Araxtaa gagi kámuu: Imbo̱o̱ʼ nuxi̱ʼ i̱yi̱i̱ʼ rí majmulú mu muʼsngáa

¡Ra̱ʼkhá tháán májánʼ rí kuaʼdáá mbá nuxi̱ʼ libro ga̱jma̱a̱ mbá folleto mu muʼsngáa ga̱jma̱a̱ numuu Biblia! Nunda̱ʼa̱a̱xu Jeobá rí maʼni tsajkurámuuʼ tsiakii rí nuʼnilú mu mbuʼñíinʼ itháán xa̱bu̱ (Mt 28:18-20; 1Co 3:6-9). Xú káʼnii gajmulú i̱yi̱i̱ʼ nuxi̱ʼ rígi̱ rá.

Ga̱jma̱a̱ numuu rí náa i̱yi̱i̱ʼ rígi̱ ndayóoʼ dí mutamijná a̱jmi̱i̱n xa̱bu̱, ikha jngóo ndayóoʼ dí muriʼkhu̱u̱ xóo nuʼsngáa. Májánʼ gáʼni á mu natanimbaníí ikha rígi̱ índo̱ gátani rataminaʼ ga̱jma̱a̱ índo̱ garasngáa:a

• Atraxnuu rí naʼthí ga̱jma̱a̱ atayáá graxe̱.

• Atraxnuu texto rí kaʼyoo ga̱jma̱a̱ atambáyii bi̱ narasngáá mu makro̱ʼo̱o̱ rí eʼthí.

• Atagrígu video ga̱jma̱a̱ atani graxe̱ rí na̱ʼkha̱ náa i̱yi̱i̱ʼ.

• Atagíʼ matayaa mbá kañiʼ kíxnuu índo̱ narasngáa.

Índo̱ gárataráʼa, araxnáá folleto xa̱bu̱ mu matayaa á mu naniguuʼ (atayáá náa kúgumaʼá “Xóo maraxnajxí folleto Araxtaa gagi kámuu náa timbá miʼtsú naratámíjná ga̱jma̱a̱ʼ”). Á mu niguámbaaʼ nirasngáá ga̱jma̱a̱ folleto ga̱jma̱a̱ ikhaa naniguuʼ xóó maʼnigajmaa, araxnáá libro ga̱jma̱a̱ anújngaaʼ náa kíxnuu 4. Á mu xtaa má rasngáá mbáa xa̱bu̱ ga̱jma̱a̱ mbá eyulú, ma̱ndoo matriʼkuriyaaʼ ga̱jma̱a̱ libro Araxtaa gagi kámuu. Ma̱ndoo matraʼwíí ikháán náá kíxnuu gátagíʼdi̱i̱.

NDA̱WA̱Á RÍ NITAYÁÁ VIDEO RA̱ʼKHÁ THÁÁN MÁJÁNʼ RÍ NITRAʼWÍÍ MATANIGAJMAA̱ BIBLIA, ATRIʼÑA̱A̱ GRAXE̱ RÍGI̱:

• Ndiéjunʼ gajmañún bi̱ nuʼsngúún náa libro nuxi̱ʼ rígi̱ rá.

• Náá numuu rí gíʼmaa musngajmúún video rígi̱ bi̱ ndiʼkhún eʼsngúún rá.

• Ndiéjunʼ rí ma̱ndoo magíʼ maʼni bi̱ nuʼsngáá rá. (Atayáá náa kúgumaʼá “Rí nagájnuriyo̱o̱ʼ ga̱jma̱a̱ rí matani náa mambá niʼkhóo”).