ rümeẽẽcü.

⁵ Ngẽgumarüü̃tama, Ngetchutchuarü ngúẽü̃gü marü nüü̃ nacuaꞌgü i Yeuwaéga. Notürü ngẽma naéga yeera nacaꞌ narümemaeü̃ erü Ngetchutchu nüü̃ nüü̃ nacuaꞌẽẽ na nhuãcü yiĩ ya Yeuwa. Tüꞌcüü̃? Erü Ngetchutchu Nanatüarü cuaꞌruü̃gu naũ i guü̃ma taꞌacü naüü̃wa. Ngẽmaãcü, ngẽguma norü ngúeü̃gü nüü̃ naĩnüẽgu i Ngetchutchuarü nguꞌẽẽtae rü nhuãcü duẽẽgümaã namecümaü̃ rü ngẽmawa nümagü yeeraãcü Yeuwaü̃ nacuaꞌgü. — Juã́ũ 14:9; 17:3.

“CUÉGA, NGẼMA CUÉGA I TCHONA CUÃÜ̃”

6. Taꞌacütchiga niĩ yeguma Ngetchutchu nüü̃ niugu na nüü̃ nayemaü̃ i Yeuwaéga? (Juã́ũ 17:11, 12)

⁶ Norü yumüẽwa, Ngetchutchu rü norü ngúeü̃gücaꞌ ínaca i nhaãcü: “Tchama rü marü taũtáma nhama i naãnewa tchangẽmaetcha, notürü nümagü rü nhama i naãnewa tá nangẽmagü erü cuü̃tawa tchaũ. Pa Tchaunatü ya Üünecü, rü nüna nadau i nagagu i cuéga, ngẽma cuéga i tchona cuãü̃gagu, na ngẽmaãcü wüitama yaĩgüü̃caꞌ ngẽma cuma rü tchama na wüitama iĩgüü̃rüü̃. Rü yeguma naü̃tawa tchayemagu rü nüna tchadau i nagagu i cuéga, ngẽma cuéga i tchona cuãü̃gagu, rü tchama nüü̃ itchapoü̃ rü tauma inayarütaue. Rü yema woetama nane irüoü̃icatama inayarütau na yemaãcü yanguü̃caꞌ i curü ore i ümatüü̃.” (Juã́ũ 17:11, 12, TNN) Eꞌna nhaü̃tchigame niĩ na Ngetchutchuéga rü Yeuwa yiĩ? Tama. Ngetchutchu nüü̃ niu i Yeuwaégagu rü tama naégagu ngẽguma nhagu: “cuéga”. Ngẽmawa nanaweꞌ na Ngetchutchuéga tama Yeuwa niĩ. Ngẽmaãcü, taꞌacütchiga niĩ yeguma Ngetchutchu nüü̃ niugu na nüü̃ nayemaü̃ i Tupanaéga? Natchiga niĩ i Ngetchutchu rü Yeuwaü̃ nideaü̃ruü̃ niĩ. Nüma rü nanatüégagu nua naũ rü meü̃ Tupanaarü poramaã nanaü. (Juã́ũ 5:43; 10:25) Rü nhuꞌmatchi, naéga ya Ngetchutchu rü nhaü̃tchiga niĩ “Yeuwa ya maẽẽruü̃ iĩcü”. Ngẽmaãcü naéga ya Ngetchutchu Yeuwatchiga niĩ.

7. Nüü̃ iutchiga wüi cuaꞌruü̃ na tüꞌcüü̃ Ngetchutchu rü Yeuwaégamaã nideaü̃.

⁷ Na yeeraãcü meã nüü̃ cucuaꞌü̃caꞌ rü nagu rüĩnü wüi cuaꞌãtchiruü̃ i nhaü̃: Wüi ãẽꞌgacü nanamu i norü dearuü̃ na togüemaã nüü̃ niuü̃caꞌ i norü ore, notürü ngẽmaãcütátama nüü̃ niu i ãẽꞌgacü nüü̃ muãcü. Ngẽgumarüü̃tama niĩ, Ngetchutchu Yeuwaégamaã nideaü̃, erü Yeuwa nüü̃ namuü̃ na norü dearuü̃ niĩcaꞌ. — Mat. 21:9; Luca 13:35.

8. Nhuãcü Yeuwaéga na Ngetchutchuü̃tagu, naü̃pa na nhama ga naãnewa naũ ga Ngetchutchu?

⁸ Tupanaarü Orewa nüü̃ niu na Ngetchutchu rü “Tupanaarü Ore nixĩ i naéga”. Erü Yeuwa rü Ngetchutchuwa daũcü̃ãꞌgümaã rü nhama i naãnecü̃aꞌ duü̃ü̃gü imaẽü̃maã nüü̃ niu i norü ore. (Juã́ũ 1:1-3) Bemana Ngetchutchu niĩ ya yima daũcü̃aꞌ ga Yeuwa nüü̃ mucü na iraéutanüü̃na nadauü̃caꞌ ngetá inatchiãneü̃wa nayemagügu. Yeguma Yeuwa nüü̃ naucuꞌẽgu ga iraéutanüü̃gü na nanawaꞌegü naga naĩnüẽü̃ yema daũcü̃ãꞌ, nüma rü nüü̃ niu na tüꞌcüü̃ naga naĩnüẽ yeguma nhagu: “Erü tchauéga rü nanaü̃tagu.”b (Êxo. 23:20, 21, TNN) Yeuwa nüü̃ niu i ngẽma erü Ngetchutchu rü norü dearuü̃ niĩ, nüma rü wüi duü̃ü̃ nanatüégaü̃ ípoü̃ niĩ rü nanaüüneẽẽ i nanatüéga i togüearü yeera.

“PA TCHAUNATÜ, NATATCHIGAẼẼ I CUÉGA”

9. Nhuãcü Ngetchutchu nanaweꞌ na Yeuwaéga nacaꞌ narümemaẽü̃? Nüü̃ iutchiga.

⁹ Marü nüü̃ idaugüü̃rüü̃, Ngetchutchucaꞌ rü Yeuwaéga rü yeera narümemaẽ, woo taũta nhama i naãnewa naũgu. Rü yeguma nua ga naãnewa nayemagu, guü̃ma i taꞌacü Ngetchutchu naüwa nanaweꞌ na nhuãcü Yeuwaéga nacaꞌ narümemaẽ! Yeguma norü puracü nagútchaü̃gu, Ngetchutchu Yeuwana nacaꞌ naca i nhaü̃: “Pa tchaunatü, natatchigaẽẽ i cuéga.” Rü yegumatama, Nanatü tagaãcü nanangãü̃ nhama wüi baibeanerüü̃. Yeuwa nhanagürü: “Tchama rü marü tchanatatchigaẽẽ i tchauéga rü wenatáarü tchanatatchigaẽẽ.” — Juã́ũ 12:28, TNN.

10-11. (a) Nhuãcü Ngetchutchu nanatatchigaẽẽ i Yeuwaéga? (Nüü̃ nadau ta i natchicünaꞌã.) (b) Tüꞌcüü̃ nanawaꞌe Yeuwaégaü̃ naüüneẽẽ rü naégaü̃ ínapoü̃?

¹⁰ Ngetchutchu nanatatchigaẽẽ ta i Nanatüéga. Nhuãcü? Nüma rü togüemaã nüü̃ niutchiga na nhuãcü Yeuwa meẽtchicü niĩü̃ rü natchiga i taꞌacü i meü̃ Yeuwa naü. Notürü, Ngetchutchu nanawaꞌe ta nanaweꞌü̃ na guü̃ma i taꞌacü Yeuwa naüü̃ weꞌguü̃ niĩ rü ta na Naéga rü naüüneü̃. Ngetchutchu nanaweꞌ na nhuãcü ngẽma rü narümemaẽ niĩ yeguma norü ngúeü̃güü̃ nanguꞌẽẽgu na nhuãcü nayumüẽgüü̃. Nüma rü nhanagürü: “Pa Tonatü ya Daũgucü, nanaüüneẽẽgüü̃ tá i cuéga.” — Mat. 6:9, TNN.

¹¹ Notürü tüꞌcüü̃ nanawaꞌe Yeuwaégaü̃ naüüneẽẽü̃ rü naégaü̃ ínapoü̃? Erü noriitchima ga natchica nawa ga inaügüü̃ ga Edéü̃wa, Tchataná rü doraü̃ niu i Yeuwatchiga ngẽgumacürüwa. Tchataná nüü̃ niu na Yeuwa rü dorataꞌaü̃ niĩ rü tama Adáü̃na rü Ewana nanaãtchaü̃ i meü̃. (Gên. 3:1-5) Tchataná nüü̃ niutchaü̃ na taꞌacü Yeuwa üü̃ rü tama naweꞌguü̃. Nagagu i ngẽma Tchatanáarü doragü, bemana duü̃ü̃gü nagu narüĩnüẽ na Yeuwa rü natchiecümaü̃. Rü Yóarü nguneü̃gu, Tchataná nüü̃ niu na yíema Yeuwacaꞌ maü̃ẽ na tanayaugümareü̃caꞌ i meü̃gü. Tchataná nüü̃ niu ta, na duü̃ü̃gü tama Yeuwacaꞌ namaẽama ngẽguma gutchaü̃güwa nangẽmagügu erü tama aicuma Tupanaü̃ nangetchaü̃gü. (Jó 1:9-11; 2:4) Teé eꞌna niĩ dorataꞌa, Yeuwa rüeꞌna Tchataná? Nawaꞌe niĩ muü̃ i nguneü̃gü naüpetü na nüü̃ icuaꞌü̃caꞌ i ngẽma.

“ICHANAXÃ I CHORÜ MAXÜ̃”

12. Taꞌacü Ngetchutchu naüü̃ erü Yeuwaégaü̃ nangetchaü̃?

¹² Ngetchutchu poraãcü nügü naporaẽẽ na Yeuwaü̃ naüüneẽẽü̃caꞌ rü nanatüégaü̃ ínapoü̃caꞌ, erü ãũrima Yeuwaü̃ nangetchaü̃. Nüma rü ínamemare na norü maü̃ naãü̃ na nanaweꞌü̃caꞌ na Yeuwa naüüneü̃ rü guü̃ma taꞌacü naüwa rü naweꞌguü̃.c Rü ngẽmacaꞌ, Ngetchutchu nhanagürü: “Chomatama chorü ngúchaü̃maatama ichanaxã i chorü maxü̃.” (Juã́ũ 10:17, 18) Nüíragüü̃ ga duü̃ü̃ ga Adáü̃ rü Ewa ga ngearü tchieü̃ãgüü̃, nümagü rü tama Yeuwaga naĩnüẽ rü ngẽmacaꞌ Tchatanáwe narüĩ. Ngetchutchu tama namaã nawüigu, rü norü ngútchaü̃maã nua ga naãnewa naũ na nanaweꞌü̃caꞌ na nanatüü̃ nangetchaü̃. Nüma rü nanaü i ngẽma ngẽguma Yeuwaga naĩnügu i guü̃ma i taꞌacü naüwa rü taꞌacüü̃ niuü̃wa. (Ebr. 4:15; 5:7-10) Ngetchutchu naga naĩnü nhuꞌmata norü yuwa nangu i catawa. (Ebr. 12:2) Ngẽmawa, Ngetchutchu togüeü̃ naweꞌ na Yeuwaü̃ nangetchaü̃ rü naégaü̃ nangetchaü̃ ta.

13. Tüꞌcüü̃ Ngetchutchu marü íname na nanaweꞌü̃ca na Tchataná rü dorataꞌaü̃ niĩ? (Nüü̃ nadau ta i natchicünaꞌã.)

¹³ Guü̃ma i taꞌacü Ngetchutchu naüü̃wa nanaweꞌ na Tchataná rü dorataꞌaü̃ niĩü̃ rü tama Yeuwa! (Juã́ũ 8:44) Ngetchutchu meãma Yeuwaü̃ nacuaꞌ i guẽarü yeera. Ngẽmaãcü, tchi taꞌacü Tchataná Yeuwatchiga tchiri nideagu rü tchi aicuma niĩgu, rü Ngetchutchu rü tchi nüü̃ nacuaꞌ i ngẽma. Notürü guü̃ma i taꞌacü Tchataná Yeuwatchigaü̃ niuü̃ rü doramare niĩgü. Ngẽmacaꞌ, Ngetchutchu nüü̃ ínapoü̃ama i Yeuwaéga. Woo Yeuwa marü tama naneü̃ ínapoü̃, Ngetchutchucaꞌ narümemaeü̃ niĩ nanatüga naĩnüü̃ woo na nayutchaü̃. — Mat. 27:46.d

“CHAYANGUXẼXẼ I GUXÜ̃MA I PURACÜ GA NAWA CHOXÜ̃ CUMUXÜ̃”

14. Ngetchutchu aicuma Yeuwaga naĩnü. Taꞌacü i meü̃ Yeuwa nüna naã i ngẽmagagu?

¹⁴ Norü yumüẽwa naü̃pa na nayu, Ngetchutchu nhanagürü: “Rü chayanguxẽxẽ i guxü̃ma i puracü ga nawa choxü̃ cumuxü̃.” Nüma rü nüü̃ nacuaꞌ tchi Yeuwaga naĩnüamagu, rü Tupana rü meü̃ nüna naã. (Juã́ũ 17:4, 5) Ngetchutchuarü mecaꞌ niĩ ngẽmagu nayaõ, erü Yeuwa nüü̃ ínanguü̃tchiẽẽ i yuwa. (Pur. 2:23, 24) Yeuwa Ngetchutchuü̃ inadaẽẽ rü guü̃étüwa nanangẽmaẽẽ i daũwa. (Pir. 2:8, 9) Nguneü̃gu üpetücü, Tupana rü ãẽꞌgacü Ngetchutchuü̃ niĩẽẽ. Taꞌacü tá naü ya nüma? Ngetchutchu nanangãü̃ i ngẽma i nhaã yumüẽwa rü nhanagürü: “¡Rü núma naxũ nax torü ãẽ̱xgacü quixĩxü̃ca̱x! Rü tanaxwa̱xe i curü ngúchaü̃ nax cuxüxü̃ i ñoma i naanewa ngẽxgumarüxü̃ i daxũguxü̃ i naanewa nax curü ngúchaü̃ cuxüxü̃rüxü̃.” — Mat. 6:10.

15. Taꞌacü yeera Ngetchutchu naü tá?

¹⁵ Marü nüü̃ ingaicagütchaü̃, rü Ngetchutchu rü namaã nügü nadai tá ngẽma Tupanaarü uwanügü rü inayanaoẽẽ tá i tchieü̃ i ngẽma Armaguedóü̃gu. (Apo. 16:14, 16; 19:11-16) Rü nawena ngẽma guü̃ma, rü Ngetchutchu rü Tchatanáü̃ tá nagu nitacutchi i “ãxmaxü̃ i taxuguma iyacuáxü̃”, ngéma tá Tchataná marü taũmaü̃ naü nhama marü nayuü̃rüü̃. (Apo. 20:1-3) Rü Ngetchutchu rü namaã ínacuá tá i mil taunecü, rü wenatáarü i nhama i naãne rü taãẽrica tá niĩ i nawa rü tüü̃ narüngü̃ẽẽ tá i nhama i naãnecü̃ãꞌ i duü̃ü̃gü i maẽü̃ na nimegüü̃caꞌ. Nüma rü ta wenatáarü ínanadagüẽẽ i yueü̃ rü nhuꞌmatchi nüma rü ta wena nanameẽẽ i nhama i naãne na meẽtchiü̃ i naãne niĩü̃caꞌ. Rü guü̃ma i ngẽma rü Yeuwaarü unetagü rü ta ningugü! — Apo. 21:1-4.

16. Nhuãcü tá i maü̃ i nawena i mil taunecü namaã ínacuágu?

¹⁶ Nhuãcü tá i maü̃ i nawena i mil taunecü namaã ínacuágu? Rü marü natautáma i pecadugü. Rü nhama i naãnecü̃ãꞌ i duü̃ü̃gü i maẽü̃ rü marü taucatáma yeü̃cü nüü̃ nüü̃ nangetchaü̃caꞌ tá i norü pecadugü ínacagüetcha. Nümagü rü ta marü taucatáma nanawaꞌegü na Ngetchutchu nacaꞌ nayu rü bai marü tá i tchatcherdótegü na Yeuwamaã naãmücügüü̃. Rü nawena i guü̃ma i ngẽma, ‘rü ngẽma nawa iyacuáxü̃ i norü uanü i tá nüxü̃ naporamaexü̃, rü yu nixĩ’. Rü yuetamaü̃gü ningeãcügü erü yueü̃ rü marü ínarüdagü. Guü̃ i nhama i naãnewa rü tá nimegü! — 1 Cor. 15:25, 26.

17-18. (a) Taꞌacü tá ngupetüü̃ ngẽguma nagútchaü̃gu i mil taunecü i Ngetchutchu namaã ínacuágu? (b) Taꞌacü tá Ngetchutchu naü ngẽguma niguꞌgu i norü nguneü̃ i namaã ínacuágu? (1 Corĩ́tiucü̃ãꞌ 15:24, 28) (Nüü̃ nadau ta i natchicünaꞌã.)

¹⁷ Taꞌacü ngupetüü̃ tá ngẽguma nagútchaü̃gu i mil taunecü i Ngetchutchu namaã ínacuágu? Guü̃ma i duü̃ü̃gü rü tá aicuma nüü̃ nacuaꞌgüü̃ na Yeuwa rü Üünecü niĩ rü aicumacü niĩ. Nhuãcü nüü̃ tacuaꞌgüü̃ tá i ngẽma? Yeguma meẽtchi i naãne ga Édeü̃wa, ngoꞌo ga Tchataná nüü̃ niugu na Yeuwa rü dorataꞌacü niĩ rü tama meã duẽẽgümaã ínacuáü̃. Yegumacürüwa, mueꞌpüꞌcüna duü̃ü̃gü marü nanaüüneẽẽgü i naéga ya Yeuwa. Ngẽmaãcü, marü nagútchaü̃ i mil taunecü i namaã ínacuáü̃, marü taucatáma Yeuwaégaü̃ ítapoü̃gü i nagagu i Tchatanáarü doragü. Rü marü Yeuwa tüü̃ nanaweꞌ na nüma rü Tanatü ya aicuma ngetchaü̃waꞌecü niĩ.

¹⁸ Nawena na marü niguꞌ i mil i taunecü i namaã ínacuáü̃, guü̃ma i nhama i naãnecü̃ãꞌ imaẽü̃ rü nüü̃ nacuaꞌgü na guü̃ma i taꞌacü Tchataná nüü̃ iuü̃ i Yeuwatchiga rü doramare niĩ. Taꞌacü tá Ngetchutchu naü ngẽguma niguꞌgu i norü nguneü̃ i namaã ínacuágu? Eꞌna Ngetchutchu rü Tchatanáarü cuaꞌruü̃gu naũü̃ tá na ngẽmaãcü Yeuwamaã narüüwanüãü̃caꞌ? Bai tá nhugu ngẽma naüü̃! (Nawa naugütae 1 Corĩ́tiucü̃ãꞌ 15:24, 28.) Ngetchutchu rü wenatáarü Nanatüna nanaã na namaã ínacuáü̃caꞌ i guü̃ma erü aicuma Yeuwaü̃ nangetchaü̃ rü norü ngútchaü̃maã naga naĩnü tá. Rü ngẽguma ngẽma ngoꞌo i Tchataná marü inarüootchigu, rü naéga ya Yeuwa rü tá aicuma tá naüüne rü tá tauéma tchiri naégatchiga tideagü.

19. Taꞌacü niĩ Yeuwaéga Ngetchutchucaꞌ?

¹⁹ Yeuwa rü norü ngútchaü̃maã nüna nanaã naéga a Ngetchutchu! Rü Ngetchutchu meããcüma nanaweꞌ na nhuãcü Nanatü niĩ. Ngẽmaãcü, taꞌacü niĩ Yeuwaéga Ngetchutchucaꞌ? Rü Ngetchutchucaꞌ Yeuwaéga i guü̃arü yeera narümemaẽ. Ngetchutchu ngẽma naégacaꞌ nayu. Ngẽguma nagútchaü̃gu i mil taunecü i Ngetchutchu rü wenatáarü Nanatüna nanaã i guü̃ma. Nhuãcü tá Ngetchutchuarü cuaꞌruü̃gu taĩ? Nüü̃ tadaugü tá i norü ngãü̃ i to nguꞌwa.