Kíxnuu 8

Rí xú kúwi̱i̱n mbá guʼwíín nanigu̱ʼ kaʼñun Dió

Ndíí giʼmaa maʼni mbáá xa̱biya̱ náa goʼóo. (1)

Xú káʼnii giʼmaa maʼni mbáá xa̱biya̱ ga̱jma̱a̱ a̱ʼgiu̱u̱. (2)

Náa biʼyaa wi̱ji̱ inuu maʼni mbáá xa̱biya̱. (3)

Náa biʼyaa dí wi̱ji̱ inu maʼni mbáá aʼgu̱ náa goʼóo. (4)

Ndíí la e̱nda̱ʼa̱ Dió maʼni mbáá xa̱biya̱ ga̱jma̱a̱ a̱ʼgiu̱u̱ xúʼko má e̱ji̱n. (5)

Xú eʼyoo Biblia ga̱jma̱a̱ numúun bí nuniñamijna̱a̱ mangin bí nuturiga̱a̱ iñúun. (6, 7)

1. Náa Biblia naʼti rí xa̱biya̱ kaya edxu̱u̱ náa goʼóo (1 Corintios 11:3). Xa̱biya̱ giʼmaa magiʼda̱ mbáwii a̱ʼgiu̱u̱ mangoo giʼmaa rí maguaʼdáa iñúun rí nidamijna (1 Timoteo 3:2; Tito 3:1).

2. Xa̱biya̱ giʼmaa maʼndoo kaʼyoo a̱ʼgiu̱u̱ xó má eyoo kaʼyaminaʼ ikhaa. Giʼmaa mañewu̱u̱n xóo má Jesús niñewu̱u̱n xa̱bi̱i̱ (Efesios 5:25, 28, 29). Ajndu nimbá miʼtsu ragiʼmaa maxnúú ajndu má maʼtá wéñuʼ. Rí phú giʼmaa maʼni mangajo̱o̱ kaʼyo mangoo mbaʼyamajkhu (Colosenses 3:19; 1 Pedro 3:7).

3. Xa̱biya̱ giʼmaa rí mañajunʼ gaki̱i̱ numuu rí maxniʼtsun bí kúwi̱i̱n náa goʼóo. Giʼmaa maxná ganitsu, xtíin mangoo guʼwá náa maxtáa a̱ʼgiu̱u̱ gajmíín e̱ji̱i̱n. Mangoo giʼmaa maʼsngúún bí kúwi̱i̱n náa goʼóo ajngáa raunʼ Dió (1 Timoteo 5:8). Ikhaa phú gaʼga gini, mambañuun bí kúwi̱i̱n náa goʼóo majmañún ga̱jma̱a̱ numuu Dió mangoo rí wi̱ji̱ maʼni (Deuteronomio 6:4-9; Efesios 6:4).

4. Aʼgu̱ giʼmaa rí mambáyuu májánʼ ajmbio̱o̱ (Génesis 2:18). Giʼmaa mambáyuu mbayi̱i̱ mú musngúún e̱jñún (Proverbios 1:8). Jeobá eyoo rí aʼgu̱ mañewu̱u̱n bí kúwi̱i̱n náa goʼóo ga̱jma̱a̱ xúgíʼ a̱jkiu̱u̱n (Proverbios 31:10, 15, 26, 27; Tito 2:4, 5). Aʼgu̱ giʼmaa magiʼdo wéñuʼ gamajku náa ajmbio̱o̱ (Efesios 5:22, 23, 33).

5. Dió na̱nda̱ʼa̱ rí e̱ji̱i̱n munimbu̱u̱n náa anúun (Efesios 6:1-3). Ikhaa giʼthu̱u̱n rí bí guaʼdiin e̱jñún musngúún mangoo muxprigúun. Mbá xa̱biya̱ ga̱jma̱a̱ a̱ʼgiu̱u̱ giʼmín rí muriyaaʼ awaan makuwíín gajmiún e̱jñún kámí muniga̱jma̱a̱ Biblia, mumbañúun muniʼnii Dió kámí maʼnduun kuñún (Deuteronomio 11:18, 19; Proverbios 22:6, 15). Nimbá miʼtsu ragiʼmín muxnún e̱jñún mbaaʼ ndaʼkhu wéñuʼ ajndu muniginíín (Colosenses 3:21).

6. Índo̱ rí xa̱bu̱ gájmiin naguanu naguaʼdaa xkujndu rí xú makuwá, itáan májánʼ rí mugi̱ʼ muni rí eʼthi Biblia. Náa Biblia naʼti rí giʼmáanʼ maʼndulúʼ kuʼyamijná muʼni mba̱a̱ a̱jkiu̱lúʼ kuʼñún eʼwíínʼ (Colosenses 3:12-14). Náa ajngáa raunʼ Dió tseʼthi rí muniñamijna̱a̱ xa̱bu̱ índo̱ guaʼda xkujndu rí ajndu nangua giʼdo numuu wéñuʼ. Mú aʼgu̱ mandoo maniñaanʼ mbayi̱i̱ ámu 1) ikhaa naʼni gaʼduun wéñuʼ rí maxnitsun bí kúwi̱i̱n náa goʼóo, 2) ámu nakiʼnáá wéñuʼ naʼni xuíí ajndu naʼni ginaa jamí mitsaʼkháán rí ikhaa makañúú, o 3) narikho wéñuʼ tsexnuu rí mbaʼyamajkhu Jeobá (1 Corintios 7:12, 13).

7. Maʼndún kuyamijná má xúʼkhii̱n bí nidamijna. Xa̱bu̱ bí nabo̱o̱ʼ ga̱jma̱a̱ imba̱a̱ kaníí nindxu̱u̱ mbóó aʼkhá náa Dió ga̱jma̱a̱ náa xa̱bu̱ bí ndiyáa (Hebreos 13:4). Biblia naʼthi rí mbáá xa̱bu̱ mandoo maxkuʼturiga̱a̱ i̱yi̱i̱ʼ mandoo manuju̱nʼ o manigúnʼ ámu a̱ʼgiu̱u̱ o mbayi̱i̱ nabo̱o̱ʼ ga̱jma̱a̱ imba̱a̱ (Mateo 19:6-9; Romanos 7:2, 3). Jeobá tsenigu̱ʼ rí mbáá maxkuʼturiga̱a̱ i̱yi̱i̱ʼ mbayáa imba̱a̱ ámu Biblia tseniñunʼ maʼni xúʼkhii̱n (Malaquías 2:14-16).

[Xtiʼkhu rí na̱ʼkha̱ náa ináa 17]

Mbá xa̱bu̱ bí nandoo kaʼñun wéñunʼ e̱ji̱i̱n naxnún rí ndañunʼ mangoo nasʼngúún rí eʼthi ajngáa raunʼ Dió

[Xtiʼkhu rí na̱ʼkha̱ náa ináa 17]

Dió giʼthu̱u̱n rí xa̱bu̱ bí guaʼdiin e̱jñún musngúún mangoo muxprigúun e̱jñún