Xú káʼnii embáyulú dí nandoo kaʼyulú Jeobá rá.

1. Xú káʼnii gándoo muʼni maxtáa gagi Jeobá rá.

GUNDXAʼWÁMÍJNÁ dí nuxnáá mbá regalo bi̱ nandulúʼ kuʼyáá dí mitsaanʼ ga̱jma̱a̱ dí ma̱ndoo majmuu. Lá ragájkhun dí majmulú á mu xa̱bu̱ buʼko̱ i̱ndó nayéjxi̱i̱ ga̱jma̱a̱ nambumuu dí nixnáá ráʼ. Mú ra̱ʼkhá tháán gáʼdxulú á mu xa̱bu̱ naxnáa núma̱aʼ ga̱jma̱a̱ nasngájma índo̱ najmuu dí nixnáá. Ndiéjunʼ eʼsngúlú xkri̱da rígi̱ rá. Jeobá nixnájxi̱i̱ a̱ʼdióo ga̱jma̱a̱ numulúʼ. ¡Ikhaa ra̱ʼkhá tháán nadxuu índo̱ nuxnáa núma̱aʼ ga̱jma̱a̱ numuu dí niʼtsiwáánʼlú ma̱ngaa ga̱jma̱a̱ numuu dí nandoo kaʼyulú! (Juan 3:16; Rom. 5:​7, 8).

2. Ndiéjunʼ guʼyáá náa artículo rígi̱ rá.

² Mú, á mu nánguá exnáa núma̱aʼ ga̱jma̱a̱ numuu dí nijuiʼtsiwáánʼ rá. Mani̱ndxu̱u̱ asndu xóo muyéjxi̱i̱lú náa mbá caja ga̱jma̱a̱ mambumulúʼ gáʼni. Mu xugíʼníí rígi̱ ga̱jma̱a̱ mu xuníʼñááʼ ruxnáa núma̱aʼ, gíʼmaa mundxaʼwamíjna̱ má xúʼko̱ dí Jeobá ga̱jma̱a̱ Jesús niʼni ga̱jma̱a̱ numulúʼ. Ikhaa rúʼko̱ dí muʼthá náa artículo rígi̱. Muʼthá xú káʼnii embáyulú dí nijuiʼtsiwáánʼ rí mbiʼi xúgi̱ ga̱jma̱a̱ xú káʼnii gambáyulúʼ nda̱wa̱á. Ma̱ngaa mbuʼyáá xóo gándoo muxnáa núma̱aʼ Jeobá ga̱jma̱a̱ numuu dí nandoo kaʼyulú, itháan má índo̱ narígá Conmemoración.

XÓO EMBÁYULÚ RÍ MBIʼI XÚGI̱

3. Ndiéjunʼ nindxu̱u̱ mbá dí nambáyulú rí nijuiʼtsiwáánʼ dí mbiʼi xúgi̱ rá.

³ Nambáyulúʼ má asndu rí mbiʼi xúgi̱ dí nixnáximinaʼ makhañúu Cristo. Mbá xkri̱da, ga̱jma̱a̱ numuu dí nijuiʼtsiwáánʼ, Jeobá naʼni mba̱a̱ a̱jkiu̱u̱n kaʼyoo aʼkhúlú. Ikhaa na̱nguá eʼni rígi̱ numuu dí kasudaa, naʼni mba̱a̱ a̱jkiu̱u̱n kaʼyulú numuu dí ikhaa nandoo. David niʼthí náa mbá ajmúú: “Ikháánʼ Jeobá, ra̱ʼkhá tháán májáanʼ a̱jkia̱a̱nʼ, xtaa xawii mu matani̱ mba̱a̱ a̱jkia̱a̱nʼ” (Sal. 86:5; 103:​3, 10-13).

4. Tsíin niʼtsiwíin Jeobá rá. (Lucas 5:32; 1 Timoteo 1:15.)

⁴ Kúwá tikhuun bi̱ naku̱mu̱ún dí na̱nguá kaʼñúún dí Jeobá maʼni mba̱a̱ a̱jkiu̱u̱n kaʼñún. Gajkhun má dí nimbáa dí ikháanʼ rakáʼyoo. Asndu apóstol Pablo niʼthí: “Rakáʼyoʼ magumbiʼyuʼ apóstol”. Mú nda̱wa̱á niʼthí xóó: “Numuu rí májánʼ wéñuuʼ a̱jkiu̱u̱n Dios ikha jngóo ni̱ndxu̱ʼ apóstol” (1 Cor. 15:​9, 10). Índo̱ natanga̱a̱ a̱jkiu̱lú náa aʼkhá dí nixuʼdámíjná, Jeobá naʼni mba̱a̱ a̱jkiu̱u̱n kaʼyulú. Raʼkháa numuu dí kaʼyulú, nindxu̱u̱ numuu dí Jeobá nandoo kaʼyulú. Ikha jngóo á mu nakumulú dí rakáʼyulú dí Jeobá maʼni mba̱a̱ a̱jkiu̱u̱n kaʼyulú, garmáʼáan a̱jkiu̱lú dí ikhaa na̱nguá niʼtsiwíin xa̱bu̱ jmbiin, ikhaa niʼtsiwíin xa̱bu̱ aʼkhá bi̱ natanga̱a̱ a̱jkiu̱ún náa aʼkhá dí nixudamíjna̱ (atraxnuu Lucas 5:32; 1 Timoteo 1:15).

5. Ndíjkha dí nimbáa ragíʼmaa maʼthí dí Jeobá kaʼyoo maʼni mba̱a̱ a̱jkiu̱u̱n kaʼyoo rá.

⁵ Tséʼniuu á mu mbayuuʼ má tsiguʼ kuwáánʼ ru̱ʼni̱ ñajuunʼ Jeobá, ragíʼmaa mundxaʼwamíjna̱ dí ikhaa kaʼyoo maʼni mba̱a̱ a̱jkiu̱u̱n kaʼyulú ga̱jma̱a̱ numuu rúʼko̱. Nduʼyáá gajkhun dí ikhaa ndaʼyoo dí gíʼdoo numuu xúgíʼ dí niʼnilú ga̱jma̱a̱ numuu ikhaa (Heb. 6:10). Ikhaa na̱nguá nixnáa A̱ʼdióo makhañúu mu maʼni numaaʼ dí niʼni ñajuunʼ, nixnáa numuu dí nindoo maxnúlú mbá regalo. Á mu nakumulú dí Jeobá kaʼyoo maʼni mba̱a̱ a̱jkiu̱u̱n kaʼyulú numuu dí mbayuʼ má kúwáanʼ ru̱ʼni̱ ñajuunʼ, kuwáánʼ ruʼthá rí na̱nguá má ndiyóoʼ dí Jesús makhañúu ga̱jma̱a̱ numulúʼ (atanimbríguii ga̱jma̱a̱ Gálatas 2:21).

6. Ndíjkha dí Pablo niʼniminaʼ maʼni ñajuunʼ Dios rá.

⁶ Pablo ni̱jkha̱nú ndiʼyoo dí xáʼngo̱o̱ gáʼni dí Dios maʼni mba̱a̱ a̱jkiu̱u̱n kaʼyoo. Mú, náá numuu dí niʼniminaʼ wéñuuʼ mu maʼni ñajuunʼ Jeobá xá. Numuu dí nindoo masngájma dí ra̱ʼkhá tháán nixnáa núma̱aʼ ga̱jma̱a̱ numuu dí Dios ra̱ʼkhá tháán májáanʼ a̱jkiu̱u̱n ga̱jma̱á nindxu̱u̱ (Efes. 3:7). Xúʼko̱ má kayuuʼ, ikháanʼlu ma̱ngaa, nuʼni má xúʼko̱ ñajuunʼ Jeobá ga̱jma̱a̱ gagi, raʼkháa numuu dí nandulúʼ rí magáwíinʼ a̱jkiu̱u̱n kaʼyulú nuʼni numuu dí nandulúʼ musngajmáá dí nuxnáa núma̱aʼ ga̱jma̱a̱ numuu dí naʼni mba̱a̱ a̱jkiu̱u̱n kaʼyulú.

7. Ndiéjunʼ imbo̱ʼ embáyulú dí mbiʼi xúgi̱ ga̱jma̱a̱ numuu dí nijuiʼtsiwáánʼ rá. (Romanos 5:1; Santiago 2:23.)

⁷ I̱mba̱ dí nambáyulú mbiʼi xúgi̱ ga̱jma̱a̱ numuu dí nijuiʼtsiwáánʼ nindxu̱u̱ dí ma̱ndoo mambájxulú májánʼ gajmiúlú Jeobá.a Xó má ndiʼyáá náa artículo dí nijngoo, índo̱ ndiʼkhu̱ egumáánlú xóó na̱nguá embájxulú májánʼ gajmiúlú Dios. Mú ga̱jma̱a̱ numuu dí nijuiʼtsiwáánʼ ma̱ndoo makuwáánʼ “tsímáá gajmiúlú Dios” ga̱jma̱a̱ mu̱ʼgua̱ kanuu náa ikhaa (atraxnuu Romanos 5:1; Santiago 2:23).

8. Náá numuu dí gíʼmaa muxnáa núma̱aʼ Jeobá ga̱jma̱a̱ numuu dí nandoo nuʼtákáñii rá.

⁸ Gundxaʼwamíjna̱ i̱mba̱ dí gíʼdoo wéñuuʼ numuu dí nambájxulú gajmiúlú Jeobá, ikhaa nindxu̱u̱ dí nandoo nuʼtákáñii. Ikhaa raʼkháa i̱ndó naʼdxawuun dí nutajkáan índo̱ narígá reunión, ma̱ngaa naʼdxaun índo̱ naʼtájkáan mámbáa dí ikháánʼlú. Dí nuʼtájkáan nambáyulú maʼni̱i̱ a̱jkiu̱lú ga̱jma̱a̱ naʼni makuwáánʼ tsímáá, mú dí itháan gíʼdoo numuu nindxu̱u̱ dí nambájxulú itháan májánʼ gajmiúlú Dios (Sal. 65:2; Sant. 4:8; 1 Juan 5:14). Índo̱ Jesús nixtáa náa tsu̱du̱u̱ Ku̱ba̱ʼ, mbaʼa nuthu eʼtájkháan numuu dí ndiʼyoo dí Jeobá naʼdxawuun ga̱jma̱a̱ índo̱ naʼtájkáan naʼni dí mambájxu̱u̱ itháan májánʼ ga̱jma̱a̱ (Luc. 5:16). Ra̱ʼkhá tháán nuxnáalu núma̱aʼ dí ga̱jma̱a̱ numuu dí Jesús nixnáximinaʼ makhañúu, ma̱ndoo mambájxulú gajmiúlú Jeobá ga̱jma̱a̱ ma̱ndoo muʼtákáñii.

XÓO GAMBÁYULÚ NDA̱WA̱Á

9. Xú káʼnii gámbáñún dí nijuiʼtsiwáánʼ xa̱bi̱i̱ Jeobá bi̱ naguájun jmbu rá.

⁹ Xú káʼnii gámbáñún dí nijuiʼtsiwáánʼ xa̱bi̱i̱ Dios bi̱ naguájun jmbu rá. Jeobá maʼni dí makuwá kámuu mbiʼi. Mbaʼin xa̱bu̱, nundxaʼwamíjna̱ dí nditháan xándoo dí makuwáánʼ kámuu mbiʼi numuu dí asndu má nákha wajyúuʼ xa̱bu̱ nagún rakháñún má xúʼko̱. Mú Jeobá niʼniwíin xa̱bu̱ mu makuwá kámuu mbiʼi. Maski ajndu nakujmaa dí xándoo makuwáánʼ kámuu mbiʼi, mú xúgíʼ ma̱ndoo ga̱jma̱a̱ numuu dí Jeobá niʼni numuu ga̱jma̱a̱ vida ndrígóo mínaaʼ A̱ʼdióo (Rom. 8:32).

10. Ndiéjunʼ kuáʼti̱i̱n bi̱ kaxtaʼwíin ga̱jma̱a̱ bi̱ eʼwíinʼ mugu̱ rá.

¹⁰ Maski ajndu dí makuwáánʼ kámuu mbiʼi nindxu̱u̱ mbá dí marigá nda̱wa̱á, mú Jeobá nandoo dí mundxaʼwamíjná dí asndu xóo kuwáánʼ má ikhí. Bi̱ kaxtaʼwíin nuguaʼthi̱i̱n dí makuwá mekhuíí mu mutañajunʼ gajmiún Cristo náa tsu̱du̱u̱ Ku̱ba̱ʼ (Apoc. 20:6). Ga̱jma̱a̱ eʼwíinʼ mugu̱ nuguáʼthi̱i̱n dí makuwá náa Ku̱ba̱ʼ Mitsaanʼ, náa ni xárígá gaʼkhu ni má xtambiyaʼ (Apoc. 21:​3, 4). Lá ikháán xtaʼti̱i̱n dí maraxtaa kámuu mbiʼi náa tsu̱du̱u̱ Ku̱ba̱ʼ ráʼ. Rígi̱ gíʼdoo ikháá má numuu xóo dí maraxtaa mekhuíí. Jeobá niʼniáánʼ mu makuwáánʼ kámuu mbiʼi náa tsu̱du̱u̱ Ku̱ba̱ʼ. Ikha jngóo maʼdxuu wéñuuʼ a̱jkiu̱lú dí makuwáánʼ ikhí.

11, 12. Ndiéjunʼ nindxu̱u̱ tikhu dí májánʼ wéñuuʼ kuáʼti̱i̱n marigá náa numbaaʼ nuxi̱ʼ rá. (Atayáá ma̱ngaa xtiʼkhuu.)

¹¹ Atatsaʼwáminaʼ xú káʼnii gáraxtaa náa Ku̱ba̱ʼ Mitsaanʼ. Ikhí ní xaxmiéjuanʼ maʼniaʼ nandii ni má dí makhañáaʼ (Is. 25:8; 33:24). Jeobá maxnáaʼ xúgíʼ dí májánʼ dí ikháán gáʼndaaʼ. Ndiéjunʼ gánigua̱a̱ʼ majmañaaʼ rá. Lá manigua̱a̱ʼ majmañaaʼ ga̱jma̱a̱ numún xujkhúʼ ráʼ. Ga̱jma̱a̱ numuu ajmúú ráʼ. O dí matraxníí ráʼ. Ma̱ngaa ikhí mbaʼñúunʼ bi̱ mbuyáá xóo maguma guʼwá, bi̱ muni̱, bi̱ mu̱du̱, bi̱ muni̱ májánʼ ganitsu, bi̱ mudu ri̱ʼi̱, bi̱ muniwíi ajua̱nʼ rí majmaa náa maxtiejunʼ (Is. 35:1; 65:21). ¡Ma̱ndoo majmañaaʼ xúgíʼ dí gaʼndaaʼ numuu dí maraxtaa kámuu!

¹² ¡Ra̱ʼkhá tháán mitsaanʼ gáʼni índo̱ gátujxi̱ín xa̱bu̱ bi̱ nikháñún! (Hech. 24:15). Ga̱jma̱a̱ ra̱ʼkhá tháán mitsaanʼ gáʼni dí maʼga̱ rajmañulú ga̱jma̱a̱ numuu Jeobá ma̱ngaa ga̱jma̱a̱ numuu xúgíʼ dí ikhaa niʼniwíi (Sal. 104:24; Is. 11:9). Mú dí itháan májánʼ nindxu̱u̱ dí nditháan xúʼni̱ dí raʼkhí, ikha jngóo ma̱ndoo muʼni ñajuunʼ Jeobá dí asndu xáʼyóoʼ muʼthán dí maʼni mba̱a̱ a̱jkiu̱u̱n kaʼyulú. Lá matriʼkui̱i̱ ikháán xúgíʼ dí maguma tsajkurámááʼ nda̱wa̱á i̱ndó ga̱jma̱a̱ numuu dí matani “gagiminaʼ mbá xngaa ga̱jma̱a̱ aʼkhá” ráʼ. (Heb. 11:25.) Tsiaki̱i̱ dí gu̱ʼni̱ mbiʼi xúgi̱ magiʼdoo numuu. Garmáʼáan a̱jkia̱a̱nʼ dí maʼga̱nú mbóʼ mbiʼi dí Ku̱ba̱ʼ mitsaanʼ ni xánindxu̱u̱ dí ndiʼkhún muguaʼthi̱i̱n marigá nda̱wa̱á numuu dí yáá makuwáánʼ má ikhí. Xúgíʼ rígi̱ ma̱ndoo marigá ga̱jma̱a̱ numuu dí Jeobá nindoo kaʼyulú wéñuuʼ ga̱jma̱a̱ nixnájxi̱i̱ A̱ʼdióo makhañúu ga̱jma̱a̱ numulúʼ.

GUSNGAJMÁ DÍ NUXNÁA NÚMA̱Aʼ JEOBÁ NUMUU DÍ NANDOO KAʼYULÚ

13. Xú káʼnii gándoo musngajmá dí nuxnáalu núma̱aʼ ga̱jma̱a̱ numuu dí nandoo kaʼyulú Jeobá rá. (2 Corintios 6:1.)

¹³ Xú káʼnii gándoo guxnáa númaaʼ Jeobá ga̱jma̱a̱ numuu dí niʼtsiwáanʼ rá. Índo̱ nuʼni dí muʼni magiʼdoo itháan numuu náa vida ndrígúlú dí muʼni ñajuunʼ (Mat. 6:33). Jesús nikháñúu “mu bi̱ kúwá nduya ní xákúwá xóo eñún ikhiin, makuwá ga̱jma̱a̱ numuu bi̱ nikháñun ma̱ngaa bi̱ nitujxi̱i̱” (2 Cor. 5:15). Jeobá ra̱ʼkhá tháán májánʼ a̱jkiu̱u̱n ga̱jma̱a̱ naʼni mba̱a̱ a̱jkiu̱u̱n kaʼyulú. Índo̱ nuʼni xúgíʼ xó má eʼngo̱o̱ mu muʼni ñajuunʼ, nusngajmá dí nuxnáa núma̱aʼ ma̱ngaa dí nakru̱ʼu̱lú xúgíʼ dí niʼni ga̱jma̱a̱ numulú (atraxnuu 2 Corintios 6:1).

14. Xú káʼnii gusngajmá dí nakumulú kuʼyáá Jeobá índo̱ nundrígúlú ikha ndrígóo rá.

¹⁴ I̱mba̱ enii xóo ma̱ndoo muxnáa núma̱aʼ Jeobá nindxu̱u̱ dí musngajmá rí nakumulú kuʼyáá índo̱ nuʼnimbánii ikha dí naxnúlú. Xú káʼnii gándoo gúʼni rá. Índo̱ guraʼwi̱i̱ ndiéjunʼ gúʼni, gíʼmaa mundxaʼwamíjná má xúʼko̱ ndiéjunʼ eyoo Jeobá muʼnilú, xóo asndu náá mínaaʼ escuela guʼnigájmaa o ndiéjunʼ ñajunʼ gúraʼwíí muʼni (1 Cor. 10:31; 2 Cor. 5:7). Índo̱ nusngájma rí nakumulú kuʼyáá Jeobá náa dí nuraʼwíí muʼni, naʼni dí maguáʼdáá itháán fe náa ikhaa ga̱jma̱a̱ mambájxulú itháan májánʼ gajmiúlú. Ma̱ngaa najkuánú nduʼyáá dí nindxu̱u̱ gajkhun dí makuwáanʼ kámuu mbiʼi nda̱wa̱á (Rom. 5:​3-5; Sant. 2:​21, 22).

15. Xú káʼnii gándoo musngajmá dí nuxnáa núma̱aʼ índo̱ narígá Conmemoración rá.

¹⁵ I̱mba̱ enii xóo ma̱ndoo musngajmá dí nuxnáa núma̱aʼ ga̱jma̱a̱ numuu dí nijuiʼtsiwáánʼ ma̱ngaa dí Jeobá nandoo kaʼyulú, nindxu̱u̱ dí majmulú májánʼ mbiʼi nákhá xóó tsérígá ga̱jma̱a̱ nda̱wa̱á dí gájngoo Conmemoración. Raʼkháa i̱ndó muríyaʼ awan dí makuwáánʼ ikhí, ma̱ngaa ma̱ndoo muʼthúún eʼwíinʼ dí makuwa (1 Tim. 2:4). Guʼthúún xú káʼnii nindxu̱u̱ reunión kiejunʼ rígi̱. Ma̱ndoo musngajmúún video dí na̱ʼkha̱ náa jw.org dí kayá edxu̱u̱ Náa numuu nikháñu Jesús rá. ga̱jma̱a̱ Guʼni ku̱ma̱a̱ dí xú nikháñúu Jesús. A̱ngiu̱lú bi̱ kuya̱ edxu̱u̱ ma̱ngaa muthúún bi̱ niniñaaʼ rutaraʼa. Lá naʼngo̱o̱ natatsaʼwáminaʼ xú káʼnii gagi kúwá bi̱ kúwi̱i̱n mekhuíí ga̱jma̱a̱ bi̱ kúwá náa tsu̱du̱u̱ Ku̱ba̱ʼ á mu tikhun mugiu̱u̱ Jeobá bi̱ nindáti̱gi̱i̱n naxkajxi̱i̱n a̱jkiu̱ún matangi̱ín ráʼ. (Luc. 15:​4-7). Índo̱ gárígá Conmemoración ma̱ndoo muʼgímijná dí raʼkháa i̱ndó ikháanʼ gurájximijnálú, ma̱ngaa dí murajxi̱ín bi̱ ndiʼkhún egiʼdi̱i̱ eguwáʼ ga̱jma̱a̱ bi̱ mbayuuʼ má eʼni dí nánguá eguwáʼ. ¡Guʼni dí xúgíinʼ maku̱mu̱ún dí májánʼ nini dí niguwáʼ! (Rom. 12:13).

16. Ndíjkha dí gíʼdoo numuu mundxaʼwamíjna̱ muʼni itháan ñajuunʼ Jeobá índo̱ gárígá Conmemoración rá.

¹⁶ Lá ma̱ndoo muʼni itháan ñajuunʼ Jeobá índo̱ gaʼni Conmemoración rá. Rígi̱ nindxu̱u̱ mbá náa ma̱ndoo musngajmáá dí nuxnáa núma̱a̱ Jeobá ga̱jma̱a̱ Jesús ga̱jma̱a̱ numuu xúgíʼ dí nini ga̱jma̱á nindxu̱lú. Índo̱ nuʼtáraʼalu itháan, itháan má eʼyáá xóo embáyulú Jeobá ga̱jma̱a̱ itháan má gákumulú kuʼyáá ikhaa (1 Cor. 3:9). Ma̱ngaa, gármáʼáan a̱jkiu̱lú dí muraxnuu Biblia dí kaʼyoo índo̱ narígá Conmemoración, dí na̱ʼkha̱ náa i̱yi̱i̱ʼ Guʼnigajmaa tsejtsí mbiʼi Escritura ga̱jma̱a̱ Iyii’ dí najmulú náa reunión. Ma̱ngaa ma̱ndoo muʼnigajmaa itháán versículo ndrígóo Biblia rúʼko̱ índo̱ gúʼnigajma̱a̱ ndajkuaan.

17. Ndiéjunʼ eʼni dí Jeobá maʼdxuu a̱jkiu̱u̱n kaʼyulú rá. (Atayáá ma̱ngaa kúgumaʼá “Dí ma̱ndoo muʼni mu musngajmá dí nuxnáa núma̱aʼ Jeobá dí nandoo kaʼyulú”.)

¹⁷ Xaxmiéjuanʼ á mu tséʼnga̱a̱ʼ gátani̱ xúgíʼ xó má naʼthí náa artículo rígi̱. Garmáʼáan a̱jkia̱a̱nʼ dí Jeobá tséʼni mbríguíi dí natani̱ ikháán ga̱jma̱a̱ dí nuni̱ eʼwíinʼ. Ikhaa ndaʼyoo dí gíwánʼ náa a̱jkia̱a̱nʼ ga̱jma̱a̱ nadxuu a̱jkiu̱u̱n numuu dí ndaʼyoo rí ikháán naraxnáa núma̱aʼ ga̱jma̱a̱ numuu dí ikhaa niʼtsiwáanʼ (1 Sam. 16:7; Mar. 12:​41-44).

18. Náá numuu dí ra̱ʼkhá tháán nuxnáa núma̱aʼ Jeobá ga̱jma̱a̱ Jesús rá.

¹⁸ I̱ndó ga̱jma̱a̱ numuu dí nijuiʼtsiwáánʼ, Jeobá ma̱ndoo maʼni mba̱a̱ a̱jkiu̱u̱n kuyulú, ma̱ndoo mambájxulú gajmiúlú ga̱jma̱a̱ ma̱ndoo muguaʼthi̱i̱n makuwáánʼ kámuu mbiʼi. Gusngajmá má xúʼko̱ dí nuxnáa núma̱aʼ ga̱jma̱a̱ numuu dí Jeobá nandoo kuʼyúlú, dí nixkajxi̱i̱ maxnúlú xúgíʼ dí ra̱ʼkhá tháán májánʼ (1 Juan 4:19). Ma̱ngaa gusngajmá dí nuxnáa núma̱aʼ dí Jesús ra̱ʼkhá tháán nindoo kaʼyulú wéñuuʼ dí asndu nixnáximinaʼ ga̱jma̱á numulúʼ (Juan 15:13).