Kíxnuu 7
Xú káʼnii guʼguanú mijngii náa Dió ga̱jma̱a̱ rí mugríga̱a̱
Ñájunʼ giʼdo wéñuʼ numuu mugríga̱a̱ nangi eʼni rá. (1)
Tsáa lá giʼmaa mugríga̱a̱, xú káʼnii rá. (2, 3)
Káʼnii lá iʼwaaʼ gandoo muʼthá índo̱ nuʼtá káñí. (4)
Nguanáá giʼmáánʼ ikháánʼ matagríga̱a̱. (5, 6)
Lá naʼdxun Dió xúgíʼ rí naratá káñí xáʼ. (7)
1. Rí muʼtá káñí nandoo gaʼti rí muʼni wabamijná muʼtán Dió. Gugríga̱a̱ Dió nangi eʼni. Ámu nuʼni xúʼkhii̱n, makumulúʼ rí kuwánʼ mijngii ndu xóo mbáá bí nambáxulúʼ májánʼ gajmiulúʼ. Maskijndu Jeobá nindxu̱u̱ itáan mba̱a̱ mangoo giʼdo wéñuʼ sieki̱i̱ naʼdxaun rí nuʼtá káñí. Lá natagríga̱a̱ Dió ikháánʼ nangi eʼni ráʼ. (Salmo 65:2; 1 Tesalonicenses 5:17.)
2. Rí mugríga̱a̱ mbá kajua̱a̱ ga̱jma̱a̱ rí mbuʼyamajkuí Jeobá. Ikha jngó, indió Jeobá Dió giʼmáanʼ mugríga̱a̱. Índo̱ Jesús nixtáa náa tsu̱du̱u̱ ku̱ba̱ʼ, nigrígo̱o̱ má xúʼkhii̱n Anu̱u̱, nda̱wa̱a̱ tsáa imbáá. Xúʼkhii̱n má giʼmaa muʼni mangáanʼ (Mateo 4:10; 6:9). Mú giʼmáanʼ mugríga̱a̱ má xúʼkhii̱n ga̱jma̱a̱ nambiʼyuu Jesús. Xúʼkhii̱n nusngájmá rí nduʼyamajkuíí Jesús mangoo nuʼnimbulúʼ rí niʼni ikhaa, rí nixnáximináʼ ga̱jma̱a̱ numulúʼ (Juan 14:6; 1 Juan 2:1, 2).
3. Índo̱ nugríga̱a̱ Dió, giʼmáanʼ muʼtán asndu náa amiulúʼ. Ragiʼmáanʼ muʼthá kikha ndu má mbuʼyarídaa i̱yi̱i̱ʼ rí mugríga̱a̱ (Mateo 6:7, 8). Mandoo mugríga̱a̱ ndu xó má eyuluʼ mú gu̱ʼni̱ jma̱a̱ gamajku, ndu náa má mbiʼi̱i̱ ndu náa má kuwánʼ. Ajndu naʼdxaun Dió rí nugríga̱a̱ mañúú rí nagajnu ná amiulúʼ (1 Samuel 1:12, 13). Índo̱ gaʼndaʼ marata káñí atayaa náa wii kri̱ga̱ náa nangua kúwi̱i̱n xa̱bu̱ (Marcos 1:35).
4. Káʼnii lá iʼwááʼ gando garata ikháánʼ índo̱ garata káñí. Ndu biʼyaa rí mambayaaʼ o rí maʼnigachúú rí mambaxa̱ʼ májánʼ ga̱jma̱ʼ (Filipenses 4:6, 7). Xkrida rí xú miʼtá káñí nasngájma rí giʼmáanʼ mugríga̱a̱ ga̱jma̱a̱ rí Jeobá nandoo maʼni ga̱jma̱a̱ nambiʼyuu. Mangoo mandoo munda̱ʼa̱a̱ rí eyuluʼ, rí maʼni mba̱a̱ a̱jkiu̱u̱n ga̱jma̱a̱ aʼkhá ndrigulúʼ mangoo mambayulúʼ mú xuʼni dí ra̱májánʼ (Mateo 6:9-13). Xunda̱ʼa̱ indió ga̱jma̱a̱ numulúʼ índo̱ nugríga̱a̱. Giʼmáanʼ munda̱ʼa̱ indió rí enigu̱ʼ Dió (1 Juan 5:14).
5. Ikháánʼ mandoo matagríga̱a̱ má xúʼkhii̱n índo̱ gagajnu ndu náa ámia̱nʼ maraxna̱a̱ núma̱aʼ Dió xúʼkhii̱n má matani mba̱a̱ (1 Crónicas 29:10-13). Xatatsiʼñáaʼ rarata káñí índo̱ garaʼdaa xkujndu mangoo índo̱ gagiʼnuu gaki̱i̱ fe ndrigáʼ (Salmo 55:22; 120:1). Mangoo májánʼ matagríga̱a̱ nákha xóo tsetsiʼtsu (Mateo 14:19). Jeobá nandoo rí mugríga̱a̱ «kámbá nutu» (Efesios 6:18).
6. Índo̱ nuxuʼdamijna̱ aʼkhá rí mitsáʼkhún wéñuʼ giʼmáanʼ mugríga̱a̱ mangoo muʼtájkáán Jeobá mú magaʼwínʼ a̱jkiu̱u̱n kaʼyulúʼ mangoo maʼni mba̱a̱ a̱jkiu̱u̱n. Dió xtáa «xawii maʼni mba̱a̱ a̱jkiu̱u̱n» kaʼyulúʼ índo̱ guʼta majpulúʼ xúgíʼ aʼkhulúʼ mangoo mu̱ʼgi̱ʼ rí naxagutangáanʼ muxuʼdamijna̱ aʼkhá (Salmo 86:5; Proverbios 28:13).
7. Jeobá naʼdxaún indió bí nuni rí jmbu, bí nuta káñí ikhaa. Mú Dió maʼdxaun índo̱ garata káñí, ikháánʼ giʼmáánʼ mataʼgimináʼ mú maraxtaa xó eʼthi xtángoo ndrigóó (Proverbios 15:29; 28:9). Índo̱ gatagríga̱a̱, giʼmáánʼ matani wabaminaʼ (Lucas 18:9-14). Rí natanda̱ʼa̱ giʼmaa masngájma rí xúʼkhii̱n gatani. Xúʼkhii̱n gatasngajmá rí xtaʼda fe mangoo dí narata nindxu̱u̱ gajkhun. Indió ikhú gariʼñáaʼ Jeobá rí natagríga̱a̱ (Hebreos 11:6).