Isaías
50 Rígi̱ dí naʼthí Jeobá:
“Náá rígá i̱yi̱i̱ʼ náa naʼthí dí niniʼñáanʼ rudála,* bi̱ ikhúún ni̱thu̱u̱n maʼga̱a̱ rá.
Lá nigujua̱a̱nʼ mu mani̱i̱ gidxawúʼ ráʼ.
¡Gu̱ya̱a̱la! Ikháanʼ nixtagujua̱a̱nʼ ga̱jma̱a̱ numuu rí nakiéʼkala,
ga̱jma̱a̱ numuu aʼkhála ikháanʼ ni̱thu̱u̱n dí maʼga̱a̱ rudála.
2 Náá numuu rí ndawa̱a̱ nimbáa índo̱ ni̱ʼkhá rá.
Náá numuu rí tágooʼ nimbáa índo̱ ni̱tha̱ rá.
Lá chíʼmbaʼ ñawúnʼ mu xáʼngo̱o̱ gáʼni káwáanʼla ráʼ.
Lá na̱nguá gúʼdoo tsiaki̱i̱ mu ma̱ni̱ káwáanʼla ráʼ.
¡Gu̱ya̱a̱la! Índo̱ ikhúún na̱thu̱u̱n lamáa* dí mujndooʼ, nujndooʼ,
ga̱jma̱a̱ na̱ni̱ rí mañu maʼni̱i̱ xóo mbá ku̱ba̱ʼ mijxooʼ.*
E̱gi̱ʼ bi̱ kúwá ikhí naʼgiin numuu rí nda̱a̱ iyaʼ
ga̱jma̱a̱ nakháñún numuu rí nakándawúúnʼ.
3 Ikhúún na̱ni̱ rí mekhu magúwúunʼ mikína
ga̱jma̱a̱ na̱ni̱ rí magúwúunʼ xtíin mi̱du̱”.*
4 Tátá Jeobá bi̱ itháán mba̱a̱, niʼsngóʼ dí ma̱ta̱,
mu xúʼko̱ mba̱yo̱o̱ xóo mathu̱u̱n* bi̱ nakáguabaaʼ.
Ikhaa naxkajxu̱ún mámbá miʼcha̱,
naxkajui̱i̱ cháʼwunʼ mu madxawun xóo bi̱ najuiʼsngúún.
5 Tátá Jeobá bi̱ itháán mba̱a̱, nirmbáʼtoo cháʼwunʼ,
ga̱jma̱a̱ ikhúún nidxawuun. Táni̱ rí nandoʼ ikhúún.
6 Nitsri̱ya̱ʼ tsu̱du̱ʼ muxnáá bi̱ nuxnuʼ,
ga̱jma̱a̱ inuʼ bi̱ nurubu stawunʼ.
Na̱nguá nirkaʼwu inuʼ náa bi̱ nuni̱ májtiuunʼ,
ni má náa bi̱ naʼphu̱ ndujthúúnʼ.
7 Mú Tátá Jeobá bi̱ itháán mba̱a̱ mambáyuʼ.
Ikha jngóo xáguma májtiuunʼ.
Ma̱ni̱ gújkhúʼ inuʼ xóo itsí gújkhúʼ
ga̱jma̱a̱ nda̱yo̱o̱ rí xáguanúʼ ga̱jma̱a̱ ma̱jti̱ʼ.
8 Xtáa má mijngii bi̱ naʼthí rí májáanʼ xa̱bu̱ nindxu̱ʼ.
Tsáá gándoo gákrui̱gu̱u̱n rá.*
Guguajúnlu jnduʼ mbá xúgiáanʼ.
Tsáá gíʼdoo mbá rí makruigu̱u̱n rá. Gakuʼmaminaʼ.
9 ¡Gu̱ya̱a̱la! Tátá Jeobá bi̱ itháán mba̱a̱ mambáyuʼ.
Tsáá gáʼthí rí gúʼdoo aʼkhúnʼ rá.
¡Gu̱ya̱a̱la! Xúgíinʼ ikhiin maʼguiinʼ xóo eguuʼ mbá xtíin.
Mikhu̱u̱n mbáa ruxi.*
10 Tsáá mbáa dí ikháanʼ namíñuu kaʼyoo Jeobá ga̱jma̱a̱ naʼdxawuun aʼwóo xa̱bi̱i̱ rá.
Tsáá nijngruigo̱o̱ náa mikína mbiʼ, náa nda̱a̱ kayuuʼ aguʼ rá.
Gaku̱mu̱u̱ kaʼyoo Jeobá ga̱jma̱a̱ gámbáyuminaʼ náa Dios ndrígóo.
11 “¡Gu̱ya̱a̱la! Xúgiáanʼ ikháanʼ bi̱ kuwáanʼ ruskamáán aguʼ ga̱jma̱a̱ nu̱ni̱ rí magajnúu aguʼ,
Gajngrui̱ga̱la náa nambiʼi agiala, náa aguʼ rí ikháanʼ niskamáán.
Rígi̱ dí maxnála ñawúnʼ:
Majngutiga̱a̱nʼ ga̱jma̱a̱ ra̱ʼkhá tháán gíkuáanʼ.