Josué

11 Índo̱ Jabín rey bi̱ xtáa náa Hazor, niʼdxawuun rígi̱, ikhú nikuʼmiin xa̱bu̱ mu magún kuñu̱u̱n ajngáa náa Jobab rey bi̱ xtáa náa Madón xúʼko̱ má náa rey bi̱ xtáa náa Simrón, ga̱jma̱a̱ náa rey bi̱ xtáa náa Acsaf, 2 náa reyes bi̱ kúwá náa kúbá xígií náa norte, ga̱jma̱a̱ náa mata* Kinéret xígií náa sur, ma̱ngaa náa Sefelá ga̱jma̱a̱ náa juímuu Dor xígií náa narámaaʼ a̱jkha̱ʼ,* 3 mangiin náa xa̱bu̱ cananeos xígií náa nagájnuu a̱jkha̱ʼ* ga̱jma̱a̱ náa narámaaʼ a̱jkha̱ʼ, náa xa̱bu̱ amorreos, hititas, perizitas, ga̱jma̱a̱ jebuseos bi̱ kúwá náa kúbá, mangiin heveos bi̱ kúwá náa agoo kúbá Hermón, náa mbaaʼ Mizpá. 4 Niguwáʼ gajmiún mbá xúgíinʼ soldado ndrígu̱ún, ra̱ʼkhá tháán mbaʼin dí nindxu̱ún asndu xóo jui̱ʼi̱ dí rígá náa rawuunʼ lamáa,* ma̱ngaa niguwáʼ gajmiún mbaʼin wéñuuʼ wáyú ma̱ngaa carros dí nuxmijná ga̱jma̱a̱. 5 Xúgíinʼ reyes bugi̱ nimbánúún rí mugimbúmíjná ga̱jma̱a̱ nigún gúgi̱ʼi̱i̱n náa mijngii iduu iyaʼ Merom mu muxmijná gajmiún Israel.

6 Ikhú Jeobá niʼthúu̱n Josué: “Xámíñáaʼ xtañún, numuu dí gájtsíí xóo hora má rígi̱, nikháñún má gáxnajxiin náa ñawúúnʼ xa̱bu̱ Israel. Gúʼxíinʼ xujkiún gátatsiʼñún ga̱jma̱a̱ matatsi̱ka̱a̱ cárriu̱ún dí nuxmijná ga̱jma̱a̱”. 7 Josué gajmíi̱n xúgíinʼ xa̱bu̱ bi̱ nuxmijná, nda̱a̱ tsu̱ma̱ nigún gúradíin náa iduu iyaʼ Merom. 8 Jeobá niniñúúnʼ náa ñawúúnʼ xa̱bu̱ Israel, niradíin ga̱jma̱a̱ nigún ruxkúún asndu náa Sidón rí Mba̱a̱, náa Misrefot-Maim ga̱jma̱a̱ náa mata Mizpé dí naguanúu xígií náa nagájnuu a̱jkha̱ʼ, niradíin ga̱jma̱a̱ túniña̱a̱ʼ dí nimbáa makríyáaʼ. 9 Josué niʼniún xó má Jeobá niʼthúu̱n maʼni: Niniñúúnʼ gúʼxíinʼ wáyu̱ún, ma̱ngaa nitsikha̱a̱ cárriu̱ún dí nuxmijná ga̱jma̱a̱.

10 Josué nitanga̱a̱ nito̱ʼo̱o̱ náa xuajin Hazor, ma̱ngaa nixíyáa ga̱jma̱a̱ espada rey, numuu dí Hazor ninindxu̱u̱ xuajin dí phú ndiyá edxu̱u̱ náa i̱ʼwáʼ xuajin dí tri̱ga̱ rawuunʼ. 11 Niradíin xúgíinʼ xa̱bu̱ bi̱ kúwá ikhí, xúʼko̱ kaʼnii nini̱ gámbíin. Mbá xúgíinʼ nikháñún. Nda̱wa̱á nigídooʼ aguʼ nikha̱a̱ Hazor. 12 Josué nito̱ʼo̱o̱ náa mbá xúgíʼ xuajñún reyes bugi̱, ma̱ngaa nigudíin mbá xúgíinʼ reyes buʼko̱ ga̱jma̱a̱ espada. Nigudíin, xó má nikuʼmaa maʼni Moisés xa̱bi̱i̱ Jeobá. 13 Israelitas na̱nguá nitsikha̱a̱ xuajin dí trámáʼ náa ndi̱jtsu̱u̱, i̱ndó dí nitsikháa Josué ninindxu̱u̱ Hazor. 14 Israelitas niguanún gajmiún xujkiún ma̱ngaa mbá xúgíʼ dí niguanáa náa xuajin. Niradíin mbá xúgíinʼ ga̱jma̱a̱ espada asndu niguámbíin. Túniña̱a̱ʼ dí nimbáa maxtáa. 15 Dí Jeobá nikuʼmaa maʼni Moisés, ikhaa má rúʼko̱ dí Moisés niʼthúu̱n maʼni Josué ga̱jma̱a̱ Josué niʼni xó má nijuiʼtháán. Niʼnimbánuu mbá xúgíʼ dí Jeobá nikuʼmaa maʼni Moisés.

16 Josué nito̱ʼo̱o̱ náa xúgíʼ mbaaʼ rígi̱, náa kúbá, náa xúgíʼ Négueb, náa xúgíʼ ku̱ba̱ʼ Gosén, Sefelá, Arabá ga̱jma̱a̱ náa kúbá ndrígóo Israel ma̱ngaa náa kúbá dí naguanúu xígií náa níjniúu, 17 asndu náa kúbá Halac, dí naguanúu náa mijngii Seír, ga̱jma̱a̱ asndu náa Baal-Gad, dí na̱jkha̱ xígií náa mata Líbano, náa agoo kúbá Hermón, niguajtuun mbá xúgíinʼ reyes ga̱jma̱a̱ nigudíin. 18 Mba̱yu̱u̱ʼ nixmínaʼ gajmíi̱n Josué xúgíinʼ reyes bugi̱. 19 Nimbá xuajin túnimbánumíjná gajmiún israelitas dí makuwá tsímáá, i̱ndó heveos bi̱ kúwá náa Gabaón. Náa xúgíʼ i̱ʼwáʼ xuajin nitu̱ʼu̱u̱n ga̱jma̱a̱ nixmijná gajmiún. 20 Jeobá má niniñuuʼ dí maʼni gújkhúʼ a̱jkiu̱ún xa̱bu̱ bugi̱, mu xúʼko̱ magún gúxmijná gajmiún israelitas, xúʼko̱ ikhaa ma̱ndoo maʼni gámbíin dí asndu xágáwíinʼ a̱jkiu̱u̱n kaʼñún. Ndiyóoʼ dí maguma gámbíin xó má Jeobá nikuʼmaa maʼni Moisés.

21 Nákha ikhú Josué niʼni gámbíin anaquim bi̱ kúwíin náa kúbá, ma̱ngaa náa Hebrón, Debir, Anab, ga̱jma̱a̱ xúgíinʼ bi̱ kúwíin náa kúbá Judá ga̱jma̱a̱ bi̱ kúwá náa kúbá Israel. Josué niʼni gámbíin xúgíinʼ ikhiin ga̱jma̱a̱ xuajñún. 22 Nimbáa anaquim táguanúu náa ku̱bu̱únʼ israelitas. I̱ndó niguanún náa Gaza, Gat ga̱jma̱a̱ Asdod. 23 Xúʼko̱ kaʼnii niʼni dí Josué nigruigúu xúgíʼ ku̱ba̱ʼ rúʼko̱ xó má Jeobá nikudaminaʼ náa Moisés. Josué nixnúún ku̱ba̱ʼ rígi̱ xa̱bu̱ Israel mu murui̱ʼta̱a̱ xó má kaʼñún mudrigúu mámbá xuajin majkhaʼ.* Ikhú niniña̱a̱nʼ ruxmijná.