Rí mamiñulúʼ kuʼyáá Dios mambáyulú rí mbiʼi xúgi̱ ga̱jma̱a̱ nda̱wa̱á

1, 2. Xú káʼnii mbríguii xóo kuwáanʼlu ikháanʼ ga̱jma̱a̱ xóo nixtáa Lot rá.

ÍNDO̱ nduʼyáá xú káʼnii nindxúu̱n xa̱bu̱ numbaaʼ nakumulú xóo nikumu̱u̱ Lot, bi̱ nindxu̱u̱ xa̱bu̱ májáanʼ bi̱ nixtáa nákha wajyúuʼ. “Bi̱ nixmiéjuunʼ wéñuuʼ ga̱jma̱a̱ numuu xúgíʼ enii rí xkawiʼ rí nini̱ xa̱bu̱ bi̱ ra̱míjíinʼ” numuu rí ikhaa ndaʼyoo dí Anu̱lú bi̱ xtáa náa mekhuíí nawiyuuʼ kaʼñúún xa̱bu̱ bi̱ nindxu̱ún xúʼko̱ kaʼnii (2 Ped. 2:7, 8). Numuu rí Lot nindoo kaʼyoo Jeobá ga̱jma̱a̱ ndiʼyamajkuu wéñuuʼ, ikhaa niwiyuuʼ xóo nikúwíin xa̱bu̱ bi̱ nixtáa gajmíi̱n. Ikháá má kayuuʼ mangáán, kuwáánʼlú náa numbaaʼ rí na̱nguá eyamajkuíí wéñuuʼ rí nandoo Dios o asndu tséyamajkuíí xó má eyoo ikhaa, maski asndu xúʼko̱, ikháanʼ ma̱ndoo manindxu̱lú kaʼwáanʼ xó má eyoo Dios, á mu nandulú kuʼyáá ga̱jma̱a̱ najmañulú mbuʼyamajkuíí (Prov. 14:2).

² Mú ma̱ndoo muʼni rígi̱, Jeobá nambáyulú ga̱jma̱a̱ naxnúlú tsiakii ga̱jma̱a̱ rí na̱ʼkha̱ raʼthí náa libro ndrígóo Proverbios. Xúgiáanʼlú xóo xa̱bekha, gu̱ʼu̱, jiámá, xabuanii ma̱ndoo majmañulú ga̱jma̱a̱ xúgíʼ consejos rí na̱ʼkha̱ náa ináa ndrígóo.

RÍ MAMIÑULÚʼ KUʼYÁÁ DIOS NAÑEWU̱NLÚ

3. Xó má eʼthí Proverbios 17:3, ndíjkha rí gíʼdoo numuu muñewa̱a̱n a̱jkiu̱lú rá. (Atayáá ma̱ngaa xtiʼkhu.)

³ Mbá rí gíʼdoo numuu mu muñewa̱a̱n a̱jkiu̱lú rí tsékujmaa, mbá nindxu̱u̱ rí Jeobá ndaʼyoo rí gíwánʼ náa a̱jkiu̱ún xa̱bu̱. Ndiéjunʼ eyoo gáʼthúún rígi̱ rá. Dí ikhaa ndaʼyoo tséʼngu̱u̱n gúyáá eʼwíinʼ, tsíín phú xa̱bu̱ nindxu̱lú (atraxnuu Proverbios 17:3).b Jeobá nandoo kaʼyulú itháán índo̱ ndaʼyoo rí nundxaʼwamíjná má xúʼko̱ ga̱jma̱a̱ numuu ikha ndrígóo, dí ma̱ndoo mambáyulú makuwáanʼ kámuu mbiʼi. Rúʼko̱ gaʼni dí xáguma gacháánʼ xóo xkawiʼ dí enii xa̱bu̱ numbaaʼ ga̱jma̱a̱ xóo naniguuʼ Gixa̱a̱ (Juan 4:14; 1 Juan 5:18, 19). Rí nandulú kuʼyáá ga̱jma̱a̱ gamajkhu rí kuáʼdáá náa Jeobá maʼni itháán mba̱a̱, índo̱ guniʼnííʼ itháán. Xándoo muʼni mbóoʼ rí maʼni gawúunʼ xóo ku̱mu̱u̱ Anu̱lú asndu xúndxaʼwamíjnalúʼ muʼni dí raʼkhí. Índo̱ gúraʼníí mbóoʼ tsáʼkhá gurajximijnalú: “Xú káʼnii gani gawúunʼ mbáa bi̱ nisngájmaa rí nandoo kaʼyoo wéñuuʼ ga̱jma̱a̱ niʼni ra̱ʼkhá tháán mba̱a̱ ga̱jma̱a̱ numuu rá.” (1 Juan 4:9, 10.)

4. Xú kaʼnii nimbáyúu mbáa ndxájulú dí nimíñuu kaʼyoo Jeobá rá.

⁴ Mbáa ndxájulú bi̱ xtáa náa Croacia bi̱ mbiʼyuu Martac inuu mabóoʼ ga̱jma̱a̱ mbáa. Ikhaa niʼnirámáʼ: “Tájmun mandxaʼwáminaʼ kaʼwu, niʼniuu gakhi̱i̱ marikhoo rí nagua̱ʼa̱ eʼni xuyuʼ, rí mabo̱ʼ gajmuʼ mbáa. Mu rí mamiñúu kayóo Jeobá niñewu̱nʼ”. Xú káʼnii rá. Marta niʼthí rí nimbáyúu mandxaʼwáminaʼ ga̱jma̱a̱ numuu xúgíʼ dí marígá nda̱wa̱á á mu ikhaa naʼni rí nandoo. Mangáanʼ, índo̱ gúraʼníí mbóoʼ rí ma̱ndoo maʼni dí majngutíguáanʼ, garmáʼáan a̱jkiu̱lú rí itháán gamíi dí magíʼnulú nindxu̱u̱ rí muʼni dí Jeobá maxtáa gíná, ga̱jma̱a̱ rí xuʼyamajkuíílú kámuu mbiʼi (Gén. 6:5, 6).

5. Ndiéjunʼ ejmañaaʼ ikháanʼ rí nigíʼnuu Leo rá.

⁵ Índo̱ namíñulú kuʼyáá Jeobá muñewa̱a̱n rí xambáxulú gajmiulúʼ xa̱bu̱ bi̱ nuni̱ dí raʼkhí. Leo bi̱ xtáa náa xuajin Congo nijmañuu rígi̱. A̱jkhu̱ tsiguʼ nda̱wa̱á rí nijngúun iyaʼ, ikhaa nimbájxuuʼ gajmíi̱nʼ xa̱bu̱ bi̱ nuni̱ dí raʼkhí, ikhaa nindxaʼwámi̱na̱ʼ dí tséʼni dí raʼkhí maski ajndu bi̱ nambájxu̱u̱ gajmíi̱n nuni̱ má xúʼko̱ dí raʼkhí, mú ikhaa na̱nguá eʼni rúʼko̱, na̱nguá má eʼni mbóoʼ rí Jeobá na̱nguá nigu̱u̱. Mú, nda̱wa̱á nigíʼdúu niʼni xó ma nuni̱ bi̱ nambáxu̱u̱ gajmíi̱n, nigíʼdúu níjnga̱a̱ wéñuuʼ ga̱jma̱a̱ nibóoʼ xkawiiʼ kayuuʼ gajmíi̱n gu̱ʼu̱. Ikhú Leo nigíʼdúu nindxaʼwamina ga̱jma̱a̱ numuu xúgíʼ rí niʼsngóo anu̱u̱ bi̱ nindxu̱ún Testigos, ga̱jma̱a̱ xóo gagi rí nixtáa índo̱ ikhaa ma̱ngaa ninindxu̱u̱ testigo. Nda̱wa̱á ikhaa nigíʼdúu niʼni ga̱jma̱a̱ nindxaʼwámi̱na̱ʼ rí májánʼ ga̱jma̱a̱ nimbayíí bi̱ kuya̱ edxu̱u̱, ikhaa rúʼko̱ niʼni rí matanga̱a̱ náa Jeobá. Dí xúgi̱, Leo nindxu̱u̱ mbáa bi̱ kayá edxu̱u̱ ga̱jma̱a̱ nindxu̱u̱ mbáa precursor especial bi̱ xtáa gagi.

6. Tsíin nindxu̱ún gu̱ʼu̱ bi̱ muʼtámíjnalú náa artículo rígi̱ rá.

⁶ Rí xúgi̱ muʼnigajmaalú capítulo 9 ndrígóo Proverbios, náa na̱ʼkha̱ ikha dí xúgiáánʼ ma̱ndoo mambáyulú. Gi̱i̱ na̱ʼkha̱ raʼthí ga̱jma̱a̱ numún a̱jmi̱i̱n gu̱ʼu̱, mbáa nandoo gáʼthúu̱n ku̱ma̱, imba̱a̱ nandoo gáʼthúu̱n skágunʼ.d Índo̱ gúʼnigajmaa kutriga̱ rí na̱ʼkha̱ gi̱i̱, garmáʼáan a̱jkia̱a̱nʼ rí Gixa̱a̱ ga̱jma̱a̱ numbaaʼ ndrígóo raʼkháa tháán nigún rí mubu̱únʼ gajmiún xa̱bu̱ ga̱jma̱a̱ nanigúnʼ pornografía (Efes. 4:19). Ikha jngóo gíʼdoo numuu rí majmañulú dí mamiñulúʼ kuʼyáá Jeobá ga̱jma̱a̱ muʼni tsínguminalu náa dí raʼkhí (Prov. 16:6). A̱jmi̱i̱n gu̱ʼu̱ bi̱ muʼtamijnalu ga̱jma̱a̱ numún nuthúún xa̱bu̱ “bi̱ ndayóóʼ ajkiuún” rí magún náa guʼwún mu ma̱ndoo muphiʼtsu (Prov. 9:1, 5, 6, 13, 16, 17). Mu mbá najmaa invitacion rígi̱, rígá mixtiʼkhu kayuuʼ dí egiʼnuu, ndiéjunʼ nindxu̱u̱ rá. Guʼyáálú.

XÚNDRIGÚLÚ INVITACIÓN NDRÍGÓO “A̱ʼGÚ SKÁGUNʼ”

7. Xó má naʼthí Proverbios 9:13-18, xú káʼnii guámbárigún bi̱ nundrígú invitación ndrígóo “a̱ʼgú skágunʼ” rá. (Atayáá xtiʼkhuu ma̱ngaa.)

⁷ Gúguáʼdiin muʼthálú ga̱jma̱a̱ numuu invitación ndrígóo “a̱ʼgú skágunʼ” (atraxnuu Proverbios 9:13-18).e Ikhaa nandxaʼwáskha “¡Xúgíinʼ bi̱ tséjmañún gáguwáʼ gi̱i̱!”. Ikhaa naʼthúún bi̱ tséjmañún dí muphiʼtsu mbrígúu̱n. Ndiéjunʼ gíʼnún bi̱ nagún rá. “Ikhí kúwá bi̱ nagún makhañún”. Na̱nguá nindxu̱u̱ timbá miʼtsu dí náa Proverbios na̱ʼkha̱ raʼthí ga̱jma̱a̱ numuu mbáa a̱ʼgu̱ bi̱ nindxu̱u̱ xúʼko̱ kaʼnii. Náa i̱ʼwáʼ capítulos na̱ʼkha̱ raʼthí rí xudxawíín mbáa “a̱ʼgu̱ bi̱ tséjmaʼniiʼ” mbáa “a̱ʼgu̱ bi̱ nandoo maʼni rájáánʼ”. Naʼthúlú dí “goʼwóo naguámbári̱go̱o̱ náa rí nakháñun” (Prov. 2:11-19). Ma̱ngaa náa Proverbios 5:3-10 naʼthúlú dí gíʼmaa muñewumíjnalú eʼni imba̱a̱ “a̱ʼgu̱ bi̱ tséjmaʼniiʼ” bi̱ “rajkhúu nagajtaa náa rí makhañún”.

8. Ndiéjunʼ gíʼmaa muraʼwíí muni bi̱ nudxawíín aʼwóo “a̱ʼgú skágunʼ” rá.

⁸ Xúgínʼ bi̱ nudxawíín aʼwóo “a̱ʼgú skágunʼ” gíʼma muraʼwíí ndiéjunʼ muni: Á mu mundrígú invitación o na̱nguá. Asndu mangáanʼ maʼga̱nú mbóoʼ mbiʼi dí gíʼmaa muraʼwíílu rígi̱. Ndiéjunʼ guʼni índo̱ mbáa gatsudáán mu muʼbúlú gajmiúlú mbáa o á mu náa internet o asndu náa dí najmulú nakujmaa mbá nache̱ mbá xtiʼkhuu ndrígóo pornografía rá.

9, 10. Ndíjkha jngóo ragíʼmaa majngutíguáan dí muʼbulú xkawiiʼ kayuuʼ gajmiúlú mbáa rá.

⁹ Rígá mbaʼa rí gíʼdoo numuu mu xúʼbulú xkawiʼ kayuuʼ gajmiulúʼ mbáa. Libro ndrígóo Proverbios naʼthí dí “a̱ʼgú skágunʼ”naʼthí dí “itháan taun iyaʼ rí niguma kuʼwáʼ”. Ndiéjunʼ eyoo gáʼthúu̱n “iyaʼ rí niguma kuʼwáʼ” rá. Náa Biblia nambríguii iyaʼ dí naxnáa tsiakii ga̱jma̱a̱ índo̱ xa̱bu̱ bi̱ nidamijná nubu̱únʼ mbríguu (Prov. 5:15-18). Bi̱ ninigu̱u̱nʼ ma̱ndoo má mubu̱únʼ gajmiún guʼñu̱ún xó má kaʼyoo. Mú, “iyaʼ rí niguma kuʼwáʼ” nindxu̱u̱ mixtiʼkhu kayuuʼ. Mbáa rígi̱ nandoo gáʼthúu̱n índo̱ xa̱bu̱ bi̱ tsédamijná, nubu̱únʼ xkawiiʼ kayuuʼ. Mbaʼa nuthu naguma nguʼwáá, ikháá xó mbá kuʼwáʼ naʼni índo̱ tséyáá. Bi̱ nuni̱ rígi̱ asndu naku̱mu̱ún dí taun nindxu̱u̱ “iyaʼ rí niguma kuʼwáʼ” numuu dí eʼwíinʼ tséyáá dí nuni̱i̱. Mú nuninduwamijná. Jeobá ndaʼyoo xúgíʼ dí erígá, xándoo muʼninduwaalú ikhaa. Nda̱a̱ imbo̱o̱ dí itháán miʼkhu̱u̱n ki xóo ni xámbájxulú gajmiulú Jeobá. Ra̱ʼkhá tháán miʼkhu̱u̱n rúʼko̱ (1 Cor. 6:9, 10). Mú rígá xóó itháan.

¹⁰ Mbáa xa̱bu̱ bi̱ naguʼwuun mabo̱ó gajmíi̱n mbaʼin, ma̱ndoo maʼni dí mathiyuuʼ, maku̱mu̱u̱ dí nda̱a̱ numuu, asndu ma̱ndoo magiʼdaa mbáa ada̱ dí tségiʼthu̱u̱n o maʼni gachúu familia ndrígóo. Rí itháán májánʼ nindxu̱u̱ dí xúndrigúlú invitación ndrígóo “a̱ʼgú skágunʼ”. Mbaʼin bi̱ najngutíguíin náa tsáʼkhá dí mubu̱únʼ gajmíi̱n xa̱bu̱, nánguá mbájxu̱u̱n gajmiún Jeobá ma̱ngaa nuguaʼdaa nandii dí naʼni dí makhañún (Prov. 7:23, 26). Versículo 18 ndrígóo capítulo 9 naguámbári̱go̱o̱ xígi̱ kaʼnii: “Bi̱ ikhaa nandxaʼwún, kajchún náa majñu̱u̱ʼ iñá wajinʼ”. Á mu xígi̱ kaʼnii gawámbári̱go̱o̱ mbiʼi ndrígún, ndíjkha jngóo mbaʼin xa̱bu̱ nundrigú invitación rígi̱ xá. (Prov. 9:13-18.)

11. Náa numuu nindxu̱u̱ raʼkhí dí mbuʼyáá pornografía rá.

¹¹ Mbá rí na’ni dí majngutíguíin mbaʼin xa̱bu̱ náa invitación rígi̱ nindxu̱u̱ pornografía. Ikhaa nindxu̱u̱ mbá tsáʼkhá dí rígá asndu náá. Mbaʼin ku̱mu̱ún dí na̱nguá nindxu̱u̱ raʼkhí dí ma̱ta̱ya̱a̱, mu ragájkhun rúʼko̱. Pornografía naʼni dí maʼndaaʼ ma̱ta̱ya̱a̱ má xúʼko̱ dí raʼkhí, naʼni gachíí na’ni dí mandáti̱ga̱ʼ numaaʼ ga̱jma̱a̱ makuma̱a̱ dí eʼwíinʼ na̱nguá guáʼdaa numún. Naʼni gakhi̱i̱ mambumaaʼ xúgíʼ dí nitayáá. Índo̱ natayáá pornografía iwáá nagua̱ʼa̱ mata̱ba̱a̱ʼ ga̱jma̱a̱ mbáa, raʼkháa naʼni dí matatsiʼñáʼ matandxaʼwamínáʼ ga̱jma̱a̱ numuu rúʼko̱ (Col. 3:5; Sant. 1:14, 15). Xúʼko̱, mbaʼin bi̱ nduyáá pornografía niguánún nuni̱ dí tsáʼkhá.

12. Ndiéjunʼ gíʼmaa muʼnilú á mu nakujmaa mbá xtiʼkhuu dí maʼni dí mundxaʼwamíjná dí tsaga rá.

¹² Ndiéjunʼ gíʼmaa maʼni mbáa cristiano á mu náa celular ndrígóo o asndu ndiéjunʼ má najmuu nagájnuu mbá xtiʼkhuu ndrígóo pornografía rá. Gíʼmaa maniñuuʼ mbaʼyoo mbá nache̱. Dí nambájxulú gajmiúlú Jeobá nindxu̱u̱ rí itháán gíʼdoo numuu, nda̱a̱ imbo̱o̱, dí marmáʼáan a̱jkiu̱lú rígi̱ mambáyulú mu muraʼwíí májánʼ. Mú, rígá mbaʼa xtiʼkhuu dí mbaʼin ethi dí ranindxu̱u̱ pornografía, mu naʼni dí mundxaʼwamíjná dí tsaga, asndu xtiʼkhuu rígi̱, na̱nguá eyulú mbuʼyáá ma̱ngaa. Náa numuu rá. Numuu dí tsíyulú muxuʼdámíjná aʼkhá náa a̱jkiu̱lú (Mat. 5:28, 29). David, mbáa ndxájulú bi̱ kayá edxu̱u̱ náa xuajin Tailandia naʼthí: “Ikhúún naniguʼ marajximínáʼ: ‹Lá manigu̱u̱ʼ Jeobá dí maguánú mba̱yo̱o̱ xtiʼkhu rígi̱ maski ajndu tsénindxu̱u̱ pornografía rá.› Índo̱ nandxaʼwamina xígi̱ kaʼnii, nambáyúu mu maraʼwíi májánʼ dí mani”.

13. Ndiéjunʼ gámbáyulú muraʼwíí májánʼ dí muʼnilú rá.

¹³ Rí mamiñulú muʼni mbá dí maʼni gawúunʼ, dí maʼni rí Jeobá maxtáá ngíná nambáyulú mu muraʼwíí májánʼ dí muʼni. Ikha jngóo Proverbios 9:10 naʼthí: “Rí mamiñáanʼ xtayáá Jeobá ikhú nagi̱ʼdu̱u̱ naraʼdáá ku̱ma̱”. Rígi̱ naguánú kaʼwu náa nagi̱ʼdu̱u̱ capítulo 9, náa na̱ʼkha̱ raʼthí ga̱jma̱a̱ numuu mbáa a̱ʼgu̱ bi̱ nandoo gáʼthúu̱n “ku̱ma̱ dí nindxu̱u̱ gajkhun”.

GUNDRIGÚLÚ INVITACIÓN NDRÍGÓO “KU̱MA̱ DÍ NINDXU̱U̱ GAJKHUN”

14. Xú káʼnii imbo̱o̱ invitación na̱ʼkha̱ raʼthí náa Proverbios 9:1-6 rá.

¹⁴ (Atraxnuu Proverbios 9:1-6).f Gi̱i̱ nuxkamaa mbá invitación dí naʼniulú Jeobá, bi̱ Niʼniwáanʼ ga̱jma̱a̱ bi̱ na̱ʼkha̱ xúgíʼ ku̱ma̱ (Prov. 2:6; Rom. 16:27). Dí xúgi̱ Proverbios na̱ʼkha̱ raʼthí ga̱jma̱a̱ mbá guʼwá dí gíʼdoo mbá juwan xigu̱u̱ goʼwóo. Rígi̱ naʼni mundxaʼwamíjná dí Jeobá ra̱ʼkhá tháán májánʼ a̱jkiu̱u̱n, mbáa Dios bi̱ nagruiguíin xúgíinʼ bi̱ nandún majmañún ga̱jma̱a̱ numuu, mu muguaʼdaa ku̱ma̱ ndrígóo.

15. Ndiéjunʼ invitación nindxu̱u̱ dí naʼniulú Dios rá.

¹⁵ Jeobá májánʼ a̱jkiu̱u̱n ga̱jma̱a̱ naxnúlú mbaʼa dí májánʼ. Rígi̱ nakujmaa kaʼwu náa Proverbios capítulo 9 náa na̱ʼkha̱ raʼthí ga̱jma̱a̱ numuu mbáa a̱ʼgu̱ dí nandoo gáʼthúu̱n “ku̱ma̱ dí nindxu̱u̱ gajkhun”. Ikhaa gíʼdoo xúgíʼ xawii, niʼni mújúunʼ májánʼ xuwiʼ ga̱jma̱a̱ vino ma̱ngaa rígá má xúgíʼ xawii náa mesa (Prov. 9:2). Ma̱ngaa xó má eʼthí náa versículo 4 ga̱jma̱a̱ 5 “ku̱ma̱ dí nindxu̱u̱ gajkhun” naʼthúún xúgínʼ bi̱ nindxu̱ún tségundiin: “Gaguwaʼla, gu̱phu̱ pan ndrígóo”. Ndíjkha jngóo gíʼmaa mundrígú invitación ndrígóo a̱ʼgu̱ bugi̱ rá. Numuu dí Jeobá nandoo mañewu̱u̱n ejñu̱u̱n ga̱jma̱a̱ maxnún ku̱ma̱. Ikhaa na̱nguá eyoo dí magíʼnulú dí raʼkhí mu ma̱ndoo majmañulú dí májánʼ, ikha jngóo, “ikhaa naxnún ku̱ma̱ rí májánʼ bi̱ ni̱ndxu̱ún jmbiin” (Prov. 2:7). Á mu nandulú kuʼyáá ga̱jma̱a̱ nduʼyamajkuíí Jeobá maʼndulú muʼni dí nandoo ikhaa, ma̱ngaa muʼnimbánii xúgíʼ consejo dí naxnúlú. Á mu nuʼnilú xúgíʼ rígi̱ makuwáánʼlu gagi (Sant. 1:25).

16. a) Xú káʼnii nimbáyúu Alain maraʼwíi májánʼ dí nandoo kaʼyoo ga̱jma̱a̱ dí ndaʼyamajkuu Jeobá rá. b) Dí nirígá numuu dí niraʼwíí xúʼko̱ kaʼnii rá.

¹⁶ Guʼyáá mbá xkri̱da dí nasngájmulú dí mamiñulúʼ kuʼyáá Jeobá nambáyulú mu muraʼwíí májánʼ dí muʼni. Alain mbáa bi̱ kayá edxu̱u̱, nindxu̱u̱ maestro náa mbá escuela. Ikhaa naʼthí: “Mbaʼin maestro naku̱mu̱ún dí á mu nduyáá película náa na̱ʼkha̱ pornografía ma̱ndoo majmañu̱ún xú káʼnii musngáá itháan májánʼ ga̱jma̱a̱ numuu tema rígi̱. Mú, Alain nda̱yo̱o̱ dí raʼkhí nindxu̱u̱ dí mandxaʼwáminii xúʼko̱ kaʼnii. Ikhaa naʼthí dí niʼnii: “Numuu rí nandoʼ ka̱yo̱o̱ ga̱jma̱a̱ ndayamajkhuu Jeobá, tándoo gáyóo kayuuʼ películas rúʼko̱. Ma̱ngaa ni̱thu̱u̱n compañeríiʼ náa numuu naraʼwíí xúʼko̱ kaʼnii”. Índo̱ niraʼwíí maʼni rígi̱, ikhaa niʼdxawuun consejo ndrígóo “ku̱ma̱ dí nindxu̱u̱ gajkhun” dí naʼthí: “Gaʼguala má xúʼko̱ náa kamba̱a̱ dí rígá ku̱ma̱” (Prov. 9:6). Mbaʼin compañeriiʼ niʼniún tsiánguá dí niʼni dí asndu niguáʼdiin ninigajmaa Biblia ga̱jma̱a̱ niguáʼdiin nigúun náa reunión.

17, 18. Xú káʼnii eguma tsajkhurámíi bi̱ nundrígú invitación ndrígóo “ku̱ma̱ dí nindxu̱u̱ gajkhun”, ga̱jma̱a̱ ndiéjunʼ kuáʼti̱i̱n nda̱wa̱á rá. (Ma̱ngaa atayáá xtiʼkhuu.)

¹⁷ Jeobá najmuu a̱jma̱ xkri̱da ndrígúun a̱jmi̱i̱n gu̱ʼu̱ bugi̱ mu masngájmulú xú kaʼnii ma̱ndoo makuwáanʼlu gagi. Bi̱ nundrigú invitación ndrígóo “a̱ʼgú skágunʼ” ga̱jma̱a̱ mba̱áʼ má nandxaʼwáá, nandúun mubu̱únʼ xkawii kayuuʼ gajmiún eʼwíinʼ. I̱ndó nundxaʼwamíjna̱ xóo kúwi̱i̱n mbiʼi rúʼko̱ raʼkháa xú káʼnii makúwiin nda̱wa̱á. Ikhiin mawambáa mbiʼi ndrígun “náa majñu̱u̱ʼ iñá wajinʼ” (Prov. 9:13, 17, 18).

¹⁸ Mú raʼkháa tháán mixtiʼkhu nikúwi̱i̱n bi̱ nindrígu invitación ndrígóo “ku̱ma̱ rí nindxu̱u̱ gajkhun”. Kúwi̱i̱n gagi numuu rí guáʼdáá mbá xúgíʼ dí ndañún mu ma̱ndoo makuwíin mijngii náa Jeobá (Is. 65:13). Jeobá nijmiu profeta Isaías mú maʼthúlú: “ Gudxuun rí gáthalá, ga̱jma̱a̱ guphu rí májánʼ ma̱ngaa guxkamaa rí phú ndaskhuʼ” (Is. 55:1, 2). Ikháánʼlú najmañulú manigulúʼ rí Jeobá naniguʼ ga̱jma̱a̱ mawíyulú rí Jeobá nawiyuʼ (Sal. 97:10). Ikháanʼ nanigulúʼ muʼthúún eʼwíinʼ rí muniʼnuuʼ “ku̱ma̱ dí nindxu̱u̱ gajkhun”. Nindxu̱lú xóo gu̱ʼú ñumbáá bi̱ na̱ʼkha̱ raʼthí náa capítulo 9 ndrígóo Proverbios, bi̱ nundxaʼwaskhaa “náa mbíjní mitsídáʼ ndrígóo xuajin”. Ikhaa má xóo ikhiin nuʼtalu “¡gaguwaʼla gi̱i̱ xúgiáanʼla bi̱ tséjmañala!”. Ikháanʼlu ga̱jma̱a̱ bi̱ nundrígú invitación rígi̱. Nambáyulú wéñuuʼ xúgi̱ ga̱jma̱a̱ mambáyulú má nda̱wa̱á ma̱ngaa. Á mu najkualú náa kamba̱a̱ dí rígá ku̱ma̱, ma̱ndoo makuwáánʼ kámuu mbiʼi (Prov. 9:3, 4, 6).

19. Xó ma Eclesiastés 12:13, 14, ndiéjunʼ gíʼmaa muʼnilú rá. (Atayáá ma̱ngaa náa kúguamáʼáan “Xú káʼnii eñewu̱nlú dí mamiñúlúʼ kuʼyáá Dios”).

¹⁹ (Atraxnuu Eclesiastés 12:13, 14).g Maski ajndu kuwáánʼlú náa i̱ʼwáʼ mbiʼi, náa rígá i̱ndó dí raʼkhí. Mú ikháánʼlú nandulú kuʼyáá Jeobá ga̱jma̱a̱ mbuʼyamajkuíí má xúʼko̱ ikha jngóo nuñewanʼlú a̱jkiu̱lú xúʼnilú mbóoʼ rí maʼni magua̱ʼa̱ muʼni mbó dí raʼkhí ga̱jma̱a̱ makuwáanlú miʼngiʼ náa Jeobá numuu rí nandulú kuʼyáá ga̱jma̱a̱ nduʼyamajkuíí Jeobá muʼniuu má invitar má xúʼko̱ eʼwíinʼ xa̱bu̱ mu ma̱ndoo mbuʼyáaʼ ku̱ma̱ rí nindxu̱u̱ gajkhun ga̱jma̱a̱ majmañún mangiin.