Isaías
54 “¡Atatsaʼwá ga̱jma̱a̱ gagi, a̱ʼgu̱ bi̱ na̱nguá egiʼdiin e̱ji̱n, bi̱ xóó tséraʼdaa nimbáa a̱ʼdiáaʼ!
Gaʼdxaaʼ, atatsaʼwá ga̱jma̱a̱ gagi, ikháán bi̱ nimbá miʼtsú táraʼdáá ga̱ʼkhu̱ dí maraʼdaa ada̱,
numuu rí itháan mbaʼin e̱ji̱i̱n a̱ʼgu̱ bi̱ niguanáa
ki xóo e̱ji̱i̱n a̱ʼgu̱ bi̱ gíʼdaa ajmbio̱o̱”,* eʼthí Jeobá.
2 “Atani̱ itháan ma̱ja̱nʼ guʼwáaʼ.
Ataxtriga̱ xtíin náa guʼwáaʼ rí mba̱a̱.
Atani̱ itháan ma̱ja̱nʼ, ataxúmán itháan ñuñuu
ga̱jma̱a̱ atadu̱ jxa̱ʼ stákóo.
3 Numuu dí maraxtaa náa ñawún májáanʼ ga̱jma̱a̱ náa ñawún xti̱ya̱a̱ʼ.
Bi̱ gáguwáʼ náa ikháán mundrígúu rí kaʼñún bi̱ kúwá náa xuajin mba̱ʼu̱
ga̱jma̱a̱ makuwá náa xuajin rí niguanáa.
4 Xámíñáaʼ, numuu dí xágájnuu gamajkuaaʼ,
xáku̱ma̱a̱ʼ dí naguma majti̱i̱nʼ, numuu dí xáguma nduwáánʼ.
Mambumaaʼ xóo niguma majti̱i̱nʼ nákha dxáʼgú nindxa̱a̱ʼ
ga̱jma̱a̱ xármáʼáan a̱jkia̱a̱nʼ xóo nigájnuu gamajkuaaʼ nákha ninindxa̱a̱ʼ a̱ʼgú xuáʼa”.
5 “Bi̱ phú Mba̱a̱ bi̱ niʼníí nindxu̱u̱ xóo ajmbia̱a̱ʼ,
ikhaa nindxu̱u̱ Jeobá bi̱ naʼtáñajúúnʼ ángeles, xúʼko̱ kaʼnii mbiʼyuu,
ga̱jma̱a̱ bi̱ Kaʼwii náa Israel bi̱ Niʼtsiríña̱a̱nʼ.
Ikhaa magumbiʼyuu Dios náa xúgíʼ tsu̱du̱u̱ ku̱ba̱ʼ.
6 Numuu dí Jeobá nindxa̱ʼwáaʼ xóo mbáa a̱ʼgu̱ bi̱ ninújúnʼ bi̱ niguanáa ga̱jma̱a̱ bi̱ ra̱ʼkhá tháán ngíná xtáa,
xóo mbáa a̱ʼgu̱ bi̱ ninújúnʼ nákha kaʼnii dxáʼgú, bi̱ nánguá nindúún gúyáá”, eʼthí Dios.
7 “Niniʼñáánʼ mbá xngaa,
mú ga̱jma̱a̱ numuu dí nagáwíinʼ a̱jkiu̱nʼ maʼkháaʼ ka̱ña̱a̱n.
8 Índo̱ mbá nacha̱ nikiʼnún ka̱ya̱a̱ʼ, nirkaʼwu̱ mbá xngaa inuʼ náa ikháán,
mú ga̱jma̱a̱ numuu rí nandoʼ ka̱ya̱a̱ʼ* rí ndajyúuʼ asndu kámuu maʼni dí magáwíinʼ a̱jkiu̱nʼ ka̱ya̱a̱ʼ”, eʼthí Jeobá bi̱ Niʼtsiríña̱a̱nʼ.
9 “Xóo mbiʼi dí nixtáa Noé rígi̱ e̱yo̱o̱ ikhúún.
Xó má ni̱xna̱ ajngóʼ dí iyaʼ rí nijnííʼ nákha mbiʼi dí nixtáa Noé ni xátanga̱a̱ majnííʼ náa tsu̱du̱u̱ ku̱ba̱ʼ,
xúʼko̱ má e̱xna̱ ajngóʼ dí xátangu̱ún makiʼnún ka̱ya̱a̱ʼ ga̱jma̱a̱ ni xáriyáaʼ.
10 Tséʼniuu á mu kúbá magi̱jxi̱ jngoo náa tri̱ga̱
ga̱jma̱a̱ bíjní maʼbajngaa,
nditháan xániʼñúuʼ randoʼ ka̱ya̱a̱ʼ*
dí nimbánúʼ makuwáánʼlú tsímáá nditháan xámbá”, eʼthí Jeobá, bi̱ nagáwíinʼ a̱jkiu̱u̱n kaʼyaaʼ.
11 “Ikháán a̱ʼgu̱ bi̱ xtaa ngíná, bi̱ ra̱ʼkhá tháán nitamíniiʼ ga̱jma̱a̱ nimbáa táʼni̱i̱ a̱jkia̱a̱nʼ,
marngujxi̱ itsí ndrígáaʼ ga̱jma̱a̱ argamasa,*
ma̱ngaa maʼgíʼ rajkuáaʼ ga̱jma̱a̱ itsí zafiro.
12 Xtájtsí ndrígáaʼ ma̱ni̱ ga̱jma̱a̱ itsí rubí,
xkrugua ma̱ni̱ ga̱jma̱a̱ itsí xngiyaʼ,*
ma̱ngaa mbá xúgíʼ dí kúgumaʼá ga̱jma̱a̱ xuajin* ma̱ni̱ ga̱jma̱a̱ itsí mitsaanʼ.*
13 Mbá xúgíinʼ ejña̱a̱nʼ maʼsngúún Jeobá,
ga̱jma̱a̱ ra̱ʼkhá tháán tsímáá gákúwá.
14 Dí májánʼ rí natani̱ maʼni dí mariejún jxa̱ʼ.
Dí naʼni ngínáá marigá mitsínguánʼ náa ikháán,
nimbá xáʼni dí mamiñáanʼ, ni má xárígá mbá numuu dí mamiñáanʼ,
numuu dí rígi̱ xáʼkha̱ kanuu náa ikháán.
15 Á mu mbáa na̱ʼkha̱ gáxmína̱ʼ ga̱jma̱á nindxa̱a̱ʼ,
raʼkháa ikhúún ekuʼmáa ma̱ʼkha̱.
Bi̱ gáxmína̱ʼ ga̱jma̱á nindxa̱a̱ʼ xáʼngo̱o̱ matani̱ ga̱jma̱a̱ʼ”.
16 “¡Atayáá! Ikhúún ni̱ni̱i̱ bi̱ nañejuunʼ ajua̱nʼ,
bi̱ nandiyuuʼ chámbuʼ rí nakamuu
ñajunʼ ndrígóo nindxu̱u̱ dí maʼni mbá ajua̱nʼ.
Ikhúún ni̱ni̱i̱ xa̱bu̱ bi̱ naʼni gámbóo.
17 Nimbá ajua̱nʼ dí gúni̱ mu muxnaaʼ ga̱jma̱a̱ xájmaa,
ga̱jma̱a̱ ikháán marata̱ dí gágíʼnuu xa̱bu̱ bi̱ gákruiga̱a̱n.
Rígi̱ nindxu̱u̱ dí mudrigúu xa̱bi̱i̱ Jeobá,
numuu dí ikhúún nda̱yo̱o̱ dí ikhiin nindxu̱ún xa̱bu̱ míjíinʼ”, eʼthí Jeobá.