Isaías
55 ¡Gaguwa̱ʼla mbá xúgiáanʼ, bi̱ nakándawala! ¡Gaguwa̱ʼ gúwanla iyaʼ!
Ikháanʼla, bi̱ raguáʼdáá mbújkha̱a̱, ¡gaguwaʼla, gu̱tsi̱ ga̱jma̱a̱ gu̱phula!
Xúʼko̱, gaguwaʼla, gu̱tsi̱ vino ga̱jma̱a̱ yaʼdú, tséyóoʼ má mbújkha̱a̱ ga̱jma̱a̱ xáʼyóoʼ má mu̱ni̱ numáá.
2 Náá numuu dí nu̱ni̱ numáá ga̱jma̱a̱ mbújkha̱a̱ dí raʼkháa ganitsu rá.
Náá numuu rí naguámbala mbújkha̱a̱ rí nudaaʼ náa mbá rí tséʼni magiʼmala rá.
Gudxawunʼla májánʼ ga̱jma̱a̱ gu̱phu dí májánʼ,
ga̱jma̱a̱ muphula ganitsu dí itháan májánʼ.*
3 Guʼgíʼ e̱dxa̱laʼ mudxawíín ga̱jma̱a̱ gaguwaʼla náa ikhúún.
Gudxawíín ga̱jma̱a̱ xúʼko̱ makuwáanʼla,
ikhúún mambanúʼ ga̱jma̱á nindxa̱la mbá rí mbajyúuʼ asndu kámuu,
masngajmála rí nandoʼ ka̱ya̱la* xó má nikuʼdáminaʼ náa David.
Gajkhun mambanúu rígi̱.
4 ¡Atayáá! Ni̱ni̱ rí mani̱ndxu̱u̱ testigo náa xa̱bu̱ xuajin,
bi̱ kayá edxu̱u̱ ga̱jma̱a̱ bi̱ maʼtáñajúúnʼ xa̱bu̱ xuajin.
5 ¡Atayáá! Matatsa̱ʼwa̱a̱ ma̱ʼkha̱ mbá xuajin dí tsétatsinuuʼ,
ga̱jma̱a̱ xa̱bu̱ xuajin bi̱ tséniʼníínʼ maguwáʼ ragáñúún náa ikháán,
ga̱jma̱a̱ numuu Jeobá Dios ndrígáaʼ, bi̱ Kaʼwii náa Israel,
numuu dí ikhaa maʼni mba̱a̱n.
6 Guʼyáaʼ Jeobá nákhá xóó ma̱ndoo muxkamaa.
Gundxa̱ʼwa̱a̱la, xúgi̱ dí xtáa mijngii.
7 Ganiñuuʼ kambo̱o̱ xa̱bu̱ xkawi̱i̱ʼ,
ganiñuuʼ rí nandxaʼwáminaʼ dí ra̱májánʼ xa̱bu̱ ra̱májáanʼ,
gatanga̱a̱ náa Jeobá, ikhaa magáwíinʼ a̱jkiu̱u̱n kaʼyoo,
gatanga̱a̱ náa Dios ndrígulú, ikhaa maʼni mba̱a̱ a̱jkiu̱u̱n kaʼyoo.
8 “Numuu dí nandxa̱ʼwa̱mínáʼ raʼkháa xóo dí nundxa̱ʼwa̱míjnala ikháanʼ,
ga̱jma̱a̱ kambala ikháanʼ raʼkháa xóo kambo̱ʼ ikhúún”, eʼthí Jeobá.
9 “Numuu dí xó má mekhu rígá itháán mitsídánʼ ki xóo ku̱ba̱ʼ,
xúʼko̱ má kambo̱ʼ rígá itháán mitsídánʼ ki xóo kambala ikháanʼ,
ga̱jma̱a̱ dí nandxaʼwamínaʼ ki xóo dí nundxaʼwamíjnala ikháanʼ.
10 Numuu dí xó má ruʼwa ga̱jma̱a̱ idiʼ nagajtaa asndu mekhuíí
ga̱jma̱a̱ tsétanga̱a̱ ikhí asndu índo̱ najuiya̱a̱ʼ náa ku̱ba̱ʼ,
naʼni dí ma̱jma̱a̱ ga̱jma̱a̱ makráʼáan tsígáʼ, ma̱ngaa dí mi̱khu̱ bi̱ naʼdu,
11 xúʼko̱ kaʼnii gánindxu̱u̱ ajngáa dí nagájnuu náa rawunʼ.
Xátanga̱a̱ náa ikhúún á mu xóó tsémbánuu,
mambanúu tsiaki̱i̱ rí ikhúún nandoʼ
ga̱jma̱a̱ maʼga̱nú marigá dí ikhúún nakuʼmá maguma.
12 Numuu dí ikháanʼla magajnálaʼ ga̱jma̱a̱ gagi
ga̱jma̱a̱ tsímáá gáguwa̱a̱ʼla.
Kúbá ga̱jma̱a̱ bíjní ra̱ʼkhá tháán gáʼdxún,
asndu mundxa̱ʼwa̱ dí gagi náa inala,
ga̱jma̱a̱ mbá xúgíʼ ixi̱ dí rígá xanáá muxnáá ñawúúnʼ.
13 Ikhaa dí makráʼáan iná tsuwanʼ, makráʼáan ixi̱ enebros.
Ikhaa dí makráʼáan iná tsuwanʼ dí xtáʼdu̱u̱ makráʼáan ixi̱ mirtos.
Rígi̱ maʼni dí majmaʼnuuʼ mbiʼyuu Jeobá,
ga̱jma̱a̱ mani̱ndxu̱u̱ mbá tsinaʼ dí mbajyúuʼ kámuu rí nditháan xándatiga̱a̱”.