Lá najmaʼ tarjeta náa naʼthí tsíin ni̱ndxu̱ún xa̱bi̱i̱ Jeobá rí na̱ʼkha̱ náa jw.org ráʼ.

Ndayóoʼ dí muʼtáraʼa itháan nacha̱, numuu rí najngiyuu itháan rí marigá majphú mba̱a̱ gaʼkhu (Pr 24:11, 12, 20). Mbá dí xú káʼnii mumbáñuun xa̱bu̱ nindxu̱u̱ dí majmulúʼ tarjeta náa naʼthí tsíin ni̱ndxu̱ún xa̱bi̱i̱ Jeobá, rí na̱jkha̱ kagui̱i̱n náa rígá Ajngá rawunʼ Dios ga̱jma̱a̱ náa ináa ndrígúlú dí rígá náa Internet. Náa tarjetas rúʼko̱ kama mbá código náa na̱jkha̱ kagu̱u̱n mbuyáá video Náa numuu rí gíʼmaa muʼnigajmaa Biblia rá. Ma̱ngaa mbá invitación mu munda̱ʼa̱ majmañún itháan o majuiʼsngúún ga̱jma̱a̱ numuu Biblia. Kuwa xa̱bu̱ bi̱ tsíñún guraxnuu i̱yi̱i̱ʼ ndrígúlú, mú nandún matu̱ʼu̱u̱n náa ináa ndrígóo jw.org. Ikha jngó xátane a̱jma̱ a̱jkia̱nʼ mu maraxnu̱u̱n tarjeta. Mú xáraxnu̱u̱n tarjeta xa̱bu̱ bi̱ tsíñún gúdxuun.

Dí gúʼni mámbá mbiʼi, ma̱ndoo muxkaxi̱i̱ a̱jkiu̱u̱n xa̱bu̱ mu manigu̱ʼ maʼdxun ga̱jma̱a̱ mbá ajngáa xóo: “Nandoʼ maxna̱ʼ tarjeta rígi̱. Na̱ʼkha̱ mbá dirección ndrígóo Internet náa tima mbaʼa rí ma̱ndoo matraxnuu ga̱jma̱a̱ videos ma̱ngaa xáxtumáán rí ma̱ta̱ya̱a̱ xúgíʼ rígi̱” (Jn 4:7). Numuu rí tarjetas rígi̱ ma̱jkha̱ʼ nindxu̱u̱, ma̱ndoo muʼda̱ gúʼgua̱ asndu náa mu muxná índo̱ gándoo.