Gúñajunʼ mbá jnduʼ mu muʼtáruʼun xa̱bu̱ bi̱ nuthi i̱ʼwáʼ ajngáa

Xa̱bu̱ nudxawíín májánʼ índo̱ nuʼtáruʼun náa ajngún. Mbá ikha jngó rí náa Pentecostés tsiguʼ 33, Jeobá niʼni rí judíos “bi̱ kuwa náa xúgíʼ xuajen” mudxawíín ajngá rí majan náa ajngún maski ma niguaʼdáá mbá ajngáa rí phú nuthi, xóo hebreo o griego (Hch 2:5, 8). Mbiʼi xúgi̱, rígá congregación náa mixtiʼkhu ajngáa bi̱ nutaraʼa náa ikháá territorio. Ndiéjunʼ eñuunʼ publicadores bi̱ kuwa náa congregaciones rúʼko̱ mu mutaruʼun xúgínʼ xa̱bu̱ rí asndu xajmún wéñuʼ tsiakii ga̱jma̱a̱ xúni̱ xkajkiu̱ún xa̱bu̱ bi̱ kuwa ikhí rá.

• 

  Mutamijná (Pr 15:22): Bi̱ ni̱ndxu̱ún superintendentes ndrígóo servicio gíʼmaa muriyaʼ awan ga̱jma̱a̱ mbuyáá xú káʼnii gándoo gútaraʼa mu xúgínʼ ma̱ndoo muñambáá. Mbáa congregación rí nuthi i̱mba̱ ajngáa xaʼndún rí muʼtáraʼa náa guʼwá dí rígá náa territorio ndrígu̱ún. Mú, á mu territorio rúʼko̱ nindxu̱u̱ mba̱a̱ ga̱jma̱a̱ á mu tséʼngu̱u̱n gutaraʼa, mbáa maʼndún rí muʼtáraʼa náa xúgíʼ guʼwá ga̱jma̱a̱ rí muʼthúún á mu nuxkamaa mbáa xa̱bu̱ bi̱ nanigu̱u̱ʼ maʼdxaun náa territorio ndrígu̱ún (od-S ináa 93 kutriga̱ 37). O mbáa munda̱ʼa̱ rí congregación ndrígúlú muñambáá mu mbuñi̱i̱nʼ xa̱bu̱ bi̱ nuthi ajngún mu xúʼko̱ mbuyáá náa kuwa (km 7/12 ináa 5, kugumáʼán). Garmáʼáan a̱jkiu̱lú rí ma̱ndoo maʼni dí ikháá má guʼwá muthi mbaʼa ajngáa. Mu awan rí guriʼyáʼ mu muʼtáraʼa gíʼmaa rí xanujngorámuʼ xtángoo.

• 

  Guñajunʼ mbóó (Ef 4:16): Gíʼmáán muʼnimbánii xúgíʼ ikha rí gáxná superintendente ndrígóo servicio. Lá nuʼsngáá ga̱jma̱a̱ Biblia mbáa bi̱ tséʼthi ajngúlú ráʼ. Mbáa xa̱bu̱ buʼko̱ majmañuu itháán nacha̱ á mu naʼnigámaa ga̱jma̱a̱ mbáa publicador bi̱ naʼthí ajngóo bi̱ xtáa náa i̱mba̱ congregación.

• 

  Guniratamijná (Pr 15:28; 16:1): Á mu nuxkamaa mbáa xa̱bu̱ bi̱ naʼthí i̱mba̱ ajngáa náa territorio, atani xóo má eʼngo̱o̱ mu ma̱ra̱ta̱a̱n. Mu maraxtaa xawii, atatsaʼwáminaʼ xú káʼnii ajngáa ethi náa territorio ndrígáʼ ga̱jma̱a̱ atrigú Biblia ga̱jma̱a̱ tikhu videos náa ajngáa rúʼko̱. Ma̱ngaa ma̱ndoo majmáanʼ aplicación JW Language mu majmañaaʼ xóo matraxíín xa̱bu̱ náa mbaʼa ajngáa.