NORÜ NGUꞌ 26
WIYAE 123 Yeuwaga rü tórü dauü̃güga taĩnüẽ
Cugü írüíraãcüma nayau na tama guü̃maü̃ cucuaꞌü̃
“Rü tama [meã] nüxü̃ tacua̱x i norü ĩnü ya yimá Guxü̃étüwa Ngẽxmacü.” — JÓ 37:23.
TAꞌACÜ NÜNA ÍNGUGÜTCHAÜ̃
Nüü̃ tacuaꞌgü tá nhuãcü nüü̃ tarüporamaẽ i gutchaü̃gü ngẽguma yigü írüíraãcüma nagu tarüĩnüẽgu i guü̃ma i taꞌacü marü nüü̃ icuaꞌgüü̃ rü Yeuwagu tayaõgü, woo tama nüü̃ tacuaꞌgü guü̃ma i taꞌacü bemana nangupetüü̃ tá.
1. Nhuãcü Yeuwa nanaü i duü̃ü̃gü rü tüꞌcüü̃ ngẽmaãcü nanaü?
YEUWA nanaü i duü̃ü̃gü i mecümaãcüma, rü ngẽmacaꞌ meã nagu tarüĩnüẽ, rü meã nüü̃ tacuaꞌgü i ngẽwacaü̃ i natchigagü rü ta nhuãcü taügü i taꞌacü tüü̃ nanguꞌẽẽ. Tüꞌcüü̃ Yeuwa ngẽmaãcü nanaü i duü̃ü̃gü? Nüma rü nanawaꞌe na ‘taãẽwa nangu na Tupanaü̃ tacuaꞌgü’ rü cuaꞌ i aicumaü̃wa meü̃ i unetagü taügü ngẽguma nacaꞌ ipuracüegu. — Pro. 2:1-5; Rom. 12:1.
2. (a) Taꞌacü name niĩ nüü̃ icuaꞌgüü̃ i tatchiga? (Jó 37:23, 24) (Nüü̃ nadau ta i natchicünaꞌã.) (b) Tüꞌcüü̃ torü mecaꞌ niĩ nüü̃ tacuaꞌgü na tama guü̃maü̃ icuaꞌü̃?
2 Aicuma niĩ na Yeuwa nanaü i duü̃ü̃gü na meã nüü̃ nacuaꞌgüü̃caꞌ i ngẽwacaü̃ i natchigagü, notürü nangẽma muü̃tchi i natchigagü na duü̃ü̃gü taucürüwa nüü̃ nacuaꞌgüü̃. (Nawa naugütae Jó 37:23, 24.) Nüü̃ nadau i Yóarü cuaꞌruü̃. Yeuwa mueꞌpüꞌcüna Yóna naca rü yema rü nanaweꞌ na Yó tama nüü̃ nacuaꞌ muü̃tchi i natchigagü. Yeuwa rü Yómaã nidea rü nüü̃ narüngü̃ẽẽ a Yó na yeera nügü ínarüíraü̃ rü nanaütchicüü i norü ĩnü. (Jó 42:3-6) Ngẽgumarüü̃, tacaꞌ name yigü írüíraãcü nüü̃ tacuaꞌgü na tama guãmaü̃ tacuaꞌgü. Ngẽma rü tüü̃ narüngü̃ẽẽ na nagu tayaõgü na Yeuwa guü̃gutáma tamaã nidea i taꞌacü aicuma tanawaꞌegü nüü̃ icuaꞌgüü̃ na meü̃ i unetagü taügüü̃caꞌ. — Pro. 2:6.
Torü mecaꞌ niĩ nüü̃ icuaꞌgüü̃ na tama nüü̃ tacuaꞌgü i guü̃ma, ngẽgumarüü̃ Yóarü mecaꞌ niĩ i ngẽma (Nüü̃ nadau i natchimaü̃ 2wa. )
3. Taꞌacü tá nüü̃ tadaugü i nhaa nguꞌwa?
3 Nhaa nguꞌwa, nüü̃ tadaugü nümaü̃ i natchigagü i tama nüü̃ icuaꞌü̃ rü taꞌacü i gutchaü̃gü bemana tüü̃ nangupetüü̃ i ngẽmagagu. Nüü̃ tadaugü ta tüꞌcüü̃ name tama nüü̃ tacuaꞌgü i nümaü̃ i natchigagü. Nüü̃ tadaugü i ngẽma rü tüü̃ narüngü̃ẽẽ na yeeraãcü nagu tayaõgü na Yeuwa ya “guxü̃xü̃ma nacuáxü̃”, tamaã nüü̃ niu i taꞌacü aicuma tanawaꞌegü na nüü̃ icuaꞌü̃. — Jó 37:16.
TAMA NÜÜ̃ TACUAꞌGÜ NHUGU ÍNANGU I NGẼMA GUꞌ
4. Mateu 24:36wa nüü̃ iurüü̃, taꞌacü tama nüü̃ tacuaꞌgü?
4 Nawa naugütae Mateu 24:36. Tama nüü̃ tacuaꞌgü nhugu niguꞌ tá i nhama i naãnearü ngẽmaü̃gü. Rü yeguma Ngetchutchu nhama ga naãnewa nayemagu, nüma rü ta tama nüü̃ nacuaꞌ “ngẽma ngunexü̃ rü ora i nagu tá nangupetüxü̃ i ngẽma”.a Rü nawena, nüma rü norü ngúeü̃gümaã nüü̃ niu na Yeuwaicatama nüü̃ nangẽma i pora na nüü̃ naunetaü̃caꞌ nhugu nümaü̃ i ngupetügü rü nangupetüü̃ tá. (Pur. 1:6, 7) Yeuwa marü nüü̃ nauneta nhugu niguꞌ tá i daa nguneü̃gü, notürü tama nüü̃ tacuaꞌ nhugu ngẽma rü aicuma nangupetüü̃ tá.
5. Taꞌacü bemana tüü̃ nangupetü erü tama nüü̃ tacuaꞌgü nhugu ínangu tá i ngẽma Yeuwaarü nguneü̃?
5 Ngẽgumarüü̃ Ngetchutchu nüü̃ niu, yiemagü rü tama nüü̃ tacuaꞌgü nhure i nguneü̃ naüpetü tá na ínanguü̃caꞌ i ngẽma guꞌ. Rü ngẽmagagu, bemana tama yana taĩnüẽwaꞌe rü tarümaãtchigü, rü yeera ngẽmaãcü tarüĩnü ya teé marü muü̃tchi i taunecü ítananguẽẽ i ngẽma Yeuwaarü nguneü̃. Rü nhuꞌmatchi bemana tarümaãtchigü ngẽguma wüi i tatanüü̃ rüeꞌna to i duü̃ü̃ tagu nidaucüraü̃gu erü ngẽma rü taũta nangupetü. (2 Pe. 3:3, 4) Bemana nagu tarüĩnüẽ na yeera natautcha yana taĩnüẽwaꞌe rü tama nüü̃ tarütchaue ngẽguma togü tchiri tatchiga nideagügu tchi aicuma nüü̃ tacuaꞌgügu nhugu ngẽma nguneü̃ ínangu tá.
6. Tüꞌcüü̃ name tama nüü̃ icuaꞌgüü̃ nhugu ínangu tá i Yeuwaarü nguneü̃?
6 Nagagu i Yeuwa tama tamaã nüü̃ niu nhugu tá ínangu i ngẽma norü nguneü̃, tüü̃ nanatautchaẽẽ na inaweꞌü̃caꞌ na nacaꞌ ipuracüeü̃ erü nüü̃ tangetchaü̃gü rü nagu tayaõgü. Yiãgü rü tanawaꞌegü nacaꞌ tapuracüe i guü̃gutáma, rü tama nhuꞌmatatá ínangu i ngẽma nguneü̃. Ngẽmaãcü, nagu tarüĩnüẽ i muü̃tchi i meü̃gü i wipeꞌewa nangupetüü̃ tá i ngẽma Yeuwaarü nguneü̃wena rü tama nagu tarüĩnüẽetcha natchiga nhugu ínangu tá i ngẽma norü nguneü̃. Rü ngẽma rü tüü̃ narüngü̃ẽẽ na yeera Yeuwana ingaicamagüü̃caꞌ, rü yeera nagu tayaõgüü̃caꞌ rü yeera yigü taporaẽẽgüü̃caꞌ na nüü̃ itaãẽgüẽẽü̃caꞌ. — 2 Pe. 3:11, 12.
7. Taꞌacü nüü̃ tacuaꞌgü?
7 Name nagu tarüĩnüẽ i taꞌacü marü nüü̃ icuaꞌgüü̃. Nüü̃ tacuaꞌgü na nguneü̃güarü guꞌ inanaügü nagu ga 1914. Tupanaarü Orewa, Yeuwa tüna nanaã i uãtchigü na tüü̃ nawe i taunecü i nhugu inaügü i ngẽma nguneü̃gü rü ta nhuãcü niĩ i nacümagü i 1914wena. Rü ngẽmaãcü, aicuma nüü̃ tacuaꞌgü na “marü ningaica i ngẽma Cori ya Tupanaarü ngunexü̃”. (Sof. 1:14) Rü nüü̃ tacuaꞌgü ta taꞌacü niĩ i puracü na Yeuwa nanawaꞌe na taügü. Nüma rü nanawaꞌe na guü̃ i duü̃ü̃gümaã tideagü natchiga i “Tupanaarü ore i mexü̃”. (Mat. 24:14) Rü ngẽmatchiga tideagü i wigutaꞌa 240 natchiü̃ãnegüwa rü yeera i mil nagagüwa. Yiãgü tama tanawaꞌegü nüü̃ tacuaꞌgü natchiga “ngẽma ngunexü̃ rü ora” na ãũrima yigü taporaẽẽgüü̃caꞌ i ngẽma meẽtchiü̃ i puracüwa.
TAMA NÜÜ̃ TACUAꞌGÜ NHUÃCÜ YEUWA NAÜÜ̃
8. Taꞌacütchiga niĩ i ngẽma ore “ñuxãcü Tupana ya guxü̃arü üruxü̃ ixĩcü naxüxü̃ i guxü̃ma”? (Eclesiastes 11:5)
8 Yiãgü tama nüü̃ tacuaꞌgü ta “nax ñuxãcü Tupana ya guxü̃arü üruxü̃ ixĩcü naxüxü̃ i guxü̃ma”. (Nawa naugütae Eclesiastes 11:5.) Ngẽma rü natchiga niĩ i taꞌacü Yeuwa nanaü rü ta natchiga i taꞌacü nüma rü tama nanatchuꞌu na nangupetüü̃ na nanaüü̃caꞌ i norü ngútchaü̃. Yiãgü tama aicuma nüü̃ tacuaꞌgü ta tüꞌcüü̃ Yeuwa nanatautchaẽẽ nümaü̃ i ngupetügü rüeꞌna taꞌacü nüma rü naü na tüü̃ narüngü̃ẽẽü̃caꞌ. (Sal. 37:5) Tupanaarü Ore nüü̃ niu na tama nüü̃ icuaꞌü̃ nhuãcü Tupana naüü̃ i guü̃ma rü nhama tama nüü̃ tacuaꞌgürüü̃ na nhuãcü nayae ya wüi ya bue i tümaéanüwa. Bai dutúrugü meã nüü̃ nacuaꞌgü i guü̃ma i ngẽmatchiga. Ngẽgumarüü̃, yiãgü tama meã nüü̃ tacuaꞌgü na nhuãcü Yeuwa nanaü tá i ngẽmaü̃gü.
9. Taꞌacügu bemana tarüĩnüẽ erü tama nüü̃ tacuaꞌgü na nhuãcü Yeuwa tüü̃ narüngü̃ẽẽ?
9 Ngẽguma tama nüü̃ tacuaꞌgügu na nhuãcü Yeuwa tüü̃ narüngü̃ẽẽ tá, bemana tama paãtchi nüü̃ taunetagü i taꞌacü taügü tá. Bemana tamuü̃ẽ i nüü̃ taoe i torü ngẽmaü̃gü na noremaã imaẽü̃caꞌ rü yeera Yeuwacaꞌ tapuracüeü̃caꞌ rüeꞌna tamuü̃ẽ to natchicawa taĩ ngetá nanawaꞌewa i yeera i ngü̃ẽẽ. Rüeꞌna bemana nagu tarüĩnüẽ na Yeuwa tama tamaã nataãẽ ngẽguma yigü iporaẽẽgügu na yeera nacaꞌ tapuracüe notürü tacaꞌ taucürüwa ngẽma taügü. Rüeꞌna bemana ãũrima nacaꞌ tapuracüe notürü taũta tüü̃ nangẽmagü i wüi Tupanaarü Orearü nguꞌ, rüeꞌna ãũrima yigü iporaẽẽgü i wüi puracüwa i Yeuwaarü duü̃ü̃gütanüwa notürü muü̃tchi i gutchaü̃wa tangẽmagü. Rü ngẽmacaꞌ, bemana nagu tarüĩnüẽ na Yeuwa tama tüü̃ narüngü̃ẽẽ.
10. Taꞌacü i nacümagü tüü̃ nangẽmagü nagagu i tama nüü̃ icuaꞌgüü̃ i taꞌacü Yeuwa naüü̃ tá na tüü̃ narüngü̃ẽẽü̃caꞌ?
10 Tama nüü̃ tacuaꞌgü i taꞌacü Yeuwa naüü̃ tá, tüü̃ narüngü̃ẽẽ na tüü̃ nangẽmagüü̃caꞌ i meü̃ i nacümagü, cuaꞌãtchiruü̃ nügü írüíra. Rü ngẽma rü tüü̃ narüngü̃ẽẽ na nüü̃ icuaꞌgüü̃caꞌ na Yeuwa guü̃guma nüü̃ nacuaꞌ i taꞌacü rümemaẽü̃. (Isa. 55:8, 9) Rü nhuꞌmatchi nüü̃ tacuaꞌgü na nhuãcü yeeraãcü aicuma nagu tayaõgü na nüma rü guü̃na nadau. Ngẽguma meü̃ tanayaugügu i norü puracüwa rü guü̃guma nüü̃ ticuaꞌüü̃gü ya Yeuwa. (Sal. 127:1; 1 Cor. 3:7) Rü ngẽguma nangupetügu i taꞌacü tama tanawaꞌegü, name nüna tacuaꞌãtchie na Yeuwa guü̃maü̃ nacuaꞌ. (Isa. 26:12) Tanaügü i taꞌacü nawaꞌe rü nagu tayaõgüama na Yeuwa guü̃guma tüü̃ narüngü̃ẽẽ tá. Aicuma nagu tayaõgü na nüma rü tüü̃ naucuꞌẽ woo tama nanaü i ngẽma i norü poramaã ngẽgumarüü̃ nũcüma nhuguãcü naüü̃. — Pur. 16:6-10.
11. Taꞌacü nüü̃ tacuaꞌgü?
11 Nüü̃ tacuaꞌgü na Yeuwa cuaꞌ nüü̃ nangẽma rü guü̃guma nangetchaü̃waꞌeü̃ rü naüü̃ i taꞌacü weꞌguü̃ niĩ. Rü nüü̃ tacuaꞌ tá na Yeuwaü̃́ name i guü̃ma i taꞌacü nacaꞌ rü taenegücaꞌ rü taeyagücaꞌ taügüü̃. Rü aicuma nüü̃ tacuaꞌgü ta na Yeuwa guü̃guma tümaétü nawémeꞌ i teé aicuma naga iĩnüẽ. — Ebr. 11:6.
TAMA NÜÜ̃ TACUAꞌGÜ TAꞌACÜ MOÜ̃Ü̃ NANGUPETÜÜ̃ TÁ
12. Taꞌacü Tiagu 4:13, 14wa nüü̃ icuaꞌgüü̃?
12 Nawa naugütae Tiagu 4:13, 14. Tama nüü̃ tacuaꞌgü i taꞌacü tá moü̃ tüü̃ üpetüü̃. Nhama i naãnewa ‘rü guãcaꞌ ínangu i tümaarü gutchaü̃”. (Ecl. 9:11) Rü ngẽmagagu, tama nüü̃ tacuaꞌgü tchi taꞌacü tanaügütchaü̃gu rü ngẽmaãcü niĩ tá rüeꞌna tchi moü̃ tamaẽamagu.
13. Nhuãcü bemana niĩ i torü ĩnü nagagu niĩ tama nüü̃ icuaꞌgüü̃ i guü̃ma i taꞌacü wipeꞌewa ngupetüü̃?
13 Bemana tacaꞌ nagutcha tama nüü̃ tarütchaue erü tama nüü̃ tacuaꞌgü i taꞌacü aicuma wipeꞌewa nangupetüü̃ tá. Tchi ãũrima nacaꞌ taoegaãẽgügu i taꞌacü bemana nangupetüü̃ tá, bemana tama taãẽãcü tamaẽ. Rü bemana torü maü̃ rü ngurüãtchi natoraü̃ẽẽ, rüeꞌna tchieü̃gü ngurüãtchi tüü̃ nangupetüü̃, rü ngẽmacaꞌ bemana tangetchaü̃ü̃tchi rü tarümaãtchigüü̃tchi. Rü ta ngẽguma taꞌacü tanawaꞌegü rü tama ngẽmaãcü tüü̃ nangupetügu rü bemana taoegaãẽ. — Pro. 13:12.
14. Taꞌacü tanawaꞌegü nüü̃ tacuaꞌgü rü taügüü̃ na taãẽãcü imaẽü̃caꞌ? (Nüü̃ nadau ta i natchicünaꞌãgü.)
14 Ngẽguma gutchaü̃gü tüü̃ nangupetügu, wüi nacüma niĩ na nüü̃ tanaweꞌgüü̃caꞌ na nüétama i taꞌacü tüü̃ nangupetüü̃, Yeuwacaꞌ tapuracüe erü nüü̃ tangetchaü̃gü. Tupanaarü Ore tüü̃ naweꞌ na tama name nagu tarüĩnüẽ na Yeuwa tüü̃ ínapoü̃ i guü̃ma i gutchaü̃gü. Rü tüü̃ naweꞌ ta na nüma tama naü̃pa nüü̃ nauneta i taꞌacü torü maü̃wa nangupetüü̃ tá. Yeuwa nüü̃ nacuaꞌ na tama tanawaꞌegü nüü̃ icuaꞌgüü̃ i taꞌacü wipeꞌewa nangupetüü̃ na taãẽãcü imaẽü̃caꞌ. Rü aicuma niĩ na taãẽãcü imaẽü̃caꞌ i nhuꞌma tanawaꞌegü nacaꞌ tadaugü i norü ucuꞌẽgü rü naga taĩnüẽ. (Jer. 10:23) Ngẽguma nacaꞌ idaugügu i Yeuwaarü ngü̃ẽẽ na meü̃ i unetagü iügüü̃caꞌ, tama taoegaãẽü̃tchi i taꞌacü bemana wipeꞌewa nangupetüü̃ tá. Rü nagu tarüĩnüẽ i Tiagurüü̃ yeguma nanaümatügu i nhaü̃: “Ngẽxguma chi nanaxwa̱xegu ya [Yeuwa ya] Cori ya Tupana nax imaxẽxü̃, rü chi tanaxü i ngẽma puracü i nagu rüxĩnüexü̃.” — Tia. 4:15.
Ngẽguma nacaꞌ tadaugügu i Yeuwaarü ucuꞌẽgü rü naga taĩnüẽ, ngẽma rü tüü̃ ínapoü̃ (Nüü̃ nadaugü i natchimaü̃gü 14-15wa)b
15. Taꞌacü nüü̃ tacuaꞌgü i wipeꞌetchiga?
15 Aicuma niĩ na tama nüü̃ icuaꞌü̃ i taꞌacü wüitchigü i nguneü̃wa nangupetü tá, notürü nüü̃ tacuaꞌgü na Yeuwa tüna naãtchaü̃ i maü̃ i taguma gúü̃. Nümaü̃gü i norü duü̃ü̃gücaꞌ i daũguü̃ i naãnewa rü togüecaꞌ i nhama i naãnewa. Nüü̃ tacuaꞌgü ta, na Yeuwa tama doraü̃ niu rü natauma i taꞌacü nüü̃ nagutchaẽẽ na nüü̃ ínayanguü̃ẽẽü̃caꞌ i norü unetagü. (Titu 1:1, 2) Nümaicatama rü ‘noriarü ügügutama rü nhuꞌmata norü guꞌwa nangu rü nüü̃ niu i ngẽma tá wüitchigü i nguneü̃ ngupetüü̃’. Tupanaarü Orearü nguneü̃gu, guü̃ma i taꞌacü Yeuwa nüü̃ niu rü aicuma nangupetü, rü guü̃ma i norü unetagü i wipeꞌecaꞌ rü ta nangupetü tá. (Isa. 46:10) Aicuma nüü̃ tacuaꞌgü na natauma i taꞌacü Yeuwaü̃ nagutchaẽẽ na tüü̃ nangetchaü̃ü̃caꞌ. (Rom. 8:35-39) Ngẽmaãcü, nüétama i taꞌacü torü maü̃wa nangupetü, nüma rü tüna nanaã i cuá, rü pora rü taãẽ na tama nüü̃ tarütchaueü̃caꞌ. Aicumaü̃tchi nüü̃ tacuaꞌgü na Yeuwa tüü̃ narüngü̃ẽẽ rü taétü nawémeꞌ tá. — Jer. 17:7, 8.
TAUCÜRÜWA NÜÜ̃ TACUAꞌGÜ NA YEUWA MEÃMA TÜÜ̃ NACUAꞌÜ̃
16. Taꞌacü Yeuwa nüü̃ nacuaꞌ i tatchiga, rü taꞌacügu curüĩnü i ngẽmatchiga? (Salmo 139:1-6)
16 Nawa naugütae Salmo 139:1-6. Yeuwa nüü̃ nacuaꞌ i guü̃ma i tatchiga. Nüma rü nüü̃ nacuaꞌ taꞌacügu tarüĩnüẽ rü tüꞌcüü̃ ngẽmaãcü tarüĩnüẽ. Yeuwa nüü̃ nacuaꞌ i taꞌacü tideagü rü taꞌacü torü maü̃newa nangẽma. Nüma rü nüü̃ nacuaꞌ ta guü̃ma i taꞌacü ügüü̃ rü tüꞌcüü̃ ngẽma taügü. Ãẽꞌgacü ga Dawí nüü̃ niu na Yeuwa guü̃guma ínamemare na tüü̃ narüngü̃ẽẽü̃caꞌ. Taꞌacügu curüĩnü ngẽguma nüü̃ cucuaꞌgu na Tupana ya Guü̃étüwa Ngẽmacü nanaü i daũguü̃ i naãnewa rü nhama i naãnewa, rü meã tacaꞌ narüĩnü i wüitchigü i yiemagü? Dawí ngẽmatchiga nhanagürü: “Rü guxü̃ma i ngẽma cua̱x rü chauãxẽ rü tama ningu nax nüxü̃ chacuáxü̃ i ngẽma. Rü ngẽma nax nataxüchixü̃ i ngẽma cua̱x rü tama nüxü̃ chacua̱x i ñuxãcü nax yixĩxü̃.” — Sal. 139:6.
17. Tüꞌcüü̃ bemana nagutcha nagu tayaõgü na Yeuwa meãma tüü̃ nacuaꞌü̃?
17 Nagagu i taꞌacü tatanüü̃maã nangupetüü̃, rüeꞌna tacümagü rüeꞌna nagagu i taꞌacügu tayaõgü naü̃pa na cuaꞌ i aicumaü̃ tüü̃ ngẽmagu, bemana tacaꞌ nagutcha nüü̃ tadaugü ya Yeuwa nhama wüi nanatü ngetchaü̃waꞌecürüü̃ na tacaꞌ nagutchaãẽ. Rüeꞌna bemana nagu tarüĩnüẽ na tchieü̃gü ga nũcüma taügü rü poraãcü i tchieü̃ niĩ rü ngẽmacaꞌ Yeuwa taguma tamaã naãmücütchaü̃ rü tüna nangaicamatchaü̃. Rü nhuguãcü Dawí ngẽmagu rüĩnü. (Sal. 38:18, 21) Rüeꞌna wüi duü̃ü̃ aicumaãcü nanaütchicüütchaü̃ i norü maü̃ na Yeuwa nawaꞌeãcüma namaü̃ü̃caꞌ bemana nügüãẽwa nügüna naca i nhaü̃: ‘Tchi Tupana aicuma tchoü̃ nacuaꞌgu, tüꞌcüü̃ nüma rü nanawaꞌe na tchanaütchicüü i tchorü maü̃ rü tama nanayau na ngẽmaãcü tchiĩ?’
18. Tüꞌcüü̃ name tanayaugü na Yeuwa meã tüü̃ nacuaꞌü̃? (Nüü̃ nadau ta i natchicünaꞌãgü.)
18 Name niĩ nayaugüü̃ na Yeuwa meã tüü̃ nacuaꞌü̃ rü nüü̃ nadau i meü̃gü i tawa i tama nüü̃ tadaugü. Nüma rü nüü̃ nadau i torü gutchinügü, notürü nüü̃ nacuaꞌ na meü̃ i duü̃ü̃ tiĩgütchaü̃ rü ãũrima tüü̃ nangetchaü̃. (Rom. 7:15) Ngẽguma meã nüü̃ tacuaꞌgügu na Yeuwa guü̃guma nüü̃ nadau na meü̃ i duü̃ü̃ tiĩgütchaü̃, ngẽma rü tüna naã i pora na nacaꞌ aicuma taãẽãcü tapuracüeama.
Ngẽguma ngurüãtchi gutchaü̃gü tüü̃ nangupetügu, Yeuwa tüü̃ narüngü̃ẽẽ na tama nüü̃ tarütchaueü̃caꞌ erü nanaporaẽẽ i torü õ nawa i norü unetagü i wipeꞌecaꞌ (Nüü̃ nadaugü i natchimaü̃gü 18-19wa.)c
19. Taꞌacü nüü̃ tacuaꞌgü i Yeuwatchiga?
19 Aicumaü̃tchi nüü̃ tacuaꞌgüü̃ na Yeuwa rü ngetchaü̃ niĩ. (1 Juã́ũ 4:8) Nüü̃ tacuaꞌgü na guü̃ma i taꞌacü nüma rü tüü̃ nawaꞌe na taügüü̃caꞌ nanaweꞌ na tüü̃ nangetchaü̃ rü nanawaꞌe na meã imaẽü̃. Rü nüü̃ tacuaꞌgü ta na Yeuwa nanawaꞌe na tüü̃ nangẽma maü̃ i taguma gúü̃. Na tüü̃ nangẽmaü̃caꞌ i ngẽma, nüma rü nanamu i nane na tacaꞌ nayuü̃caꞌ. Rü ngẽmagagu, aicuma nagu tayaõgü na woo tchieü̃ taügücüraü̃, Yeuwa nawaꞌeãcüma tamaẽ. (Rom. 7:24, 25) Rü nüü̃ tacuaꞌgü na “nax taãẽarü yexera yixĩxü̃ ya Tupana rü nüma rü guxü̃xü̃ma nacua̱x”. (1 Juã́ũ 3:19, 20) Yeuwa guü̃ü̃ma nacuaꞌ i tatchiga rü nüma aicuma nüü̃ nacuaꞌ na tama tacaꞌ taucürüwa iĩü̃ nawaꞌeãcü tamaẽ.
20. Tüꞌcüü̃ tama name na nacaꞌ ioegaãẽü̃tchi i taꞌacü tama nüü̃ icuaꞌgüü̃?
20 Yeuwa tamaã nüü̃ niu i guü̃ma i taꞌacü aicuma inawaꞌegüü̃ nüü̃ icuaꞌgüü̃. Rü ngẽguma yigü írüíraãcüma tanayaugügu i ngẽma, tama taoegaãẽü̃tchi namaã i taꞌacü tama nüü̃ icuaꞌgüü̃. Rü ngẽmaãcü aicuma tacaꞌ nagutchaãẽ i taꞌacü rümemaẽü̃ niĩ. Rü nhuꞌmatchi tanaweꞌgü na yigü írüíra rü aicuma nagu tayaõgü ya Yeuwa ya ‘aicuma i cuá nüü̃́ ngẽmaü̃’. (Jó 36:4) Rü woo tama meã nüü̃ icuaꞌgügu i guü̃ma i nhuꞌma, nüü̃ tacuaꞌgü na Yeuwa tüü̃ nanguꞌẽẽama i guü̃gutáma. Rü ngẽmamaã tataãẽgüü̃tchi erü guü̃gutáma yeeraãcü nüü̃ tacuaꞌgü ya torü Tupana ya Yeuwa. — Ecl. 3:11.
WIYAE 104 Rü Yeuwaãẽ i üüneü̃ nhama ãmarerüü̃ niĩ
b NATCHICÜNAꞌÃWA NGÓÜ̃TCHIGA: Wüi papa rü nanemaã nanameẽẽ i wüi butcha i anüpaꞌacaꞌ nacaꞌ ngẽguma gutchaü̃ nüü̃ nangupetügu, nümagü rü marü nügü nameẽẽgü.
c NATCHICÜNAꞌÃWA NGÓÜ̃TCHIGA: Wüi taene i gutchaü̃wa nangẽma rü nagu narüĩnü na nhuãcü nataãẽ tá i meẽtchiü̃ i naãnewa.