Isaías
34 Guxuʼmamíjnála mbá xúgiáanʼ xa̱bu̱ xuajin mu mudxawíín,
guʼgíʼ e̱dxa̱laʼ mudxawíín, xuajin.
Gaʼdxuun ku̱ba̱ʼ ga̱jma̱a̱ dí rígá ikhí,
ku̱ba̱ʼ ga̱jma̱a̱ dí najma̱a̱ ikhí.
2 Numuu dí Jeobá nakiʼnáa kaʼñún mbá xúgíinʼ xa̱bu̱ xuajin
ra̱ʼkhá tháán ekásnga̱ñu̱u̱ʼ kaʼñún mbá xúgíinʼ soldado ndrígiu̱ún.
Ikhaa maxnájxi̱i̱n mu maguma gámbíin,
ga̱jma̱a̱ maxnájxi̱i̱n mu makhañún.
3 Bi̱ gákháñún náa ikhaa majui̱ʼdi̱i̱n rexa̱a̱,
xuñúúnʼ maʼni ndajtsún náa tsu̱du̱u̱ ku̱ba̱ʼ
ga̱jma̱a̱ eʼdiún magajtaa náa kúbá.
4 Bi̱ ra̱ʼkhá tháán mbaʼin bi̱ nuxmijná ga̱jma̱a̱ numuu mekhu migiin,
ga̱jma̱a̱ mekhu maxtámbújxi̱ xóo mbá rollo.
Xúgíinʼ soldado ndrígiu̱ún mujnduxtíin,
xóo índo̱ inúu uva nujndooʼ ga̱jma̱a̱ nagajtaa náa ixu̱u̱
ga̱jma̱a̱ xóo índo̱ higo nijndooʼ naxpátrígúu náa ixu̱u̱.
5 “Numuu dí náa mekhu muwa̱a̱n espádóʼ ga̱jma̱a̱ eʼdi.
Magajtaa espada náa Edom mu manda̱ʼa̱a̱ cuenta,
náa mbá xuajin dí nixnajxí mu maguma gámbáa.
6 Jeobá gíʼdoo mbá espada dí muwa̱a̱n ga̱jma̱a̱ eʼdi.
Magu̱u̱ xtanga ma̱ngaa eʼdiún mugu̱ bi̱ míjíinʼ ga̱jma̱a̱ tsu̱jtuunʼ,
magu̱u̱ xtangoo riñón ndrígu̱ún mugu̱.
Numuu dí Jeobá gíʼdoo má xawii mbá tsigijñaʼ náa Bozrá
ga̱jma̱a̱ ra̱ʼkhá tháán mbaʼin gákháñún náa ku̱ba̱ʼ Edom.
7 Majnguti̱gi̱i̱n gajmiún xedi̱ xaná,
bi̱ guáʼdáá tsiaki̱i̱ majnguti̱gi̱i̱n gajmiún ejín xédí.
Náa ku̱bu̱únʼ majnííʼ eʼdi
ga̱jma̱a̱ náa yujndaʼ manda̱wo̱o̱ʼ xtanga”.
8 Numuu dí Jeobá gíʼdoo mbá mbiʼi dí maʼni mumíniiʼ,
mbá tsiguʼ dí maʼni ngíníi ga̱jma̱a̱ numuu dí raʼkhí nigíʼnuu Sion.
9 Mata* ndrígu̱ún maʼga̱nú mani̱ndxu̱u̱ xóo alquitrán*
ga̱jma̱a̱ yujndaʼ mani̱ndxu̱u̱ xóo azufre,*
ku̱ba̱ʼ mani̱ndxu̱u̱ xóo alquitrán dí nakha.
10 Xájuíyuuʼ mbiʼi ni má mbruʼun,
matsimuu má xúʼko̱ gúniúu.
Ni xátanga̱a̱ maguma májáanʼ mba̱yu̱u̱ʼ tsiguʼ,
ga̱jma̱a̱ nimbáa ni xánújngoo ikhí.
11 Pelícano ga̱jma̱a̱ endi tsuwanʼ* makuwá ikhí,
xpuʼphúnʼ majkhiinʼ ga̱jma̱a̱ yu̱wa̱ʼ mangiin makuwá ikhí.
Dios majmuu mbá ñuñuu ga̱jma̱a̱ nivel* mu magiéwan ku̱ba̱ʼ rúʼko̱
mu xúʼko̱ masngájma dí maguanáa ga̱jma̱a̱ ni xájmaa.
12 Nimbáa xa̱bu̱ bi̱ gíʼdoo numuu náa ikhiin xúgíiʼ mani̱ndxu̱u̱ rey,
ga̱jma̱a̱ mbá xúgíinʼ príncipes ni xákúwá.
13 Makráʼáan tsuwanʼ náa torre ndrígu̱ún dí wájun jxa̱ʼ,
mba̱ja̱a̱ iná tsuwanʼ náa xuajñún dí kúgumaʼá.
Ikhí mani̱ndxu̱u̱ náa makuwá chacal,*
ga̱jma̱a̱ náa makuwá avestruz.
14 Xujkhúʼ bi̱ kúwá náa ku̱ba̱ʼ mijxooʼ* muxkamamijnáa gajmiún eʼwíinʼ xujkhúʼ bi̱ nundxa̱ʼwa̱ ngínún,
ga̱jma̱a̱ tsujtu xáná* mandxaʼwíín a̱ngui̱i̱n.
Xúʼko̱, ikhí gáxtáa ñu̱ʼu̱ bi̱ jngruigo̱o̱ mbruʼun,* ikhí gáyáa jxu̱u̱ʼ.
15 Ikhí a̱bu̱nʼ maʼni xújúunʼ ga̱jma̱a̱ maʼni xndúu,
matsígoo xndúu ga̱jma̱a̱ magímbóo náa agoo ndájkhoo.
Xúʼko̱, ikhí magimbíin milanos,* mámbáa ga̱jma̱a̱ a̱ʼgiu̱u̱.
16 Guʼyáʼ náa libro ndrígóo Jeobá ga̱jma̱a̱ guraxnuu gakhi̱i̱:
Xúgíinʼ trámáʼ mbiʼñún ikhí,
ndawa̱a̱ nimbáa bi̱ ragíʼdaa a̱ʼgiu̱u̱,
numuu dí Jeobá má niʼthí índo̱ nixná awan,
nigímbíin ga̱jma̱a̱ tsiaki̱i̱ ndrígóo.
17 Ikhaa nindxu̱u̱ bi̱ niríya̱ʼ suértiu̱ún,
ñawúunʼ nigiéwan ga̱jma̱a̱ náa dí kaʼñún mudrigúu.*
Mani̱ndxu̱u̱ ku̱bu̱únʼ asndu kámuu,
makuwá ikhí mba̱yu̱u̱ʼ tsiguʼ.