Ndíjkha dí Jesús ndiʼyoo dí gíʼdoo numuu mbiʼyuu Jeobá rá.

1, 2. a) Ndiéjunʼ niʼni Jesús nákha mbruʼun rí inuu makhañúu rá. b) Ndiéjunʼ gúriʼña̱a̱ náa artículo rígi̱ rá.

WAKÍʼ jueves, 14 ñajunʼ gu̱nʼ nisán tsiguʼ 33, Jesús nikuiʼtsu iwáá gajmii apóstoles ndrígióo. Ikhaa ndiʼyoo dí inuu má dí Judas magujua̱a̱, maguma ngínáa ga̱jma̱a̱ nda̱wa̱á xa̱bu̱ sia̱nʼ ndrígóo muxiyáa. Ikha jngóo nda̱wa̱á rí nipiʼtsu nixnún tsiaki̱i̱ apóstoles ndrígióo ga̱jma̱a̱ índo̱ inuu má magúun, Jesús niʼni mbá oración dí gíʼdoo wéñuuʼ numuu. Apóstol Juan niʼnirámáʼ oración rígi̱ dí nuxkamaa náa Juan capítulo 17.

² Náa artículo rígi̱ mbuʼyáá ndiéjunʼ gajmañulú náa oración rí niʼni Jesús. Ndiéjunʼ nindxu̱u̱ dí niʼni maxmiéjuunʼ nákhá inuu makhañúu ga̱jma̱a̱ ndiéjunʼ rí itháan nigiʼdoo numuu ndiʼyoo ikhaa índo̱ nixtáa náa tsu̱du̱u̱ ku̱ba̱ʼ xá.

“NIXNU̱U̱N MUNIʼNUUʼ MBIʼYAAʼ”

3. Ndiéjunʼ niʼthí Jesús ga̱jma̱a̱ numuu mbiʼyuu Jeobá ga̱jma̱a̱ ndiéjunʼ nindoo gáʼthí xá. (Juan 17:​6, 26.)

³ Índo̱ Jesús niʼtájkáan, niʼthúu̱n Jeobá: “Nixnu̱u̱n muniʼnuuʼ mbiʼyaaʼ”. Ga̱jma̱a̱ rígi̱ nigiʼdoo wéñuuʼ numuu náa ikhaa numuu rí asndu a̱jma̱ nuthu niʼthí (atraxnuu Juan 17:​6, 26). Raʼkháa rígi̱ eyoo gaʼthí dí niʼsngúún xa̱bi̱i̱ dí Jeobá nindxu̱u̱ mbiʼyuu Dios, numuu dí ikhiin nindxu̱ún judíos ga̱jma̱a̱ nduyáá má, ma̱ngaa mbiʼyuu Dios na̱ʼkha̱ mbaʼa nuthu náa Escrituras Hebreas. Ikha jngóo índo̱ Jesús niʼthí rí nixnún muniʼnuuʼ mbiʼyuu Dios, nindoo gaʼthí rí nisngúún xa̱bi̱i̱ xóo kaʼnii Jeobá, rí naʼni, rí nandoo maʼni ga̱jma̱a̱ xóo nindxu̱u̱. Ndawa̱a̱ i̱mba̱a̱ bi̱ naniniiʼ itháán májánʼ Jeobá ki xóo Jesús, ikha jngóo i̱ndó ikhaa ma̱ndoo maʼsngúún xa̱bu̱ ga̱jma̱a̱ numuu Jeobá.

4, 5. a) Aratá xú káʼnii ma̱ndoo maʼga̱nú magiʼdoo numuu mbiʼyuu mbáa xa̱bu̱. b) Xú káʼnii nijkha̱nú nigiʼdoo numuu mbiʼyuu Jeobá náa apóstoles rá.

⁴ Guʼgíʼ mbá xkri̱da, atatsaʼwáminaʼ rí náa congregación ndrígáaʼ xtáa mbáa anciano bi̱ mbiʼyuu David ga̱jma̱a̱ nindxu̱u̱ médico. Mbáa niʼníí má etatsiniiʼ, mú mbóo mbiʼi ikháán ndayáaʼ rí mbáa médico mambáyáaʼ. Ikha jngóo mbá nacha̱ nagún ku̱ña̱a̱n náa hospital dí nañajunʼ ndxájulú bugi̱. Ikhaa naʼni xó ma eʼngo̱o̱ mu mambáyáaʼ mu xákáñáaʼ. Rí xúgi̱ na̱dxu̱ʼnú nandaaʼ xtayáá itháan ndxájulú bugi̱ ga̱jma̱a̱ índo̱ natadxawíín mbiʼyuu narmáʼáan a̱jkia̱a̱nʼ dí niʼni ga̱jma̱a̱ numaaʼ. David raʼkháa i̱ndó nindxu̱u̱ anciano bi̱ xtáa congregación ndrígáaʼ ma̱ngaa nindxu̱u̱ bi̱ niʼni kríña̱a̱nʼ, xóo muʼthá mbiʼyuu nagiʼdoo numuu náa ikháánʼ.

⁵ Ikhaa má kayuuʼ, maski ajndu xa̱bi̱i̱ Jesús nduyáá má rí Jeobá nindxu̱u̱ mbiʼyuu Dios. Mú mbiʼyuu Jeobá ni̱jkha̱nú nigiʼdoo itháan numuu náa ikhiin índo̱ Jesús nimbañúún muniʼniiʼ itháan májánʼ Jeobá. Ikhaa nisngájma xó phú nindxu̱u̱ Jeobá ga̱jma̱a̱ xóo niʼni ma̱ngaa xóo niʼthí. Índo̱ apóstoles ndiyáá xóo eʼsngáa Jesús ga̱jma̱a̱ xóo eʼniún xa̱bu̱, niguánú niʼniniiʼ itháan májánʼ Jeobá (Juan 14:9; 17:3).

“MBIʼYAAʼ, RÍ IKHÁÁN NIRAXNÚʼ”

6. Ndiéjunʼ nindoo gáʼthí Jesús índo̱ niʼthí dí Jeobá nixnúu mbiʼyuu xá. (Juan 17:​11, 12.)

⁶ Jesús niʼthúu̱n rígi̱ Jeobá índo̱ niʼtájkháan: “Atiewu̱u̱n ga̱jma̱a̱ numuu mbiʼyaaʼ, rí ikháán niraxnúʼ” (atraxnuu Juan 17:​11, 12). Lá rígi̱ eyoo gáʼthí dí Jesús niriʼkhuu mbiʼyuu rá. Na̱nguá, numuu dí ikhaa niʼtájkháan: “Atiewu̱u̱n ga̱jma̱a̱ numuu mbiʼyaaʼ”. Ikha jngóo Jesús táriʼkhuu mbiʼyuu ga̱jma̱a̱ tágu mbiʼyuu Jeobá. Mú ndiéjunʼ nindoo gáʼthí índo̱ niʼthí rí Jeobá nixnúu mbiʼyuu xá. Timbá, Jesús nindxu̱u̱ bi̱ Jeobá nikungua̱a̱nʼ mu ma̱ʼkha̱ kayóo ajngóo. Ni̱ʼkha̱ xtiʼkhuu Anu̱u̱ ga̱jma̱a̱ nijmuu mbiʼyuu Jeobá mu maʼni mbaʼa milagro (Juan 5:43; 10:25). Ma̱ngaa mbiʼyuu Jesús nandoo gáʼthúu̱n: “Jeobá nindxu̱u̱ bi̱ naʼni káwáánʼlú”. Xó má eʼyáá ikhí má na̱ʼkha̱ mbiʼyuu Jeobá.

7. Gajmaaʼ xkri̱da mu marata náá numuu dí Jesús ma̱ndoo maʼthí ga̱jma̱a̱ numuu mbiʼyuu Jeobá.

⁷ Mu makru̱ʼu̱lú itháan májánʼ, gúgíʼ mbá xkri̱da, mbáa xa̱bu̱ ñajunʼ ma̱ndoo makuʼmaa i̱mba̱a̱ xa̱bu̱ mu maʼthí ga̱jma̱a̱ numuu mbiʼyuu, ajngáa dí gáʼthí xa̱bu̱ bugi̱ magiʼdoo ikháá má numuu xóo ajngóo xa̱bu̱ ñajunʼ. Xúʼko̱ má kayuuʼ Jeobá nikuʼmaa Jesús, ga̱jma̱a̱ ajngáa rí gáʼthí Jesús mani̱ndxu̱u̱ xóo Jeobá xtáa raʼthí (Mat. 21:9; Luc. 13:35).

8. Ndiéjunʼ eyoo gáʼthúu̱n rí mbiʼyuu Jeobá rígá náa Jesús nákha xóó tséʼkha̱ náa tsu̱du̱u̱ Ku̱ba̱ʼ rá. (Éxodo 23:​20, 21.)

⁸ Náa Biblia naʼthí rí Jesús nindxu̱u̱ ajngáa, numuu dí Jeobá nijmiuu mu maʼthúún ángeles ga̱jma̱a̱ xa̱bu̱ numbaaʼ rí ikhaa nandoo dí mbuyáá ga̱jma̱a̱ rí muni̱ (Juan 1:​1-3). Mbáa Jesús nindxu̱u̱ ángel bi̱ Jeobá nikuʼmaa mu maxnún ikha israelitas, índo̱ kúwá ragún náa ku̱ba̱ʼ mijxooʼ. Náá numuu dí ndiyóoʼ munimbu̱ún kuyáá ángel buʼko̱ xá. Numuu dí Jeobá niʼthí: “Mbiʼyuʼ rígá náa ikhaa” (atraxnuu Éxodo 23:​20, 21).a Ndiéjunʼ eyoo gáʼthúu̱n rígi̱ rá. Nandoo gáʼthúu̱n dí Jesús nindxu̱u̱ bi̱ Jeobá nikuʼmaa ga̱jma̱a̱ bi̱ nasngájma rí Jeobá naʼni xúgíʼ dí májánʼ ma̱ngaa dí ikhaa nindxu̱u̱ kaʼwii.

“ANU̱ʼ, ATANI̱ MBA̱A̱ MBIʼYAAʼ”

9. Xú kaʼnii eʼyáá dí Jesús ndiʼyoo dí gíʼdoo numuu mbiʼyuu Jeobá rá.

⁹ Xó má ndiʼyáá, asndu nákha xóó tséʼkha̱ Jesús náa tsu̱du̱u̱ Ku̱ba̱ʼ ikhaa ndiʼyoo dí gíʼdoo numuu mbiʼyuu Jeobá. Xúʼko̱ má nisngájma índo̱ ni̱ʼkha̱ náa tsu̱du̱u̱ Ku̱ba̱ʼ, rí niʼni nisngájma dí ndiʼyoo dí gíʼdoo numuu mbiʼyuu Jeobá. Índo̱ nánguá niguanúu mbayuʼ mbiʼi mu maʼtáraʼa, Jesús niʼthúu̱n Jeobá: “Anu̱ʼ, atani̱ mba̱a̱ mbiʼyaaʼ”. Mbá nacha̱, Anu̱u̱ niriʼñuu ga̱jma̱a̱ mbá aʼwá gakhi̱i̱ rí nigájnuu asndu mekhuíí, niʼthí: “Ni̱ni̱ mba̱a̱ má ga̱jma̱a̱ ma̱ni̱ mba̱a̱ mbu̱júu̱” (Juan 12:28).

10, 11. a) Ndiéjunʼ niʼni Jesús mu maʼni mba̱a̱ mbiʼyuu Jeobá rá. (Atayáá ma̱ngaa xtiʼkhuu.) b) Náá numuu dí gíʼmaa musngajmá dí Jeobá naʼni dí májánʼ ga̱jma̱a̱ dí mbiʼyuu nindxu̱u̱ kaʼwu xá.

¹⁰ Jesús ma̱ngaa niʼni mba̱a̱ mbiʼyuu Anu̱u̱, índo̱ niʼthúún eʼwíinʼ ga̱jma̱a̱ numuu xóo nindxu̱u̱ Jeobá ga̱jma̱a̱ rí nagui̱i̱ dí naʼni. Mú raʼkháa i̱ndó rígi̱ niʼni, ikhaa ndiʼyoo dí ndayóoʼ masngájma dí xúgíʼ rí naʼni Jeobá nindxu̱u̱ májánʼ ga̱jma̱a̱ dí mbiʼyuu nindxu̱u̱ kaʼwu. Jesús nisngájma dí rígi̱ gíʼdoo wéñuuʼ numuu índo̱ niʼsngúún xa̱bi̱i̱ mutajkáan, ikhaa niʼthí: “Anu̱xu bi̱ xtaa mekhuíí, kaʼwu gáʼni mbiʼyaaʼ” (Mat. 6:9).

¹¹ Náá numuu dí gíʼmaa musngajmá dí Jeobá naʼni dí májánʼ ga̱jma̱a̱ dí mbiʼyuu nindxu̱u̱ kaʼwu rá. Numuu rí náa jardín dí nirígá náa Edén, Gixa̱a̱ niʼthí dí Jeobá Dios naʼni nduwaʼ ga̱jma̱a̱ dí na̱nguá nixnúu rí májánʼ Adán ga̱jma̱a̱ Eva (Gén. 3:​1-5). Ma̱ngaa niʼthí rí Jeobá tséjmañuu maʼtáñajunʼ, rígi̱ niʼni gachúu mbiʼyuu Jeobá. Ga̱jma̱a̱ índo̱ nixtáa Job niʼthí rí xa̱bu̱ nuni̱ ñajuunʼ Dios i̱ndó numuu dí kua̱ʼthi̱i̱n dí makánún, ma̱ngaa rí xa̱bu̱ muniña̱a̱ʼ runi̱ ñajuunʼ Jeobá índo̱ gúraʼníí mbá gamiéjunʼ numuu dí na̱nguá má endún kuyáá wéñuuʼ (Job 1:​9-11; 2:4). Ndiyóoʼ mbayuʼ mbiʼi mu makujmaa tsáá phú eʼthí dí gajkhun: Jeobá o Gixa̱a̱ dxe̱ʼ.

“NAXNAJXÍ VIDA NDRÍGÓʼ”

12. Ndiéjunʼ nixtáa xawii maʼni Jesús ga̱jma̱a̱ numuu dí nandoo kaʼyoo mbiʼyuu Jeobá rá.

¹² Jesús ra̱ʼkhá tháán nindoo kaʼyoo Anu̱u̱, dí nindoo maʼni kaʼwi̱i̱ mbiʼyuu ga̱jma̱a̱ masngájma dí naʼni rí májánʼ, ikha jngóo niʼthí: “Naxnajxí vida ndrígóʼ” (Juan 10:​17, 18). Nixtáa xawii makhañúu ga̱jma̱a̱ numuu mbiʼyuu Jeobá.b Adán ga̱jma̱a̱ Eva túnimbu̱ún kuyáá Jeobá ga̱jma̱a̱ nigún kidxuuʼ Gixa̱a̱. Mú Jesús nixtáa xawii ma̱ʼkha̱ náa tsu̱du̱u̱ Ku̱ba̱ʼ ga̱jma̱a̱ niʼnimbo̱o̱ náa xúgíʼ mbiʼi rí nixtáa (Heb. 4:15; 5:​7-10). Niwi̱ji̱ jmbu asndu índo̱ nijuiʼdujmaa náa ixi̱ (Heb. 12:2). Xúʼko̱ nisngájma dí ra̱ʼkhá tháán nandoo kaʼyoo Jeobá ga̱jma̱a̱ mbiʼyuu.

13. Náá numuu dí Jesús ma̱ndoo masngájma dí Gixa̱a̱ naʼni nduwaʼ rá. (Atayáá ma̱ngaa xtiʼkhuu.)

¹³ Xúgíʼ dí niʼni Jesús nasngájma dí Gixa̱a̱ nindxu̱u̱ bi̱ naʼni nduwaʼ, raʼkháa Jeobá (Juan 8:44). Mbáwíí Jesús naniniiʼ itháán májánʼ Jeobá, ikha jngóo ikhaa ma̱ndoo mbaʼyoo á mu dí niʼthí Gixa̱a̱ ga̱jma̱a̱ numuu Jeobá nindxu̱u̱ gajkhun. Mú ikhaa niraʼwíí maʼtámbáyúu mbiʼyuu Jeobá, rígi̱ nisngájma dí xúgíʼ dí niʼthí Gixa̱a̱ nindxu̱u̱ nduwaʼ. Maski ajndu nikujmaa dí Jeobá niniñáti̱ga̱a̱ Jesús, mú niwi̱ji̱ jmbu ga̱jma̱a̱ nindoo makhañúu ki xóo rí xánimboo kaʼyoo Anu̱u̱ (Mat. 27:46).c

“NINIGÁJXU̱U̱ ÑAJUNʼ RÍ IKHÁÁN NIRAXNÁ NGAWUʼ”

14. Ndiéjunʼ niʼni Jeobá mu maʼni tsajkurámaaʼ Jesús numuu dí niwi̱ji̱ jmbu rá.

¹⁴ Náa oración rí Jesús niʼni nákha inu makhañúu, niʼthúu̱n Jeobá: “Ninigájxu̱u̱ ñajunʼ rí ikháán niraxná ngawuʼ”. Ikhaa ndiʼyoo gajkhun dí Jeobá maʼni tsajkurámaaʼ numuu dí niwi̱ji̱ jmbu (Juan 17:​4, 5). Ga̱jma̱a̱ xúʼko̱ má nirígá numuu dí Jeobá tániñuuʼ rí maguanúu mba̱yu̱u̱ʼ náa iñá wajin (Hech. 2:​23, 24). Niʼniga̱bi̱i̱ ga̱jma̱a̱ nixnúu mbá ñajunʼ rí itháan gíʼdoo numuu náa mekhuíí (Filip. 2:​8, 9). Mbayu̱u̱ʼ tsiguʼ nda̱wa̱á, Jesús nigíʼdu̱u̱ niʼtáñajunʼ xóo Rey náa Reino ndrígóo Dios. Ndiéjunʼ gáʼngo̱o̱ gáʼni Reino bugi̱ rá. Jesús niʼthí rígi̱ índo̱ niʼsngúlúʼ dí munda̱ʼa̱a̱ Jeobá: “Ga̱ʼkha̱ rí naratáñajunʼ. Gaguma rí nandaaʼ ikháán, xó má mekhuíí xúʼko̱ má náa tsu̱du̱u̱ ku̱ba̱ʼ ma̱ngaa” (Mat. 6:10).

15. Ndiéjunʼ ma̱ngaa gáʼni Jesús rá.

¹⁵ Gítháán má tígo̱o̱ dí Jesús maxmína̱ʼ gajmíi̱n xa̱bu̱ sia̱nʼ ndrígóo Dios ga̱jma̱a̱ maʼni gámbíin bi̱ ra̱míjínʼ náa Armagedón (Apoc. 16:​14, 16; 19:​11-16). Ikhú madama̱ʼa̱a̱n Gixa̱a̱ náa iñá mbiʼ náa maguguaraʼaa ga̱jma̱a̱ xándoo maʼni nimbá (Apoc. 20:​1-3). Nda̱wa̱á Jesús magíʼdu̱u̱ maʼtáñajunʼ mbá Mil tsiguʼ, ikhaa maʼni dí náa tsu̱du̱u̱ Ku̱ba̱ʼ marigá dí tsímáá ga̱jma̱a̱ mambáñún xa̱bu̱ mani̱ndxu̱ún jmbiin. Maʼni ga̱bi̱ín bi̱ nikháñún ga̱jma̱a̱ maʼni rí náa xúgíʼ Ku̱ba̱ʼ mani̱ndxu̱u̱ mitsaanʼ. ¡Ikhú mambanúu rí Jeobá nandoo! (Apoc. 21:​1-4).

16. Xú káʼnii gákuwáanʼ nda̱wa̱á rí gájngoo mbá Mil tsiguʼ dí matañájunʼ Jesús rá.

¹⁶ Xú káʼnii gákuwáanʼ nda̱wa̱á rí gájngoo mbá Mil tsiguʼ dí maʼtáñajunʼ Jesús rá. Xa̱bu̱ ni xánindxu̱ún xa̱bu̱ aʼkhá ga̱jma̱a̱ ni xákiéʼkhúún itháan. Mu ma̱ndoo mambajxúlú gajmiúlú Jeobá ni xáʼyóoʼ má makuwá bi̱ mbá 144,000 mu mani̱ndxu̱ún ndxajkun, ni má Jesús mu mani̱ndxu̱u̱ ndxajkun bi̱ phú kayá edxu̱u̱. Ga̱jma̱a̱ “dí nakháñulú bi̱ nindxu̱u̱ xóo mbáa bi̱ sia̱nʼ gajmiúlú bi̱ naguanúu iwáá kayuuʼ, maguma gámbáa”. Ikhú magabi̱ín xa̱bu̱ bi̱ nikháñún ga̱jma̱a̱ xúgíinʼ bi̱ gakuwá náa tsu̱du̱u̱ Ku̱ba̱ʼ mani̱ndxu̱ún xa̱bu̱ jmbiin (1 Cor. 15:​25, 26).

17, 18. a) Ndiéjunʼ gárígá nda̱wa̱á dí gájngoo mbá Mil tsiguʼ dí matañájunʼ Jesús rá. b) Ndiéjunʼ gáʼni Jesús índo̱ gáwámbá rí maʼtáñajunʼ rá. (1 Corintios 15:​24, 28; atayáá ma̱ngaa xtiʼkhuu.)

¹⁷ Ndiéjunʼ ma̱ngaa gárígá nda̱wa̱á rí gájngoo mbá Mil tsiguʼ dí maʼtáñajunʼ Jesús rá. Marigá mbá dí ra̱ʼkhá tháán nagui̱i̱. Nimbáa ni xáʼni a̱jma̱ a̱jkiu̱u̱n dí Jeobá nindxu̱u̱ mbáa Dios kaʼwii ga̱jma̱a̱ bi̱ naʼni rí májánʼ. Náa jardín dí rígá náa Edén, Gixa̱a̱ niʼthí dí Jeobá naʼni nduwaʼ ga̱jma̱a̱ dí tséjmañuu maʼtáñajunʼ ma̱ngaa rí tsíyoo gáʼñúún xa̱bu̱. Asndu nákha ikhú, xa̱bu̱ bi̱ nuni̱ ñajuunʼ nuni̱ kaʼwi̱i̱ mbiʼyuu. Índo̱ gájngoo rí mbá Mil tsiguʼ, maguma kaʼwi̱i̱ mbá kayuuʼ mbiʼyuu Jeobá. Anu̱lú bi̱ xtáa mekhuíí masngájma rí gajkhun nandoo kaʼyulú.

¹⁸ Ikhú xúgíinʼ xa̱bu̱ maguánú mbuyáá dí nindxu̱u̱ minduwaʼ rí Gixa̱a̱ niʼthí ga̱jma̱a̱ numuu Jeobá. Ndiéjunʼ gáʼni Jesús índo̱ gáwámbá rí maʼtáñajunʼ rá. Lá mbaʼyáridoo Gixa̱a̱ ga̱jma̱a̱ makujximínáʼ náa Jeobá xá. ¡Na̱nguá! (Atraxnuu 1 Corintios 15:​24, 28). Jesús nindxu̱u̱ mixtiʼkuii. Ikhaa maxnájxi̱i̱ rí maʼtáñajunʼ náa Anu̱u̱ ga̱jma̱a̱ maniñamina̱ʼ mu maʼtáñajuunʼ, maʼni rígi̱ numuu dí nandoo kaʼyoo Jeobá.

19. Ndiéjunʼ eyoo gáʼthúu̱n mbiʼyuu Jeobá, eʼyoo Jesús rá.

¹⁹ Ikha jngóo Jeobá nixnúu mbiʼyuu A̱ʼdióo mu maʼthí ga̱jma̱a̱ numuu. Ga̱jma̱a̱ Jesús nisngájma májánʼ xú káʼnii nindxu̱u̱ Anu̱u̱. Ikha jngóo ndiéjunʼ eyoo gáʼthúu̱n mbiʼyuu Jeobá, eʼyoo Jesús rá. Ndaʼyoo dí rígi̱ nindxu̱u̱ dí itháán gíʼdoo numuu. Nixtáa xawii makhañúu ga̱jma̱a̱ numuu mbiʼyuu Jeobá ma̱ngaa maxtáa xawii maxnájxi̱i̱ xúgíʼ Jeobá nda̱wa̱á rí gájngoo mbá Mil tsiguʼ dí maʼtáñajunʼ. Xú káʼnii gándoo gúʼyaridáá Jesús rá. Grajxe̱ rígi̱ muriʼña̱a̱ náa imbo̱o̱ artículo.