Isaías
49 Gudxawunʼ, bi̱ kuwáanʼ náa islas,*
ga̱jma̱a̱ guʼgíʼ e̱dxa̱laʼ, xuajin dí rígá mitsínguánʼ.
Jeobá nindxa̱ʼóʼ nákhá ikhúún xóó tséxtáá.
Niríya̱ʼ mbiʼyuʼ nákhá ikhúún kaʼni̱í ku̱ʼu̱u̱n náa awúu̱n ru̱dúʼ.*
2 Niʼni dí rawunʼ mani̱ndxu̱u̱ xóo espada rí mixíníʼ,
nirkaʼwún náa ndájkhoo ñawúunʼ.
Niʼni dí mani̱ndxu̱ʼ xóo flecha dí mixíníʼ,
nirkaʼwún náa najti flecha.
3 Niʼthúnʼ: “Ikháán nindxa̱a̱ʼ xa̱bi̱ʼ, Israel,
náa ikháán masngajmá xóo mitsiʼñún”.
4 Mú ikhúún ni̱tha̱: “Mbaʼ niñajuunʼ xúʼkuíínʼ.
Niguámboʼ tsiaki̱i̱ ndrígóʼ náa mbá rí nda̱a̱.
Mú nda̱yo̱o̱ kaʼwu dí Jeobá maʼthí á mu májánʼ o ra̱májánʼ dí na̱ni̱,*
ga̱jma̱a̱ dí mada̱a̱ʼ na̱ʼkha̱ náa Dios ndrígóʼ”.
5 Ga̱jma̱a̱ dí xúgi̱, Jeobá bi̱ niʼniún náa awúu̱n ru̱dúʼ xóo xa̱bi̱i̱,
niʼthí dí ikhúún matangu̱ún ka̱ya̱a̱ Jacob,
mu magímbáminaʼ ga̱jma̱a̱ Israel.
Ikhúún maguma mbu̱u̱n náa iduu Jeobá,
ga̱jma̱a̱ Dios ndrígóʼ maʼga̱nú mani̱ndxu̱u̱ tsiaki̱i̱ ndrígóʼ.
6 Ga̱jma̱a̱ ikhaa niʼthí: “Raʼkháa i̱ndó xa̱bi̱ʼ gánindxa̱a̱ʼ
mu mataxujxíi xuajin majkhaʼ* ndrígóo Jacob
ga̱jma̱a̱ midxa̱a̱ʼ xtiin bi̱ gákáwíin náa Israel.
Ma̱ngaa nixnajxíin xóo aguʼ náa xa̱bu̱ xuajin,
mu dí ma̱ni̱ káwíin xa̱bu̱ maʼga̱nú asndu náa itháan mitsínguánʼ náa tsu̱du̱u̱ ku̱ba̱ʼ”.
7 Jeobá bi̱ Ni̱ʼtsi̱ríya̱a̱ʼ Israel, bi̱ Kaʼwii náa ikhaa, naʼthúu̱n ajngáa rígi̱ bi̱ tsíñún gúyáá, bi̱ xa̱bu̱ xuajin nawiñu̱u̱nʼ kuyáá, xa̱bi̱i̱ xa̱bu̱ ñajunʼ:
“Mbuyáá reyes ga̱jma̱a̱ matujxu̱u̱n,
ga̱jma̱a̱ príncipes musmbati̱gu̱u̱n
ga̱jma̱a̱ numuu Jeobá, bi̱ jmbii,
bi̱ Kaʼwii náa Israel, bi̱ niraʼwíín”.
8 Rígi̱ dí naʼthí Jeobá:
“Náa mbá mbiʼi dí ninindxu̱ʼ májáanʼ xa̱bu̱ náa ikháanʼla, niriʼñaaʼ,
ga̱jma̱a̱ náa mbá mbiʼi dí ni̱ni̱ káwíin xa̱bu̱, nimbáyáaʼ,
niñewa̱a̱n má xúʼko̱ mu maxnajxíin xóo mbá dí nambánuʼ náa xa̱bu̱ xuajin,
mu ma̱ni̱ májáanʼ ku̱ba̱ʼ,
mu ma̱ni̱ dí ikhiin muda̱a̱ ku̱bu̱únʼ dí niguanáa,
9 mu maʼthúún bi̱ kajtiin náa guʼwá e̱jua̱nʼ ‹¡Agajnáanʼla!›,
ga̱jma̱a̱ mu maʼthúún bi̱ kúwá náa mikína ‹¡Gusngajmá mijnála!›.
Muxkamaa ganitsu náa rawuunʼ kamba̱a̱,
marigá ra̱jxa̱ náa rawuunʼ mbá xúgíʼ kamba̱a̱ rí nagún xa̱bu̱.*
10 Xáxkidxu̱u̱n ni má xákándawúúnʼ,
xúyáá mijkha ni má xátsikhíin a̱jkha̱ʼ.
Numuu dí bi̱ nagáwíinʼ a̱jkiu̱u̱n kaʼñún maxnún ikha,
ga̱jma̱a̱ maʼga kagui̱i̱n náa rígá iduu iyaʼ.
11 Ma̱ni̱ dí xúgíʼ kúbá ndrígóʼ maʼni kamba̱a̱,
ga̱jma̱a̱ kamba̱a̱ a̱pha̱ ndrígóʼ mambaníi.
12 ¡Atayáá! Bugi̱ naguwáʼ mitsínguánʼ,
ga̱jma̱a̱ ¡atayáá!, bugi̱ naguwáʼ xígií náa norte ga̱jma̱a̱ xígií náa narámaaʼ a̱jkha̱ʼ,*
ga̱jma̱a̱ bugi̱ naguwáʼ náa mbaaʼ Sinim”.
13 Mekhu, gundxa̱ʼwa̱la ga̱jma̱a̱ gagi, gaʼdxaanʼ ku̱ba̱ʼ.
Gaʼdxalá kúbá ga̱jma̱a̱ gundxa̱ʼwa̱la ga̱jma̱a̱ gagi.
Numuu dí Jeobá niʼni rí maʼni̱i̱ a̱jkiu̱u̱n xuajñuu
ga̱jma̱a̱ nasngájmúún dí nagáwíinʼ a̱jkiu̱u̱n kaʼñún bi̱ numíniiʼ.
14 Mú Sion tséniñuuʼ raʼthí:
“Niniñuʼ Jeobá, nimbumuu kaʼyoʼ Jeobá”.
15 Lá ma̱ndoo dí mbáa a̱ʼgú nikhi̱i̱ mambumuu kaʼyoo a̱ʼdióo* ráʼ.
Lá xágáwíinʼ a̱jkiu̱u̱n kaʼyoo ada̱ bi̱ nigui̱i̱ náa awúu̱n xáʼ.
Tséʼniuu á mu gu̱ʼu̱ bugi̱ mambumún, mú ikhúún nditháan xámbumuʼ ka̱ya̱a̱ʼ.
16 ¡Atayáá! Niniraʼmáʼ mbiʼyaaʼ náa ñawún paskoʼ.
Xtájtsí ndrígáaʼ rígá má xúʼko̱ náa inuʼ.
17 Ejña̱a̱nʼ matangi̱ín mbá nacha̱.
Bi̱ nini̱ gámbáan, muni̱ tsíngumijná náa ikháán.
18 Atajxújxi̱i̱ edxa̱a̱ʼ ga̱jma̱a̱ atiejxi̱ mbájndi.
Xúgíinʼ ikhiin nagimbíi̱n.
Naguwáʼ náa ikháán.
“Xó má ikhúún gajkhun xtáá, eʼthí Jeobá,
ikhiin mani̱ndxu̱ún xóo xtíin dí mataguʼwáanʼ maʼni mitsiʼñán,
xóo mbáa dxáʼgú bi̱ manújúnʼ naraʼngo̱o̱ xábí.
19 Tséʼniuu á mu mbayaaʼ niguanáa ga̱jma̱a̱ ndáwi̱i̱n xa̱bu̱, ga̱jma̱a̱ ku̱ba̱a̱ʼ niguma gámbáa,
dí xúgi̱, chíʼgíiʼ* gúyáá bi̱ gákúwá ikhí,
ga̱jma̱a̱ bi̱ ni̱ʼpha̱a̱ʼ makuwá mitsínguánʼ.
20 E̱ji̱n bi̱ nigumiin índo̱ ikháán nitanimbatígi̱i̱n ejña̱a̱nʼ, muthaanʼ:
‹Chíʼgíiʼ wéñuuʼ ku̱ba̱ʼ rígi̱ e̱yo̱o̱ jún.
Atani̱ gáʼchíi maxtáá gi̱i̱›.
21 Ga̱jma̱a̱ maratamínáʼ:
‹Á mu ninimbatígi̱i̱n e̱ji̱n ga̱jma̱a̱ nindxu̱ʼ mbáa a̱ʼgu̱ bi̱ tségiʼdiin e̱ji̱n,
ni̱jkha̱ kiʼñúún ga̱jma̱a̱ nixtáá náa guʼwá e̱jua̱nʼ,
tsáá e̱ji̱i̱n bugi̱ bi̱ nigruíguíin rá.
Tsáá niʼni mba̱ji̱i̱n xá.
¡Atayáá! Mbáwún niguanúʼ,
náá niguwáʼ e̱ji̱n bugi̱ rá.›”
22 Rígi̱ dí naʼthí Tátá Jeobá bi̱ itháán mba̱a̱:
“¡Atayáá! Makujxí ñawúnʼ mbuyáá xa̱bu̱ xuajin mba̱ʼu̱
ga̱jma̱a̱ mbá poste rí nasngájmúún mbuyáá xa̱bu̱ xuajin.
Mudariʼiin* jiámiáaʼ maguwáanʼ kudiin,
ga̱jma̱a̱ náa xpajphún gatrámíinʼ waʼxiáanʼ gágún kudiin.
23 Muñewa̱a̱nʼ reyes
ga̱jma̱a̱ princesa ndrígu̱ún mani̱ndxu̱ún ñumbáá ndrígáaʼ.
Musmbati̱gu̱u̱n asndu mbayííʼ náa inaaʼ,
ga̱jma̱a̱ muxtííʼ yujndooʼ rajkuáaʼ,
mi̱dxu̱ʼnú ma̱ta̱ya̱a̱ dí ikhúún nindxu̱ʼ Jeobá,
bi̱ nuguáʼthi̱i̱n náa ikhúún xáguma majti̱i̱nʼ”.
24 Lá ma̱ndoo mbáa soldado mixkujiiʼ magajta káyííʼ bi̱ na̱jkha̱ kagui̱i̱n náa guʼwá e̱jua̱nʼ ráʼ.
O, lá ma̱ndoo makáwíin bi̱ na̱jkha̱ kagui̱i̱n náa guʼwá e̱jua̱nʼ mbáa xa̱bu̱ ñajunʼ ra̱májáanʼ ráʼ.
25 Numuu dí rígi̱ dí naʼthí Jeobá:
“Xúʼko̱, asndu soldado mixkujiiʼ magajta káyííʼ bi̱ na̱jkha̱ kagui̱i̱n náa guʼwá e̱jua̱nʼ,
ga̱jma̱a̱ bi̱ na̱jkha̱ kagui̱i̱n náa guʼwá e̱jua̱nʼ xa̱bu̱ ñajunʼ bi̱ ra̱májáanʼ, maguma káwíin.
Ikhúún maxmína̱ʼ ga̱jmu̱ʼ bi̱ gáxmína̱ʼ ga̱jma̱á nindxa̱a̱ʼ
ga̱jma̱a̱ ma̱ni̱ káwíin e̱jña̱a̱ʼ.
26 Ma̱ni̱ dí mu̱phu̱ xuñúúnʼ bi̱ nuni̱ ngínáá,
majngi̱i̱n ga̱jma̱a̱ eʼdiún xóo dí muwa̱a̱n vino rí taun.
Mbá xúgíinʼ xa̱bu̱ mbuyáá dí ikhúún nindxu̱ʼ Jeobá,
bi̱ Naʼni kríña̱a̱nʼ ga̱jma̱a̱ bi̱ Naʼtsiríña̱a̱nʼ,
bi̱ gíʼdoo Tsiaki̱i̱, Dios ndrígóo Jacob”.