“Atani gámbíin xúgíinʼ xándú”

Jacob ndiʼyoo májánʼ rí i̱ndó Jeobá kaʼyoo mbiʼyamajkuíí, maski ajndu xóó nda̱a̱ mbá xtángoo náa naʼthí dí raʼkhí rí matayamajkúún xándú (Éx 20:3-5). Ikha jngó, índo̱ Jeobá niʼthúu̱n rí mata̱nga̱a̱ náa Betel, Jacob niʼthúún bi̱ kúwi̱i̱n náa goʼwóo rí muni̱ gámbíin xúgíinʼ xándú bi̱ guáʼdiin. Ikha jngó Jacob niʼdu míʼíin xúgíinʼ xándú, xóo xábí rí najmún xóo amuleto mu mara̱ʼngu̱n, mugídaʼ náa ñawúunʼ o náa rajkhún (Gé 35:1-4). Jeobá ninigu̱u̱ʼ rí niʼni Jacob.

Rí mbiʼi xúgi̱, xú káʼnii gándoo mbuʼyamajkuíí mbáwíi Jeobá rá. Ginii kayuuʼ rí gíʼmaa mu̱ʼni̱, ndayóoʼ muniʼñáaʼ xúgíʼ rí kuajtuminaʼ ga̱jma̱a̱ xawan o xándú. Rígi̱ nandoo gáʼthúu̱n rí gíʼmaa mu̱ʼni̱ gámbáa xúgíʼ dí kuajtuminaʼ ga̱jma̱a̱ xawan ga̱jma̱a̱ gíʼmaa mbuʼyáá ndiéjunʼ rí nu̱ʼni̱ gagimijná ga̱jma̱a̱. Mbá xkri̱da, guraximíjna̱: “Lá nagúxnuu libro ga̱jma̱a̱ nda̱yo̱o̱ película náa naguwáʼ vampiros, zombis (wajinʼ bi̱ nagún kruigu̱u̱n) o i̱ʼwáʼ dí xkawiʼ ráʼ. Lá na̱ni̱ gagimina̱ʼ rí kuajtuminaʼ ga̱jma̱a̱ magia o xawan ráʼ.” Gíʼmaa mu̱ʼni̱ tsíngumijna̱ náa xúgíʼ rí Jeobá nawiyuuʼ kaʼyoo (Sl 97:10).

NDA̱WA̱Á RÍ NITAYÁÁ VIDEO “GUGUAJÚN JTI̱I̱N GIXA̱A̱”, ATRIʼÑA̱A̱ GRAXE̱ RÍGI̱:

• 

  Ndiéjunʼ xkujndu gíʼdoo mbáa bi̱ naʼnigajmaa̱ Biblia bi̱ mbiʼyuu Palesa rá.

• 

  Náá numuu rí májánʼ nindxu̱u̱ rí mbuʼyáʼ rí mumbayulúʼ bi̱ kuya̱ edxu̱u̱ á mu kuaʼdáá xkujndu ga̱jma̱a̱ numuu xawan rá.

• 

  Á mu nandulú rí Jeobá mañewunlú, ndiéjunʼ rí gíʼmaa mu̱ʼni̱ gámbáa rá.

• Ndiéjunʼ rí gíʼdoo numuu niraʼwíí maʼni Palesa rá.

• Náa xtáa ikháán, xú káʼnii gándoo gatiewumínáʼ náa xa̱bu̱ wéñiʼ rá.