Rí najmañulú náa consejo dí nixna xa̱bu̱ bi̱ niguájun jmbu

1. Ndíjkha dí ma̱ndoo majmañulú náa xa̱bu̱ guanii rá.

MBÁ xúgiáánʼ ndayúlú ikha mu majmáánʼlu muraʼwíí dí mu̱ʼni̱ náa vida ndrígúlú. A̱ngiu̱lú ancianos ga̱jma̱a̱ eʼwíinʼ a̱ngiu̱lú bi̱ najmañún itháan, ma̱ndoo mumbayulúʼ. Maski ajndu ikhiin itháan guanii ki xóo ikháánʼlú, ragíʼmaa makumulú dí consejo dí nuxna nánguá ejmaa. Jeobá nandoo dí majmañulú náa ikhiin. Ikhiin kúwá itháan mba̱yu̱u̱ʼ ki xóo ikháánʼlú ga̱jma̱a̱ najmañún itháan, nakru̱ʼu̱u̱n itháan ga̱jma̱a̱ guáʼdáá itháan ku̱ma̱ (Job 12:12).

2. Ndiéjunʼ gájmañulú náa artículo rígi̱ rá.

² Nákha wajyúuʼ Jeobá nijmiuu xa̱bi̱i̱ bi̱ niguájun jmbu mu maxnún tsiaki̱i̱ ga̱jma̱a̱ maxnún ikha xa̱bu̱ xuajñuu. Gundxaʼwamíjna̱ ga̱jma̱a̱ numuu Moisés, David ga̱jma̱a̱ apóstol Juan. Ikhiin tákúwá mbóó tsiguʼ ga̱jma̱a̱ mixtiʼkhu wéñuuʼ xóo nikúwá. Índo̱ inu makhañún nixnún consejo dí mambáñún bi̱ itháan jiámá. Nájtsíin xa̱bu̱ nisngajmá dí gíʼdoo wéñuuʼ numuu muʼnimbulú kuʼyáá Dios. Jeobá niniñuuʼ dí magumarámáʼ ajngáa dí nithi mu mambáyulú, tséʼniuu á mu nindxu̱lú jiámá o waniáánʼ má, xúgiáánʼ ma̱ndoo mambáyulúʼ consejo ndrígu̱ún (Rom. 15:4; 2 Tim. 3:16). Náa artículo rígi̱ mbuʼyáá ajngáa dí nithi ajtsíin xa̱bu̱ bugi̱ bi̱ niguájun jmbu ga̱jma̱a̱ xú káʼnii ikháanʼ gándoo gájmañulú náa dí nithi ikhiin.

“MAKUWÁANʼ MBA̱YU̱U̱ʼ MBIʼI”

3. Xú káʼnii nijmiuu Jeobá Moisés rá.

³ Moisés niʼni má xúʼko̱ ñajuunʼ Jeobá náa xúgíʼ mbiʼi dí nixtáa. Ninindxu̱u̱ mbáa profeta, juez, bi̱ niʼnirámáʼ ga̱jma̱a̱ comandante. Nikujmaa dí ikhaa mbaʼa dí nijmañuu niʼni náa mbiʼi rí nixtáa. Nixná ikhúún israelitas índo̱ niguma káwíin náa Egipto, ma̱ngaa ndiʼyoo ga̱jma̱a̱ iduu mbaʼa milagro dí niʼni Jeobá. Dios nijmiuu mu maʼnirámáʼ witsu libro dí na̱ʼkha̱ náa Biblia, ma̱ngaa Salmo 90 ga̱jma̱a̱ mbáa ikhaa niʼni Salmo 91. Ma̱ngaa niʼnirámáʼ libro ndrígóo Job.

4. Tsíín nindoo maxnún tsiaki̱i̱ Moisés ga̱jma̱a̱ náá numuu rá.

⁴ Índo̱ inu makhañúu Moisés nákha ikhaa gíʼdoo 120 tsiguuʼ. Nigímbíin xúgíinʼ israelitas mu maʼni marmáʼáan a̱jkiu̱ún xúgíʼ dí ikhaa ndiʼyoo ga̱jma̱a̱ rí xóo nixtáa. Tikhuun dí ikhiin ndiyáá nákha ninindxu̱ún jiámá mbaʼa milagro dí niʼni Jeobá ga̱jma̱a̱ xú káʼnii ikhaa nixnún castigo bi̱ kúwá náa Egipto (Éx. 7:​3, 4). Ga̱jma̱a̱ dí xóo ninújngún náa ta̱pho̱o̱ lamáa Maña̱ʼ, ma̱ngaa ndiyáá xú kaʼnii nikháñún xa̱bi̱i̱ Faraón (Éx. 14:​29-31). Índo̱ kúwá má náa ku̱ba̱ʼ mijxooʼ ndiyáá xú kaʼnii Jeobá niñewu̱u̱n (Deut. 8:​3, 4). Ga̱jma̱a̱ índo̱ inu matu̱ʼu̱u̱n náa Ku̱ba̱ʼ dí Jeobá nikudaminaʼ maxnúún, Moisés xóó niʼthúún ajngáa dí maxnúún tsiaki̱i̱ xa̱bu̱ xuajin.a

5. Náa iwáá kayuuʼ dí niʼthí Moisés, xú káʼnii gákúwá israelitas niʼthí xá. (Deuteronomio 30:​19, 20.)

⁵ Ndiéjunʼ niʼthí Moisés rá. (Atraxnuu Deuteronomio 30:​19, 20.) Rígá awan dí makuwá mitsaanʼ wéñuuʼ bi̱ israelitas. Jeobá má gáʼni dí makuwá mba̱yu̱u̱ʼ tsiguʼ náa ku̱ba̱ʼ dí Jeobá niʼthí maxnún. Xú káʼnii nindxu̱u̱ ku̱ba̱ʼ rúʼko̱ rá. ¡Ra̱ʼkhá tháán mitsaanʼ ga̱jma̱a̱ najma̱a̱ wéñuuʼ ganitsu! Moisés niʼthúún israelitas xú káʼnii nindxu̱u̱ ku̱ba̱ʼ rúʼko̱, niʼthí dí nindxu̱u̱: “Mbá ku̱ba̱ʼ dí rígá xuajin mba̱ʼu̱ ga̱jma̱a̱ májánʼ dí ikháán na̱nguá nitani̱, guʼwá náa kajtíí xúgíʼ enii dí májánʼ dí ikháán na̱nguá nitiejuíínʼ, iñáʼ rí ikháán na̱nguá nitandii, mbaaʼ náa kiʼdu uva ga̱jma̱a̱ olivo rí ikháán na̱nguá nitadu” (Deut. 6:​10, 11).

6. Ndíjkha dí Dios niniñuuʼ dí eʼwíinʼ xa̱bu̱ xuajin matu̱ʼu̱u̱n náa kúwá israelitas rá.

⁶ Moisés niʼthúún israelitas dí á mu ikhiin nandún makuwá náa ku̱ba̱ʼ dí Jeobá niʼthí maxnún, ndayóoʼ dí munimbu̱ún dí naʼtáñajunʼ ikhaa, dí gíʼmaa mudxawíín dí naʼthí Jeobá ga̱jma̱a̱ munimbu̱ún kuyáá. Mú israelitas túnimbu̱ún kuyáá Jeobá. Ikha jngóo nda̱wa̱á Dios niniñuuʼ dí asirios ga̱jma̱a̱ bi̱ kúwá náa Babilonia matu̱ʼu̱u̱n náa kúwá israelitas mu magún kudiin i̱mba̱ ni̱ʼkhá (2 Rey. 17:​6-8, 13, 14; 2 Crón. 36:​15-17, 20).

7. Ndiéjunʼ ejmañulúʼ náa ajngáa dí niʼthí Moisés rá. (Atayáá ma̱ngaa xtiʼkhuu.)

⁷ Ndiéjunʼ eʼsngúlú ikháánʼ rígi̱ rá. Naʼsngúlú dí á mu nuʼnimbulúʼ makuwáánʼ má xúʼko̱. Xó má israelitas bi̱ inu matu̱ʼu̱u̱n náa Ku̱ba̱ʼ dí Dios niʼthí maxnúún, ikháánʼlú ma̱ngaa inu matu̱ʼu̱lú náa numbaaʼ dí Dios niʼthí maxnúlú. Ikhí mbuʼyáá xú káʼnii Ku̱ba̱ʼ maʼni̱i̱ mitsaanʼ (Is. 35:1; Luc. 23:43). Ikhí ni xáxtáa Gixa̱a̱ gajmíi̱n xa̱bu̱ wéñiiʼ ndrígióo (Apoc. 20:​2, 3). Ni xárígá religión dí mindu̱wa̱ʼ dí naʼni matsíngu̱u̱nʼ xa̱bu̱ náa Jeobá (Apoc. 17:16). Ni xákúwá xa̱bu̱ ñajunʼ bi̱ nuni̱ ngíníi xa̱bu̱ (Apoc. 19:​19, 20). Ga̱jma̱a̱ náa Ku̱ba̱ʼ mitsaanʼ ni xákúwá xa̱bu̱ bi̱ tsénimbu̱ún (Sal. 37:​10, 11). Xúgíinʼ munimbu̱ún xtángoo ndrígóo Jeobá dí nindxu̱u̱ jmbu, rígi̱ maʼni dí xa̱bu̱ makuwá mbá jnduʼ ga̱jma̱a̱ makuwá tsímáá. Rígi̱ gáʼni dí xúgíinʼ maʼndún kuyamijná ga̱jma̱a̱ dí xámíñún kuyamijná ¡Ra̱ʼkhá tháán mitsaanʼ gáʼni! (Is. 11:9). Á mu nuʼnimbulúʼ kuʼyáá Jeobá, ma̱ndoo makuwáánʼ náa Ku̱ba̱ʼ mitsaanʼ kámuu mbiʼi raʼkháa nguáthá tsi̱gu̱ú (Sal. 37:29; Juan 3:16).

8. Xú káʼnii nimbáyúu mbáa misionero dí nagi̱ʼthu̱u̱n maxtáa kámuu mbiʼi nda̱wa̱á rá. (Judas 20, 21.)

⁸ Á mu nundxa̱ʼwa̱míjna̱ má xúʼko̱ ga̱jma̱a̱ numuu dí kua̱ʼthi̱i̱n marigá nda̱wa̱á dí makuwáánʼ kámuu mbiʼi, nambáyulú muraʼníí tsáʼkhá (atraxnuu Judas 20, 21). Rígi̱ ma̱ngaa maxnúlú tsiaki̱i̱ mu̱ʼni̱ gámbáa mbá dí nagua̱ʼa̱ mu̱ʼni̱. Mbáa ndxájulú bi̱ ninindxu̱u̱ misionero mba̱yu̱u̱ʼ tsiguʼ náa África, ndiyóoʼ maʼni ga̱jma̱a̱ mbá dí nagua̱ʼa̱ maʼni. Ikhaa niʼthí: “Índo̱ ndi̱yo̱o̱ dí xándoo maxtáá kámuu mbiʼi á mu tsénimbo̱ʼ ka̱yo̱o̱ Jeobá, rígi̱ nimbáyuʼ maniminaʼ manimbánuu xkujndu dí gúʼdoʼ ga̱jma̱a̱ dí matakáñuu Jeobá ga̱jma̱a̱ numuu rúʼko̱. Ikhaa nimbáyuʼ mu ma̱ni̱ má xúʼko̱ ñajuunʼ ga̱jma̱a̱ dí niʼngo̱ʼ ni̱ni̱ ga̱jmu̱ʼ xkujndu dí gúʼdoo”.

“MAGAJNÚU MÁJÁNʼ XÚGÍʼ DÍ GÁTANI̱”

9. Ndiéjunʼ tsáʼkhá ndiyóoʼ maraʼnuu David rá.

⁹ David ninindxu̱u̱ mbáa májáanʼ rey. Ma̱ngaa ninindxu̱u̱ mbáa bi̱ niʼni ajmúú, bi̱ niʼnirámáʼ ajngáa dí nagui̱i̱, bi̱ nixmíjná gajmíi̱n xa̱bu̱ ga̱jma̱a̱ mbáa profeta. Niraʼnuu mbaʼa tsáʼkhá. Mba̱yu̱u̱ʼ tsiguʼ ndiyóoʼ markaʼwuminaʼ numuu dí rey Saúl ndiyáaʼ maxíyáa. Índo̱ ni̱jkha̱nú ninindxu̱u̱ rey, David ndiyóoʼ magayúu mbu̱júu̱, numuu dí Absalón bi̱ ninindxu̱u̱ a̱ʼdióo nindoo marígú káyúuʼ dí naʼtáñajunʼ. Maski ajndu niraʼnuu mbaʼa xkujndu ga̱jma̱a̱ mbaʼa nuthu nikiéʼkúun, niwi̱ji̱ má xúʼko̱ jmbu náa Dios asndu índo̱ ikhaa nikháñúu. Jeobá niʼthí dí David ninindxu̱u̱ mbáa xa̱bu̱ bi̱ niʼni dí maʼdxuu a̱jkiu̱u̱n. Ikha jngóo májánʼ gáʼni dí muʼdxawíín consejo dí niʼthí David (Hech. 13:22; 1 Rey. 15:5).

10. Náá numuu dí David nixnúu consejo Salomón nákha xóó tsénindxu̱u̱ rey rá.

¹⁰ Guʼthá ga̱jma̱a̱ numuu dí David niʼthúu̱n a̱ʼdióo bi̱ mbiʼyuu Salomón, bi̱ maʼga̱nú mani̱ndxu̱u̱ nuxi̱i̱ʼ rey. Jeobá niraʼwíi dxámá bugi̱ mu maʼni templo, náa xa̱bu̱ ma̱ndoo mbuyamajkuíí Jeobá (1 Crón. 22:5). Salomón maraʼnuu tikhuu xkujndu. Guʼyáá ndiéjunʼ consejo nixnúu David.

11. Ndiéjunʼ consejo nixnúu David Salomón, ga̱jma̱a̱ xú káʼnii nimbánuu ajngáa dí niʼthún xá. (1 Reyes 2:​2, 3; atayáá ma̱ngaa xtiʼkhuu.)

¹¹ Ndiéjunʼ niʼthí David rá. (Atraxnuu 1 Reyes 2:​2, 3.) David niʼthúu̱n a̱ʼdióo dí á mu naʼnimbo̱o̱ kaʼyoo Jeobá, xúgíʼ dí gáʼni magajnúu májánʼ. Ga̱jma̱a̱ xúʼko̱ má nirígá mba̱yu̱u̱ʼ tsiguʼ (1 Crón. 29:​23-25). Salomón niʼni templo dí nagui̱i̱ wéñuuʼ, niʼnirámáʼ tikhuu libro kañiiʼ dí na̱ʼkha̱ náa Biblia ga̱jma̱a̱ niyambáá maguma i̱ʼwáʼ. Nijmaʼniiʼ dí nijmañuu wéñuuʼ ga̱jma̱a̱ dí nigiʼdoo wéñuuʼ (1 Rey. 4:34). Mú, xó má David niʼthí, dí i̱ndó magajnúu májánʼ dí gáʼni Salomón á mu naʼnimbo̱o̱ kaʼyoo Jeobá. Phú ngíná dí nda̱wa̱á nigíʼdu̱u̱ ndiʼyamajkhún eʼwíinʼ dioses. Rígi̱ niʼni dí Jeobá nánguá nimbáyúu Salomón ga̱jma̱a̱ nánguá nijmañuu maʼtáñajunʼ májánʼ (1 Rey. 11:​9, 10; 12:4).

12. Ndiéjunʼ gándoo gajmañulú náa ajngáa dí niʼthí David rá.

¹² Ndiéjuunʼ ejmañulúʼ ikháánʼ rá. Dí muʼnimbulú kuʼyáá Jeobá ikhaa maʼni tsajkurámáánʼ ga̱jma̱a̱ mambáyulú (Sal. 1:​1-3). Gajkhun má dí Jeobá tsékudaminaʼ maxnúlú muguaʼdáá xó má niʼni ga̱jma̱a̱ Salomón. Mú, á mu nuʼnimbulúʼ kuʼyáá, mambáyulúʼ mbuʼyáá ndiéjunʼ dí májánʼ muraʼwíí mu̱ʼni̱ (Prov. 2:​6, 7; Sant. 1:5). Ikha dí naxnúlú Jeobá nambáyulú mbuʼyáá ndiéjunʼ gúʼni ga̱jma̱a̱ numuu ñajunʼ, dí muʼnigajma̱a̱, dí mu̱ʼni̱ gagimijná ga̱jma̱a̱, ma̱ngaa mbuʼyáá xóo majmulú mbújkha̱a̱. Á mu nuʼnimbulú ma̱ndoo mambájxulú má xúʼko̱ gajmiúlú Dios (Prov. 2:​10, 11). Maguaʼdíin bi̱ mambaxúlúʼ májánʼ gajmiúlú, ma̱ngaa muguaʼdáá ikha dí ndayúlú makuwáánʼ gagi mbá guʼwáanʼ.

13. Ndiéjunʼ nimbáyúu Carmen mu magajnúu májánʼ dí niraʼwíí ma’ni rá.

¹³ Carmen, bi̱ xtáa náa Mozambique, nindxaʼwámi̱na̱ʼ dí magajnúu májánʼ dí gáʼni á mu naʼnigajmaa̱ escuela dí mitsídánʼ. Ikha jngóo niraʼwíí maʼniga̱jma̱a̱ mu mani̱ndxu̱u̱ Arquitecta. Ikhaa naʼthí: “Ra̱ʼkhá tháán ninigu̱ʼ dí xtáá rajmañuʼ, mú nirígú káyúʼ wéñuuʼ mbiʼi ga̱jma̱a̱ tsiaki̱i̱. Nagíʼdu̱u̱ nanigajma̱a̱ las 7:30 dí miʼcha̱ asndu las 6:00 dí wakíʼ. Niʼniuʼ gakhi̱i̱ maʼgá reunión ga̱jma̱a̱ niniʼñúuʼ rambájxuʼ májánʼ ga̱jmu̱ʼ Jeobá. Ni̱jkhánú ndi̱yo̱o̱ dí xtáá ranimi̱na̱ʼ ma̱ni̱ ñajúúnʼ a̱jmi̱i̱n xa̱bu̱” (Mat. 6:24). Ikhaa niʼtájkáan ga̱jma̱a̱ numuu rígi̱, ma̱ngaa ndiyáá mbaʼyoo itháan náa i̱yi̱i̱ʼ ndrígulú. Ikhaa naʼthí dí nirígá: “Nda̱wa̱á dí tikhuun a̱ngiu̱lú bi̱ najmañún nixnuʼ májánʼ consejo ga̱jma̱a̱ dí niʼthúnʼ ru̱dúʼ, nimbáyúʼ maraʼwi̱i̱ maniʼñúuʼ ranigajma̱a̱ mu ma̱ni̱ kájxi̱ ñajuunʼ Jeobá. Ga̱jma̱a̱ numuu rígi̱, nijmún niraʼwi̱i̱ májánʼ dí ma̱ni̱. Tségáwíinʼ a̱jkiu̱nʼ dí niraʼwi̱i̱ ma̱ni̱ rígi̱”.

14. Ndiéjunʼ consejo nixná Moisés ga̱jma̱a̱ David rá.

¹⁴ Moisés ga̱jma̱a̱ David nindúún kuyáá wéñuuʼ Jeobá ga̱jma̱a̱ ndiyáá dí ra̱ʼkhá tháán gíʼdoo numuu dí munimbu̱ún kuyáá. Náa iwáá ajngáa dí nithi, nithúún bi̱ kúwá rudxawíín dí mbuyaridúún ikhiin ga̱jma̱a̱ dí muguajún má xúʼko̱ jmbu náa Jeobá. Mbá nájmi̱i̱n nithi dí, bi̱ gúni tsíngumi̱jna̱ náa Jeobá, xándoo mambajxúúnʼ gajmiún ga̱jma̱a̱ ni xáʼni tsajkurámiinʼ xó má nikudaminaʼ maʼni. Consejo dí ikhiin nixna ra̱ʼkhá tháán gíʼdoo numuu náa ikháánʼlú ma̱ngaa. Mba̱yu̱u̱ʼ tsiguʼ nda̱wa̱á, imba̱a̱ xa̱bi̱i̱ Jeobá bi̱ niwi̱ji̱ jmbu niʼthí dí gíʼdoo wéñuuʼ numuu muguajún jmbu náa Dios.

“NDA̱A̱ IMBO̱O̱ RÍ MAʼNI MAʼDXUʼ WÉÑUUʼ”

15. Ndiéjunʼ ni̱jkha̱nú ndiʼyoo apóstol Juan náa mbiʼi dí nixtáa rá.

¹⁵ Juan ninindxu̱u̱ mbáa apóstol bi̱ Jesús ra̱ʼkhá tháán nindoo kaʼyoo (Mat. 10:2; Juan 19:26). Ni̱jkha̱ ga̱jma̱a̱ Jesús índo̱ niʼtáráʼa, ndiʼyoo índo̱ niʼni mbaʼa milagro, ma̱ngaa nixtáa ga̱jma̱a̱ índo̱ niraʼnuu mbaʼa ga̱ʼkhu̱. Nixtáa ga̱jma̱a̱ índo̱ nixiyáa ma̱ngaa ndiʼyoo índo̱ nigabi̱i̱. Ndiʼyoo xóo ni̱jkha̱ ragaja̱a̱ congregación dí nirígá nákha siglo timbá, ndiʼyoo xóo nigi̱ʼdu̱u̱, ga̱jma̱a̱ índo̱ ajngáa dí májánʼ “nijuiʼtáraʼa náa xúgíʼ tsu̱du̱u̱ ku̱ba̱ʼ” (Col. 1:23).

16. Tsíín nimbáñún carta dí niʼnirámáʼ Juan rá.

¹⁶ Índo̱ Juan nikhi̱i̱ má, niʼnirámáʼ tikhuu libro dí na̱ʼkha̱ náa Ajngá rawuunʼ Dios. Mbá dí ikhaa nindxu̱u̱ Apocalipsis (Apoc. 1:1). Ma̱ngaa niʼnirámáʼ mbá Evangelio dí nayéjkha̱ mbiʼyuu ga̱jma̱a̱ mbá ajtsú carta. Ragajtsú carta dí niʼnirámáʼ ni̱jkha̱ náa inuu mbáa cristiano bi̱ mbiʼyuu Gayo, bi̱ ni̱jkha̱nú ndiʼyoo xóo mbáa a̱ʼdióo bi̱ nindoo kaʼyoo wéñuuʼ (3 Juan 1). Mbáa nákha ikhú Juan gíʼdiin má mbaʼin bi̱ ni̱jkha̱nú ndiʼñún xóo e̱ji̱i̱n. Rí niʼnirámáʼ Juan naxnún wéñuuʼ tsiaki̱i̱ xa̱bi̱i̱ Jesús asndu rí mbiʼi xúgi̱.

17. Xó má naʼthí náa 3 Juan 4, ndiéjunʼ dí naʼni maʼdxuu a̱jkiu̱lú rá.

¹⁷ Ndiéjunʼ niʼnirámáʼ Juan rá. (Atraxnuu 3 Juan 4.) Juan niʼthí dí índo̱ nuʼnimbulú kuʼyáá Dios naʼni makuwáánʼ gagi. Índo̱ ikhaa xtáa raʼnirámáʼ ragajtsú carta, tikhuun má kúwá rusngáa dí minduwaʼ ga̱jma̱a̱ nuni̱ dí marigá xkujndu náa congregación. Mú, eʼwíinʼ “jngruigu̱u̱n má xúʼko̱ náa rí gajkhun”. Nunimbu̱u̱n kuyáá Jeobá ga̱jma̱a̱ nuni̱ “má xúʼko̱ xó má naʼthí náa kiʼtáñajunʼ ndrígóo” (2 Juan 4, 6). Cristianos bi̱ niguájun jmbu bugi̱ nini̱ rí maʼdxuu a̱jkiu̱u̱n Juan, ma̱ngaa nini̱ rí maʼdxuu a̱jkiu̱u̱n Jeobá (Prov. 27:11).

18. Ndiéjunʼ gándoo gájmañulú náa ajngáa dí niʼthí Juan rá.

¹⁸ Ndiéjunʼ eʼsngúlú ikháánʼ rá. Á mu naguajún jmbu náa Jeobá makuwáánʼ gagi (1 Juan 5:3). Mbá xkri̱da, ra̱ʼkhá tháán edxulú índo̱ nu̱ʼni̱ dí maxtáa gagi Jeobá. Ikhaa nadxuu índo̱ nu̱ʼni̱ gaʼduunʼ tsáʼkhá dí rígá náa numbaaʼ ga̱jma̱a̱ nuʼnimbulú dí naʼthí náa Ajngá rawuunʼ (Prov. 23:15). Ma̱ngaa nadxún bi̱ kúwá mekhuíí (Luc. 15:10). Asndu mangáánʼ nadxulú índo̱ nduʼyáá dí a̱ngiu̱lú naguájun jmbu maski asndu najuixkúún o nuraʼníí tsáʼkhá (2 Tes. 1:4). Índo̱ gáguma gámbáa numbaaʼ náa dí naʼtáñajunʼ Gixa̱a̱, ra̱ʼkhá tháán gáʼdxulú numuu dí niguajún jmbu náa Jeobá.

19. Ndiéjunʼ niʼthí mbáa ndxájulú dí marasngúún eʼwíinʼ ga̱jma̱a̱ numuu Jeobá rá. (Atayáá ma̱ngaa xtiʼkhuu.)

¹⁹ Mbá dí naʼni makuwáánʼ gagi nindxu̱u̱ dí muʼsngúún eʼwíinʼ ga̱jma̱a̱ numuu Jeobá. Rachel bi̱ xtáa náa República Dominicana, naku̱mu̱u̱ dí ra̱ʼkhá tháán naguii, ma̱ngaa dí tsémbríguii ga̱jma̱a̱ nimbá dí maʼsngúún eʼwíinʼ ga̱jma̱a̱ numuu Jeobá. Índo̱ nandxa̱ʼwáminaʼ ga̱jma̱a̱ numún bi̱ niʼsngúún, ikhaa naʼthí: “Ra̱ʼkhá tháán gagi xtáá índo̱ nda̱yo̱o̱ rí bi̱ nasngún naguánú nandún kuyáá Jeobá, naku̱mu̱ún kuyáá ga̱jma̱a̱ nuriʼkumijnáa mu muni̱ dí maʼdxuu a̱jkiu̱u̱n. Rí xtaa gagi nindxu̱u̱ itháan mba̱a̱ ki xóo tsiaki̱i̱ rí ni̱ni̱ mu masngúún”.

GUʼYÁÁ RÍ EʼSNGÚLÚ IWÁÁ AJNGÁA DÍ NITHI XA̱BEKHA BUGI̱ BI̱ NIGUÁJUN JMBU

20. Ndiéjunʼ dí naʼni mbríguáanʼ gajmiúlú Moisés, David ga̱jma̱a̱ Juan rá.

²⁰ Moisés, David ga̱jma̱a̱ Juan nikúwá nákha wajyúuʼ, dí xóo nikúwíin ikhiin ninindxu̱u̱ mixtiʼkhu kayuuʼ xóo kuwáánʼ ikháánʼlú dí mbiʼi xúgi̱. Mú rígá dí naʼni mbríguáanʼ gajmiúlú. Ikhiin mangiin nini̱ ñajuunʼ Dios bi̱ gajkhun xó má ikháánʼlú. Ikháá má xóo ikhiin, nuʼtákáñíí Jeobá, nakumulú kuʼyáá ikhaa ga̱jma̱a̱ nunda̱ʼa̱a̱ dí maxnúlú ikha. Ga̱jma̱a̱ ikháá má xóo xa̱bekha bugi̱, nduʼyáá gajkhun dí Jeobá naʼni tsajkurámíinʼ bi̱ nunimbu̱ún kuyáá.

21. Xú káʼnii gáʼni̱ tsajkurámáánʼ Jeobá á mu nuʼnimbulú consejo ndrígóo Moisés, David ga̱jma̱a̱ Juan rá.

²¹ Guʼnimbulúʼ consejo dí nixna xabuanii bugi̱ ga̱jma̱a̱ guʼnimbulúʼ kiʼtáñajunʼ ndrígóo Jeobá. Mu xúʼko̱ magajnúu májánʼ xúgíʼ dí gúʼni̱. Ga̱jma̱a̱ makuwáánʼlú “mba̱yu̱u̱ʼ mbiʼi”, xúʼko̱, kámuu mbiʼi (Deut. 30:20). Ma̱ngaa makuwáánʼ gagi, numuu dí mu̱ʼni̱ maʼdxuu a̱jkiu̱u̱n Anu̱lú bi̱ xtáa mekhuíí, bi̱ naʼnimbánuu xúgíʼ dí nakudaminaʼ. ¡Asndu tséʼngo̱o̱ gúndxaʼwámíjná nguáthá mba̱a̱ gáʼni̱ tsajkurámáánʼlú! (Efes. 3:20).