Xú káʼnii eyoo Dios makuwáanʼ rá.

NÁA periódicos, náa televisión, náa radio ga̱jma̱a̱ náa Internet, nuthi wéñuʼ ga̱jma̱a̱ numuu rí narígá delitos, guerras ga̱jma̱a̱ náa nuradími̱jna̱ wéñuʼ xa̱bu̱. Mbáa asndu ikháán xtaa ratamíniiʼ ga̱jma̱a̱ mbá nandii o nikháñuu mbáa bi̱ xtayáá.

Mbá guʼwíin nudxawíín náa radio rí narígá

Atraximínaʼ:

Lá xúgi̱ nindoo maxtáá Dios gajmíi̱nʼ bi̱ kuwa náa goʼwóoʼ ráʼ.
Náa gándoo gaxkamaa rí mambáyuʼ mu maraʼnuu xkujndu rá.
Lá maʼga̱nú mbá mbiʼi rí marigá rí tsímáá náa tsu̱du̱u̱ Ku̱ba̱ʼ ráʼ.

Náa Biblia naxtiʼña̱a̱ graxe̱ rí ma̱ndoo mambáyulúʼ.

NÁA BIBLIA NAʼSNGÁA RÍ DIOS MAʼNIÚN RÍ MÁJÁNʼ WÉÑUʼ XA̱BU̱ NUMBAAʼ

Xa̱bu̱ ní xáguaʼdáá ga̱ʼkhu̱, ní xáganii ga̱jma̱a̱ xákhañun (Revelación [Apocalipsis] 21:4).
“Bi̱ guʼxuʼ maʼga̱nú makixi̱i̱ xó má eʼni añaʼ” (Isaías 35:6).
“Mambaʼta̱a̱ idún xa̱bu̱ bi̱ tsíkruigu̱u̱n” (Isaías 35:5).
Magabiín bi̱ nikháñun (Juan 5:28, 29).
Nímba̱a̱ ní xáʼniuu nandii (Isaías 33:24).
Marigá ganitsu mu̱phu̱ xúgínʼ (Salmo 72:16).

BIBLIA MA̱NDOO MAMBÁYAAʼ

Mbáa xa̱bi̱i̱ Jeobá naʼnigajmaa Biblia ga̱jma̱a̱ mbáa xa̱bu̱

Mbáa natatsaʼwáminaʼ rí nindxu̱u̱ mbá xnuʼndaa dí nitraxnuu náa ináa rí nagi̱ʼdu̱u̱ libro rígi̱. Mú Dios nikudaminaʼ rí inuu má maʼni rígi̱ náa tsu̱du̱u̱ Ku̱ba̱ʼ, ga̱jma̱a̱ Biblia naʼthí xú káʼnii gáʼni.

Ma̱ngaa náa Biblia naʼthúlúʼ rí gíʼmaa muʼni mu makuwáanʼ tsímáá xúgi̱. Atatsaʼwáminaʼ mbégu̱ʼ ga̱jma̱a̱ numuu rí naʼni maxmiéjuanʼ. Mbáa xtaʼdáá xkujndu náa guʼwáaʼ, ga̱jma̱a̱ numuu mbújkha̱a̱ o ga̱jma̱a̱ numuu nandii. O mbáa xtaa gíná numuu rí nikháñuu mbáa bi̱ nandaaʼ xtayáá. Biblia ma̱ndoo mambáyaaʼ matraʼníí xkujndu rúʼko̱. Ga̱jma̱a̱ ma̱ndoo maʼni̱i̱ a̱jkia̱nʼ, numuu rí naxtiʼña̱a̱ graxe̱ xóo rígi̱:

Náa numuu rí numíniiʼlu rá.
Xú káʼnii gándoo guraʼníí xkujndu rá.
Ndiéjunʼ gándoo gúʼni mu makuwáanʼ tsímáá mbá guʼwáanʼ rá.
Náa kuwa bi̱ nikháñun rá.
Lá mbuʼñún mbu̱júu̱ a̱ngiu̱lú bi̱ nikháñun ráʼ.
Xóo eʼyáá rí Dios maʼnimbánuu xúgíʼ rí nikudaminaʼ rá.

Á mu ikháán xtaa ratraxnuu libro rígi̱, nindxu̱u̱ numuu rí nandaaʼ ma̱ta̱ya̱a̱ rí naʼsngáa náa Biblia. I̱yi̱i̱ʼ rígi̱ ma̱ndoo mambáyaaʼ. Graxe̱ rí na̱ʼkha̱ náa mámbá kutriga̱ mambáyaaʼ makruaʼaaʼ itháan májánʼ Biblia. Mbaʼin wéñuʼ xa̱bu̱ nanigu̱nʼ mutamijná ga̱jma̱a̱ numuu Biblia gajmiún bi̱ nutaraʼa numuu Jeobá. Nanduxu rí xúʼko̱ gáku̱ma̱ʼ mangáán. ¡Dios gáʼni tsajkurámuuʼ tsiakii rí natani mu majmañaaʼ rí eʼsngúlúʼ náa Biblia!

GAJMAÑAAʼ MAJMAʼ BIBLIA NDRÍGÁAʼ

NÁA Biblia na̱ʼkha̱ 66 libros, nawiʼtáa ga̱jma̱a̱ capítulos ma̱ngaa versículos. Xúʼko̱ ra̱mingíjyúuʼ mataxkamaa mbá texto. Índo̱ na̱ʼkha̱ mbá texto náa libro rígi̱, ginii na̱ʼkha̱ mbiʼyuu libro. Nda̱wa̱á na̱ʼkha̱ mbá número, rí nindxu̱u̱ capítulo. Ga̱jma̱a̱ ikhú na̱ʼkha̱ a̱jma̱ puntos ga̱jma̱a̱ mbá número rí nindxu̱u̱ versículo. Mbá xkri̱da, “2 Timoteo 3:16” nandoo gáʼthúu̱n raga̱jma̱ carta rí ni̱jkha̱ náa inuu Timoteo, capítulo 3, versículo 16.

Á mu natayááʼ textos rí na̱ʼkha̱, xájyúuʼ gájmañaaʼ majmaʼ Biblia. Ma̱ngaa ma̱ndoo matagíʼdi̱i̱ matraxnuu xúgíʼ mbiʼi Biblia. Á mu natraxnuu ajtsú asndu witsu capítulos mbá mbiʼi, káaʼ mbá tsiguʼ gámbáʼ ratraxnuu.