Araxná consejo dí mambáñún eʼwíinʼ

1. Tsíín gíʼmaa muxnún consejo eʼwíinʼ ga̱jma̱a̱ náá numuu rá.

TIKHUUN xa̱bu̱ tséʼniún miʼskhaa muxna consejo, mú eʼwíinʼ naʼniún gakhi̱i̱. Tséʼniuu má asndu xú káʼnii xúgiáanʼ gíʼmaa muxná consejo índo̱ gáʼyóoʼ. Jesús niʼthí rí gíʼmaa musngájma dí nandulúʼ kuyamíjna̱ á mu nandulúʼ manindxu̱lú xa̱bi̱i̱ (Juan 13:35). Nusngájma dí nandulúʼ kuʼñúún a̱ngiu̱lú índo̱ nuxnún consejo rí ndañún. Ma̱ngaa náa Biblia naʼthí dí índo̱ nuxnún consejo eʼwíinʼ nambájxulú itháan májánʼ gajmiúlú (Prov. 27:9).

2. Ndiéjunʼ gíʼmaa majmañún muni̱ ancianos ga̱jma̱a̱ náá numuu rá. (Atayáá ma̱ngaa kúgumaʼá “Xóo maraxna consejo náa reunión dí narígá ta̱pha̱ xmáná”.)

² Ancianos ndayóoʼ mbuyáá xóo muxná’ consejo dí mambáñún eʼwíinʼ, numuu dí Jeobá ga̱jma̱a̱ Jesús nirajkuáa náa ñawúúnʼ dí muñewu̱u̱n bi̱ kúwá náa congregación (1 Ped. 5:​2, 3). Nunimbáníí ñajunʼ rígi̱ índo̱ nuxna discurso náa na̱ʼkha̱ consejo dí kagu̱ náa Biblia, ga̱jma̱a̱ índo̱ nuxnulúʼ consejo dí ndayúlú, ma̱ngaa índo̱ numbañún matangi̱ín bi̱ niniña̱a̱nʼ ragún reunión. Xú káʼnii gándoo gúni ancianos o xúgiáánʼ mu muxná mbá májánʼ consejo índo̱ gáʼyóoʼ rá.

3. a) Xú káʼnii gándoo gúxná mbá májánʼ consejo rá. (Isaías 9:6; atayáá ma̱ngaa kúgumaʼá “Guʼyaridáá Jesús índo̱ gúxná mbá consejo”.) b) Ndiéjunʼ gúʼyáá náa artículo rígi̱ rá.

³ Ma̱ndoo majmañulú muxná mbá májánʼ consejo á mu nduʼyaridún tikhuun xa̱bu̱ bi̱ naʼthí ga̱jma̱a̱ numún náa Biblia. Bi̱ nigíʼ itháan májánʼ xkri̱da nindxu̱u̱ Jesús, náa Biblia naxná mbiʼyuu “Bi̱ Najmañuu naxná Consejo” (atraxnuu Isaías 9:6). Náa artículo rígi̱ mbuʼyáá ndiéjunʼ gúʼni índo̱ mbáa gándu̱ʼu̱lú dí muxnáá consejo, ga̱jma̱a̱ índo̱ gúxná consejo maski ajndu tséndu̱ʼu̱lú. Ma̱ngaa mbuʼyáá ndíjkha gíʼdoo numuu muxná mbá májánʼ consejo náa mbiʼi rí kaʼyoo.

ÍNDO̱ MBÁA GÁNDU̱ʼU̱LÚ CONSEJO

4, 5. Ndiéjunʼ gíʼmaa murajximíjna̱ índo̱ mbáa gándu̱ʼu̱lú consejo rá. Atagíʼ mbá xkri̱da.

⁴ Ndiéjunʼ ginii gíʼmaa mu̱ʼni̱ índo̱ mbáa gándu̱ʼu̱lú consejo rá. Mbáa nadxulú ga̱jma̱a̱ nacha̱ nandulúʼ mumbáyíí, mú itháan májánʼ dí ginii murajximíjna̱: “Lá nakro̱ʼo̱ʼ ga̱jma̱a̱ numuu dí ikhaa narajxu̱ʼ mu ma̱ndoo maxnu̱u̱ mbá májánʼ consejo xáʼ.” Nguáná itháan má májánʼ dí mumbáyíí mbayáaʼ i̱mba̱a̱ bi̱ ma̱ndoo maxnúu mbá májánʼ consejo.

⁵ Guʼgíʼ mbá xkri̱da, gundxa̱ʼwámi̱jna̱ dí bi̱ nambájxulú gajmiúlú naʼniuu mbá nandii mbiiʼ. Mbóo mbiʼi naʼthúlú dí ndiyáʼ mbaʼyoo ndiéjunʼ thana mambáyúu ga̱jma̱a̱ narajxulú ndiéjunʼ endxa̱ʼwa̱míjnalu. Mbáa ikháanʼ nduʼyáá má ndiéjunʼ gúʼni, mu á mu na̱nguá nindxu̱lú médico ga̱jma̱a̱ tséʼyáá ndiéjunʼ thana gámbáyúu, itháan májánʼ dí muʼthán mbayáaʼ mbáa bi̱ gajkhun ma̱ndoo mambáyúu.

6. Ndiéjunʼ gíʼmaa mu̱ʼni̱ nákha xóó tséxna mbá consejo rá.

⁶ Maski ajndu nakumulú dí majmáán muxnáá consejo mbáa, mú itháan májánʼ dí xúriʼña̱a̱ʼ mbá nacha̱ índo̱ gúndu̱ʼu̱lú consejo, numuu dí xó má naʼthí náa Proverbios 15:​28, “xa̱bu̱ májáanʼ nandxaʼwáminaʼ májánʼ dí gáriʼña̱a̱”. Ikha jngóo maski ajndu nakumulú dí nduʼyáálú má ndiéjunʼ gúʼthá, mú itháan májánʼ dí muríyaʼ mbiʼi mu mbuʼyáʼ xóo mumbáyíí, mu muʼtájkáan ga̱jma̱a̱ mu mundxa̱ʼwa̱míjna̱ dí niraxnuu. Rígi̱ gámbáyulú mu muxná mbá májánʼ consejo dí nambríguii ga̱jma̱a̱ dí nandxa̱ʼwáminaʼ Jeobá. Guʼyáá dí nigíʼnuu profeta Natán.

7. Ndiéjunʼ eʼsngúlú xkri̱doo Natán rá.

⁷ Índo̱ rey David niʼthúu̱n Natán dí nandoo maʼni mbá guʼwá náa mbiʼyamajkuíí Jeobá. Natán mbá nacha̱ niʼthúu̱n dí májánʼ má dí nandoo maʼni, mú Jeobá na̱nguá nindoo dí David maʼni goʼwóo. Natán ginii ndiyóoʼ marajxu̱u̱ Jeobá nákha xóó tséʼthúu̱n David (1 Crón. 17:​1-4). Rígi̱ naʼsngúlú dí índo̱ mbáa gándu̱ʼu̱lú consejo, itháan májánʼ dí xúʼtálú mbá nacha̱ (Sant. 1:19).

8. Ndiéjunʼ i̱mba̱ numuu dí gíʼmaa mundxa̱ʼwa̱míjna̱ májánʼ nákha xóó tséxná mbá consejo rá.

⁸ I̱mba̱ numuu dí gíʼmaa mundxa̱ʼwa̱míjna̱ májánʼ nákha xóó tséxná mbá consejo. Á mu mbá nacha̱ exnáá consejo bi̱ na̱ndu̱ʼu̱lú ga̱jma̱a̱ tségájnuu májánʼ dí naraʼwíí maʼni, mangáánʼ maguáʼdáá aʼkhúlú. Ikha jngóo itháan májánʼ dí mundxa̱ʼwa̱míjna̱ májánʼ nákha xóó tséxna mbá consejo.

ÍNDO̱ GÚXNÁ MBÁ CONSEJO MASKI AJNDU TSÉNDU̱ʼU̱LÚ

9. Ndiéjunʼ ginii gíʼmaa mbuyáá ancianos nákha xóó tséxnáá consejo mbáa ndxájulú rá. (Gálatas 6:1.)

⁹ Nguáná ancianos ndayóoʼ muxnáá consejo mbáa ndxájulú bi̱ xtáa ra̱jkha̱ “náa kamba̱a̱ dí raʼkhí” xó má eʼthí náa Gálatas 6:1 (atraxnuu). Á mu mbáa ndxájulú tséndxaʼwáminaʼ májánʼ dí gáraʼwíí maʼni, mbáa nda̱wa̱á gamíi makudaminaʼ mbá aʼkhá mbiiʼ. Ancianos nandún mumbayíí mu maʼgá má xúʼko̱ náa kamba̱a̱ dí maʼga kayáa maxtáa kámuu (Sant. 5:​19, 20). Mu ancianos muxnáá mbá consejo dí mambáyúu, ginii gíʼmaa mbuyáá á mu gajkhun xtáa ra̱jkha̱ náa kamba̱a̱ dí raʼkhí o á mu i̱ndó má xtáa raraʼwíí maʼni mbá dí tsémbríguii ga̱jma̱a̱ dí ikhiin nanigu̱u̱nʼ. Jeobá naniñuuʼ dí mámbáa majmuu ku̱ma̱ ndrígóo mu maraʼwíí dí maʼni (Rom. 14:​1-4). Mú, á mu ancianos nduyáá dí ndxájulú niʼni mbá dí gamíi maʼni gachúu dí nambájxu̱u̱ ga̱jma̱a̱ Jeobá rá. Xú káʼnii gándoo gúxnáá consejo dí mambáyúu xá.

10-12. Ndiéjunʼ gíʼmaa maʼni mbáa anciano índo̱ gáxnúu consejo bi̱ tándo̱ʼo̱o̱ rá. Atagíʼ mbá xkri̱da (atayáá ma̱ngaa xtiʼkhuu).

¹⁰ Mingíjyúuʼ nindxu̱u̱ dí ancianos muxnáá consejo mbáa ndxájulú bi̱ tánda̱ʼa̱ consejo. Apóstol Pablo niʼthí dí nguáná mbáa xa̱bu̱ ndayóoʼ dí makhánáá consejo maski ajndu ikhaa naku̱mu̱u̱ dí tséyóoʼ má. Ikha jngóo nákha ancianos xóó tséxnáá mbá consejo, rígá mbaʼa dí ndayóoʼ muni̱, mu xúʼko̱ ndxájulú maniñaminaʼ rí muxnáá consejo.

¹¹ Dí maraxna mbá consejo nindxu̱u̱ xóo matadu náa mbaaʼ gújkhúʼ. Xa̱bu̱ bi̱ naʼdu, ginii naxnúu xku̱bi̱ mu maʼni wabaʼ ku̱ba̱ʼ. Ikhú naʼdu tsígáʼ ga̱jma̱a̱ nda̱wa̱á naxíjyooʼ. Xúʼko̱ má kayuuʼ, mu anciano maxná mbá consejo dí túnda̱ʼa̱a̱ gíʼmaa “maʼniratoo ku̱ba̱ʼ”. Índo̱ anciano gáʼyoo dí ma̱ndoo maxná consejo, ginii ma̱ndoo maʼthúu̱n ndxájulú dí nandoo kaʼyoo ga̱jma̱a̱ dí naxmiéjuunʼ kaʼyoo, ikha jngóo nandoo maʼtámíjná ga̱jma̱a̱. Ndxájulú madxawun consejo dí gáxnúu anciano á mu ndaʼyoo dí anciano bugi̱ nandoo kaʼñún a̱ngiu̱lú ga̱jma̱a̱ májáanʼ a̱jkiu̱u̱n.

¹² Índo̱ anciano gáʼtámíjná ga̱jma̱a̱ ndxájulú, ma̱ndoo maʼni marmáʼáan a̱jkiu̱u̱n dí xúgiáanʼ nakiéʼkulu ga̱jma̱a̱ dí ndayúlú consejo, mu xúʼko̱ ndxájulú ma̱ndoo maʼdxun consejo dí gáxnúu, xóo muʼthá “mu ku̱ba̱ʼ maʼni wabaʼ” (Rom. 3:23). Anciano ndayóoʼ majmuu ajngáa wabaʼ mu masngájmuu ndxájulú ga̱jma̱a̱ Biblia náa dí nikiéʼkúun. Nda̱wa̱á dí ndxájulú gáʼyoo dí nikiéʼkúun, anciano ndayóoʼ maʼthúu̱n mbájmbu ndiéjunʼ gáʼni mu mariʼkumina̱a̱ʼ, xóo muʼthá “naʼdu tsiga”. Iwáá kayuuʼ ma̱ndoo maʼthúu̱n ndxájulú náa dí májánʼ naʼni ga̱jma̱a̱ maʼtájkháan mbóó ga̱jma̱a̱, xígi̱ “naxíjyooʼ” tsígáʼ (Sant. 5:15).

13. Ndiéjunʼ gándoo gúni̱ anciano mu mbuyáá á mu ndxájulú nikro̱ʼo̱o̱ májánʼ consejo dí nixnáá rá.

¹³ Mbá nguáná maʼni dí ndxájulú bi̱ nikhánáá consejo makro̱ʼo̱o̱ i̱mba̱ núthu, raʼkháa xóo niʼthí anciano. Ndiéjunʼ gándoo gúni̱ anciano mu xárígá rígi̱ rá. Ma̱ndoo muni̱i̱ grajxe̱ ndxájulú mu mbuyáá á mu nikro̱ʼo̱o̱ májánʼ ga̱jma̱a̱ á mu ndaʼyoo xóo magíʼ maʼnimbánuu consejo dí nixnáá (Ecl. 12:11).

NÁA MBIʼI RÍ KAʼYOO GA̱JMA̱A̱ XÓO PHÚ GÍʼMAA

14. Ndíjkha ragíʼmaa muxná consejo índo̱ nakiʼnáanʼlú rá.

¹⁴ Numuu dí xúgiáanʼ nindxu̱lú xa̱bu̱ aʼkhá, mbáa nguáná muʼthá o mu̱ʼni̱ mbá dí xánigu̱u̱nʼ eʼwíinʼ (Col. 3:13). Náa Biblia naʼthí rí mbáa nguáná asndu makiʼnáánʼ kuʼyamijná (Efes. 4:26). Mú ragíʼmaa muxná mbá consejo índo̱ nakiʼnáanʼlú, numuu dí “xa̱bu̱ bi̱ nakásngañu̱u̱ʼ tséʼni marigá dí jmbu xóo rí nandoo Dios” (Sant. 1:20). Á mu nuxná consejo índo̱ nakiʼnáanʼlú, mbáa mu̱ʼni̱ dí marigá itháan mba̱a̱ xkujndu, rígi̱ tsíyoo gáʼthí dí xúʼtháánʼ xóo kumulúʼ mbáa bi̱ niʼni gawúnlú. Mú itháan májánʼ dí muguáʼthi̱i̱n asndu índo̱ nánguá ekiʼnáanʼlú mu muʼtámíjná gajmiúlú. Guʼyáá ndiéjunʼ gándoo gájmañulú náa Elihú bi̱ nixnúu májánʼ consejo Job.

15. Ndiéjunʼ eʼsngúlú dí niʼni Elihú rá. (Atayáá ma̱ngaa xtiʼkhuu.)

¹⁵ Job mba̱yu̱u̱ʼ nixtáa raʼtambáyumínaʼ ga̱jma̱a̱ numuu dí nitawéñííʼ bi̱ nuthi rí nambájxu̱u̱n gajmiún. Elihú niʼdxawun xúgíʼ dí niʼthí Job, maski ajndu nigáwíinʼ a̱jkiu̱u̱n kaʼyoo Job, mú nikiʼnáa kaʼyoo numuu dí niʼthí dí ragájkhun ga̱jma̱a̱ numuu Jeobá. Mú nigi̱ʼthu̱u̱n asndu índo̱ nánguá nikiʼnáa, ikhú nixnúu consejo Job ma̱ngaa niʼni ga̱jma̱a̱ gamajkhu (Job 32:2; 33:​1-7). Xkri̱doo naʼsngúlú mbá dí gíʼdoo wéñuuʼ numuu, dí itháan májánʼ muxná consejo índo̱ na̱nguá ekiʼnáanʼlú, mú gúʼni ga̱jma̱a̱ gamajkhu ma̱ngaa ga̱jma̱a̱ ngajua (Ecl. 3:​1, 7).

XÚNIʼÑÁÁNʼ RUXNÁ CONSEJO GA̱JMA̱A̱ GUʼDXAWÍÍN CONSEJO DÍ GÚXNULÚ

16. Ndiéjunʼ eʼsngáa ikháán dí naʼthí náa Salmo 32:8 rá.

¹⁶ Náa texto rí ka̱ya̱ edxu̱u̱ artículo rígi̱ Jeobá naʼthúlú: “Mba̱ya̱a̱ʼ má xúʼko̱ ga̱jma̱a̱ mañe̱wa̱a̱nʼ índo̱ gáxna̱a̱ʼ consejo” (atraxnuu Salmo 32:8).a Rígi̱ nandoo gáʼthúu̱n dí índo̱ naxnúlú consejo, ikhaa tséniñuuʼ rambáyulúʼ mu muʼgíʼ muʼnimbáníí. ¡Jeobá nagíʼ mbá májánʼ xkri̱da! Índo̱ gúxnáá consejo mbáa ndxájulú, guʼyaridáá Jeobá ga̱jma̱a̱ gu̱ʼni̱ xó má eʼngo̱o̱ mu mumbáyíí magíʼ maʼnimbánuu consejo dí nixnáá.

17. Xú káʼnii nindxu̱ún ancianos bi̱ nuxna mbájmbu consejo dí na̱ʼkha̱ náa Biblia rá. (Isaías 32:​1, 2.)

¹⁷ Xúgi̱ dí phú ndayóoʼ muʼdxawíín consejo dí gúxnulú ga̱jma̱a̱ muxnún eʼwíinʼ consejo dí mambáñún (2 Tim. 3:1). Ancianos bi̱ nuxna mbájmbu consejo dí na̱ʼkha̱ náa Biblia “nindxu̱ún xóo mbá mata náa na̱jkha̱ kúʼúun iyaʼ náa mbaaʼ dí nda̱a̱ iyaʼ” (atraxnuu Isaías 32:​1, 2). Nadxulú dí kuaʼdiin bi̱ nambájxulu gajmiúlú bi̱ nuxnulúʼ consejo dí phú ndayúlú raʼkháa dí ikháanʼ nandulúʼ muʼdxawíín. Ajngáa dí nuthi nindxu̱u̱ “xóo manzanas dí oro rí tuaʼán náa xua̱a̱ dí niguma ga̱jma̱a̱ plata” (Prov. 25:11). Gajmañulú má xúʼko̱ muxná consejo dí mambáñún eʼwíinʼ ga̱jma̱a̱ guʼgíʼ edxu̱lúʼ muʼdxawíín consejo dí gúxnulú.