Jesús naraʼwíi Saulo

Saulo nindxu̱u̱ mbáa xa̱bu̱ romano bi̱ nigumaa náa Tarso. Ninindxu̱u̱ mbáa fariseo bi̱ najmañuu wéñuʼ xtángoo ndrígu̱ún judíos ga̱jma̱a̱ naguiyuʼ kaʼñúún cristianos. Nixmájtiin náa rexo̱o̱ guʼwún, xa̱bekha ga̱jma̱a̱ gu̱ʼu̱, ma̱ngaa nakudiinʼ náa guʼwá e̱jua̱nʼ. Asndu niwi̱ji̱ ndiʼyoo rí mbaʼin xa̱bu̱ bi̱ nakiʼníin wéñuʼ nixiyáa discípulo Esteban.

Mú Saulo raʼkháa i̱ndó nindoo rí maguguiin cristianos náa Jerusalén. Ikha jngó nindo̱ʼo̱o̱ bi̱ kayá edxu̱u̱ náa ndxajkun mu makunguanʼ náa xuajen Damasco mu ma̱ngaa maxkhúún cristianos bi̱ kuwa ikhí. Índo̱ Saulo xtáa mijngii náa xuajen, mbá aguʼ nimbiʼiti̱ga̱ gakhi̱i̱ wéñuʼ náa ikhaa, ga̱jma̱a̱ ikhaa nixpríga̱a̱ mbayííʼ. Ikhú niʼdxuun mbá aʼwá: “Saulo, náa numuu rí natraxkoʼ rá.” Saulo niraxi: “Tsáa ni̱ndxa̱ʼ”. Aʼwá niriʼña̱a̱: “Ni̱ndxu̱ʼ Jesús. Ayuʼ náa Damasco, ga̱jma̱a̱ ikhí gíʼtháanʼ rí gíʼmaa matani”. Ikhú, nigúgoo iduu Saulo, ga̱jma̱a̱ xa̱bu̱ nirajtuun ñawúunʼ mu magún ku̱ya̱a̱ náa xuajen.

Náa Damasco nixtáa mbáa cristiano bi̱ nigumbiʼyuu Ananías. Jesús niʼthúu̱n náa mbá visión: “Ayuʼ náa goʼwóo Judas, náa calle rí nagumbiʼyuu Recta, ga̱jma̱a̱ atayáaʼ Saulo”. Ananías niriʼñuu: “Señor, ikhúúnʼ nidxuun mbaʼa numuu xa̱bu̱ bugi̱. Ikhaa xtáa rakudiinʼ discípulos náa guʼwá e̱jua̱nʼ”. Mú Jesús niʼthúu̱n: “Ayuʼ gáta̱ya̱a̱ ikhaa, numuu rí ndiʼyáaʼ Saulo mu maʼtáraʼa ajngáa ndrígóo Dios náa mbaʼa xuajen”.

Ikha jngó Ananías ni̱jkha̱ náa Saulo ga̱jma̱a̱ niʼthúu̱n: “Ndxájuʼ Saulo, Jesús nikuʼmún mu mambáʼta̱a̱ idaʼ”. Núkhu, Saulo nindoo niyexi mbu̱júu̱. Nijmañuu mbaʼa ga̱jma̱a̱ numuu Jesús ga̱jma̱a̱ ninindxu̱u̱ xa̱bi̱i̱. Nijngúun iyááʼ ga̱jma̱a̱ nigíʼdu̱u̱ niʼtáraʼa náa sinagoga gajmíi̱n eʼwíínʼ cristianos. Lá natatsaʼwáminaʼ xú káʼnii niʼniún tsiánguá bi̱ judíos ráʼ. Rí xúgi̱ nduyáá Saulo rí naʼsngúún ga̱jma̱a̱ numuu Jesús. Judíos niraximíjna̱: “Lá raʼkháa xa̱bu̱ bugi̱ bi̱ naxkhúún xa̱bi̱i̱ Jesús ráʼ.”

Ajtsú tsiguʼ, Saulo niʼtáruʼun xa̱bu̱ Damasco. Judíos naguiñunʼ kuyáá ga̱jma̱a̱ niriyaʼ awan mu muxiyáa. Mú a̱ngiu̱lú nidxawíín ga̱jma̱a̱ numuu awan rígi̱ ikha jngó nimbayíí mu maʼni kríyaminaʼ. Nixruiguíi náa mbá iñáʼ rí gíʼmaa náa xtátsí ndrígóo xuajen ga̱jma̱a̱ mbá extuʼ.

Índo̱ Saulo ni̱jkha̱ náa Jerusalén, nigíʼ maʼga̱ gáʼñun a̱ngiu̱lú. Mú ikhiin namíñuun kuyáá Saulo. Ikhú mbáa discípulo májánʼ wéñuʼ bi̱ mbiʼyuu Bernabé ni̱jkha̱ kayáa Saulo náa kuwa apóstoles ga̱jma̱a̱ niʼni munimbu̱ún rí Pablo gajkhun niriʼkuminaʼ. Saulo nixtáa náa congregación ndrígóo Jerusalén ga̱jma̱a̱ niʼtáraʼa ga̱jma̱a̱ gagi ajngáa májánʼ ndrígóo Dios. Mbiʼi nda̱wa̱á, xa̱bu̱ nigi̱ʼdi̱i̱ nixna mbiʼí Pablo.