Referencias ndrígóo I̱yi̱i̱ʼ dí najmulú náa reunión Xóo kúwi̱i̱n ga̱jma̱a̱ xóo Etaraʼa Cristianos
1-7 MARZO
GÍʼDOO NUMUU RÍ NA̱ʼKHA̱ NÁA BIBLIA | NÚMEROS 7, 8
“Dí naʼsngúlú náa nikúwi̱i̱n israelitas”
it-1 523 kutriga̱ 7
Congregación
Nákha ginii náa israel nikúwá “ejín guaʼniún rey” bi̱ nuxnaximi̱jna̱ ga̱jma̱a̱ numuu xa̱bu̱ xuajen (Esd 10:14). Ikha jngó, “bi̱ kuya̱ edxu̱u̱ náa tribu” ikhiin nikúwi̱i̱n mu muxnajxi̱ tabernáculo (Nú 7:1-11). Ndxajkuun, levitas mangiin “bi̱ kuya̱ edxu̱u̱ náa xuajen” ninindxu̱ún bi̱ nikúwi̱i̱n náa awan dí nirígá nákha mbiʼi rí nixtáa Nehemías (Ne 9:38–10:27). Índo̱ israelita kúwá ragún náa ku̱ba̱ʼ mixooʼ mbá 250 bi̱ kuya̱ edxu̱u̱ náa narígá reunión nigimbúun xa̱bu̱ bi̱ guáʼdáá numuu mu mutamijná gajmiún, xóo Coré, Datán, Abiram ga̱jma̱a̱ On ikhiin ni̱ndxu̱ún bi̱ tsíñún gúyáá Moisés ga̱jma̱a̱ Aarón (Nú 16:1-3). Xó má ikha rí nigíʼ Jeobá, Moisés niraʼwíin mbá 70 xa̱bu̱ guanuu bi̱ kúwá náa israel mu mumbañún xa̱bu̱ xuajen, numuu rí xáʼngo̱o̱ mbáwíi Moisés mu mambáñún xúgínʼ xa̱bu̱ (Nú 11:16, 17, 24, 25). Náa Levítico 4:15 naʼthí ga̱jma̱a̱ numuu xa̱bu̱ bi̱ nuyégún edxu̱u̱ náa reunión; nikujmaa rí ikhiin ni̱ndxu̱ún xa̱bu̱ guanii bi̱ kúwá náa Israel, xóo jueces ga̱jma̱a̱ bi̱ nuyégún edxu̱u̱ náa soldado ikhiin ni̱ndxu̱ún bi̱ nuxnaximi̱jna̱ ga̱jma̱a̱ numuu xa̱bu̱ xuajen (Nú 1:4, 16; Jos 23:2; 24:1).
it-2 874 kutriga̱ 1
Rubén
Náa nikúwá israelita, rubenita nigi̱ʼi̱i̱n xígií náa sur mu mañewu̱u̱n e̱jñún Simeón ga̱jma̱a̱ Gad. Índo̱ xa̱bu̱ xuajen natuxu̱u̱n nagún, bi̱ na̱jkha̱ ginii nindxu̱u̱ tribu ndrígóo Rubén bi̱ nayéjkha̱ edxu̱u̱ náa mbá ajtsú tribu, nda̱wa̱á nagún bi̱ nuyégún edxu̱u̱ náa i̱ʼwáʼ tribu, xóo Judá, Isacar ga̱jma̱a̱ Zabulón (Nú 2:10-16; 10:14-20). Xúʼko̱ má mbiʼi rí nixnajxi̱ tsigijñaʼ índo̱ nini̱ ndxo̱o̱ tabernáculo, ginii bi̱ na̱jkha̱ kayóo tsigijñaʼ nindxu̱u̱ Rubén nda̱wa̱á Judá, Isacar ga̱jma̱a̱ Zabulón (Nú 7:1, 2, 10-47).
w04 1/8 25 kutriga̱ 1
Rí itháan nagájnuriyooʼ náa libro ndrígóo Números
8:25, 26. Mu ma̱ndoo muni̱ májánʼ ñajunʼ ndrígu̱ún bi̱ levita, nuthúún bi̱ ni̱ndxu̱ún xa̱bu̱ guanii rí xáʼyóoʼ muñajunʼ itháan, mú ma̱ndoo mumbañún eʼwíinʼ levitas bi̱ ni̱ndxu̱ún jiáma. Rí mbiʼi xúgíʼ na̱nguá eniʼñáʼ ruʼtáraʼa ga̱jma̱a̱ numuu Reino maski ajndu guaniáanʼ. Ga̱jma̱a̱ xóo nikúwá levitas rígá mbá dí naʼsngúlúʼ, á mu mbáa ndxájulú nikhi̱i̱ nánguá eʼngo̱o̱ gáʼni ñajunʼ dí rígá náa congregación , ma̱ndoo mayambáá náa ikhaa maʼngo̱o̱ maʼni.
Guʼyáʼ rí gíʼdoo numuu
it-2 717 kutriga̱ 3
Ejín giʼnuu
Ejín guaʼniún israelitas ikhiin ma̱ndoo muyégún edxu̱u̱ náa mámbá guʼwá, ma̱ndoo muxnaximi̱jna̱ ga̱jma̱a̱ numún xa̱bu̱ xuajen. Ikha jngó Jeobá nixná mbiʼñún ejín guanii xúgínʼ xa̱bu̱ israelita ga̱jma̱a̱ numuu rí ninindxu̱u̱ timbá xuajen dí niraʼwíí, numuu dí rúʼko̱ nimbánuu ga̱jma̱a̱ Abrahán (Éx 4:22). Ga̱jma̱a̱ numuu rí Jeobá niʼni káwíin ejín giʼnuu, nikuʼma rí maguma kaʼwi̱i̱n “xúgíinʼ e̱jñún israelitas bi̱ ni̱ndxu̱ún jiáma giʼnuu. Mbáa a̱ʼdióo israelita bi̱ giʼnii ga̱jma̱a̱ timbáa xujkhú i̱ya̱ bi̱ nagumaa mani̱ndxu̱u̱” ndrígióo ikhaa (Éx 13:2). Ikha jngó xúgínʼ ejín giʼnuu nixnaximi̱jna̱ muni̱ ñajuunʼ Dios.
it-2 939 kutriga̱ 2
Mikaʼwiin
Maski ajndu Israel nindxu̱u̱ mbáa xuajen kaʼwu. Mú itháan ndxajkun bi̱ kayá edxu̱u̱ ga̱jma̱a̱ eʼwíinʼ ndxajkun numuu rí ikhiin nijuixtaʼwíin mu muni ñajunʼ náa santuario ga̱jma̱a̱ rí ikhiin kaʼñún muxnajxi̱i̱ tsigijñaʼ náa Dios ga̱jma̱a̱ numún xa̱bu̱ xuajen, índo̱ nuni̱ xúʼko̱ nusngájma rí ni̱ndxu̱ún mikaʼwun ga̱jma̱a̱ nunimbaníí májánʼ ñajunʼ ndrígu̱ún, ga̱jma̱a̱ xúʼko̱ Dios ndaʼñún rí ni̱ndxu̱ún mikaʼwun (Le 21; 2Cr 29:34). Gaʼyee ga̱jma̱a̱ eʼwíinʼ xa̱bu̱ bi̱ niniraʼmáʼ Biblia ninindxu̱ún mikaʼwun (2Pe 1:21). Apóstol Pedro niʼthí rí gu̱ʼu̱ bi̱ najuájun jmbu náa Dios ni̱ndxu̱ún mikaʼwii (1Pe 3:5). Nuthi rí soldado israelitas ni̱ndxu̱ún mikaʼwun numuu rí nuxmijná náa guerra ndrígóo Jeobá (Nú 21:14; 1Sa 21:5, 6). Xúgínʼ ejín guaʼnuu israelitas ni̱ndxu̱ún mikaʼwiin náa Jeobá, numuu rí ikhaa niʼni káwíin índo̱ nikháñúún ejín guaʼnuu Egipcios, mbiʼi dí niguma ndxa̱a̱ pascua (Nú 3:12, 13; 8:17). Ikha jngó xúgínʼ xabuanii gíʼmaa dí muxnájxi̱ tsigijñaʼ ga̱jma̱a̱ numún ejín guaʼniún, numuu rí xúʼko̱ najuiʼtsiwíin (Éx 13:1, 2; Nú 18:15, 16; Lu 2:22, 23.) Mbáa a̱ʼgu̱ o xa̱biya̱ bi̱ naxnáximinaʼ mu mani̱ndxu̱u̱ nazareo, na̱jkha̱nú nanindxu̱u̱ mikaʼwii, xúgíʼ mbiʼi rí ganindxu̱u̱ nazareo. Índo̱ nindxu̱u̱ nazareo i̱ndó naʼni ñajuunʼ Jeobá. Nazareo gíʼdoo tikhuu xtángoo rí ndayóoʼ manimbánuu, á mu ikhaa nanújnguramúuʼ na̱jkha̱nú nanindxu̱u̱ mitsagaa. Ikha jngo á mu nakiéʼkúun ndayóoʼ maxnájxi̱ mbá tsigijñaʼ kiejuunʼ, mu maʼni̱i̱ mikaʼwii mbu̱júu̱ʼ. Mbiʼi dí ikhaa nanindxu̱u̱ mitsagaa nánguá ejmaʼniiʼ xóo nazareo, ikha jngó ndaʼyoo maxnajximinaʼ mbu̱júu̱ʼ (Nú 6:1-12).
8-14 MARZO
GÍʼDOO NUMUU RÍ NA̱ʼKHA̱ NÁA BIBLIA | NÚMEROS 9, 10
“Xú káʼnii exna ikha náa xuajñuu Jeobá rá.”
it-1 403 kutriga̱ 6
Náa nikúwi̱i̱n israelitas
Índo̱ israelita natuxu̱u̱n nagún mu magi̱ʼi̱i̱n i̱mba̱ ni̱ʼkhá, ra̱ʼkhá tháán mitsaanʼ numuu rí nikúwá mbá kambáxu̱u̱n (Moisés niʼthí rígi̱ mbá 40 nuthu rí xóo natuxu̱u̱n nagún náa libro ndrígóo Números 33). Índo̱ du̱u̱n rígá náa tabernáculo xa̱bu̱ xuajen na̱nguá etuxu̱u̱n magún, mú índo̱ du̱u̱n na̱jkha̱, ikhú xa̱bu̱ natuxu̱u̱n nagún xó má Jeobá eʼtáñajúnʼ muni̱ (Nú 9:15-23). Xa̱bu̱ nu̱di̱i̱ a̱jma̱ trompeta dí ni̱ndxu̱u̱ plata rí nini̱i̱ ga̱jma̱a̱ martillo mu muthu̱u̱n dí eʼthí Jeobá (Nú 10:2, 5, 6). Índo̱ nu̱di̱i̱ mbaʼa nuthu trompeta nandoo gáʼthí rí mbaʼyóoʼ rí matuxu̱u̱ magún. Timbá aʼphu̱ rí ni̱di̱i̱ trompeta ninindxu̱u̱ dí maʼni raga̱jma̱ tsiguʼ rí nigájnún náa egipto nákha tsiguʼ [1512 t.g.], mbiʼi 20 dí maʼni raga̱jma̱ igu̱nʼ. Índo̱ nigún kuñún e̱jna̱ rí nimbánuu, ginii ni̱jkha̱ tribu ndrígóo Judá bi̱ nayéjkha̱ edxu̱u̱ náa mbá ajtsú tribu náa Isacar ga̱jma̱a̱ Zabulón. Ikhú guersonitas ga̱jma̱a̱ meraritas nagún kudúún dí kaʼñún muyégún dí rígá náa tabernáculo. Ikhú na̱jkha̱ Rubén bi̱ kayá edxu̱u̱ náa ajtsú tribu, náa Simeón ga̱jma̱a̱ Gad. Nda̱wa̱á nagún qohatitas bi̱ nagún kuñu̱u̱n santuario, ikhú na̱jkha̱ tribu ndrígóo Efraín bi̱ kayá edxu̱u̱ náa ajtsú tribu, náa Manasés ga̱jma̱a̱ Benjamín. Nda̱wa̱á kayuuʼ na̱jkha̱ Dan, bi̱ kayá edxu̱u̱ náa mbá ajtsú tribu, náa Aser ga̱jma̱a̱ náa Neftalí, ikhiin ni̱ndxu̱ún bi̱ nuñewu̱u̱n xúgíinʼ bi̱ nagún kidíiʼ (Nú 10:11-28).
w11 15/4 4 kutriga̱ 4, 5
Guyamajkuíí rí Jeobá najmuu mu maxnúlú ikha
Xú káʼnii gándoo musngajma rí nuxnáa núma̱aʼ ikha rí naxnúlú Jeobá rá. Apóstol Pablo niʼthí rígi̱: “Gunimbala ku̱ñu̱u̱n bi̱ kuya̱ edxu̱u̱ náa ikháanʼla, guniñámijna rí mutañajuanla” (Heb. 13:17). Gajkhun má dí rígi̱ nindxu̱u̱ mingíjyúuʼ, muʼgíʼ mbá xkri̱da, atatsaʼwáminaʼ rí ikháán ni̱ndxa̱a̱ʼ israelitas nákha mbiʼi rí nixtáa Moisés. Mba̱yu̱u̱ʼ mbiʼi xtaa ra̱dxu̱ʼ náa ku̱ba̱ʼ mixooʼ, ikhú natayáá rí du̱u̱n nawi̱ji̱, ikhú naratá nguáthá mba̱yu̱u̱ʼ gájyúuʼ rá. Mbá mbiʼi ráʼ. Mbá xmáná ráʼ. O mbaʼa igu̱nʼ dxe̱ʼ. Mbáa nitraximínáʼ á mu májánʼ gáʼni rí matrawíi xúgíʼ trastiaʼ, mu dí natani i̱ndó natrawíi dí phú nda̱yáaʼ, mú nanújngoo mbiʼi ikháanʼ naskaaʼ numuu rí xtaa raxkangaa má xúʼko̱ trastiaʼ. Ikha jngó natrawíi xúgíʼ dí xta̱, mú índo̱ niguámbáa nitrawíi xúgíʼ trastiaʼ ikhú du̱u̱n na̱jkha̱ ga̱jma̱a̱ ikháán ndayóoʼ madríyáaʼ xúgíʼ dí nitrawíi, ikhú nakásngañaaʼ, ikha jngó nda̱a̱ imbo̱o̱ dí matani, mi̱dxu̱ʼ má tsiakii náa kidxúúnʼ xa̱bu̱ xuajen (Núm. 9:17-22).
Xú káʼnii eʼni ikháanʼ índo̱ Dios naxnúlú ikha rá. Lá mbá nacha̱ eʼnimbulúʼ índo̱ nutulúʼ xá. O nuʼni xó má eyulú ikháanʼ dxe̱ʼ. Lá nuʼnimbulúʼ ikha dí nagájnuu nuxi̱ʼ ráʼ. Xóo dí muʼsngúún xa̱bu̱, dí muʼtáruʼun xa̱bu̱ bi̱ naguwáʼ i̱mba̱ níʼkhá, dí muʼnigajmaa mbá guʼwáanʼ o xóo muʼni índo̱ kuwáanʼ náa asamblea o ikha dí nuxnulu Comité bi̱ nuyambáá náa Hospital. I̱mba̱ náa ma̱ndoo musngajma rí nuxnáa núma̱aʼ ga̱jma̱a̱ numuu ikha dí naxnúlú Jeobá, nindxu̱u̱ dí munimbulú consejo rí nuxnulu. Ikha jngó índo̱ guraʼwí mbá rí gíʼdoo numuu muʼni, gunda̱ʼa̱a̱ Jeobá ga̱jma̱a̱ náa xuajñuu rí muxnulu ikha, xóo má eʼni mbáa ada̱ índo̱ naxnúu ruʼwa mbiiʼ nagáyúu na̱jkha̱ gáʼyoo anu̱u̱, xúʼko̱ má gíʼmaa muʼni ma̱ngaa mbuʼyáʼ mbá nacha̱ ikha dí naxná xuajñuu Jeobá mu maʼngulú muraʼníí xkujndu dí rígá náa numbaaʼ rígi̱.
Guʼyáʼ rí gíʼdoo numuu
it-1 226 kutriga̱ 4
Asamblea
Ra̱ʼkhá tháán gíʼdoo numuu rí makuwáanʼ náa reunión. Rígi̱ nigi̱ʼdu̱u̱ índo̱ niʼni ndxa̱a̱ pascua. Xúgínʼ xa̱bekha bi̱ mikaʼwiin maski ajndu kúwi̱i̱n náa guʼwún mu tsixmiéjunʼ dí makuwíin náa ndxa̱a̱ pascua xúgínʼ xa̱bu̱ buʼko̱ gíʼmaa rí makhañún (Nú 9:9-14). Índo̱ rey Ezequías niʼthúún xúgínʼ xa̱bu̱ bi̱ kúwá náa Judá ga̱jma̱a̱ Israel rí maguwáʼ náa Jerusalén mu muniriyaaʼ ndxa̱a̱ pascua rígi̱ rí niʼthí náa i̱yi̱i̱ʼ dí nikuʼma: “Xa̱bu̱ israelita, gutangáanʼla náa Jeobá [...], xúnimbaʼumíjna̱ xó má nini̱ wajin xiʼñála. Gunimbalá ku̱ya̱a̱ Jeobá ga̱jma̱a̱ gáguwaʼ náa goʼwóo rí ikhaa niʼni kaʼwi̱i̱ kámuu, gu̱ni̱ ñajunʼ Jeobá Dios ndrígála mu xúʼko̱ maniñuuʼ rakiʼnáa kaʼyála. [...] Jeobá Dios ndrígála nagáwiinʼ a̱jkiu̱u̱n ga̱jma̱a̱ naʼni mba̱a̱ a̱jkiu̱u̱n, numuu rí ikhaa magruiguáanʼ á mu ikháanʼ natangáanʼla náa ikhaa” (2Cr 30:6-9). Índo̱ xa̱bu̱ na̱nguá xtáa náa ndxa̱a̱ rígi̱ nasngájma dí na̱nguá eʼyoo kaʼyoo Dios, gajkhun má dí ikháanʼ bi̱ ni̱ndxu̱lú cristianos nánguá eʼniriyaaʼ ndxa̱a̱ pascua xóo má eni nákha ginii israelitas, mú Pablo naʼthúlú dí ragíʼmaa muniʼñáʼ ragimbáanʼlu náa mbuʼyamajkuíí Dios, ikhaa niʼthí ajngáa rígi̱: “Gaxmiéjunlú kuʼñúún eʼwíinʼ mu maxkajxáánʼ musngajmá ngajua ga̱jma̱a̱ mu̱ʼni̱ rí májánʼ, xúniʼñánʼ ragimbáanʼlu, xó má eguʼwún eni tikhun. Rí itháan májánʼ mu̱ʼni̱, guxnámíjná tsiakii, numuu rí nduʼyáá dí na̱jkha̱ ratumuu mbiʼi” (Heb 10:24, 25; atayáá CONGREGACIÓN).
15-21 MARZO
GÍʼDOO NUMUU RÍ NA̱ʼKHA̱ NÁA BIBLIA | NÚMEROS 11, 12
“Náá numuu dí ragíʼmaa muxiéʼkhá rá.”
w01 15/6 17 kutriga̱ 20
Xánindxu̱lú mbáa xa̱bu̱ bi̱ nambumuu
20 Mbaʼin Cristianos na̱nguá eniñami̱jna̱ dí majngutíguíin náa tsáʼkhá dí mubúúnʼ gajmiún bi̱ na̱nguá ni̱ndxu̱ún guʼñún. Mú tsumáá gúʼni mu xájngruigulú ruʼthá xtujtaa numuu dí rúʼko̱ gáʼni dí mandátigulú dí mambaxúʼ gajmiulúʼ Dios. Ikha jngó Pablo naxnúlú consejo rígi̱: “Xúʼgíʼ tsáʼkhá náa inúu Jeobá, xóo nini tikhun [israelitas], ikha jngó nikháñun índo̱ niʼphu̱u̱n a̱bu̱nʼ. Ga̱jma̱a̱ xuxiéʼkhá, xóo nini tikhun rí ikhiin, ikhaa numuu rúʼko̱ niguma gámbíin” (1 Corintios 10:9, 10). Israelitas nikiʼníin kuyáá Moisés ga̱jma̱a̱ Aarón asndu Dios, numuu rí i̱ndó maná exnún rí muphu dí naxná Jeobá (Números 16:41; 21:5). Ndiéjunʼ rí itháan niʼni makiʼnáa Jeobá rá. Lá ga̱jma̱a̱ numuu rí nixieʼkhá xá. O ga̱jma̱a̱ numuu rí nixudamíjná aʼkhá gajmiún gu̱ʼu̱ dxe̱ʼ. Náa Biblia naʼthí dí mbaʼin xa̱bu̱ bi̱ nixieʼkhá nikháñúún ga̱jma̱a̱ numuu rí niʼphu̱u̱n a̱bu̱nʼ (Números 21:6). Nákha ginii nikháñúún mbá 14,700 xa̱bu̱ bi̱ ninimbaʼumíjna̱ (Números 16:49). Ikha jngó ragíʼmaa muʼgíʼ tsáʼkhá náa inuu Jeobá mu mbuʼyáá nguáthá mba̱a̱ eʼngo̱o̱ eʼni o rí xuʼyamajkuíí dí naxnúlú.
Guxnáa núma̱aʼ
12 Bi̱ israelitas niguáʼdáá mbaʼa numuu mu muxnáa núma̱aʼ. Jeobá ni̱ʼkha̱ kagu̱u̱ mbá gu̱wa̱ʼ gamiéjunʼ náa Egipto mu maʼni káwíin náa kuwa rumíniʼ. Nguáthá mbiʼi nda̱wa̱á niʼni gámbíin ejército egipcio náa lamáa Maña̱ʼ. Ikhiin nixnáa wéñuʼ núma̱aʼ rí asndu nini mbá ajmúú náa Dios ga̱jma̱a̱ numuu rí niʼngo̱o̱. Mú, nguáthá mba̱yu̱u̱ʼ ndijyúuʼ rí nixnáa núma̱aʼ xá.
13 Índo̱ niraʼníí i̱ʼwáʼ xkujndu, nimbumún rí Dios niʼni ga̱jma̱a̱ numún ikhiin ga̱jma̱a̱ nisngajma rí nánguá ndiyamajkuíí (Sal. 106:7). Náa Biblia naʼthí: “Xúgínʼ xa̱bu̱ Israel nigíʼdi̱i̱ nixieʼkhá náa inuu Moisés ga̱jma̱a̱ Aarón”, rígi̱ nandoo gáʼthúu̱n rí nixieʼkhá náa inuu Jeobá (Éx. 16:2, 8). Ikhaa nikiʼnáa wéñuʼ kaʼñún ikhiin rí asndu nda̱wa̱á niʼthí rí xúgínʼ ikhiin makhañún náa ku̱ba̱ʼ mixooʼ, i̱ndó Josué ga̱jma̱a̱ Caleb na̱nguá (Núm. 14:22-24; 26:65). Ikha jngó guʼyáá xú káʼnii guʼyaridáá xkri̱da dí májánʼ ga̱jma̱a̱ tséyóoʼ dí ra̱májánʼ.
it-2 855 kutriga̱ 2
Nakiʼníin
Nuxieʼkhá. Rí mataxiéʼkhá maʼni rí makaguabiinʼ eʼwíinʼ o matanimbáti̱ga̱ vida ndrígáaʼ. Israelita nixieʼkhá náa inuu Jeobá nda̱wa̱á rí nigájnún náa Egipto, índo̱ nitanumáá Moisés ga̱jma̱a̱ Aarón dí xú káʼnii exná ikha náa xuajñuu Jeobá (Éx 16:2, 7). Rúʼko̱ niʼni dí Moisés makaguábaaʼ asndu nindoo rí makhañúu (Nú 11:13-15). Xa̱bu̱ bi̱ naxiéʼkhá gamíi makhañúu. Jeobá tánigu̱u̱ʼ rí nitanumáá Moisés numuu rí ikhaa niraʼwíí mayéʼga edxu̱u̱ náa israelita (Nú 14:26-30). Mbaʼin israelita nikháñúún ga̱jma̱a̱ numuu rí nitanuma.
Guʼyáʼ rí gíʼdoo numuu
w04 1/8 26 kutriga̱ 2
Ajngáa rawuunʼ Jeobá, ndaʼya. Rí itháan nagájnuriyooʼ náa libro ndrígóo Números
12:9-11. Náá numuu rí i̱ndó Míriam niʼniuu nandii lepra rá. Mbáa ikhaa nindxu̱u̱ bi̱ nigíʼdu̱u̱ nixiéʼkhá ga̱jma̱a̱ niʼni rí Aarón maʼni xúʼko̱ ma̱ngaa. Rígi̱ niʼni rí mbaʼyoo rí gajkhun nigiʼdoo aʼkhúun ga̱jma̱a̱ numuu rí nigiʼdoo nandii.
22-28 MARZO
GÍʼDOO NUMUU RÍ NA̱ʼKHA̱ NÁA BIBLIA | NÚMEROS 13, 14
“Rí maguáʼdáá fe na’ni rí xámiñulu”
w06 1/10 17 kutriga̱ 5, 6
Rí maguáʼdáá fe ga̱jma̱a̱ rí mamiñulúʼ kuʼyáá Dios naxnúlú tsiakii
5 A̱jmi̱i̱n bi̱ niyama niguwáa̱nʼ gagi numuu dí ra̱ʼkhá tháán nadxúún dí matu̱ʼu̱u̱n náa Ku̱ba̱ʼ dí nijuiʼthá makánún, ikhaa nindxu̱u̱ Josué ga̱jma̱a̱ Caleb, ikha jngó nithi: ‹Cananeos na̱nguá mixkujiinʼ numuu rí nda̱wa̱a̱ tsáa eñawu̱u̱n, mú ikháanʼ kuaʼdáálu Jeobá. Ikha jngó xámiñalaʼ› (Números 14:9). Lá tséyáá o skágunʼ nindxu̱u̱ xáʼ. Na̱nguá, numuu rí ikhiin ndiyáá xú káʼnii niʼni káwíin Jeobá, náa gu̱wa̱ʼ gamiéjunʼ rí nikuʼmaa náa Egipto ga̱jma̱a̱ ndiyáá xú káʼnii nixíyáa Faraon gajmíi̱n soldado ndrígóo náa Lamáa Maña̱ʼ (Salmo 136:15). Rí niʼthí mbá gu̱wi̱i̱nʼ xa̱bu̱ bi̱ niyama ga̱jma̱a̱ bi̱ ninimbu̱u̱n nisngajma rí na̱nguá nikumu̱ún kuyáá Jeobá. Ikha jngó Jeobá niʼthí ajngáa rígi̱ ga̱jma̱a̱ numuu rí ninigawíínʼ: “Asndu nguáná xuyamajkhuʼ xuajin rígi̱, ga̱jma̱a̱ asndu nguáná ní xúguaʼdáá fe náa ikhúúnʼ ga̱jma̱a̱ xúgíʼ rí ni̱ni̱ náa ikhiin xá.” (Números 14:11.)
6 Jeobá niʼthí náá numuu dí rígá xkujndu: Ikhaa niʼthí rí xa̱bu̱ xuajen nimíñúún ga̱jma̱a̱ numuu rí na̱nguá guáʼdáá fe, rígi̱ nandoo gáʼthúu̱n rí fe ga̱jma̱a̱ rí xámiñaaʼ nindxu̱u̱ mbóó, xó má niʼnirámáʼ apóstol Juan ga̱jma̱a̱ númúún cristianos: ‹Rí maguaʼdáá fe na’ni rí maʼngulú mu’ni gajmiúlú numbaaʼ› (1 Juan 5:4). Fe dí nigiʼdoo Josué ga̱jma̱a̱ Caleb nambáyulúʼ ikháanʼ rí mbiʼi xúgi̱ bi̱ ni̱ndxu̱lú xa̱bi̱i̱ Jeobá rí xámiñulúʼ muʼtáraʼa Ajngáa rí májánʼ ga̱jma̱a̱ numuu Reino ndrígóo Dios, tséʼniuu á mu ni̱ndxu̱lú jiáma, wa̱ʼxa̱ʼ o xabuanii, á mu xkujiáanʼlu o na̱nguá, nda̱wa̱a̱ nimbáa xa̱bu̱ sia̱nʼ bi̱ ma̱ndoo marikulúʼ mu xuʼtáraʼa numuu rí tsémiñulu ga̱jma̱a̱ kuaʼdáá tsiakii dí na̱ʼkha̱ náa Dios (Romanos 8:31).
Guʼyáʼ rí gíʼdoo numuu
it-1 740
Ku̱ba̱ʼ rí Dios nixnúún israelitas
KU̱BA̱ʼ rí Dios nixnúún xa̱bu̱ israelitas nindxu̱u̱ májánʼ wéñuʼ. Índo̱ Moisés nikungui̱i̱nʼ xa̱bu̱ bi̱ nuyama náa ku̱ba̱ʼ rí nijuiʼthá makánún ga̱jma̱a̱ rí maguwáʼ kudúún dí najma̱a̱ ikhí, xa̱bu̱ bi̱ nigún nindiéwáánʼ higos, granada ga̱jma̱a̱ mbá xtajxuuʼ uva rí mikiwu̱u̱n wéñuʼ rí asndu ndiyóoʼ a̱jmi̱i̱n xa̱bu̱ mu mudiéwáánʼ ga̱jma̱a̱ mbá ixi̱. Ajndu xa̱bu̱ bi̱ nimíñúún ga̱jma̱a̱ numuu rí na̱nguá guáʼdáá fe, ikhiin nithi dí rígá yáʼdú ga̱jma̱a̱ yáaʼ náa ku̱ba̱ʼ rúʼko̱ (Nú 13:23, 27).
29 MARZO ASNDU 4 ABRIL
GÍʼDOO NUMUU RÍ NA̱ʼKHA̱ NÁA BIBLIA | NÚMEROS 15, 16
“Xátanimbamíná’ ga̱jma̱a̱ xáku̱ma̱a̱ʼ xtayaminaʼ wéñuʼ”
w11 15/9 27 kutriga̱12
Lá naninuuʼ Jeobá rá’.
12 Índo̱ nachu̱u̱n matu̱ʼu̱u̱n náa Ku̱ba̱ʼ dí nijuiʼtá makhánun, Coré tánigu̱u̱ʼ xóo exná ikha náa xuajñuu Dios, ikha jngó mangiin mbá 250 xa̱bekha bi̱ guáʼdáá numuu náa xa̱bu̱ xuajen, ikhiin nindúún muriʼkhuíí ikha dí nuxna náa xuajñuu Dios. Ikhiin nikumu̱ún rí Dios xtáa náa ikhiin, ikha jngó ikhiin nikiʼníin kuyáá Moisés ga̱jma̱a̱ Aarón ga̱jma̱a̱ nithúún: ‹Ikhí rá. Naskoʼ enila, numuu rí xúgíinʼ xa̱bu̱ xuajen ni̱ndxu̱ún mikaʼwiin, numuu rí Jeobá xtáa ga̱jma̱á ni̱ndxu̱ún› (Núm. 16:1-3). ¡Ra̱ʼkhá tháán eʼnimbamínáʼ xa̱bu̱ bugi̱! Mú Moisés tagawuuʼ niniñuuʼ rí: ‹Jeobá masngájma tsáá nindxu̱u̱ bi̱ kaʼyoo ikhaa› (atraxnuu Números 16:5). Rí imbo̱o̱ʼ mbiʼi Coré gajmíi̱n xa̱bi̱i̱ bi̱ ninimbaʼumíjna̱ nikháñúún (Núm. 16:31-35).
w11 15/9 27 kutriga̱ 11
Lá naninuu’ Jeobá rá’.
11 Moisés ga̱jma̱a̱ Coré ninindxu̱u̱ a̱jmi̱i̱n xa̱bu̱ bi̱ mixtiʼkuiin eʼyoo Jeobá. Náá numuu rá. Numuu rí mixtiʼkhu eyáá ikha rí nixnúún Jeobá ga̱jma̱a̱ awan rí nigíʼ náa xuajñuu. Guʼthá ga̱jma̱a̱ numuu Coré bi̱ ninindxu̱u̱ levita, bi̱ na̱ʼkha̱ náa familia ndrígóo Qohat, ikhaa mbaʼa rí ndiʼyoo, xóo índo̱ niguma káwíin xa̱bu̱ israelitas náa lamáa Maña̱ʼ ma̱ngaa ndiʼyoo xú káʼnii nikhánún castigo bi̱ ndiyamajkhún xándú náa kúbá Sinaí, ga̱jma̱a̱ ikhaa niyambáá mu magún kuñu̱u̱n E̱jna̱ rí nimbánuu (Éxo. 32:26-29; Núm. 3:30, 31). Nikujmaa rí mbayuuʼ tsiguʼ ninindxu̱u̱ mbáa xa̱bu̱ jmbi náa Jeobá ga̱jma̱a̱ rúʼko̱ niʼni rí mbuyamajkuíí mbaʼin israelita.
Guʼyáʼ rí gíʼdoo numuu
w98 1/9 20 kutriga̱ 1, 2
Atayáá rí itháan gíʼdoo numuu
Jeobá ndiʼyoo rí itháán gíʼdoo numuu, náa Biblia naʼthí dí ‹Jeobá niʼthúu̱n Moisés, xa̱bu̱ buʼko̱ gíʼmaa makhañúu tsiakii› (Números 15:35). Náá numuu rí Jeobá ndiʼyoo dí ra̱ʼkhá tháán xkawiʼ dí niʼni xa̱bu̱ buʼko̱ rá.
Xa̱bu̱ israelitas guáʼdáá mbá majun mbiʼi mu murangoo ixi̱ ga̱jma̱a̱ rí mbuʼyáʼ ganitsu, xtíin ga̱jma̱a̱ cobija, mú índo̱ naʼni juwan mbiʼi nduyamajkuíí i̱ndó Jeobá, maski ajndu májánʼ má nindxu̱u̱ rí matrangoo ixi̱, mu raʼkhí nindxu̱u̱ dí matiejunʼ mbiʼi rí gíʼmaa matayamajkuíí Jeobá. Mú ikháanʼlu bi̱ ni̱ndxu̱lú cristianos nánguá eʼnimbaníí Xtángoo ndrígóo Moisés, mú dí nigíʼniin xa̱bu̱ bugi̱ naʼsngúlú mbá rí gíʼdoo wéñuʼ numuu, dí gíʼmaa mbuʼyáá ndiéjunʼ nindxu̱u̱ rí itháan gíʼdoo numuu (Filipenses 1:10).
5-11 ABRIL
GÍʼDOO NUMUU RÍ NA̱ʼKHA̱ NÁA BIBLIA | NÚMEROS 17-19
“Ikhúún ni̱ndxu̱ʼ bi̱ kaʼyaaʼ”
w11 15/9 13 kutriga̱ 9
Lá nakumulú kuʼyáá Jeobá rí ikhaa má gáxnulú rí ndayúlú xáʼ.
9 Gundxaʼwámíjná ga̱jma̱a̱ numún bi̱ kúwá náa tribu ndrígóo Leví. Ikhiin túndrígúu nimbá chíʼgíiʼ ku̱ba̱ʼ, numuu rí ñajunʼ ndrígu̱ún nindxu̱u̱ mitsúʼkháan, ikha jngó Jeobá niñewu̱u̱n ga̱jma̱a̱ niʼthún ajngáa rígi̱: ‹Ikhúúnʼ ni̱ndxu̱ʼ bi̱ kaʼyála ga̱jma̱a̱ dí mundrígu̱u̱› (Núm. 18:20). Ikháanʼ na̱nguá ñajunʼ xóo nini̱ ikhiin, mu nuʼnimíjna̱ musngajmá xóo nini̱ ndxajkuun gajmiún levitas dí makumulúʼ kuʼyáá Dios rí ikhaa má gáxnulú dí ndayúlú. Gíʼdoo wéñuʼ numuu rí maguaʼdáá fe numuu dí na̱jkha̱ rajngiyuu fin (Rev. 13:17).
w11 15/9 7 kutriga̱ 4
Jeobá nindxu̱u̱ bi̱ kaʼyulúʼ
4 Xó ma ndiʼyáá, tribu ndrígóo Leví na̱nguá “nindrigúu” nimbá chíʼgíiʼ ku̱ba̱ʼ, rí nikhánún ikhiin nindxu̱u̱ mbá ñajunʼ rí gíʼdoo wéñuʼ numuu dí nixnúún ‹Jeobá rí mani̱ndxu̱ún ndxajkuun› (Jos. 18:7). Ikha jngó niʼthún ajngáa rí na̱ʼkha̱ náa Números 18:20: ‹Ikhúúnʼ nindxu̱u̱ bi̱ kaʼyaaʼ›. Lá xúʼko̱ má katsíñúúnʼ levitas rí makuwá náa tsingíná numuu rí túndrigúu mbaaʼ xáʼ. Gi̱i̱ nandoo nduʼyáá rí na̱nguá (atraxnuu Números 18:19, 21, 24). Ga̱jma̱a̱ numuu ñajunʼ rí nuni̱ Levita, xa̱bu̱ Israelitas naguwáʼ kudúún xúgíʼ rí najmaa ginii náa nidu ga̱jma̱a̱ xujkhúʼ bi̱ nagumiin ginuu, xúʼko̱ má eni̱ levita mangiin índo̱ nundrigú nagún kudúún mu muxnáá ndxajkun rí itháan májánʼ rí nikhánún (Núm. 18:25-29). Ma̱ngaa levita nundrigú xúgíʼ rí nagún kudúún Israelitas dí nindxu̱u̱ mikaʼwu náa santuario. Ikha jngóo ndxajkun nikumu̱ún kuyáá Jeobá dí ikhaa má gáxnúún rí gáʼñúunʼ.
Guʼyáʼ rí gíʼdoo numuu
g02 8/6 14 kutriga̱ 2
Idú gíʼdoo wéñuʼ numuu
Nákha wájyúuʼ najmún idú mu muthi rí nindxu̱u̱ mbá rí nagajyúuʼ ga̱jma̱a̱ rí tséguámbáa. Ikha jngó náa Biblia naʼthí ajngáa rí ndajyúuʼ xóo ‹idú dí nambánuu›, nájma̱ rígi̱ nunimbríguii índo̱ idú najkuáa náa ganitsu (Números 18:19). Xó má eʼthí náa Xtángoo ndrígóo Moisés, rí tsigijñaʼ dí guxnajxi̱ náa altar gíʼmaa rí murináá, rígi̱ nandoo gáʼthúu̱n dí xáguma tsagáá o rí xaguámbáa.
12-18 ABRIL
GÍʼDOO NUMUU RÍ NA̱ʼKHA̱ NÁA BIBLIA | NÚMEROS 20, 21
“Ganindxu̱lú xa̱bu̱ guabaaʼ índo̱ kuwáanʼ náa mbá xkujndu”
“Xájmangulú ga̱jma̱a̱ guʼni rí nanigu̱u̱ʼ Jeobá”
19 Numuu rí xúʼko̱ xakiéʼkulú wéñuʼ. Gundxaʼwamíjna̱ mbu̱júu̱ ga̱jma̱a̱ numuu Moisés. Mbayuuʼ tsiguʼ ninindxu̱u̱ mbáa xa̱bu̱ bi̱ tsíkiʼnáa ga̱jma̱a̱ niʼni rí nandoo Jeobá. Mú, índo̱ niguámbá rí a̱jma̱ skiñúnʼ tsiguʼ rí nigún israelitas náa ku̱ba̱ʼ mixooʼ, Moisés nikiʼnáa. Ndxájuu dxáʼgú bi̱ nimbáyúu mu makríyaʼ náa Egipto, nikháñuu ga̱jma̱a̱ nijuaʼdi̱i̱ náa Qadés. Ikhú Israelitas nigíʼdi̱i̱ nixieʼkhá mbu̱júu̱ ga̱jma̱a̱ numuu rí na̱nguá guáʼdáá rí ndañúunʼ. Náa Biblia naʼthí rí ‹xa̱bu̱ xuajen nigíʼdi̱i̱ nixieʼkhá náa Moisés› numuu rí nda̱a̱ iyaʼ. Maski ajndu Jeobá nijmiuu Moisés mu maʼni mbaʼa milagro ga̱jma̱a̱ rí mbayuuʼ tsiguʼ ninindxu̱u̱ mbáa bi̱ nayéjkha̱ edxu̱u̱, ikhiin nuxieʼkhá má xúʼko̱. Ma̱ngaa asndu nini rí xóo Moisés gíʼdoo aʼkhúun rí nda̱a̱ iyaʼ (Núm. 20:1-5, 9-11).
“Xájmangulú ga̱jma̱a̱ guʼni rí nanigu̱u̱ʼ Jeobá”
20 Mbiʼi rúʼko̱ Moisés nikiʼnáa wéñuʼ. Ikhaa táʼthi xó má Jeobá niʼthúu̱n maʼthí, rí phú niʼni, ga̱jma̱a̱ sia̱nʼ niʼthúún israelitas ga̱jma̱a̱ niʼthí rí ikhaa maʼni mbá milagro. Ikhú, nixnúu a̱jma̱ nuthu itsí, ikhú nigájnuu mba̱ji̱nʼ iyaʼ. Rí nikuximínáʼ ga̱jma̱a̱ rí nikásgañu̱u̱ʼ niʼni rí makiéʼkhun (Sal. 106:32, 33). Ga̱jma̱a̱ numuu rí mbá chíʼgíiʼ rí nikiéʼkhun, Jeobá tániñuuʼ mato̱ʼo̱o̱ náa Ku̱ba̱ʼ rí nijuiʼthá makhánun (Núm. 20:12).
21 Xú káʼnii ikha rí gíʼdoo numuu ejmañuluʼ rí nigíʼnuu Moisés rá. Timbá, rí gíʼmaa muʼni mbá tsiakii mu manindxu̱lúʼ má xúʼko̱ mbáa xa̱bu̱ bi̱ tséjmangu̱u̱ʼ. Á mu tséñawamíjnalú maski ajndu mbá chíʼgíiʼ, rí muʼni mbaʼwumíjnalúʼ maʼni rí muʼthá o muʼni mbá rí rakáʼyoo. Raga̱jma̱, rí maʼni néʼngulú maʼni rí makawabáánʼ, ikha jngó guʼnimíjna̱ má xúʼko̱ mu manindxu̱lúʼ mbáa xa̱bu̱ bi̱ tséjmangu̱u̱ʼ tséʼniuu má xóo kuwáanʼ.
w09 1/9 19 kutriga̱ 5
Mbáa Juez bi̱ naʼnimbanuu xúgíʼ ikha ndrígóo
Timbá, Dios na̱nguá niʼthúu̱n Moisés rí maʼthúún xa̱bu̱ xuajen o rí maʼthúu̱n dí ikhiin na̱nguá enimbu̱ún. Rí maʼni a̱jma̱, Moisés ga̱jma̱a̱ Aarón na̱nguá nini̱ rí maʼga gamajkhu náa Dios. Ikha jngó Jeobá nixprígún numuu rí na̱nguá nini̱ kaʼwi̱i̱ mbiʼyuu (versículo 12). Índo̱ ikhiin nithi: ‹Muríyaʼxu iyaʼ›, Moisés ga̱jma̱a̱ Aarón nini̱ mbuyáá xa̱bu̱ xuajen dí raʼkháa Dios gáʼni rí magajnúu iyaʼ. Rí maʼni ajtsú, kaʼñún má rí mundrígú castigo ndrígóo Dios xó má nigíʼniin wajin xiʼñúnʼ numuu rí ikhiin nixu̱xi̱mi̱jna̱ náa Jeobá, ga̱jma̱a̱ numuu rúʼko̱ tániñúnʼ matu̱ʼu̱u̱n náa Canaán (Números 14:22, 23). Ga̱jma̱a̱ rí maʼni a̱jkhu̱ numuu rí ni̱ndxu̱ún bi̱ kuya̱ edxu̱u̱ náa xa̱bu̱ xuajen, ikha jngó Dios nigi̱ʼthu̱u̱n muni̱ itháan rí májánʼ (Lucas 12:48).
Guʼyáʼ rí gíʼdoo numuu
w14 15/6 26 kutriga̱ 12
Lá nduʼñún xa̱bu̱ guabiinʼ xó má eʼñún Jeobá ráʼ.
12 Índo̱ Aarón nikiéʼkúun, Jeobá ma̱ndoo maxiyáaʼ núkhu má mbiʼi rúʼko̱. Mú Jeobá ni̱jkha̱nú ndiʼyoo rí na̱nguá má nindxu̱u̱ mbáa xa̱bu̱ ra̱májánʼ. Niʼni rígi̱ numuu rí nitsudaa eʼwíinʼ. Ikhaa ni̱jkha̱nú ndiʼyoo rí nigiʼdoo aʼkhúun ga̱jma̱a̱ niʼnimbo̱o̱ ikha ndrígóo Dios (Éx. 32:26; Núm. 12:11; 20:23-27). Jeobá táʼyoo náa rí nikiéʼkúun Aarón, ikhaa ndiʼyoo fe rí nigiʼdoo ga̱jma̱a̱ rí nitanga̱a̱ a̱jkiu̱u̱n. Mba̱yu̱u̱ʼ tsiguʼ nda̱wa̱á, ikhaa gajmíi̱n bi̱ niguwáʼ náa goʼwóo nijuiʼthá ga̱jma̱a̱ numún rí ni̱ndxu̱ún xa̱bu̱ bi̱ namíñúún kuyáá Jeobá (Sal. 115:10-12; 135:19, 20).
19-25 ABRIL
GÍʼDOO NUMUU RÍ NA̱ʼKHA̱ NÁA BIBLIA | NÚMEROS 22-24
“Jeobá naʼni rí maguma tsajkurámáánʼ índo̱ najuiʼthá tsriguáanʼlu”
bt 53 kutriga̱ 5
“Niʼthí dí májánʼ ga̱jma̱a̱ numuu Jesús”
5 Xó má nákha siglo timbá, bi̱ tsíñún gúyáá rí gajkhun tséʼngu̱u̱n gurikháá rí majuiʼtáraʼa, xúʼko̱ má rí mbiʼi xúgi̱. Mambá índo̱ nagún kudiin a̱ngiu̱lú náa i̱mba̱ ni̱ʼkhá o náa imbo̱o̱ guʼwá e̱jua̱nʼ mu xútaraʼa, ikhú najuiʼtáraʼa itháán ga̱jma̱a̱ numuu Reino. Mbá xkri̱da, índo̱ nirígá Raga̱jma̱ Guerra náa xúgíʼ Numbaaʼ mitsaanʼ xóo najuiʼtáraʼa náa campos de concentración nazis. Mbáa judío bi̱ nininuuʼ dí gajkhun niʼthí: “Rí támiñún xa̱bi̱i̱ Jeobá bi̱ kajtiin guʼwá e̱jua̱nʼ, niʼni mba̱yo̱o̱ rí ikhiin nunimbu̱ún dí naʼthí náa Biblia, ikhaa rúʼko̱ niʼni rí mangúún mani̱ndxu̱ʼ xa̱bi̱i̱ Jeobá”.
it-2 250
Rí matani̱ skaguminaʼ
Rí matani̱ skaguminaʼ náa inúu Jeobá. Gaʼyee Balaam niʼni skaguminaʼ rí maʼtátsriguíin israelita numuu rí nindoo magruigú mbújkho̱o̱ rey moabita bi̱ mbiʼyuu Balac. Mú Jeobá tániñuuʼ marigá rúʼko̱. Apóstol Pedro niʼthí ga̱jma̱a̱ numuu Balaam rí ‹burriuu nigíʼdu̱u̱ niʼthí, rúʼko̱ niʼni rí xáʼga̱nú mambanúu rí nindoo gaʼyee›. Apóstol niʼthí rígi̱ náa ajngáa griega pa·ra·fro·ní·a, rí nandoo gáʼthí ‹dí Balaam nakágu̱u̱nʼ› (2Pe 2:15, 16; Nú 22:26-31).
Guʼyáʼ rí gíʼdoo numuu
w04 1/8 27 kutriga̱ 2
Rí itháan nagájnuriyoo’ náa libro ndrígóo Números
22:20-22. Náá numuu rí Jeobá nikiʼnáa kaʼyoo Balaam rá. Jeobá niʼthúu̱n gaʼyee Balaam rí xáʼtatsríguíin israelitas (Números 22:12). Mú gaʼyee ni̱jkha̱ gajmíi̱n xa̱bi̱i̱ Balac numuu rí nindoo manújngorámuuʼ rí niʼthúu̱n Jeobá, rúʼko̱ niʼni mu ma̱ndoo maguanúu májánʼ ga̱jma̱a̱ rey moabita mu xúʼko̱ magruigú mbújkha̱a̱ (2 Pedro 2:15, 16; Judas 11). Maski ajndu ni̱jkha̱ mu máʼtatsríguíin israelita mú ikhaa ninda̱ʼa̱a̱ rí maguma tsajkurámiinʼ,ga̱jma̱a̱ niʼniminaʼ rí maguanúu májánʼ ga̱jma̱a̱ rey. Ikhú niʼthúu̱n rí maʼni, rí gu̱ʼu̱ bi̱ nduyamajkuíí Baal magún gúniríjiinʼ xa̱bekha israelitas (Números 31:15, 16). Ikha jngó Jeobá nikásngañuuʼ kaʼyoo Balaam numuu rí tándxaʼwóo edxu̱u̱ rí niʼni.
26 ABRIL ASNDU 2 MAYO
GÍʼDOO NUMUU RÍ NA̱ʼKHA̱ NÁA BIBLIA | NÚMEROS 25, 26
“Lá maʼngo̱o̱ mbáa xa̱bu̱ mariʼkhu̱u̱ xúgíʼ rá.”
“Xátaxuʼdáminaʼ aʼkhá ga̱jma̱ʼ mbáa”
BI̱ NAGUDÍIN xujkhúʼ, ginii ndaʼyoo ndiéjunʼ eʼkhu xujkhúʼ bi̱ nandoo maxíyáa. Índo̱ ndaʼyoo ndiéjunʼ eniguuʼ mikhu, ikhú nagíʼ tsáʼkhá. Índo̱ xujkhúʼ na̱ʼkhu̱ rígi̱ ikhú naxpátriguíi náa tsáʼkhá ikhú bi̱ nagudíin xujkhúʼ nadxuu wéñuʼ numuu dí nigíʼ náa tsáʼkhá dí phú naniguuʼ mikhu xujkhúʼ.
2 Nákha tsiguʼ 1473 tsiguʼ ginii, nixtáa mbáa xa̱bu̱ bi̱ niraʼwíí ndiéjunʼ gágíʼ náa tsáʼkhá, mu raʼkháa ndrígóo xujkhúʼ. Nigumbiʼyuu Balaam, ikhaa nindoo rí xa̱bi̱i̱ Dios majngutíguíin náa tsáʼkhá, bi̱ nigiʼdoo campamento ndrígóo náa xkua̱ ndrígóo xuajen Moab, náa phú ndawaa ga̱jma̱a̱ Ku̱ba̱ʼ rí Jeobá niʼthí maxnún. Maski ajndu niʼni rí ninindxu̱u̱ gaʼyee ndrígóo Jeobá, ikhaa ninindxu̱u̱ mbáa bi̱ naʼninduwaʼ mu magiʼdoo wéñuʼ, bi̱ nijuiʼyááʼ mu maʼtá tsrigun xa̱bu̱. Nixmiéjunʼ, numuu dí Jeobá raʼkháa i̱ndó tániñuʼ maʼni, asndu nitsuda rí maʼni tsajkurámiinʼ. Índo̱ Balaam ndiʼyoo dí muni numáá, nigíʼ niʼni xó má eyoo. Nindxa̱ʼwáminaʼ rí á mu ikhaa naʼni rí muxudami̱jna̱ aʼkhá rí mitsáʼkhúun wéñuʼ, Dios maʼniún dí ra̱májánʼ. Ndiéjunʼ tsáʼkhá nijmuu xá. E̱jín gu̱ʼu̱ bi̱ mitsiʼñíin bi̱ kuwa náa Moab (Números 22:1-7; 31:15, 16; Revelación 2:14).
“Xátaxuʼdáminaʼ aʼkhá ga̱jma̱ʼ mbáa”
4 Ndíjkha dí nirígá xúʼko̱ rá. Dí xóo nirígá náa a̱jkiu̱ún mbaʼin israelitas. Ni̱jkha̱ rajoo dí ra̱májánʼ náa ikhiin numuu rí nini tsinguamíjná náa Jeobá, rí tármáʼáan a̱jkiu̱ún xúgíʼ rí niʼni Jeobá ga̱jma̱a̱ numún: Rí niʼni káwíin náa xuajen Egipto, rí nixnítsun náa Ku̱ba̱ʼ mixooʼ ga̱jma̱a̱ rí ni̱jkha̱ kagu̱u̱n ga̱jma̱a̱ májánʼ asndu náa Ku̱ba̱ʼ rí niʼthí maxnún (Hebreos 3:12). Apóstol Pablo nindxa̱ʼwáminaʼ ga̱jma̱a̱ numuu gamiéjunʼ rígi̱ índo̱ niʼnirámáʼ: “Xúxuʼdámijná aʼkhá gajmiúlú mbáa, xó má tikhun dí ikhiin niguánu nini, ikha jngó nikháñun mbóó mbiʼi mbá 23,000 xa̱bu̱” (1 Corintios 10:8).
Guʼyáʼ rí gíʼdoo numuu
it-2 238 kutriga̱ 1, 2
Náa natumuu
Nakujmaa dí nini̱ a̱jma̱ rígi̱ mu mbuyáá xú káʼnii gáʼnii mu ma̱ndoo maguiʼtáa ku̱ba̱ʼ: Niriyáʼ suerte mu mbuyáá náa gákhánúu mámbáa ga̱jma̱a̱ nguáthá mba̱a̱ tribu ndrígóo mámbáa. Xígi̱ kaʼnii nini̱ mu mbuyáá náá kaʼyoo makhánáá mámbáa tribu. Á mu mbáa nakánáá náa norte, sur, náa nagájnuu a̱jkha̱ʼ, náa narámaaʼ a̱jkha̱ʼ, náa mbaaʼ xkua̱ o náa kúbá. Numuu rí awan rígi̱ ni̱ʼkha̱ náa Jeobá ikha jngóo bi̱ kúwá náa mámbá tribu túni̱ ajngáa o túgiʼdu̱u̱n (Pr 16:33). Ga̱jma̱a̱ xúʼko̱ niʼni rí Dios ma̱ndoo maxnúu ku̱ba̱ʼ mámbá tribu, xó má niʼtáriyaʼ Jacob índo̱ inuu makhañúu dí na̱ʼkha̱ raʼthí náa Génesis 49:1-33.
Nda̱wa̱á índo̱ niguámbu̱u̱n ndiyáá náa gákhánáá mámbá tribu, ndiyóoʼ rí muni̱ ndawaa, nini̱ xó má mba̱a̱ mámbá tribu. “Gíʼmaa muxpíʼtáa mbaaʼ, guriyáʼ suerte mu mbu̱ya̱a̱ náá gákhánáá mu maxtáa mámbáa rí ikháanʼ gajmiála bi̱ kúwá náa guʼwála. Bi̱ mbaʼin gíʼmaa makhánúún mba̱a̱ mbaaʼ, bi̱ rambáʼin chíʼgíiʼ wáa gákhánun. Mámbáa gáʼga gáxtáa náa má gákhánáá” (Nú 33:54). Á mu tágajnuu májánʼ awan rígi̱, ikhú mbuyáá nguáthá mbaʼin náa mámbá tribu ga̱jma̱a̱ xúʼko̱ má mba̱a̱ gákhánún. Índo̱ nini̱ xúʼko̱ nigajta̱a̱ mbaaʼ rí nikhánáá tribu ndrígóo Judá numuu rí mba̱a̱ nikhánáá ga̱jma̱a̱ dí nigajta̱a̱ ndiyáa tribu ndrígóo Simeón (Jos 19:9).