Atasngájma ngajua

Dí narígá

Tsémbá mbá nacha̱ dí matatsaʼwamínáʼ dí raʼkhí xóo kiexu̱u̱n eʼwíinʼ. Mu mambáa mbá kayuʼ virus ndayóo’ mbayuuʼ mbiʼi ga̱jma̱a̱ tsiakii, xúʼko̱ má kayuuʼ erígá índo̱ nuʼnimijna rí xundxaʼwamíjna dí raʼkhí xóo kiexu̱u̱n eʼwíinʼ. Ndiéjunʼ gambáyulú rá.

Ikha rí na̱ʼkha̱ náa Biblia

Xtiʼkhu rí nakujmaa: 1. Mbáa xa̱biya̱ bi̱ na̱ʼkha̱ náa Asia nambáʼtho̱o̱ xkrugua mato̱ʼo̱o̱ mbáa xa̱biya̱ xkunii bi̱ kagu taza náa kajni̱ʼ café. 2. Ikháá má xa̱biya̱ skunii naxnún café muwa̱a̱n a̱ngui̱i̱n bi̱ nañajunʼ gajmíi̱n, asndu a̱ʼgu̱ bi̱ na̱ʼkha̱ náa India bi̱ niʼthá ginii.

“Gaʼndala ku̱ñu̱u̱n xúgínʼ, numuu dí rúʼko̱ naruwáanʼla májánʼ wéñuʼ” (COLOSENSES 3:14).

Ndiéjunʼ eyoo gáʼthúu̱n rá. Rí muʼniu̱u̱n dí májánʼ eʼwíinʼ naʼni makuwáanʼ mbá kambáxulú. Á mu natasngájma ngajua maʼni rí xátatsaʼwamínaʼ dí raʼkhí xóo kiexu̱u̱n, rúʼko̱ gaʼni rí xawiyaaʼ xtañún.

Rí ma̱ndoo matani

Xtiʼkhu rí nakujmaa Collage: 1. Mbáa a̱ʼgu̱ bi̱ na̱ʼkha̱ náa India nambáyúu imba̱a̱ a̱ʼgú nikhi̱i̱ bi̱ miʼxáa matsimuu náa escalera ga̱jma̱a̱ nambáyúu rí kagu̱. 2. Aʼgú nikhi̱i̱ bi̱ miʼxáa naxnúu galleta xa̱bu̱ bi̱ na̱ʼkha̱ náa Asia bi̱ niʼthá ginii bi̱ xtáa mijngii náa goʼwóo.

Atatsaʼwáminaʼ mbájmbu xú kaʼnii gatasngajmá rí nandaaʼ xtañún xa̱bu̱ bi̱ tsínigua̱a̱ʼ eni. Xáʼyóoʼ má matani dí gakhii wéñuʼ. Ma̱ndoo mataʼgíiʼ matani dí e̱ʼkha̱ raʼthí gi̱i̱:

Á mu nusgájmuun ngajua eʼwíinʼ, rúʼko̱ gaʼni rí xundxaʼwáá edxu̱lúʼ dí raʼkhí ga̱jma̱a̱ numún

Atasngájma rí májánʼ a̱jkia̱nʼ, mbá xkri̱da arajthuun xkrugua manújngún o náa carro á mu nándáa náa matri̱gi̱i̱n araxnún náa xtaʼwunʼ.
Aratamíjná gajmiáanʼ maski ajndu tsíjmañún májánʼ gúthi ajngáa dí naratá.
Gaʼngo̱o̱ a̱jkia̱a̱nʼ índo̱ nuni mbá rí ikháán tsíkrua̱ʼa̱ʼ.
Atadxawíín májánʼ dí gútháán ga̱jma̱a̱ ataniminaʼ makrua̱ʼa̱a̱ʼ xkujndu dí guaʼdáá.

Xkri̱da ndrígu̱ún tikhun: Nazaré (Guinea-Bissau)

“Nákhi ginii na̱nguá nindoʼ gáñuun bi̱ naguwáʼ i̱mba̱ níʼkhá. Nithu̱nʼ dí ikhiin nuni nduwiinʼ xa̱bu̱ ñajunʼ mu mixtambáñuun o ni̱ndxu̱ún xa̱bu̱ ramíjíinʼ, ikha jngó niʼniuʼ gakhii maʼndoʼ ka̱ñu̱u̱n. Mú tákumuʼ rí nini xúʼko̱ numuu dí nindxaʼwamínaʼ dí raʼkhí xóo kiexu̱u̱n. Numuu dí mbaʼin xa̱bu̱ nakumu̱ún kayuʼ má xúʼko̱ ga̱jma̱a̱ numún”.

“Nda̱wa̱á ni̱jkhánú ndi̱yo̱o̱ rí nindxa̱ʼwa̱mínáʼ dí raʼkhí ga̱jma̱a̱ numún bi̱ naguwáʼ i̱mba̱ níʼkhá. Dí nijmañuʼ náa Biblia nimbáyuʼ maniu̱u̱ dí májánʼ. Rí xúgi̱ na̱jkhá kanuu náa ikhiin, natamijná gajmíi̱n ga̱jma̱a̱ naniminaʼ maniʼnúnʼ itháan. Nánguá eñu̱u̱n xóo nákha ginii”.