Ndíjkha gíʼmaa munda̱ʼa̱ consejo rá.

1. Ndiéjunʼ gúʼni mu dí gúraʼwíí mu̱ʼni̱ magajnúu májánʼ rá. (Proverbios 13:10; 15:22.)

XÚGIÁANʼ nandulúʼ rí magajnúu májánʼ dí gúraʼwíí mu̱ʼni̱, ikha jngóo náa Ajngá rawuunʼ Dios naʼsngúlú dí gíʼmaa munda̱ʼa̱ consejo (atraxnuu Proverbios 13:10;a 15:22).b

2. Ndiéjunʼ nikudaminaʼ maʼni Jeobá rá.

² Ndawa̱a̱ i̱mba̱a̱ bi̱ ma̱ndoo maxnúlúʼ consejos dí itháan májánʼ ki xóo Anu̱lú Jeobá, ikha jngóo gíʼmaa muʼtákáñíí mu maxnúlúʼ ku̱ma̱, numuu dí ikhaa nikudaminaʼ: “Mba̱ya̱a̱ʼ má xúʼko̱ ga̱jma̱a̱ mañe̱wa̱a̱nʼ índo̱ gáxna̱a̱ʼ consejo” (Sal. 32:8). Rígi̱ nandoo gáʼthúu̱n dí Jeobá xtáa má xúʼko̱ xawii mu maxnúlúʼ consejo dí ndayúlú ga̱jma̱a̱ mambáyulú mu muʼnimbáníí.

3. Ndiéjunʼ grajxe̱ gúriʼña̱a̱ náa artículo rígi̱ rá.

³ Náa artículo rígi̱ majmulú Ajngá rawuunʼ Dios mu maxtiʼña̱a̱ a̱jkhu̱ grajxe̱ dí nuʼnilú. 1) “Xú káʼnii gíʼmaa mani̱ndxu̱ʼ mu mambáyuʼ consejo dí gúxnúʼ xá. 2) Tsáá gándoo gáxnúʼ consejo dí mambáyuʼ rá. 3) Xú káʼnii gásngajmá dí gajkhun nandoʼ consejo rá. 4) Náá numuu dí ragíʼmaa mu̱ʼni̱ xó má eni̱ eʼwíinʼ rá.”

“XÚ KÁʼNII GÍʼMAA MANI̱NDXU̱ʼ RÁ.”

4. Xú káʼnii gíʼmaa manindxu̱lú á mu nandulúʼ rí mambáyulú consejo dí gúxnulú xá.

⁴ Mu mambáyulú consejo dí gúxnulú gíʼmaa manindxu̱lú xa̱bu̱ guabaaʼ. Majmáán muraʼwíí májánʼ dí mu̱ʼni̱ á mu nuʼtháán maxnúlúʼ consejo mbáa bi̱ nakro̱ʼo̱o̱ májánʼ. Á mu na̱nguá nindxu̱lú xa̱bu̱ guabaaʼ Jeobá xándoo mambáyulú ga̱jma̱a̱ xúʼyáá xóo guʼnimbáníí consejo dí na̱ʼkha̱ náa Ajngá rawuunʼ (Miq. 6:8; 1 Ped. 5:5). Á mu nindxu̱lú xa̱bu̱ guabaaʼ muʼdxawíín ga̱jma̱a̱ muʼnimbáníí consejo dí na̱ʼkha̱ náa Biblia.

5. Ndíjkha jngóo dí rey David ma̱ndoo maʼnimbamínáʼ rá.

⁵ Guʼyáá dí ejmañulúʼ náa xkri̱doo rey David, ikhaa ninindxu̱u̱ xa̱bu̱ guabaaʼ maski ajndu mbaʼa dí niʼngo̱o̱ niʼni. Asndu nákha xóó tsénindxu̱u̱ rey, xa̱bu̱ nuniʼniiʼ numuu dí najmañuu naʼdu̱u̱ ma̱ngaa asndu ni̱ʼdu̱u̱ náa inuu rey Saúl (1 Sam. 16:​18, 19). Índo̱ Jeobá nigíiʼ mu mani̱ndxu̱u̱ nuxi̱i̱ʼ rey, nixnúu xi̱ʼ kaʼwu ndrígóo, rígi̱ niʼni dí magiʼdoo itháan tsiaki̱i̱ (1 Sam. 16:​11-13). Ma̱ngaa xa̱bu̱ xuajin nduyamajkuíí numuu dí niʼngo̱o̱ niʼni gajmíi̱nʼ mbaʼin xa̱bu̱ sia̱nʼ ndrígióo, xóo Goliat bi̱ mixkujiiʼ (1 Sam. 17:​37, 50; 18:7). Á mu David niʼni mbámínaʼ mbáa mandxa̱ʼwa̱mínáʼ dí tséyóoʼ má dí eʼwíinʼ muxnáá consejo, numuu dí ikhaa rígá má mbaʼa dí niʼngo̱o̱ niʼni. Mú ikhaa táʼni xúʼko̱.

6. Xú káʼnii eʼyáá dí David niʼdxawun consejo dí nixnáá xá. (Atayáá ma̱ngaa xtiʼkhuu .)

⁶ Índo̱ David nindxu̱u̱ má rey, nimbájxu̱u̱ gajmíi̱nʼ bi̱ ma̱ndoo muxnáá consejo (1 Crón. 27:​32-34). Asndu má nákha xóó tsénindxu̱u̱ rey, David nixtáa xawii maʼdxuun consejo dí eʼwíinʼ nuxnáá, tséʼniuu á mu dí naʼthí mbáa xa̱biya o a̱ʼgu̱ numuu dí nindxawun dí niʼthí Abigaíl a̱ʼgiu̱u̱ Nabal bi̱ gújkhúʼ a̱jkiu̱u̱n, bi̱ naʼni mbámínaʼ ga̱jma̱a̱ bi̱ tséʼyamajkhún eʼwíinʼ, mú David ninindxu̱u̱ xa̱bu̱ guabaaʼ numuu dí niʼnimbo̱o̱ dí niʼthúu̱n Abigaíl, ga̱jma̱a̱ numuu rígi̱ ikhaa táʼni mbá dí raʼkhí (1 Sam. 25:​2, 3, 21-25, 32-34).

7. Ndiéjunʼ ejmañulúʼ náa xkri̱doo David rá. (Eclesiastés 4:13; atayáá ma̱ngaa xtiʼkhuu.)

⁷ Ndiéjunʼ ejmañulúʼ náa xkri̱doo David rá. Dí maski ajndu rígá dí najmañulú nu̱ʼni̱ o kuaʼdáá mbá ñajunʼ kiejunʼ ragíʼmaa mundxa̱ʼwa̱míjna̱ dí nduʼyáálú má xúgíʼ ga̱jma̱a̱ dí tséyóoʼ má dí muxnúlú consejo. Ma̱ngaa ndayóoʼ makuwáanʼ xawii muʼdxawíín consejo dí mambáyulú tséʼniuu má tsáá gáxnulú (atraxnuu Eclesiastés 4:13). Mu xúʼko̱ xúʼni̱ mbá dí maʼni gawúnlú o dí maʼni gawúúnʼ eʼwíinʼ.

“TSÁÁ GÁNDOO GÁXNÚʼ CONSEJO DÍ MAMBÁYUʼ RÁ.”

8. Ndíjkha rí májánʼ niʼni David dí nindo̱ʼo̱o̱ Jonatán dí maxnúu consejo rá.

⁸ Guʼyáá i̱mba̱ dí najmañulú náa xkri̱doo David. Ikhaa nindu̱ʼu̱u̱n consejo bi̱ nambájxu̱u̱n májánʼ gajmiún Jeobá, ma̱ngaa bi̱ nakru̱ʼu̱u̱n xúgíʼ dí xtáa rarígá. Mbá xkri̱da índo̱ nindoo mambajxi̱i̱ ga̱jma̱a̱ rey Saúl, nindo̱ʼo̱o̱ consejo Jonatán, a̱ʼdióo má rey Saúl. Náá numuu dí Jonatán nindxu̱u̱ bi̱ ma̱ndoo maxnúu mbá májánʼ consejo xá. Numuu dí ikhaa nambájxu̱u̱ májánʼ ga̱jma̱a̱ Jeobá ma̱ngaa naniniiʼ májánʼ Saúl (1 Sam. 20:​9-13). Xú káʼnii gándoo gúʼyaridáá David rá.

9. Índo̱ gáʼyulúʼ mbá consejo tsáá gándoo gunda̱ʼa̱a̱ rá. Atagíʼ mbá xkri̱da (Proverbios 13:20).

⁹ Índo̱ gáʼyulúʼ mbá consejo, májánʼ gáʼni dí munda̱ʼa̱a̱ mbáa bi̱ nambájxu̱u̱ májánʼ ga̱jma̱a̱ Jeobá ma̱ngaa bi̱ nakro̱ʼo̱o̱ má ga̱jma̱a̱ numuu rí ikháanʼ nandulúʼ mbuʼyáác (atraxnuu Proverbios 13:20).d Mbá xkri̱da gundxa̱ʼwa̱míjna̱ʼ dí mbáa ndxájulú dxámá nandoo manigúúnʼ, tsáá gándoo gándo̱ʼo̱o̱ consejo xá. Mambáyúu má consejo dí gáxnúu bi̱ nambájxu̱u̱ ga̱jma̱a̱ maski ajndu ikhaa xóó tsénigunʼ á mu dí najmuu Biblia. Mú itháán má mambáyúu consejo dí gúxnáá a̱ngiu̱lú gajmii bi̱ mba̱yu̱u̱ʼ má kúwá runi̱ ñajuunʼ Jeobá, numuu dí ma̱ndoo muthán xóo magíʼ maʼnimbánuu consejo dí na̱ʼkha̱ náa Biblia, ma̱ngaa ma̱ndoo muthán ndiéjunʼ rí nijmañún ikhiin náa xúgíʼ tsiguʼ dí kúwá mbóó.

10. Ndiéjunʼ gúʼyáálú xúgi̱ rá.

¹⁰ Ndiʼyáálú má ndiéjunʼ cualidad ndayóoʼ maguaʼdáá ga̱jma̱a̱ tsáá ma̱ndoo maxnúlú májánʼ consejo. Rí xúgi̱ guʼyáá xú káʼnii gándoo gúsngajmá dí gajkhun nandulúʼ consejo ga̱jma̱a̱ á mu májánʼ nindxu̱u̱ dí mundu̱ʼu̱u̱n eʼwíinʼ muthulú dí gúʼni.

“XÚ KÁʼNII GÁSNGAJMÁ DÍ GAJKHUN NANDOʼ CONSEJO RÁ.”

11, 12. a) Ndiéjunʼ dí ragíʼmaa mu̱ʼni̱ rá. b) Ndiéjunʼ niʼni Rehoboam índo̱ ndiyóoʼ maraʼwíí maʼni mbá dí gíʼdoo numuu rá.

¹¹ Á mu mbáa xa̱bu̱ niraʼwíí má dí maʼni mú nandu̱ʼu̱u̱n xóó consejo eʼwíinʼ, ikhaa na̱nguá esngájma dí gajkhun nandoo consejo, i̱ndó má nandoo muthán dí májánʼ má dí niraʼwíí maʼni. Guʼyáá ndiéjunʼ eʼsngúlú dí niʼni Rehoboam.

¹² Nda̱wa̱á dí nikháñuu Salomón, Rehoboam ninindxu̱u̱ rey náa Israel. Nákhá ikhú xuajin mbaʼa dí májánʼ nigiʼdoo, mú israelitas nixiéʼkhá numuu dí Salomón nixtúmiin muñajunʼ, ikha jngóo nitháán Rehoboam dí ní xáxnún ñajunʼ gakhi̱i̱ muni̱, rey niʼthún dí muniña̱a̱ʼ mandxa̱ʼwa̱mínáʼ mu mbaʼyoo ndiéjunʼ gáʼni. Májánʼ má niʼni dí ginii nirajxu̱u̱n bi̱ kuya̱ edxu̱u̱ bi̱ nimbayíí anu̱u̱ (1 Rey. 12:​2-7). Mú ikhaa táʼdxawun consejo dí nixnáá. Náá numuu rá. Lá ga̱jma̱a̱ numuu dí niraʼwíí má dí maʼni, mú i̱ndó nindoo dí mbáa maʼthúu̱n dí májánʼ má dí nandoo maʼni xáʼ. Mbáa ikha jngóo dí nda̱wa̱á nirajxu̱u̱n bi̱ nimbájxu̱u̱ gajmíi̱n bi̱ itháan jiámáá bi̱ nitháán rí ikhaa nindoo maʼdxun (1 Rey. 12:​8-14). Rehoboam niʼdxawun consejo dí nixnáá ga̱jma̱a̱ numuu rígi̱ mbaʼin xa̱bu̱ nixujximíjna̱, asndu nákha mbiʼi rúʼko̱ Rehoboam nigiʼdoo wéñuuʼ xkujndu (1 Rey. 12:​16-19).

13. Ndiéjunʼ gúʼni mu mbuʼyáá á mu gajkhun nandulúʼ dí eʼwíinʼ muxnúlú consejo rá.

¹³ Ndiéjunʼ eʼsngúlú dí nigíʼnuu Rehoboam rá. Dí á mu nunda̱ʼa̱a̱ dí mbáa maxnúlú consejo gíʼmaa músngajmá dí gajkhun nandulúʼ dí makhánulúʼ consejo. Xóo muʼthá, xúraʼwíí wapháá dí mu̱ʼni̱. Guraximíjna̱: “Á mu na̱nda̱ʼa̱ consejo ga̱jma̱a̱ na̱nguá ethu̱nʼ dí ikhúún nandoʼ madxun, lá asndu xóo tádxawun gáni̱ ráʼ.” Gúʼgíʼ mbá xkri̱da.

14. Ndiéjunʼ dí ragíʼmaa mambumulú rá. Atagíʼ mbá xkri̱da (atayáá ma̱ngaa xtiʼkhuu).

¹⁴ Atatsaʼwáminaʼ dí mbáa ndxájulú nuxnáá mbá ñajunʼ náa madaaʼ májánʼ, mú mbaʼyóoʼ maniñún mba̱yu̱u̱ʼ bi̱ kúwá náa goʼwóo. Nákha xóó tséraʼwíí rí ma’ni, na̱ndo̱ʼo̱o̱ mbáa ndxájulú anciano rí maxnúu consejo, ndxájulú bugi̱ najmuu Biblia mu maʼni marmáʼáan ajkiu̱u̱n dí gíʼdoo numuu rí mambáñún bi̱ kúwá náa goʼwóo mu mambájxu̱u̱n gajmiún Jeobá (Efes. 6:4; 1 Tim. 5:8). Mú ndxájulú tsénigu̱u̱ʼ dí niʼthúu̱n anciano, ikha jngóo narajxuun eʼwíinʼ a̱ngiulú asndu índo̱ mbáa naʼthúu̱n dí gagruigú má ñajunʼ. Lá ndxájulú bugi̱ xtáa rayáʼ gajkhun mbá consejo ráʼ. O niraʼwíí má wapháá dí maʼni ga̱jma̱a̱ i̱ndó nindoo muthán dí májánʼ má dí niraʼwíí maʼni xáʼ. Xámbumulú dí ajkiulú mandoo maʼni nduwáanʼ (Jer. 17:9). Nguáná asndu tsíyulú gúʼdxuun consejo rí itháán ndayulú.

“LÁ GÍʼMAA MU̱ʼNI̱ XÓ MÁ ENI̱ EʼWÍINʼ RÁʼ.”

15. Ndiéjunʼ dí ragíʼmaa mu̱ʼni̱ ga̱jma̱a̱ náá numuu rá.

¹⁵ Jeobá nandoo dí mámbáa gáraʼwíí dí gáʼni (Gál. 6:​4, 5). Nijmañulú dí nákha xóó tséraʼwíí dí gúʼni, gíʼmaa mbuʼyáʼ consejo náa Biblia ga̱jma̱a̱ ma̱ndoo mundu̱ʼu̱u̱n consejo a̱ngiu̱lú bi̱ mba̱yu̱u̱ʼ má kúwá runi̱ ñajuunʼ Jeobá. Mú ragíʼmaa munda̱ʼa̱a̱ mbáa dí maʼthulú ndiéjunʼ gúʼni. Ni má xúrajxu̱u̱n bi̱ nambájxulú gajmiúlú: “Ndiéjunʼ gáni̱ ku̱ma̱a̱ʼ ján”. Ma̱ngaa ragíʼmaa mbuʼyaridáá dí eni̱ eʼwíinʼ á mu ikháanʼlú xóó tséndxaʼwamíjná májánʼ ga̱jma̱a̱ numuu rí gúʼni.

16. Ndiéjunʼ ndiyóoʼ muraʼwi̱i̱ muni̱ bi̱ corintios rá. (1 Corintios 8:7; 10:​25, 26.)

¹⁶ Cristianos bi̱ nikúwá náa congregación dí nirígá náa Corinto nákhá timbá siglo, mbáa ndiyóoʼ muraʼwi̱i̱ á mu mu̱phu̱ xuwiʼ dí nijuixnájxi̱ náa xándú. Pablo niʼthún rígi̱: “Nduʼyáá rí mbáa xándú nda̱a̱ rí nindxu̱u̱ náa numbaaʼ ga̱jma̱a̱ dí mbáwíí Dios xtáa” (1 Cor. 8:4). Mbáa ikha jngóo tikhuun má niraʼwi̱i̱ mu̱phu̱ maski ajndu nijuixnájxi̱ náa xándú, mú eʼwíinʼ niraʼwi̱i̱ dí xúphu mu xúʼko̱ xáʼni gawúunʼ ku̱ma̱ ndrígu̱ún (atraxnuu 1 Corintios 8:7; 10:​25, 26). Mámbáa má niraʼwíí dí maʼni. Pablo na̱nguá niʼthúún bi̱ corintios dí muthúún eʼwíinʼ dí gúni̱ ni má dí muni̱ xó má eni̱ eʼwíinʼ. Ikhaa niʼthúún: “Mámbáa dí ikháanʼla maxnájxi̱i̱ cuenta náa Dios” (Romanos 14:​10-12).

17. Ndiéjunʼ gárígá á mu i̱ndó nu̱ʼni̱ xó má eni̱ eʼwíinʼ rá. Atagíʼ mbá xkri̱da (atayáá ma̱ngaa xtiʼkhuu).

¹⁷ Lá dí mbiʼi xúgi̱ ma̱ndoo marigá xóo nirígá nákha wajyúuʼ ráʼ. Gundxaʼwamíjna̱ ga̱jma̱a̱ numuu dí nagájnuu náa eʼdi. Xúgiáanʼ gíʼmaa muraʼwíí á mu mundrígúlú o na̱nguá.e Mbáa naʼniulú gakhi̱i̱ makru̱ʼu̱lú ga̱jma̱a̱ numuu rígi̱, mú gíʼmaa mbuʼyáá ndiéjunʼ gúʼni̱ (Rom. 14:4). Á mu i̱ndó nuʼni xó má eni̱ eʼwíinʼ, nditháan má xájmañulúʼ gúraʼwíí májánʼ dí mu̱ʼni̱, mú majmañulú á mu najmulú Biblia mu muraʼwi̱i̱ mámbá dí gúʼnilú (Heb. 5:14). Á mu rígá mbá dí muraʼwíí mu̱ʼni̱, ginii gíʼmaa mbuʼyáʼ itháanʼ ga̱jma̱a̱ numuu rígi̱, ma̱ngaa guʼyáʼ consejo rí na̱ʼkha̱ náa Biblia. Á mu nda̱wa̱á dí ndiʼyáʼlú má mbuʼyáá, mú tákru̱ʼu̱lú ma̱ndoo munda̱ʼa̱a̱ consejo mbáa ndxájulú bi̱ nakroʼo̱o̱ ga̱jma̱a̱ numuu rígi̱.

XÚNIʼÑÁÁNʼ RUNDA̱ʼA̱ CONSEJO

18. Ndiéjunʼ eʼni Jeobá ga̱jma̱a̱ numulú rá.

¹⁸ Jeobá nasngájmulú rí naku̱mu̱u̱ kaʼyulú, ikha jngóo naniñuuʼ dí ikháanʼ má gúraʼwíí dí mu̱ʼni̱. Ikhaa nixnúlú Ajngá rawuunʼ ga̱jma̱a̱ a̱ngiu̱lú bi̱ ma̱ndoo mumbayulúʼ, mu mbuʼyáá xú káʼnii gándoo muʼnimbáníí consejo rí na̱ʼkha̱ náa Biblia. Xígi̱ kaʼnii Jeobá nañewu̱nlú ga̱jma̱a̱ nasngájma rí nandoo kaʼyulú (Prov. 3:​21-23). Xú káʼnii gándoo gúsngajmá dí nuxnáa núma̱aʼ Jeobá ga̱jma̱a̱ numuu xúgíʼ dí naxnúlú rá.

19. Ndiéjunʼ gúʼni mu maxtáa gagi Jeobá rá.

¹⁹ Xabuanii nadxún índo̱ nduyáá rí e̱jñu̱ún naguánú nanindxu̱ún xa̱bi̱i̱ Jeobá, ga̱jma̱a̱ dí nakru̱ʼu̱u̱n xóo gúnimbáníí consejo rí na̱ʼkha̱ náa Biblia ma̱ngaa rí mumbañún eʼwíinʼ. Anu̱lú Jeobá nadxuu índo̱ ndaʼyoo dí nuʼnimíjna mambájxulú itháán májánʼ gajmiúlú ma̱ngaa índo̱ nundu̱ʼu̱u̱n consejo eʼwíinʼ ga̱jma̱a̱ índo̱ nuraʼwíí mu̱ʼni̱ dí naxnúu gamajkhu.