DÍ NA̱ʼKHA̱ ITHÁAN: C
Xóo guʼsngáa dí naʼthí náa Biblia ga̱jma̱a̱ libro ¡Araxtaa gagi kámuu mbiʼi!
A̱ngiu̱lú nitajkáan wéñuʼ ga̱jma̱a̱ nindxaʼwami̱jna̱ májánʼ ndiéjunʼ ga̱ʼkha̱ náa libro dí Araxtaa gagi. Ikha jngóo mu majmaaʼ májánʼ libro rígi̱, atani̱ xóo na̱ʼkha̱ gi̱i̱ índo̱ gárasngáa dí naʼthí náa Biblia.
Nákhá xóó tserásngáa
1. Atanirataminaʼ májánʼ. Atatsaʼwáminaʼ ndiéjunʼ eyóoʼ, xú káʼnii xtáa ga̱jma̱a̱ ndiéjunʼ enimbo̱o̱ bi̱ narasngáá. Lá rígá dí maʼniuu miʼskhoo makro̱ʼo̱o̱ o magíʼ maʼnimbánuu xáʼ. Atayáá artículo ga̱jma̱a̱ video dí na̱ʼkha̱ náa naʼthí “Atayáá itháan” ga̱jma̱a̱ atatsaʼwáminaʼ xú káʼnii gámbáyúu bi̱ narasngáá. Mu xúʼko̱ maraxtaa xawii majmaaʼ índo̱ gárasngáa á mu ndayóoʼ.
Índo̱ xtaa má narasngáa
2. Á mu bi̱ narasngáá nandoo, ma̱ndoo maratajkáan índo̱ natagíʼdi̱i̱ ma̱ngaa índo̱ naguámbáa natanigájmaa ga̱jma̱a̱ʼ.
3. Tsumáá gátani̱ dí xárata wéñuʼ. Atayáá itháan dí na̱ʼkha̱ náa kíxnuu ga̱jma̱a̱ atatsiñááʼ dí bi̱ narasngáá maʼthí dí nandoo.
4. Índo̱ gátagíʼdi̱i̱ i̱mba̱ níʼkhóo, atraxnuu dí nagájnuriyoʼ ga̱jma̱a̱ arathá mámbá título dí na̱ʼkha̱ náa tikhu kíxnuu.
5. Índo̱ gámbáa mbá níʼkhóo, gajmaaʼ náa naʼthí rí nijmañaaʼ mu bi̱ nirasngáá marmáʼáan a̱jkiu̱u̱n kisngáa gajkhun dí na̱ʼkha̱ náa Biblia.
6. Índo̱ gídxúʼ ratayáá mámbá kíxnuu ga̱jma̱a̱ʼ bi̱ narasngáá:
Guraxnuu mbóó kutriga̱ dí na̱ʼkha̱ náa nagi̱ʼdu̱u̱.
Guraxnuu xúgíʼ texto ndrígóo Biblia náa naʼthí “Atraxnuu”.
Guraxnuu i̱ʼwáʼ texto dí na̱ʼkha̱ náa kíxnuu á mu ndayóoʼ.
Ataskámáá xúgíʼ video náa naʼthí “Gu̱ya̱a̱” (Á mu rígá náa kaʼnii mataskamáá).
Atani̱ xúgíʼ graxe̱.
Mbá nájmáanʼ gúyáaʼ xtiʼkhu dí na̱ʼkha̱ náa naʼthí “Gajmañaaʼ itháan”.
Gajmaaʼ kúgumaʼá náa naʼthí “Rí ma̱ndoo matani̱” mu bi̱ narasngáá mbaʼyoo má ikhaa xú káʼnii ejkha̱ raʼniminaʼ. Aratháán magíʼ meta dí ma̱ndoo maʼni. Dí na̱ʼkha̱ má náa kúgumaʼá o i̱mba̱ kayuuʼ.
Atrajxi̱i̱ á mu ninigu̱u̱ʼ tikhu artículo o video dí na̱ʼkha̱ náa naʼthí “Atayáá itháan” índo̱ niʼnirataminaʼ maʼnigajmaa.
Ataniminaʼ matanigajma̱a̱ kañiiʼ kíxnuu mámbá índo̱ narasngáa.
Nda̱wa̱á dí nirasngáa
7. Atatsaʼwáminaʼ má xúʼko̱ ga̱jma̱a̱ numuu bi̱ nirasngáá. Atanda̱ʼa̱a̱ Jeobá dí maʼni tsajkurámuuʼ dí niʼniminaʼ niʼni má ga̱jma̱a̱ dí maxnáaʼ ku̱ma̱ dí ndayáaʼ mu matambáyii.