Xárata dí maʼniuu mingíjyúuʼ makro̱ʼo̱o̱

Dí niʼni Jesús

VIDEO: Jesús naʼsngáa ga̱jma̱a̱ xkri̱da dí Jeobá nañewunlú

1. Atayáá VIDEO o atraxnuu Mateo 6:​25-27. Nda̱wa̱á atayáá graxe̱ rígi̱:

1. Xú káʼnii xkri̱da nijmuu Jesús mu maʼsngáa dí Jeobá nañewu̱nlú rá.

2. Maski ajndu Jesús ndiʼyoo mbaʼa ga̱jma̱a̱ numún ñu̱ʼu̱, ndíjkha niʼthí mbá dí ramíʼskhoo makruaʼaaʼ xá. Ndíjkha dí ninindxu̱u̱ májánʼ xóo niʼsngáa xá.

Ndiéjunʼ ejmañulúʼ náa xkri̱doo Jesús rá.

2. Á mu nuʼthá ga̱jma̱a̱ ajngáa dí ra̱mingíjyúuʼ makruaʼaaʼ, xa̱bu̱ marmáʼáan a̱jkiu̱ún dí nuʼsngúún ga̱jma̱a̱ maʼga̱nú asndu náa a̱jkiu̱ún.

Atayaridáá Jesús

3. Xárata wéñuʼ. Xáratha̱a̱n bi̱ narasngáá xúgíʼ dí natayáá ga̱jma̱a̱ numuu tema dí kuwáanʼ ru̱ya̱a̱. Dí itháan májánʼ nindxu̱u̱ dí mbuya̱a̱ má dí na̱ʼkha̱ raʼthí náa i̱yi̱ʼ dí nuʼnigajma̱a̱ ga̱jma̱a̱. Índo̱ gátani̱ mbá graxe̱, gaʼngo̱o̱ a̱jkia̱a̱nʼ maraʼti̱i̱n dí bi̱ narasngáá mariʼña̱a̱. Mú, á mu na̱nguá eʼyoo xóo exti̱ʼña̱a̱ o naʼthí mbá dí na̱nguá embánii ga̱jma̱a̱ dí naʼthí náa Biblia xá. Atani̱i̱ i̱ʼwáʼ graxe̱ rí mambáyúu mariʼñaa májánʼ. Á mu bi̱ narasngáá nikro̱ʼo̱o̱ má dí eyoo gáʼthí, gánújngaaʼ i̱mba̱ punto.

4. Gajmaaʼ dí ndaʼyoo má bi̱ narasngáá mu matambáyii makro̱ʼo̱o̱ ku̱ma̱ dí nuxi̱ʼ. Mbá xkri̱da, á mu matagíʼdi̱i̱ mbá kíxnuu náa na̱ʼkha̱ ga̱jma̱a̱ numuu dí matujxi̱ín xa̱bu̱, ma̱ndoo matanga̱án marata̱ mbá chíʼgíiʼ gajmaaʼ bi̱ narasngáá dí ndaʼyoo má ga̱jma̱a̱ numuu ndiéjunʼ eguáʼníí índo̱ nakháñulú.

5. Atraʼwíí májánʼ xkri̱da dí majmaaʼ. Nákha xóó tsératá mbá xkri̱da, atrajxi̱mínáʼ:

1. “Lá ra̱mingíjyúuʼ xkri̱da rígi̱ ráʼ.”

2. “Lá xájyúuʼ gákro̱ʼo̱o̱ bi̱ nasngóo ráʼ.”

3. “Lá mambáyúu marmáʼáan a̱jkiu̱u̱n kisngáa dí nagájnuriyoʼ raʼkháa i̱ndó xkri̱da dí gájmuʼ ráʼ.”