Consejo rí mambáñún bi̱ kúwá mbá guʼwi̱i̱n mu makuwá gagi

Xa̱bekha, gaʼndala ku̱ñu̱u̱n má xúʼko̱ guʼyala

“Xa̱bu̱ bi̱ ninigu̱nʼ ndayóoʼ maʼndún kuñún guʼñu̱ún xó má nandún kuyáá xuñúnʼ. Xa̱biya̱ bi̱ nandoo kaʼyoo a̱ʼgiu̱u̱ xúʼko̱ má eyoo kaʼyaminaʼ ma̱ngaa, numuu rí nimbáa na̱nguá ewiyu̱u̱ʼ kaʼyoo xuyuuʼ, rí naʼni naxnúu rí mikhu ga̱jma̱a̱ nañewu̱u̱n májánʼ” (EFESIOS 5:28, 29).

Xa̱bu̱ bi̱ ninigúnʼ ikhaa kayá edxu̱u̱ náa goʼwóo (Efesios 5:23). Mbáa xa̱biya̱ bi̱ májáanʼ na̱nguá gujkhuʼ a̱jkiu̱u̱n náa a̱ʼgiu̱u̱ rí phú naʼni ndaʼyamajkuu, nañewu̱u̱n, naxnúu rí ndayóo, naʼni a̱jkiu̱u̱n índo̱ xtáa ngíná. Ma̱ngaa ndayáʼ xóo maʼni mu a̱ʼgiu̱u̱ maxtáa tsímáá, tsétsudaaʼ a̱ʼgiu̱u̱ maʼni rí nandoo ikhaa (Filipenses 2:4). Índo̱ naʼtámíjná ga̱jma̱a̱ naʼthúu̱n rí naku̱mu̱u̱ ma̱ngaa rí nandxa̱ʼwa̱mínáʼ mú ma̱ngaa naʼdxawuun. Tsékiʼnáa kaʼyoo ni má tséxnúu ni tséʼtá wéñuuʼ (Colosenses 3:19).

Gu̱ʼu̱ guyamajkún a̱jmbia̱la

“A̱ʼgu̱ gíʼmaa mbaʼyamajkuu wéñuuʼ ajmbio̱o̱” (EFESIOS 5:33).

A̱ʼgu̱ nayambáá marigá tsímáá náa goʼwóo índo̱ ndaʼyamajkuu ajmbio̱o̱ ga̱jma̱a̱ nambáyúu náa dí naraʼwíí maʼni. Á mu ajmbio̱o̱ nakiéʼkúun tséʼni majti̱i̱, rí naʼni ndaʼyamajkuu má xúʼko̱ ga̱jma̱a̱ tsékiʼnáa (1 Pedro 3:4). Ma̱ngaa índo̱ ndayóoʼ maʼnimbánuu ga̱jma̱a̱ mbá xkujndu, ndaʼyoo nguáná gáʼni ma̱ngaa gíʼmaa maʼni ga̱jma̱a̱ gamajkhu (Eclesiastés 3:7).

Ganindxa̱a̱ʼ jmbii náa bi̱ ndiyáa

“Xa̱biya̱ [...] maxtáa ga̱jma̱a̱ a̱ʼgiu̱u̱ ma̱ngaa maguanu mani̱ndxu̱ún mbóó xuwiʼ” (GÉNESIS 2:24).

Índo̱ mbáa xa̱biya̱ ga̱jma̱a̱ a̱ʼgu̱ nudamijná naguánu nanindxuún xóo mbá ñuu rí xándoo gútu. Ikha jngóo mbá najmiin gíʼmaa muni tsiakimíjna rí makuwá má xúʼko̱ mbá kambájxu̱u̱n. Xú káʼnii gándoo gúni xá. Ma̱ndoo muni á mu nandún kuyamíjna̱ ga̱jma̱a̱ xúgíʼ a̱jkiu̱ún, ma̱ngaa á mu nuxnamijná regalos. Ga̱jma̱a̱ nditháan xándoo mubúúnʼ gajmiún mbáa bi̱ na̱nguá ndiya̱a̱. Rí nuni nduwamijná naʼni dí xakumún kuyamíjna̱ ma̱ngaa naʼni rí xákúwá tsímáá bi̱ kúwá náa guʼwún (Hebreos 13:4).

Xa̱bu̱ guanii gusngún e̱jña̱la

“Arasngáá dxámá maʼga̱ náa kamba̱a̱ rí kaʼyoo; índo̱ gáʼni xa̱bu̱ nikhi̱i̱ xagajnúriyoʼ ikhí” (PROVERBIOS 22:6).

Dios nirajkuáa ñawúúnʼ xabuanii rí musngúún e̱jñu̱ún, xóo rí muguaʼdáá gamajkhún ma̱ngaa ikhiin gíʼmaa mugíʼ xkri̱da náa e̱jñu̱ún (Deuteronomio 6:6, 7). Á mu ada̱ naʼni dí raʼkhí, xabuanii bi̱ májáanʼ a̱jkiu̱ún tséni mbaʼ munií, rí phú nuni nakúwá “xawii mu mudxawíín, tséthi mbá nacha̱ ga̱jma̱a̱ tsékasngañún mbá nacha̱” (Santiago 1:19). Á mu ndayóoʼ makhánaa castigo ada̱, nuni numuu rí nandún kuyáá, raʼkháa numuu rí nakiʼníin kuyáá.

E̱ji̱n, gunimbala kuñu̱u̱n ana̱la

“E̱ji̱n gunimbala kuñu̱u̱n ana̱la [...]. ‹Atayamajkuíí ana̱a̱ʼ ga̱jma̱a̱ ru̱dáaʼ›” (EFESIOS 6:1, 2).

E̱ji̱n gíʼmaa munimbu̱ún ga̱jma̱a̱ mbuyamajkún anu̱ún ma̱ngaa rudún. Índo̱ nuni xúʼko̱ narígá tsímáá ga̱jma̱a̱ nakúwá gagi mbá guʼwíin. Índo̱ e̱ji̱n nani nusngajma rí nduyamajkhún anu̱ún índo̱ nuñewu̱u̱n. Mbá xkri̱da nduyáá á mu májánʼ guʼwún náa kúwíin o numbañún ga̱jma̱a̱ mbújkha̱a̱ índo̱ ndañún (1 Timoteo 5:3, 4).